الفنان مجدي الكفراوي

كنت مستمتع جدا أنا وصديقي "عمر" واحنا بنتمشى في متحف الفن المصري الحديث وسط أروع مجموعة لوحات ممكن تكون موجودة في مكان واحد، شغل كل الأجيال حوالينا... لكن اللي زاد من استمتاعي واستغرابي في نفس الوقت هو تصوري أن "عمر" صاحبي بحكم إنه محاسب والفن بالنسبة له حاجة صعبة جداً هيقف قدام اللوحات الكلاسيكية أو المرسومة بشكل مفهوم، لكن كان برضه بيقف قدام لوحات "تجريدية" مش مفهومة بالنسبة له، وده اللي بيأكِّد لي إن الفن التشكيلي لغة عالمية مالهاش علاقة بالفهم، وإن المتعة رد فعل لأحاسيسنا كبشر على اللون وتوزيعه في اللوحة...

قال لي "عمر": طيب يا فنان بما إننا في المتحف، مين أهم فنانينا في موضوع الوشوش واللي هي اللوحات اللي كانت بتتعلق في البيوت زمان ودلوقت؟
قلت له: "قصدك فن "البورتريه"؟

قال لي: أيوه بالظبط...
قلت له: بص يا سيدي ده موضوع مهم جداً، خليني أحكِ لك عنه شوية... فن البورتريه ده بدأ من بدري جدا، من آلاف السنين اكتشفوا مجموعة بورتريهات سموها "وجوه الفيوم" كانت مرسومة من عصر البطالمة... والمعروف إنه خلال العصر المسيحي بعد سنة أربعين ميلادية كانت الطقوس الدينية في مصر بتلزم الأقباط بدفن صورة وجوه الموتى معهم، لكن الصور دي كانت كلها -سيان كانت مرسومة أو منحوتة- مرتبطة بالطقس العقائدي ساعتها.. بعد كده بدأ الموضوع ينتشر على استحياء في العالم كله وكان معروف في الإمبراطورية الإسلامية كمان ومتاحف العالم مليانة بصور شخصية لأباطرة الهند المسلمين، وسلاطين إيران، لكن موضوع البورتريهات انتشر فجأة على نطاق واسع في عصر النهضة الأوربية في بداية القرن الـ14 وبقى من أسس فن الرسم والتلوين ويمكن أبرز مثال لفن البورتريه اللوحة الشهيرة "الموناليزا"...
بتاعت "كاظم الساهر"...
لأ، بتاعت "ليوناردو"...
آه بتاع النينجا تيرتلز...

أيوه بالظبط، طيب أنت عارف إن أسماء سلاحف النينجا فعلاً على أسماء فناني عصر النهضة "مايكل أنجلو، ليوناردو دافنشي، رافائييل، دوانتيلوا"، بس أنا قصدي "ليوناردو دافنشي"، وفضلت أهمية البورتريه في ازدياد لحد نهاية القرن الـ19 ثم بدأ يفقد أهميته بسبب ظهور آلة التصوير الفوتوغرافي– الكاميرا، وفي مصر لما جت الحملة الفرنسية سنة 1798 كان معاها مجموعة من الرسامين اللي كانوا بيسجلوا اللي بيحصل للحملة ودول أول فنانين رسموا بورتريه في العصر الحديث..

ولما جِه "محمد علي" باشا وحكم مصر سنة 1805 جاب فنانين من أوربا علشان يرسموا صور شخصية له ولأفراد أسرته، بعد كده ولاده جابوا رسامين من إيطاليا وفرنسا لأداء نفس المهمة.. الفنانين دول استقر معظمهم في مصر وبدأوا يرسموا الأثرياء في الوقت ده، وبدأوا كمان يعلِّموا المصريين رسم البورتريه، وهم الفنانين اللي قامت عليهم مدرسة الفنون الجميلة اللي أوحى واحد من الفنانين دول للأمير "يوسف كمال" بإنشائها 1908 واللي كان ناظرها فنان فرنسي اسمه "لابلان"، وبدأت المدرسة تخرّج أجيال من الفنانين في فن البورتريه...
زي مين كده؟
زي "محمد حسني" و"أحمد صبري"
طيب فين أعمالهم هنا؟
تعال أوريك.

• محمود مختار رائد فن النحت
  
  
• النقطة الذهبية في اللوحة الفنية
  
  
• يعني إيه كلاسيكية، ويعني إيه تجريدية؟
  
  
• هي الأوبرا ناس بتجعجع وخلاص؟!
  
  
• النحت على الهوا!!!
  
  
• كهوف الإنسان البدائي وعلاقتها بالرسم!
  
  
• حكاية الفن التطبيقي الحلزوني!!
  
  
• الفن التشكيكي والبؤرة الكونية...!