الفنان مجدي الكفراوي

شفت في عين "عمر" صاحبي رغبة مصحوبة بطمع في أن يمارس الفن التشكيلي، خصوصًا أنه في الفترة الأخيرة كان مركّز معايا بشكل استثنائي في الفن والكلام عن الفن، رغم أننا أصدقاء من عشر سنين إلا أنه يظهر إنه خد باله مؤخرًا إن صديقه فنان تشكيلي... مش عارف الواد بيحبِّ ولا إيه... صحّاني صوت "عمر" من التفكير، وقال لي:

-إيه يا فنان.. فين الكِمالة؟

...كمالة إيه يا صاحبي؟!.. إنت فاكر نفسك في محل كشري؟!!

لأ يا فنان... كمالة حكاية الفنانين اللي ما دخلوش كليات فن....

بس يا سيدي.. الخلاصة اللي عايز أوصلها لك في الموضوع ده هي إن الفن زي ما قلت لك قبل كده موجود حواليك في كل حاجة، وفي كل مكان، وكل اللي عليك تعمله إنك تشوفه وتحس بيه أيًّا كان حجم المشاكل والزعل اللي جواك.. فبتلاقي الفنانين اللي مش خريجي أكاديميات حسّهم بيبقى مرتبط بفطرتهم السليمة، والفطرة السليمة دي مش عند الفنانين بس.. دي هبة من ربنا سبحانه وتعالى إداها لنا كلنا، وهي المرتبطة باختيارك لبِدَلك وكرفتاتك وإنت رايح الشغل كل يوم.. نفس الفطرة دي هي اللي بتخلي الفنان اللي مش دارس يعمل لوحات جميلة...

طيب مين تاني من فنانينا ما درسوش في أكاديميات...

كتير.. عندك زي ما قلت لك قبل كده "محمود سعيد" من الرواد كمان الفنان "محمد ناجي"، ومن الأجيال الموجودة دلوقت كتير.. عندك مثلاً الفنان "أحمد فؤاد سليم"، والفنان "وجيه وهبة"، والفنان "عادل السيوي"، والفنان "فريد فاضل".. كتير جدًّا...

- طيب يا فنان إيه موضوع الدكاترة في الفن ده؟
آه عندك حق لأن الموضوع بقى منتشر بس عايز أقول لك إن مفيش حاجة اسمها دكتوراه في الفن لكن فيه دكتوراه في فلسفة الفن، وبعدين خليك فاكر يا "عمر" إن عباقرة الفن في العالم ما سمعناش إن حد فيهم كان دكتور ولا حتى "تومرجي"...

آه صحيح... أنا ما سمعتش عن الدكتور "بيكاسو"، ولا الباشمهندس "فان جوخ".. أمال إيه اللي بيحصل عندنا ده؟!!...

والله مش عارف يا صاحبي بس هو تقريبًا حاجة ليها علاقة بالبرستيج... لكن أنا فاكر يا "عمر" فنان صاحبي كندي بعد ما أخد شهادة "الماستر" اللي بيسموها في مصر دكتوراه اتعين -ما شاء الله- مدرس إبتدائي رسم في إحدى المدارس الأجنبية هنا في مصر...
عقبال أملتك يا فنان!!..

• الرسم مهنة مكتسبة
  
  
• فنان بالفطرة
  
  
• الفرق بين الفنون جميلة والفنون التطبيقية
  
  
• الملابس والفن والتشكيلي
  
  
• الفن التشكيلي والمسرح
  
  
• المدرسة الانطباعية أو "التأثيرية"
  
  
• "الاسكتش"
  
  
• روائع فن الصور الشخصية "البورتريه"
  
  
• "فن البورتريه"
  
  
• محمود مختار رائد فن النحت
  
  
• النقطة الذهبية في اللوحة الفنية
  
  
• يعني إيه كلاسيكية، ويعني إيه تجريدية؟
  
  
• هي الأوبرا ناس بتجعجع وخلاص؟!
  
  
• النحت على الهوا!!!
  
  
• كهوف الإنسان البدائي وعلاقتها بالرسم!
  
  
• حكاية الفن التطبيقي الحلزوني!!
  
  
• الفن التشكيكي والبؤرة الكونية...!