الفنان مجدي الكفراوي

كنت قاعد في أمان الله بارسم وفي غاية الاستمتاع بالألوان والخيالات اللي عمّالة رايحة جاية في دماغي وكأنها أحد شوارع القاهرة المزدحمة لحد ما سمعت صوت جرس الباب بيرن بشكل هستيري... قلت: العيال ولاد الجيران مش هيبطلوا لعب... لكن شوية واتأكدت إنهم مش العيال لمّا فتحت الباب، ولقيت "عمر" صاحبي واقف قدامي وهو متغاظ وشكله مستحلف لي... قلت له:
- إهدا يا "عمر" واللي انكسر هيتصلح... يا راجل افتكرتك عيال الجيران بس الحمد لله طلعت أعيل...
كله وأنا باحاول أضحّكه...لكن هو أبدًا!... قلت له:
- خير يا سيدي فيه إيه؟...

قال لي:

- بتضحك عليّ يا فنان، وأنا اللي مِستأمنك على دماغي المتكلّفة وسايب لك إحساسي ومشاعري تلعب بيها يمكن أكون في يوم من الأيام واحد بيفهم ويحس كويس...

- إيه يا "عمر" اللي حصل لكل ده؟...

- إنت زمان يا فنان قلت لي إن لوحة الموناليزا للفنان "ليوناردو دافنشي" تمنها حوالي 100 مليون دولار..

- طيب يا "عمر" إيه يعني حد نصب عليك وباعها لك؟!...

- لأ يا فنان لقيتها عند "حازم" ابن خالتي لوحة كبيرة جدا وجميلة والتوقيع عليها...

أنا سمعت الكلام ده وكنت هاموت من الضحك... قام قال لي:

- بتضحك ليه؟..

قلت له:
- بص يا "عمر" أولا لوحة الموناليزا أو الجيوكندا الأصلية ملك لمتحف اللوفر وهو مش عارضها للبيع؛ لأنها لا تقدر بثمن، وبعدين اللوحة الأصلية مقاسها 77× 53 سم يعني مش كبيرة ولا حاجة ثانيا تفتكر إن "حازم" ابن خالتك يقدر يشتري الموناليزا؟!... اهدا يا "عمر" وادخل اعمل لنا اتنين شاي وتعال أحكي لك عن الاستنساخ...

- استنساخ إيه يا فنان؟....

- استنساخ اللوحات يا صاحبي دي حكاية طويلة وجميلة في نفس الوقت....
بعد ما "عمر" عمل لنا الشاي، ودخلنا المرسم بدأت أحكي له:
- عارف يا "عمر" ثلاثي الفنانين الأشهر في عصر النهضة "مايكل أنجلو"، "ليوناردو دافنشي"، و"رافايللو" أكبرهم طبعًا "ليوناردو دافنشي" وده عاش ما بين عامي 1452 - 1519 وهو اتولد قبل "مايكل أنجلو" بـ 23 عاما، وقبل "رافايللو" بـ 49 عاما ولوحة الموناليزا اللي عملها "ليوناردو" كانت مصدر لإلهام فنانين كتير جدا على مر التاريخ باعتبارها عمل إبداعي فذ، واللوحة دي اتقلدت كتير جدا، وأول واحد قلدها وعمل منها نسخ كان "رافايللو" لكن تعرف اللوحة دي ليه مهمة للدرجة دي؟...

- آه طبعًا علشان بتبص لك من أي زاوية...

- لأ مش بس كده يا صاحبي الحقيقة؛ لأن التقنية أو الأسلوب اللي رسمها بيها "ليوناردو" كان بمثابة ثورة في الوقت ده، كانت طريقة الرسم المتعارف عليها في الوقت ده كل الأشكال بتكون مرسومة بنفس الوضوح ومحددة بخطوط لكن "ليوناردو" رسم اللوحة دي بتقنية عالية جدا وعمل فيها عمق، وكمان دي أول بورتريه يترسم في الوقت ده، طبعًا بعد ما نستثني "وجوه الفيوم" اللي اترسمت في العصر الروماني في مصر...
لحظة واحدة يا "عمر" أشوف مين ع الباب.......

• إزاي أعمل معرض؟
• إزاي قاعات العرض الخاصة بتتعامل مع الفنانين؟
  
• قاعات العرض الخاصة
  
• عن قصر الفنون وصالون الجاليري
  
• عن الفنانة إنجي أفلاطون
  
• عن الفنانات المصريات
  
• أقدم الفنانات المصريات
  
• الفنانات في مصر
  
• الفن التشكيلي والسينما
  
• الفنان لازم يكون مثقف
  
• مفيش دكتوراه في الفن
  
• الرسم مهنة مكتسبة
  
• فنان بالفطرة
  
• الفرق بين الفنون جميلة والفنون التطبيقية
  
• الملابس والفن والتشكيلي
  
• الفن التشكيلي والمسرح
  
• المدرسة الانطباعية أو "التأثيرية"
  
• "الاسكتش"
  
• روائع فن الصور الشخصية "البورتريه"
  
• "فن البورتريه"
  
• محمود مختار رائد فن النحت
  
• النقطة الذهبية في اللوحة الفنية
  
• يعني إيه كلاسيكية، ويعني إيه تجريدية؟
  
• هي الأوبرا ناس بتجعجع وخلاص؟!
  
• النحت على الهوا!!!
  
• كهوف الإنسان البدائي وعلاقتها بالرسم!
  
• حكاية الفن التطبيقي الحلزوني!!
  
• الفن التشكيكي والبؤرة الكونية...!