بص وطل>>> تفانين>>> جاليري

الفنان
مجدي الكفراوي

بعد ما خلّصنا الكلام عن المسرح، واتفرجنا على العرض... "عمر" كان مبسوط جدّاً، وبدا في حالة من الصمت مليان كلام وتفكير..
إيه يا عم "عمر" سرحان في إيه؟...

في الفن يا فنان... بس إيه يا فنان.. أنا دلوقت متلخبط في حاجة، وعايز أفهمها...
أؤمر يا باشا...

كنت عايز أعرف الفرق بين كليات الفنون... يعني أنا عارف إن كلية الفنون الجميلة في الزمالك بتطلّع فنانين، طيب كلية الفنون بتاعة جامعة القاهرة؟...

بص يا سيدي أولاً كلية الفنون اللي جنب جامعة القاهرة اسمها كلية الفنون التطبيقية، ودي تابعة لجامعة حلوان مش القاهرة... بس هي الحكاية بدأت إزاي؟...

ببساطة يا فنان علشان أفهم...
ماشي يا صاحبي زي ما أنت عارف إن أول مدرسة لتعليم الرسم كانت...

أيوه سنة 1908.

بالظبط وده كان أول شكل للتعليم الأكاديمي...

يعني إيه أكاديمي؟...

يعني تعليم أصول الرسم زي الموجود في الطبيعة بدون تحوير أو تلخيص... والبداية كانت مدرسة، وبعدين المدرسة دي انتقلت في شبرا، وبقت مدرسة عليا، وبعد كده انتقلت في الزمالك في مكانها الحالي في شارع "إسماعيل محمد" وبقت كلية... لكن الكلية دي ماكانتش بتوفّي بغرضها في عملية تدريس الفن في المدارس؛ لأن عدد المتخرجين فيها كان قليل جدّاً (26)، وماكانوش مؤهلين للتدريس، والمدارس كانت محتاجة مدرسين، فعملوا معهد يؤهل الخريجين للتدريس، وسموه معهد التربية الفنية، وده كان في المنيل، وبعدين بقى كلية التربية الفنية، وانتقل جنب كلية الفنون الجميلة في الزمالك في نفس الشارع، لكن كمان خريجي كلية التربية الفنية كان نسبة صغيرة منهم بيشتغل بالتدريس، ومع زيادة عدد السكان بالطبع زاد عدد المدارس، وتقريباً نصف خريجي كلية التربية الفنية كانوا بيشتغلوا في الفن، سيان كان نحت، تصوير، ديكور... فكان لازم يكون فيه كلية ثانية تسدّ العجز اللي حاصل في تدريس الرسم، فعملوا كليات التربية النوعية، وللعلم يا صديقي كل كليات الفنون الأساسية الموجودة في القاهرة تابعة لجامعة حلوان، لكن كليات التربية النوعية موجودة في كل الجامعات دلوقت...

وإيه بقى الكليات الأساسية دي؟...

فنون جميلة، وتربية فنية، وفنون تطبيقية.. هما دول الكليات الأساسية.. لكن الموجود دلوقت أربع كليات فنون جميلة الأولى بتاعة جامعة حلوان، والثانية في إسكندرية، والثالثة في المنيا، والأخيرة في الأقصر، أما كلية التربية الفنية ففيه منها اتنين: الأولى في الزمالك، والتانية في المنيا، أما الفنون التطبيقية فهي كلية واحدة لكن التربية النوعية موجودة في كل الجامعات... ده غير المعاهد الخاصة ومعهد السينما...

أيوه لكن برضه ما فهمتش الفرق في التدريس في الكليات دى إيه...

تعال أقول لك...