الفنان مجدي الكفراوي

الدنيا أوضة كبيرة للانتظار...
فيها ابن آدم زيه زي الحمار!!
الهمّ واحد، والملل مشترك..
ومفيش حمار بيحاول الانتحار...
عجبي!!

دي طبعًا يا فنان رباعية "صلاح جاهين"...
إيه ده يا "عمر" أنت بتقرأ من ورايا؟!!...

- لا والله يا فنان.. بس ده "جاهين"..
أهو أنت عارف "صلاح جاهين" ده يا "عمر"؟...
ماله؟...
ده نموذج للمبدع الحقيقي... فنان بمعنى الكلمة.. أنت عارف طبعًا إن "جاهين" كان شاعر ورسام وممثل وكاتب، وكان نموذج بيأكِّد تكامل الفنون..

- يعني إيه يا فنان؟
يعني هو أهم نموذج للروح المبدعة بمعنى إن لمّا تبقى روح الإنسان منا مليانة بحاجات حلوة بيكون سهل عليه إنه يطلع الحاجات دي في عمل فني..

إنت عايز تقول: إن الفنون كلها موصّلة على بعضها؟...
طبعاً يا صديقي...

طب وحياتك يا فنان قبل ما تتكلم في الموضوع ده كنت عايز أفهم حاجة..
تفضل.

أنت قلت لي إن مش شرط إن الفنان يكون خريج كلية من كليات الفنون علشان يبقى فنان...
ده حقيقي..

ازاي يعني؟!
يعني أنت مثلاً راجل محاسب في بنك بتحب الفن وعايز تبقى فنان مثلاً..

هو ينفع يا فنان؟!
طبعًا ينفع طب هقول لك معلومة مهمة سمعت عن فنان عالمي اسمه "جوجان"؟
طبعًا سمعت عنه.

ده كان محاسب.
ياه!!

- لأ.. وبدأ يرسم وهو عنده 36 سنة...
معقول؟!!...

طبعاً.. المهم إنك علشان تبقى فنان مش لازم تروح كلية فن.. لأ ده أنت ممكن تتعلم أساسيات الرسم، وزي ما قلت لك إن الرسم مهنة مكتسبة.. ممكن تُعلَّم بالتمرين.. ممكن تبقى رسام كويس... لكن فيه فرق مهم جدًّا بين الرسام والفنان...

يعني إيه بقى؟ بتحيرني ليه يا فنان؟... إنت خايف أتعلم الرسم؟!!
- لأ يا صديقي.. بس خلّيني أوضّح لك إن الرسامين الموجودين في الميادين، واللي بيرسموا الناس في الشوارع دول رسامين شاطرين بيبقوا عارفين قواعد الرسم... نِسَب الوجه... وازاي يستخدموا الخامة اللي بيرسموا بيها، سواء كانت فحم أو زيت أو ألوان مائية وبيستعينوا دايماً بصورة الشخص اللي بيرسمه، أو بوجود الشخص نفسه قدامه... لكن بيكون صعب جدًّا عليه إنه يرسم لوحة من دماغه...
صعب إنه يعمل تكوين فني في خياله على عكس الفنان لازم يكون الأول رسام كويس، وبعدين يقدر يستغل مهاراته في الرسم في إنه يرسم من خياله، وتعلُّم الرسم زي ما قلت لك مش حاجة صعبة.
طبعًا إنت بس خليك جنبي وأنا بارسم... وعلى فكرة من فنانينا اللي مادرسوش فن في أكاديميات فناننا الكبير "محمود سعيد" ده خريج حقوق.. والحركة الفنية في مصر مليانة فنانيين كتير مش خريجي كليات فنون.

• فنان بالفطرة
  
  
• الفرق بين الفنون جميلة والفنون التطبيقية
  
  
• الملابس والفن والتشكيلي
  
  
• الفن التشكيلي والمسرح
  
  
• المدرسة الانطباعية أو "التأثيرية"
  
  
• "الاسكتش"
  
  
• روائع فن الصور الشخصية "البورتريه"
  
  
• "فن البورتريه"
  
  
• محمود مختار رائد فن النحت
  
  
• النقطة الذهبية في اللوحة الفنية
  
  
• يعني إيه كلاسيكية، ويعني إيه تجريدية؟
  
  
• هي الأوبرا ناس بتجعجع وخلاص؟!
  
  
• النحت على الهوا!!!
  
  
• كهوف الإنسان البدائي وعلاقتها بالرسم!
  
  
• حكاية الفن التطبيقي الحلزوني!!
  
  
• الفن التشكيكي والبؤرة الكونية...!