بص وطل>>> تفانين>>> جاليري

الفنان
مجدي الكفراوي

بص يا سيدي إحنا اتفقنا إن كليات الفنون في مصر هي الفنون الجميلة بفروعها في القاهرة والإسكندرية وكلية التربية الفنية وفنون تطبيقية، وكليات التربية النوعية، لكن خلينا نتفق بدايةً على أن الفن لا يُدرَّس...

يعني إيه يا فنان؟...
يعني كل الكليات دي بتدرِّس أساليب رسم، وتنفيذ وطرق تنفيذ أعمال فنية، وطرق التدريس بالنسبة للكليات التربوية... لكن الفن لا يدرس؛ بدليل إن فيه فنانين كتير خريجي كليات غير الكليات المتخصصة، وفيه فنانين فطريين..

يعني إيه فطريين؟
يعني ماتعلّموش أصلاً أو كان تعليمهم قليل... لكن بالفطرة عملوا فن... المهم خلينا في موضوعنا.. الكليات الفنية الدراسة فيها عبارة عن خمس سنوات، أول سنة بتُسمى إعدادي فنون، وفيها الطالب بياخد كل المواد الموجودة في الكليات؛ علشان يقدر يحدّد هو هيكمل في أي قسم، وأحيانًا توزيع الأقسام بيعتمد على المجموع اللي حصل عليه الطالب في أول سنة... نسيت أقول لك إن شرط الالتحاق بالكليات دي هو النجاح في اختبار قدرات الفنون في الثانوية العامة، زائد المجموع طبعًا...

لكن المواد والأقسام الموجودة في الكليات دي متشابهة جدًّا مع اختلاف صغير: وهو الأساس اللي اتعملت علشانه الكلية.. كلية التربية الفنية اتعملت علشان إعداد وتأهيل الخريجين للتدريس، فبتلاقي فيه مواد تربوية نظري كتير زي "طرق التدريس" و"علم النفس" و"أطفال غير أسوياء"... ده بالإضافة إلى أن في آخر سنتين في الكلية فيه مادة مهمة اسمها تربية عملي، وهو نزول الطلبة في مجموعات على المدارس؛ للتدريب على عملية التدريس، وده طبعًا مش موجود في فنون جميلة ولا فنون تطبيقية، كمان كلية التربية الفنية بتدرس كل المواد في الخمس سنوات، المواد الأساسية زي النحت والرسم والتصوير، والمواد الفرعية زي الأشغال الفنية "النسيج والنجارة والمعادن والخزف"، لكن كليات الفنون التطبيقية والفنون الجميلة بعد سنة الإعدادي بيكون التخصص في مادة واحدة، يعني قسم النحت بيدرس نحت بس، مع المواد النظري طبعًا، والتصوير يدرس تصوير بس، والتدريس في فنون جميلة بيكون مهتم أكتر بطريقة بناية الطالب وتعليمه الشكل الأكاديمي أولاً، أما كلية فنون تطبيقية فهي من اسمها معمولة أساسًا علشان تنفيذ الحاجات اللى إحنا بنستخدمها في حياتنا اليومية بشكل فني جميل، يعني مثلاً قسم طباعة المنسوجات يدرسوا فيه كل حاجة خاصة بالطباعة من تاريخها لحد التركيب الكيماوي للنسج وللألوان، وطبعًا مفيش فيها مواد تربوية.. يعني التدريس بيكون أكثر تخصصا في كليات فنون جميلة وفنون تطبيقية.