الفنان مجدي الكفراوي

ايما كالى عياد

يا دوب خلّصت التليفون ورجعت لـ"عمر" صاحبي لقيته ماسك فرشة اللون والبالتيه بتاعتي وبيفكر يرسم... قلت له: إنت ناوي على إيه بالظبط؟... قال لي:
- ناوي أبقى فنان...
قلت له: بسيطة خليني أعلِّمك...
- ماشي يا فنان.. بس مش وقته.. خلينا نكمل كلامنا دلوقت على ما آخد القرار...
كنا فين يا "عمر"...
- كنا عند "فريدا كالو"..
آه.. بص يا صاحبي.. "فريدا كالو" دي فنانة مكسيكية، وهي كانت زوجة الفنان الكبير جدّاً وأهم فناني المكسيك "دييجو........
قاطعني عمر وقال:
- ...... ماردونا"؟..

كوكب يوسف العسال

قلت له:
لا يا ناصح "دييجو ريفيرا"، وأنا رأيي الشخصي إن عظمة وشهرة "فريدا كالو" مش في فنها لكن في سيرتها الذاتية.. كونها كانت زوجة لأهم فنان في المكسيك، وكمان الحادثة اللي أقعدتها فترة كبيرة من حياتها، وكمان استضافتها لـ"تروتسكي" قائد الجيش الأحمر في فترة نفيه... كل الظروف دي كانت أسباب في شهرة "فريدا كالو"...
- إنت بتسرح بيّ يا فنان!!.. قائد الجيش الأحمر اسمه "مانويل جوزيه" وقائد المدفعية "أبو تريكة"..
بتهزر يا "عمر" ولاّ بتتكلم جد؟...
- باتكلم جد طبعاً...
طيب اقرأ يا صاحبي علشان أنا هاكلمك عن الفن بس ما ليش دعوة بالسياسة علشان ما بفهمش فيها.. المهم يا صاحبي كان فيه فنانات كتير طبعًا في أوربا لكن ما أخدوش حظهم من الشهرة زي غيرهم من الفنانين...
- نرجع لمصر يا فنان.. مين أول فنانة في مصر؟

زينب عبد الحميد

الحقيقة يا صاحبي إنت متقدرش تقول بالضبط مين أول فنانة؛ علشان عندنا مشكلة كبيرة في عملية توثيق الفن في مصر، وتحديداُ الفنانات.. لكن أقدم اسم ذكرته مراجع الفن الموجودة كان لفنانة اسمها "نظيمة سليم"، ودي كانت مواليد 1898، لكن حتى تاريخ وفاتها مفيش حد يعرفه، لكن كان فيه بعدها فنانة اسمها "إيمي نمر" وهي من أسرة سورية، ووالدها هو اللي أسس جريدة المقطم، وهي اتعلمت الرسم في إنجلترا وفرنسا، و"إيمي نمر" مواليد 1902، وتوفيت 1962، لكن الفنانات اللي كانوا من أصل أجنبي فهم كالتالي: "إيمي كالي عياد" ودي زوجة فناننا الكبير "راغب عياد"، والفنانة "مارجوفيون"، والفنانة "فيسيلا فريد"، والفنانة "خواكينا كساسي شهدي"، وهي زوجة الفنان المصري الكبير "عباس شهدي" هم دول الفنانات اللي من أصل أجنبي، لكن كان لهم دور مهم في الفن المصري...

- طيب الفنانات المصريات أخبارهم إيه؟

جاذبية سرى

لأ.. عندنا فنانات كتير زي "زينب عبده"، و"عفت ناجي"، و"مارجريت نخلة"، و"إنجي أفلاطون"، و"تحية حليم"، و"جاذبية سرّي"، و"زينب السجيني"، و"عطيات السيد"، و"رباب نمر".....
- بس كفاية يا فنان مصدقك..
- كل دول فنانات؟!!...
ولسه كتير...
- طيب برّاحة عليّ واحكي لي مين أهم.. وليه مش معروفين كويس؟...
حاضر بس بشرط... عارف المطبخ؟؟
- آه يا فنان.. يعني فاكرُه طشاش...
طيب روح اعمل لنا شاي.....

• الفنانات في مصر
  
  
• الفن التشكيلي والسينما
  
  
• الفنان لازم يكون مثقف
  
  
• مفيش دكتوراه في الفن
  
  
• الرسم مهنة مكتسبة
  
  
• فنان بالفطرة
  
  
• الفرق بين الفنون جميلة والفنون التطبيقية
  
  
• الملابس والفن والتشكيلي
  
  
• الفن التشكيلي والمسرح
  
  
• المدرسة الانطباعية أو "التأثيرية"
  
  
• "الاسكتش"
  
  
• روائع فن الصور الشخصية "البورتريه"
  
  
• "فن البورتريه"
  
  
• محمود مختار رائد فن النحت
  
  
• النقطة الذهبية في اللوحة الفنية
  
  
• يعني إيه كلاسيكية، ويعني إيه تجريدية؟
  
  
• هي الأوبرا ناس بتجعجع وخلاص؟!
  
  
• النحت على الهوا!!!
  
  
• كهوف الإنسان البدائي وعلاقتها بالرسم!
  
  
• حكاية الفن التطبيقي الحلزوني!!
  
  
• الفن التشكيكي والبؤرة الكونية...!