history موضوعات سابقة
send to friend .ارسل الموضوع لصديق
الفنان
مجدي الكفراوي

بعد الوقت الكتير اللي قضيناه أنا وصديقي "عمر" في متحف الفن الحديث خُفت على صاحبي إنه يكرهني ويكره الفن التشكيلي اللي باحاول أصالحه عليه، وكمان أنا عارف إن المتحف مش ممكن يتشاف كويس في يوم واحد:
آه يا "عمر".. مش كفاية كده النهارده علشان المتحف هيقفل....


مشهد يوضح تصميم الديكور والملابس من فيلم وا إسلاماه

ليه كدا يا فنان؟ مش هنكمل المتحف...
بعدين يا صديقي، بس تعال دلوقت نرُوح نشوف مكان تاني مليان فن تشكيلي بس أنت متخدش بالك منه...
إيه ده يا فنان؟...
المسرح يا صاحبي.
إيه يا فنان أنت بتسرح بيَّ ولاّ إيه بالضبط؟... إيه علاقة المسرح بالفن التشكيلي؟...
كنا بندردش أنا و"عمر" واحنا ماشيين من الأوبرا خارجين من متحف الفن الحديث في اتجاه مركز الهناجر اللي فيه قاعة عرض فن تشكيلي، وفيه كمان مسرح... المهم: دخلنا الهناجر، لكن المشكلة إن "عمر" صاحبي بص على يمينه أول ما دخل لقى كافيتريا، والحقيقة أنا لحد دلوقت مش عارف إيه العلاقة بينه وبين أي مكان فيه أكل أو شرب... شفت الغدر في عينه وهو بيقول لي:
ما تيجي يا فنان نقعد في الكافيتريا نشرب حاجة، وبالمرة نكمل كلامنا... ما هو مش معقول نتكلم واحنا بنتفرج على مسرحية ولاّ إيه يا فنان؟


نموذج رائع لتصميم الديكور الإسلامي لشادي عبد السلام في السينما المصرية

قلت له:
هي "كلمة حق يراد بها باطل"
قال لي:
بالضبط يا فنان زي جواز "عتريس" من "فؤادة".
ضحكنا، وكنت حريص في وسط الضحك إن هو اللي عليه الدور يعزمني، المهم: قعدنا وبدأنا نتكلم، قلت له:
المسرح بقى يا سيدي كله فن تشكيلي، عندك مثلاً الديكور، وده له قسم متخصص في كلية فنون جميلة، وفي معهد السينما، وهو عبارة عن عملية مركبة، ومدهشة في روعتها؛ لأن ديكور المسرح مش زي ديكور البيت، ده بيكون معمول بأقل الخامات، ولما الخامة بتقل بيزيد المجهود المبذول فيها، وده بينطبق على ديكور السينما والمسرح والتليفزيون، وعادة بيكون الفوم هو سيد الموقف في التشكيل؛ لأنه سهل التشكيل، وأرخص من الخشب...
إيه ده! باعتبار يعني إني عارف الفوم...


شادي أثناء العمل على قناع لشخصية إخناتون

آه الفوم ده الخامة البيضة اللي بتحفظ الأجهزة الكهربية الجديدة، بس بييجي على شكل كُتل كبيرة، وأحيانًا بيكون عبوات سايلة...
لو سمحت 2 شاي وساندوتش...
مش قلت لكم همّه على بطنه!!!..

 


الاسم
البلد
البريد الإلكتروني