الفنان مجدي الكفراوي

كلمني "عمر" صاحبي على التليفون...
- إيه يا فنان هنروح فين النهارده؟ وحياتك شوف لنا أي مكان بعيد عن قاعدة المرسم والبيت، ويا سلام لو مكان نقدر ناكل فيه حاجة...
مش عارف يا "عمر" إيه الفجعة اللي إنت فيها دي...
- أصلي اكتشفت يا صاحبي إن الواحد مابياخدش حاجة من الدنيا دي غير اللي بياكله.. فقررت إني آكل كل اللي أقدر عليه!!!...
يا سلام!! حكيم يا صاحبي.. طيب باقول لك إيه قابلني في الأوبرا...
- هناكل؟؟...
- لأ.. هافرجك على صالون جاليري...
- وبعدها تفرجني على مطبخ جاليري ماشي!...
ماشي يا خفيف...
- صحيح يا فنان إيه صالون جاليري ده؟...
قابلني في الأوبرا وأنا أقول لك...
- فين في الأوبرا؟...

قُدام قصر الفنون بعد ساعة..
وبعد ساعة بالظبط لقيت "عمر" صاحبي جاي بيتمخطر...
- حمدًا لله على سلامتك يا فنان.. إيه بقى صالون جاليري وإيه قصر الفنون؟...
بص يا صاحبي أنا قلت لك قبل كده إن الأوبرا فيها خمس قاعات عرض وهم: قاعة مركز الهناجر، وقاعة الفنون اللي جنب المسرح الصغير، وقاعة بالمكتبة الموسيقية اللي قدامك دي، وقاعة بنقابة الفنانين التشكيليين، وقصر الفنون اللي إحنا قدامه ده.. وقصر الفنون ده اتبنى مكان قاعة عرض قديمة كان اسمها قاعة النيل بأرض المعارض ده طبعاً قبل الأوبرا ما تتبني في الثمانينيات... المهم إن قصر الفنون هو أكبر وأهم قاعة عرض مجهزة على أحدث طراز، وهو عبارة عن دورين وفيه عدد من القاعات الكتيرة مفتوحة على بعض، وكمان فيه مكتبة مهمة للّي يحب يطّلع على كتب الفن وهي مفتوحة للناس كلها مجاني ده غير مكتبة للهدايا...
- المهم يا فنان فيه كافيتيريا؟...
طبعاً يا صاحبي فيه كافيتيريا بس الحمد لله بيعملوا لها صيانة دلوقتي!...

- يا خسارة.. طيب إيه صالون جاليري؟...
صالون جاليري ده معرض بيعمله قطاع الفنون التشكيلية كل سنة ودي السنة الثانية ليه... لكن الموضوع المهم هو إن كل قاعات العرض الخاصة الموجودة في مصر بتتقابل مع بعضها وبتعرض أهم اللوحات والتماثيل الموجودة عندها يعني يا صاحبي بدل ما آخدك وألفّ بيك على قاعات العرض اللي في مصر الجديدة، واللي في القاهرة الجديدة، واللي في الإسكندرية، واللي في الزمالك، أنا وفّرت عليك وجبتك هنا علشان كل القاعات موجودة هنا، وخلينا نقول حاجة مهمة جدّاً يا "عمر": إن فكرة جمع قاعات الفن التشكيلي في معرض واحد بدأت من حوالي أربع سنين، وبدأها الأستاذ "محمد الصاوي" في ساقية "الصاوي" في الزمالك، وهو أقام معرضين للقاعات الخاصة، وبعد كده تولّى المعرض ده وزارة الثقافة متمثلة في قطاع الفنون التشكيلية برئاسة الفنان "محسن شعلان"، ودي الدورة الثانية للصالون تحت رعاية قطاع الفنون اللي خصص أهم قاعاته وهو قصر الفنون لصالون جاليري...
- طيب يا فنان مش هندخل نتفرج ولا إيه؟...
ياللا بينا...

• عن الفنانة إنجي أفلاطون
  
  
• عن الفنانات المصريات
  
  
• أقدم الفنانات المصريات
  
  
• الفنانات في مصر
  
  
• الفن التشكيلي والسينما
  
  
• الفنان لازم يكون مثقف
  
  
• مفيش دكتوراه في الفن
  
  
• الرسم مهنة مكتسبة
  
  
• فنان بالفطرة
  
  
• الفرق بين الفنون جميلة والفنون التطبيقية
  
  
• الملابس والفن والتشكيلي
  
  
• الفن التشكيلي والمسرح
  
  
• المدرسة الانطباعية أو "التأثيرية"
  
  
• "الاسكتش"
  
  
• روائع فن الصور الشخصية "البورتريه"
  
  
• "فن البورتريه"
  
  
• محمود مختار رائد فن النحت
  
  
• النقطة الذهبية في اللوحة الفنية
  
  
• يعني إيه كلاسيكية، ويعني إيه تجريدية؟
  
  
• هي الأوبرا ناس بتجعجع وخلاص؟!
  
  
• النحت على الهوا!!!
  
  
• كهوف الإنسان البدائي وعلاقتها بالرسم!
  
  
• حكاية الفن التطبيقي الحلزوني!!
  
  
• الفن التشكيكي والبؤرة الكونية...!