الفنان مجدي الكفراوي

كنا في الجزء المخصص لمعرض قاعة إبداع وكان "عمر" مبسوط جدا من لوحة عبارة عن أربعة أجزاء رسم فيها الفنان الشاب "علاء أبو الحمد" أربعة أوضاع لموديل جالس بشكل انطباعي تأثيري أقرب للكلاسيكية منه للتجريد...

- حلوة قوي اللوحة دي يا فنان.. بس هو ليه راسم بنت واحدة أربع مرات؟...
شوف يا صاحبي الفنان هنا استعان بموديل...
- يعني إيه موديل؟...
يعني شخص حقيقي يقعد قدامه ويرسمه الفنان بشكل مباشر فـ"علاء" هنا عايز يوضح لنا جمال إنه يكرر الموديل في أوضاع جلوس مختلفة والمحصلة النهائية زي ما إنت شايف...
- جميل جدا طيب كمِّل كلامك، لو أنا باعرف أرسم وعايز

أعمل معرض أعمله إزاي...
أقولك يا سيدي بتصور الشغل بتاعك أو بتاخد لوحاتك نفسها في إيدك وبتروح لأي قاعة خاصة توريهم اللوحات وفي الحالة دي هيحصل حاجة من اتنين لو الشغل عجب المسئول عن القاعة وشاف إنه ممكن يتباع بسهولة هيعرضه لك وعادة لو القاعات من اللي بتتعامل بالنسبة -القاعات الكبيرة يعني- مش هتعرض لك لوحدك طبعًا لكن ممكن تعرض لك في معرض جماعي، أما لو الشغل ماعجبهمش فتاخد الشغل وتروح للقاعات اللي بتأجَّر المكان بشكل قِطعي ودول بيسمحوا لك بالإيجار لكن بشرط إن الشغل يكون مستواه كويس ما يقللش من قيمة القاعة...
- طيب عادةً الإيجار بيكون كام؟...
هو حسب القاعة والمكان، يعني مثلا في أتيليه القاهرة للكتاب والفنانين -وده في 2 ش "كريم الدولة" في ميدان "طلعت حرب" في وسط البلد- عندهم القاعة الكبيرة بـ 300 جنيه في الأسبوع والقاعة الصغيرة بـ 175 جنيه في الأسبوع لكن طبعًا لازم اللوحات تكون كويسة، وعندك كمان ساقية "الصاوي" إيجار القاعة في الأسبوع بحوالي 300 جنيه، أما لو مستوى الشغل مش كويس فيبقى الأحسن إن فنان يشوف الشغل ده ويحاول يوجّه اللي بيرسم إزاي الدنيا تكون مظبوطة...

- طيب.. ده بالنسبة للعرض، طيب الأسعار بقى عاملة إيه؟...
بص جنبك كده يا "عمر" دي أسعار الفنانين اللي إنت شايف شغلهم... شاورت لصاحبي على "قائمة الأسعار " كانت متعلقة على الجدران... راح "عمر" بص ورجع كان هيموت فيها...
- إيه ده يا فنان اللوحات غالية جدا!!...
رحت أتأكد هو شاف أسعار مين بالظبط لقيت حظه وِحِش شاف أسعار أكبر الفنانين قيمة وسنّا مثلا الفنان "عبد الوهاب مرسي" بـ 85 ألف جنيه والفنان "عادل السيوي" بنفس السعر، والفنان "آدم حنين" 250 ألف جنيه، وجيل الوسط بـ 65 و45 ألف جنيه، قال لي صاحبي:
- من بكره هابقى فنان وكبير كمان...
الواد اتجنن...........

• إزاي قاعات العرض الخاصة بتتعامل مع الفنانين؟
  
• قاعات العرض الخاصة
  
• عن قصر الفنون وصالون الجاليري
  
• عن الفنانة إنجي أفلاطون
  
• عن الفنانات المصريات
  
• أقدم الفنانات المصريات
  
• الفنانات في مصر
  
• الفن التشكيلي والسينما
  
• الفنان لازم يكون مثقف
  
• مفيش دكتوراه في الفن
  
• الرسم مهنة مكتسبة
  
• فنان بالفطرة
  
• الفرق بين الفنون جميلة والفنون التطبيقية
  
• الملابس والفن والتشكيلي
  
• الفن التشكيلي والمسرح
  
• المدرسة الانطباعية أو "التأثيرية"
  
• "الاسكتش"
  
• روائع فن الصور الشخصية "البورتريه"
  
• "فن البورتريه"
  
• محمود مختار رائد فن النحت
  
• النقطة الذهبية في اللوحة الفنية
  
• يعني إيه كلاسيكية، ويعني إيه تجريدية؟
  
• هي الأوبرا ناس بتجعجع وخلاص؟!
  
• النحت على الهوا!!!
  
• كهوف الإنسان البدائي وعلاقتها بالرسم!
  
• حكاية الفن التطبيقي الحلزوني!!
  
• الفن التشكيكي والبؤرة الكونية...!