بص وطل>>> تفانين>>> جاليري

الفنان
مجدي الكفراوي

حمدت ربنا إن الساعة جت خمسة لأن "عمر" اللي كنت فاكره صاحبي كان ناقص ياكُلني.. تصوروا يا مؤمنين أكل كل حاجة في الكافيتريا... إيه يا "عمر" إنت مابتاكُلش في بيتكم يا أخي!..

لأ يا فنان بس الفن فتح نفسي...

طب يلاّ بينا قبل ما يتخرب بيتي...!! أخدت صديقي ودخلنا "متحف الفن الحديث" وأول ما دخلنا وقفنا في البهو اللي على شكل دايرة وبابُص لصاحبي لقيته واقف متنّح.. يا صديقي أكيد الأكل كتم على نفسك...
أكل إيه!... الله... ازاي يكون فيه حاجة زي كده في مصر وماحدش يقول لي؟...
معلش... الناس أصلاً عندها حساسية من دخول الأوبرا فاتكسفوا يقولوا لك...

إيه يا فنان اللوحة دي؟ أنا باشوفها كتير احك لي؟
كان "عمر" صديقي.. قصدي اللي كان صديقي بيتكلم على لوحة كبيرة جداً مقاسها 3.50م× 198سم للفنان الكبير "محمود سعيد"، واللوحة من أشهر أعماله واسمها "المدينة" وأحياناً بيسموها "بنات بحري"، وبدأت أشرح له إن دي أشهر لوحات الفنان السكندري "محمود سعيد" اللي عاش من 1897 إلى عام 1964 وهو من جيل الرواد الأوائل، وإنه كان مستشار محكمة ودرس الفن في مراسم الفنانين الأجانب اللي كانوا موجودين في الوقت ده في إسكندرية لأن ماكانش فيه مدارس لتعليم الرسم في مصر علشان زي ما أنت عارف إن أول مدرسة للفنون الجميلة في مصر كانت سنة 1908...

لا والله ما أعرف..!!
اللوحة دي اترسمت سنة 1937 وهي مرسومة بخامة الزيت على توال "قماش".. عارف يا "عمر" اللوحة دي فيها خدعة كبيرة جداً زي ما أنت شايف الجو كله، تحس إنه في إسكندرية...

أيوه طبعاً... بنات بحري.. والمراكب الشراعية والبحر...
لكن بص يا صديقي في عمق اللوحة...

أيوه دي قلعة قايتباي...
أنا فضلت سنين فاكر كده... لحد ما أخذت بالي إن دي مش قلعة قايتباي... دي قلعة صلاح الدين في القلعة... لأن قلعة قايتباي مفيهاش جامع....

أيوه صحيح...
لكن "محمود سعيد" في اللوحة دي حب يجمع أبطال لوحاته في لوحة واحدة... بنات بحري... بيّاع العرقسوس... راكب الحمار مع ابنه... حاملة الجرة، والمقرئ جنب الجدار، والمراكبية، والملامح المعمارية لبيوت رشيد في الوقت ده، وهو رسم كل الخليط ده فيما يشبه "الكولاج" المحكم، بس هو راعى تكبير الشخوص الأمامية والتصغير التدريجي للعناصر في الخلف علشان يحسِّسنا بالعمق في اللوحة، وكأن كل الناس الموجودين في اللوحة كانوا مع بعض في نفس الوقت وده مش حقيقي... لكن تجمُّع الشخوص في اللوحة دي بيعبّر بيها عن تجمع مصر الحقيقية متمثلة في ولاد البلد والعامة في الوقت ده... أما بناية وتكوين اللوحة بصريا فدي حاجة عبقرية تانية...

أيوه جينا للكلام الغريب يا فنان... بالراحة بالراحة...
أنا قصدي ازاي أنت بتقدر تشوف لوحة زي دي وعينك بتقدر تتحرك عليها بشكل لا إرادي بالنسبة لك وتستمتع بيها...

أيوه... ازاي...

فيه نقط في اللوحة بيسموها النقط الذهبية يعني أنسب مكان في اللوحة تقدر تحط فيه شخص وعينك تبقى مستريحة، ودي دايماً بتبقى في مساحة الثلث والثلثين، أو لما يبقى فيه تكوين هرمي مثلث، وده متوفر في اللوحة دي، هتلاقي الثلث على اليمين بيّاع العرقسوس والثلث على الشمال فيه الراجل على الحمار والثلث من فوق فيه بنات بحري والثلاثة عاملين التكوين الهرمي، ورادد على مثلث مقلوب في بنات بحري، أما توزيع الألوان فهسيبه لعينك... وضميرك.