بص وطل>>> تفانين>>> جاليري

الفنان
مجدي الكفراوي

فضلت أنا وصديقي "عمر" نمشي في المتحف واحنا في الدور الثاني... لكن صاحبي باعني أحلى بيع لما شاف مكتبة الهدايا اللي موجودة في المتحف، والحقيقة أنا عذرته لأن ركن الهدايا فيه كل الحاجات اللي قلتها لـ"عمر" في أول كلامنا، فيها تي شيرتات مطبوع عليها لوحات جميلة من مقتنيات المتحف، وفيها نفس اللوحات مطبوعة على كروت وبوسترات... اشترى "عمر" تي شيرت عليه لوحة للفنان "أحمد نور" وأخذ مجموعة من الكروت...

وقال لي.. حقيقي يا فنان، اللوحات لما بتبقى على التي شيرت بتبقى حاجة في منتهى الروعة... بس سيبك أنت... إيه بقى موضوع الاسكتش..

قلت له بص يا سيدي "الاسكتش" هو الرسم التحضيري للوحة الأصلية، بمعنى إن فيه فنانين كتير بيحبوا يعملوا رسم تمهيدي لللوحة اللي هيرسموها، سواء كانت "زيت أو إكريلك أو أي خامة تانية"... يعني الاسكتش بيبقى عبارة عن رسم مبدئي للعمل الفني وهو عادة بيكون بقلم رصاص أو فحم أياً كان المتاح، وبيبقى طبعاً على ورق لأنه صعب إنه يتعمل على "توال" أو "كانقس"...

استنى... يعني إيه "توال" والكلمة التانية دي...
"التوال" و"الكانقس" عبارة عن قماش بيتم معالجته بخامات تانية علشان يترسم عليه، وميزته إن عمره الافتراضي كبير عن الورق لكن الاسكتش بيبقى حاجة كده زي ما تقول "اصطياد لفكرة".. بمعنى إن لما الفنان بيجيله تصور للوحة ما فبيضطر يلجأ للرسم السريع على ورق وبعد كده يبدأ يهذب صياغته للاسكتش لما ييجي يرسم اللوحة...

آه، يعني زي ما تقول كده الخريطة بتاعة اللوحة..
حاجة زي كده، لكن المشكلة الحقيقة اللي بتواجه فنانين كتير هي إن الاسكتش بيكون -في أحيان كتيرة- أهم وأروع من اللوحة الأصلية... ليه؟ علشان الفنان لما بييجي يرسم الاسكتش بيحط فيه إحساسه الحقيقي بالعمل؛ فبيكون أكثر مصداقية؛ لأن عادة اللوحة بتعبر عن نفس الأحاسيس لكنها مهذبة بصرياً.. من الآخر بتكون اللوحة فيها افتعال عن الاسكتش؛ لأن أحاسيسك لما بتطلعها زي ما هي بصدق بتوصل بنفس الصدق.. وأنا عايز أقول لك إن فيه مدرسة في الفن اسمها الانطباعية، تحس إن اللوحات بتاعة الفنانيين دول زي الاسكتشات...

استنى عليّ يا فنان، إيه الانطباعية دي ومين أهم فنانينا فيها؟...
بما أننا في المتحف الحديث فدي فرصة أوريك رائد الانطباعية المصرية وبالمرة أقول لك حكايتها إيه..

والله مش عارف أنا في متحف ولاّ قسم شرطة! كل ما تقول لي رائد بقلق...!!
طيب تعال نشوف...