بص وطل>>> تفانين>>> جاليري

الفنان
مجدي الكفراوي

يا دوب خلصنا الكلام عن لوحة "المدينة" للفنان الرائد "محمود سعيد" ولقيت صاحبي بيقول لي...

شايف التمثال الجميل ده... ده تمثال عروس النيل اللي عامله الفنان المعروف طبعاً "محمود مختار" وده عمله سنة 1929 من خامة البرونز وده نحته في خامة البرونز الصلبة....

إيه ده يا عمر عرفت منين...

منين إيه يا فنان إنت بتعرف ترسم بس... ما بتعرفش تقرأ... مكتوب تحت التمثال...

قلت له مش ممكن يكون مكتوب تحت التمثال انه اتنحت في خامة البرونز الصلبة..

ليه يا فنان...

علشان يا صاحبي لو إنت فاكر لما اتكلمنا عن النحت قبل كده قلنا إن المعادن اللي ممكن إذابتها زي النحاس والدهب والبرونز والحديد بأنواعه بيبقى صب... يعني النحات بيعمل التمثال الأول من الطين وبعد كده بيعمل ليه قالب من الجبس وبعدين يصب أي خامة معدنية ممكن إذابتها في النسخة السالبة بتاعت الجبس فيطلع التمثال الموجب من المعدن وده بيكون في مسابك بدرجات حرارة عالية جداً عموماً هنتكلم عن الموضوع ده بعدين لما نروح متحف "محمود مختار"... لكن بقى اللي ماتعرفهوش عن "محمود مختار إنه الرائد الأول لفن النحت المصري الحديث وهو اتولد في قرية من مدينة المحلة الكبرى اسمها "طمباره" ده سنة 1891 وأول دفعة مدرسة الفنون الجميلة اللي أنشأها الأمير "يوسف كامل" سنة 1908 في الجمالية وفيها تتلمذ على يد فنان فرنسي اسمه "جيوم لابرني" وبعد "مختار" ما خلّص دراسته في مدرسة الفنون الجميلة سافر عام 1911 لفرنسا وتتلمذ على يد كل من "كوتان" و "مرسييه"، ودول نحاتين فرنسيين، وفي سنة 1920 حصل "مختار" على شهادة الشرف من معرض الفنانين الفرنسيين على نموذج تمثال نهضة مصر اللي هو أشهر أعماله دلوقت وتم تكبيره طبعاً علشان ينفع ويبقى عمل ميداني...

آه عارفه طبعاً.. ده اللي قدام جنينة الحيوانات لامؤاخذة...
ونهضة مصر تم تكبيره بدعم حكومي وشعبي وسياسي واسع جداً باعتبار التمثال رمز لثورة 1919... و"مختار" له أعمال كتير مهمة هنشوفها في المتحف الخاص به... لكن قول لي يا "عمر" إيه أول إحساس وصل لك لما شفت تمثال عروس النيل...

مش عارف بس حسيت إنه زي ما يكون فرعوني... زي التماثيل بتاعة الفراعنة... وكمان التكوين الهرمي اللي إنت لسه قايل عليه...

ده حقيقي جداً لأن الفنانين في أوربا في عصر النهضة لما بدأوا يتحركوا في اتجاه نهضتهم كانوا بيرجعوا لأصول فنهم في الفن اليوناني والروماني... "مختار" عمل نفس الشيء.. كمِّل بناية شغله بشكل مصري جداً ومن جذور فن أجداده الفراعنة وكأنه امتداد حقيقي ليهم... لكن ماقلِّدش حد من فنانين أوربا وبالشكل ده عمل شكل خاص للنحت المصري الحديت وده "محمود مختار" العبقري اللي هنتكلم عنه باستفاضة بس بعدين.