الفنان مجدي الكفراوي

أخذت "عمر" صاحبي وطلعنا الدور الثاني في متحف الفن الحديث علشان أفرجه على روائع فن الصور الشخصية "البورتريه" لأساتذتنا في هذا الفن وأول ما صادفنا من لوحات كانت الروائع اللي عملها الفنان الرائد "أحمد صبري"، إيه رأيك يا "عمر"... ماردتش عليّ... كان واقف قدام لوحة "السيدة والمروحة"..

حبيت أثير فضوله... قلت له... دي زوجته الفرنسية... ماردش عليّ... قلت له عارف الفنان ده فقد بصره ومات... رد عليّ أخيراً...
إيه يا عم اللي بتقوله ده...
قلت له "أحمد صبري" حكاية إنسانية مهمة جداً...
إحكِ لي...

تخيل يا "عمر" الراجل ده عاش طفولة قاسية جداً أبوه وأمه ماتوا وهو صغير جداً وبعدين أخذه جده ربّاه، لما جده مات أخده خاله، وهو اتولد في "الدرب الأحمر" سنة 1889... ورغم ظروف اليتم اللي عاشها وهو صغير والدنيا ماكانتش جميلة معاه وهو كبير... تخيل يا صاحبي في فترة من حياته ماكانش لاقي مكان يعيش فيه عرض عليه واحد من الأجانب اللي عايشين في مصر أوضة في مشتل في المنيل مقابل إنه ياخد منه كل شهر لوحة وفي الفترة دي كان عايش على أكل البطاطس بس... واشتغل رسام بقسم الحشرات بوزارة الزراعة وبعدين رسام بوزرة الأشغال العمومية اللي أرسلته بعثة لفرنسا وهناك رسم لوحته "الراهبة" وهي أشهر أعماله، كان نفسي أوريها لك لأن المفروض إن مكانها في المتحف ده، بس مفيش حد يعرف هي فين دلوقت...

يعني إيه...

يعني اللوحة مختفية... لكن المهم إنه أخد جائزة الشرف من جمعية الفنون الفرنسية على هذا العمل البديع ولما رجع مصر اشتغل مدرس رسم في مدرسة الفنون الجميلة... المهم يا "عمر" إن "أحمد صبري" ده من أوائل الفنانين المصريين اللي كانوا بارعين جداً في فن الصورة الشخصية، وزي ما أنت شايف الراجل كان متمكن من خاماته بشكل مذهل لدرجة إنه يخليك تحس بروح الناس اللي بيرسمهم...

مش بس كده يا فنان، شايف التفاصيل اللي في القماش رغم إنها شكلها من قريب مش مرسومة كويس لكن واضحة جداً...

أهو ده اللي اسمه "تأثيري" وهو بيرسم بشكل واقعي زي اللي موجود في الطبيعة لكن بلمسات صغيرة يوضح أثر النور على الأشياء وده واضح جداً في لوحته بعد القراءة.

ومن أهم لوحات "أحمد صبري" اللوحة اللي رسمها للفنان "حسين بيكار" وهو بيعزف على العود وكمان اللوحة اللي رسمها للأديب الكبير "توفيق الحكيم" ودي رسمها بسرعة شديدة على طريقة رسم الاسكيتش....

استنى عندك، يعني إيه اسكيتش وإيه أهميته في الموضوع ده...

أقول لك يا سيدي يعني إيه اسكيتش.

• "فن البورتريه"
  
  
• محمود مختار رائد فن النحت
  
  
• النقطة الذهبية في اللوحة الفنية
  
  
• يعني إيه كلاسيكية، ويعني إيه تجريدية؟
  
  
• هي الأوبرا ناس بتجعجع وخلاص؟!
  
  
• النحت على الهوا!!!
  
  
• كهوف الإنسان البدائي وعلاقتها بالرسم!
  
  
• حكاية الفن التطبيقي الحلزوني!!
  
  
• الفن التشكيكي والبؤرة الكونية...!