بص وطل>>> تفانين>>> جاليري

الفنان
مجدي الكفراوي

أخدت "عُمر" صاحبي ورحنا نشوف لوحات الفنان الكبير/ "يوسف كامل" اللي هو بيعتبر أهم رواد - بلاش رائد علشان عُمر ما مايزعلش - الانطباعيين، وقف "عمر" قدام لوحات "يوسف كامل" وحسيت إنه ما انبسطش قوي..

وقال لي:
هي اللوحات دي مش خلصانة ولاّ إيه؟!

قلت له:
ليه؟؟

قال لي:
تحس إنها مش واضحة قوي.. هي دي الطباعية...
أولاً: اسمها الانطباعية أو "التأثيرية" والمدرسة دي ظهرت في فرنسا في معرض اتعمل سنة 1874 كان المعرض ده بيضم فنان كبير ومهم اسمه "كلود مونيه" وأصحابه، في المعرض ده كان فيه ناقد فرنسي اسمه "لوي ليروي" شاف لوحة لمونيه كان اسمها (انطباع شروق الشمس) ومن هنا جت كلمة انطباعية، وهما كانوا بيهتموا بتأثير ضوء الشمس على الأشياء؛ لأن في الوقت ده كان فيه نظريات جديدة في تحليل نور الشمس، لكن الفنان "يوسف كامل" ده ليه حكاية حلوة قوي: هو أولاً من أوائل خريجي مدرسة الفنون الجميلة اللي أنشأها الأمير "يوسف كمال" زي ما أنت عارف...

أيوه سنة 1908 في الجمالية...
ما شاء الله عليك حافظ.. المهم إن الفنان ده كان عايز يكمل دراسته في إيطاليا، فاتفق هو وصديقه الفنان الكبير "راغب عياد" إن واحد منهم يسافر والتاني يفضل يشتغل في مصر، ويتولى مصاريفه في إيطاليا، وسافر "يوسف كامل" الأول، وهناك قابل الزعيم "سعد زغلول"، وحكى له الحكاية، فقرر مجلس الشيوخ في الوقت ده إن الاتنين "يوسف كامل"، و"راغب عياد" يسافروا يكملوا بعثتهم على حساب الدولة...

حاجة عظيمة يا فنان.. لكن ليه الرسم مش واضح كده؟
لأ.. دي الطريقة اللي المدرسة دي عالجت بيها اللون، لكن اللي كان بيهمهم هو تحليل الضوء وأثره على الحاجات اللي شايفينها، وعلشان تشوف اللوحات دي كويس "بربش" عينيك شوية..
أيوه صحيح..
لما بتعمل كده بتلاقي عينيك جمعت الأشكال وبقى شكلها واضح شوية..
ده حقيقي.. وأنا عايز أقول لك إن الفنان "يوسف كامل" اللي اتولد سنة 1891 وتوفي سنة 1971 كان عميد كلية الفنون الجميلة وكان كمان مدير لمتحف الفن الحديث اللي احنا فيه دلوقت، بس طبعاً ما كانش مكانه هنا في الأوبرا.. ده بالنسبة لوظايفه، أما بالنسبة لشغله فبالتأكيد نور الشمس في مصر مختلف عنه في باريس، وعلشان كده أسلوبه كمان كان مختلف عن الانطباعيين بتوع باريس، فبتلاقي عنده النور أزهى، وكمان المواضيع اللي هو تناولها في لوحاته كلها عن الفلاحين وحيواناتهم والأحياء الشعبية.. فالموضوع مصري بالكامل والألوان تحس إنها بتاعتنا، علشان كده "يوسف كامل" بيعتبر رائد للانطباعيين المصريين...
تاني رائد...!!