الفنان مجدي الكفراوي

فسيلا فريد (م.باشتلي)

صباح الخير على الورد اللي فتّح في جناين مصر... ده كان صوت الشيخ "إمام عيسى" اللي قطعه صوت جرس الباب المزعج... يا ترى مين على الصبح... فتحت وطبعاً كلنا عارفين مين اللي كان على الباب... بالضبط.. "عمر" صاحبي...
خير يا سيدي.. مش عايز النهارده!!
زقّني بفضول شديد كأنه داخل يفتش البيت...
مش عايزين إيه بس يا فنان؟ إيه المقابلة اللي مش ولا بد دي؟... هاشرب شاي... ماتكترش السكر زي كل مرة وحياتك يا فنان...
فيه إيه يا "عمر"؟...
فيه إيه إزاي يعني يا فنان؟ لقيت نفسي فاضي قلت آجي نكمّل كلامنا..
آه يا صاحبي... كلامنا... إحنا كنا واقفين فين...
عند الفنانات ودورهم في الفن المصري...
طيب مسبِّل عينيك كده ليه؟!!
فنانات بقى وكده يعني يا فنان... إنت مش شايفني لابس إيه؟!!...

زينب السجيني

آه.. شيك قوي.. عموماً إحنا هنتكلم عنهم مش هنقابلهم...
يا خسارة!!!...
بص يا صاحبي.. إنت عارف طبعاً إن أول مدرسة للفنون الجميلة اتفتحت في مصر كانت سنة 1908 يعني من 100 سنة بالضبط.. ودي طبعاً فتره قصيرة لو بصّينا لدول أوربا اللي عمرهم الفني أكثر من 500 سنة، لكن المهم إن الدفعة الأولى من خريجي المدرسة ما كانش فيها طبعاً ولا فنانة... لأن إحنا طبعاً بنتكلم في سنة 1908، ولك أن تتصور وضع المجتمع في الفترة دي.. كان طبعاً مجتمع منغلق جدّاً إلا من قلة قليلة جدّاً من الأرمن والأجانب والطبقة الأرستقراطية، وده لأن تعليم الفن في الفترة دي كان بيستوجب إن اللي بيتعلم الرسم يلتحق بمرسم من مراسم الفنانين الأجانب الموجودين في مصر، وأكيد ده طبعاً كان مكلف جدّاً.. ناهيك عن مساحة الحرية اللي كانت صعبة جدّاً على وضع الأنثى في مجتمع شرقي إسلامي فقير... وعلشان كده لما بترجع لتاريخ الفن المصري وتدوّر على الفنانات هتلاقي إن كلهم يا إما أجانب عاشوا في مصر أو إن أحد الأبوين أجنبي أو من الأرمن، وكان أهم الفنانين اللي بيعملوا في الفترة دي "بيبي مارتان" و"شود ذريان" وهما أرمن طبعاً...

مرجريت نخلة

لكن يا فنان هو كان فيه فنانات في أوربا زمان؟..
قصدك فترة عصر النهضة والباروك؟..
أيوه بالضبط الفترة دي...
الحقيقة يا صاحبي إن كمان أوربا في الفترة دي كان وضع المرأة متحفظ يمكن أشد من تحفُّظ مجتمعنا في الفترة اللي بنتكلم عليها، وكمان كان الفن في أوربا في فترة النهضة والباروك أغلبه فن كنسي -ديني يعني- فكان صعب جدّاً يكون فيه فنانات...
طيب "فريدة كالو" دي تبقى مين؟...
آه.. إنت عرفت الاسم ده منين؟!!... إنت بتذاكر من ورايا يا "عمر"؟

كوكب يوسف العسال

لأ.. عيب يا فنان.. أنا شفت الفيلم بتاع "سلمى حايك"...
صحيح عموماً "فريدة كالو" دي تبقى.......
ورن جرس التليفون..
لحظة يا "عمر" أردّ على التليفون وأجيلك..

• الفن التشكيلي والسينما
  
  
• الفنان لازم يكون مثقف
  
  
• مفيش دكتوراه في الفن
  
  
• الرسم مهنة مكتسبة
  
  
• فنان بالفطرة
  
  
• الفرق بين الفنون جميلة والفنون التطبيقية
  
  
• الملابس والفن والتشكيلي
  
  
• الفن التشكيلي والمسرح
  
  
• المدرسة الانطباعية أو "التأثيرية"
  
  
• "الاسكتش"
  
  
• روائع فن الصور الشخصية "البورتريه"
  
  
• "فن البورتريه"
  
  
• محمود مختار رائد فن النحت
  
  
• النقطة الذهبية في اللوحة الفنية
  
  
• يعني إيه كلاسيكية، ويعني إيه تجريدية؟
  
  
• هي الأوبرا ناس بتجعجع وخلاص؟!
  
  
• النحت على الهوا!!!
  
  
• كهوف الإنسان البدائي وعلاقتها بالرسم!
  
  
• حكاية الفن التطبيقي الحلزوني!!
  
  
• الفن التشكيكي والبؤرة الكونية...!