الفنان مجدي الكفراوي

آه لا مؤاخذة يا فنان كنا فين؟... آه كنا عند "الفوم"...

بس يا صاحبي كنت باحاول أوصّل لك إن الفوم من أهم الخامات اللي بيسهل تشكيلها، علشان كده كل مهندسي الديكور بيعتمدوا عليه، ده بالإضافة للخشب، والخيش، وعجاين الورق، بالإضافة للاستنسل...

تصميم لشخصية الأم الملكة تي في فيلم إخناتون

آه عارفُه بتاع الأشعة، قلت لي عليه لما كنا بنتكلم عن طباعة "الاستنسل"...

ما شاء الله عليك لسه صاحي، والاستنسل ده بيستخدم بدل الزجاج؛ لأنه شفاف، وممكن يستخدم في تغيير لون الجوّ سيان كان ليل أو نهار، وده من خلال ألوانه، وهو سهل التفريغ، أما الفوم فيمكن تشكيله "بالكتر" أو بالسلك الحراري، وده بيبقى عبارة عن سلك بتاع سخان أول ما بيسخن تقدر تحركه في الفوم ببساطة شديدة، كأنك بتقطّع جبنة بسكينة... لكن دائمًا أهم حاجة عند فناني الديكور اللي بيحملوا لقب "مهندس" هو عنصر السرعة، والخامات اللي بنتكلم عليها بتساعد في السرعة، وكمان في سهولة تحريك الديكور ونقله، وكمان عملية تخزينه، وطبعًا مهندس الديكور بيكون عنده فريق عمل بينفّذ الكلام ده بسرعة مذهلة...

تصميم لشخصية القائد (حور محب) في فيلم إخناتون

طيب يا فنان ده الديكور... فيه إيه تاني؟...

فيه كمان تصميم الملابس وتنفيذها، وهو موضوع كله فن تشكيلي من أول ما يبدأ الفنان في تصوير ورسم الملابس، وده بيسبقه إن الفنان يكون محدِّد العصر اللي فيه اللبس، ويشوف الناس في الزمن ده كانوا بيلبسوا ازاي، ويبدأ يرسم كل الشخوص، وبعدين يشوف الخامات الأقل سعرًا والأخف وزنًا، كل ده بيكون على حسب ظروف إنتاج العمل، ومدى استمراريته بمعنى أنه لو مسلسل طويل والممثلين محتاجين يغيّروا كتير، أو مسرحية مدة عرضها طويل يراعى أن اللبس لازم يعيش فترة كبيرة، ويستحمل الحركة، ونفس الشيء في الملابس بيكون فيه فريق بينفّذ الملابس كمان بسرعة، والملابس شاملة طبعًا الإكسسوارات، وهما الاتنين بيكونوا طبعًا في منتهى الصعوبة لما يكون العمل تاريخي؛ لأن الإكسسوارات هنا بتكون عبارة عن دروع وسيوف وحاجات من النوع ده...

تصميم لملابس شخصية عبده الحامولي في فيلم ألمظ وعبده الحامولي

طيب يا فنان هو تصميم الملابس ده قسم في فنون جميلة برضه...

عادة بيكون مصممو الملابس خريجي فنون جميلة أو معهد السينما ديكور، لكن الموضوع هنا بيبقى معتمد في الأول والآخر على الموهبة، ويمكن أشهر اللي عملوا تصميم وديكور كان الفنان الراحل "شادي عبد السلام"...

تصميم لملابس شخصية السلطان محمود في فيلم وا إسلاماه

وبعدين؟...

وبعدين إيه؟! تعال نتفرج على المسرحية.

• الفن التشكيلي والمسرح
  
  
• المدرسة الانطباعية أو "التأثيرية"
  
  
• "الاسكتش"
  
  
• روائع فن الصور الشخصية "البورتريه"
  
  
• "فن البورتريه"
  
  
• محمود مختار رائد فن النحت
  
  
• النقطة الذهبية في اللوحة الفنية
  
  
• يعني إيه كلاسيكية، ويعني إيه تجريدية؟
  
  
• هي الأوبرا ناس بتجعجع وخلاص؟!
  
  
• النحت على الهوا!!!
  
  
• كهوف الإنسان البدائي وعلاقتها بالرسم!
  
  
• حكاية الفن التطبيقي الحلزوني!!
  
  
• الفن التشكيكي والبؤرة الكونية...!