الفنان مجدي الكفراوي

كنت في غاية السعادة وأنا شايف "عمر" صاحبي والفرحة اللي غرقانة في الدهشة مرسومة على وشّه، قلت في سري الواد ده بيحس من ورايا ولاّ إيه! يبقى أكيد حكاية "مِس سعاد" بتاعة الرسم كانت صحيحة.. كل الدهشة دي واحنا لسه مادخلناش المتحف... أمّال لما ندخل هيعمل إيه... طيب يلاّ يا "عمر" ندخل المتحف..

استنى بس يا فنان إيه ده؟

ده يا سيدي تمثال للفنان الراحل "صلاح عبد الكريم" والتمثال عبارة عن قطع من الخردة مُجمّعة باللحام على شكل حيوان..

مين "صلاح عبد الكريم" والفن ده اسمه إيه؟

بص يا سيدي "صلاح عبد الكريم" من فنانينا البارزين، متنوع الجوانب، كان مهندس ديكور لكنه احتل مكانة رفيعة في فن التمثال، وهو من أوئل الفنانين اللي تعاملوا مع خامة الحديد في منحوتاته، والفن ده كان اسمه الفن الجاهز" Art trove" وهي الحاجات اللي ممكن نلاقيها متشكِّلة جاهزة بفعل الطبيعة، و"صلاح عبد الكريم" عاش في الفترة من 1925- 1988، خلي بالك يا "عمر" احنا لسه مادخلناش المتحف...
رحنا نقطع لـ"عمر" تذكرة من اللي هي بجنيه واحد.. سعر رمزي للمصريين.. قالوا لنا إن المتحف هيقفل الفترة الصباحية بعد نصف ساعة فلازم ننتظر الفترة المسائية من 5: 9... عاجبك كده يا سي "عمر"... اتأخرنا، تعال بقى أعزمك على حاجة تشربها...

أيوه يا فنان، وفرصة اتفرج على باقي المنحوتات اللي موجودة في الممرات...

أخدت "عمر" ورحنا على الكافيتريا الموجودة في مبنى المجلس الأعلى للثقافة... طلبنا قهوة وكل ده وصاحبي ساكت تماماً وأنا باتابع عينه رايحة فين... كانت عينه المرة دي على تمثال تجريدي موجود بجوار الكافيتريا.. كان العمل لأحد الفنانين الأجانب اللي شاركوا في "سمبوزيوم" النحت الدولي اللي بيتعمل كل سنة في مدينة أسوان..
سألني "عمر" يعني إيه سمبوزيوم؟ قلت له إن ده ملتقى دولي للنحت بييجي فيه "نحاتين" من كل دول العالم ويجتمعوا "الفنانين المصريين والأجانب" فيما يشبه ورشة عمل علشان يتبادلوا الأفكار، وكل واحد بينحت العمل الخاص به.. وده من أهم فرص التواصل بين النّحات المصري والنحاتين في العالم كله... وأنا باكمِّل كلامي كان "عمر" مركِّز في اتجاه تاني.. كان فيه تمثال لأمير الشعراء "أحمد شوقي" موجود قدّام مكتبة المجلس الأعلى للثقافة وهو من التماثيل الكلاسيكية... بس قول لي يا "عمر" يعني شايفك معجب بالأعمال الكلاسيكية والتجريدية بنفس الشكل....

وحياتك يا فنان بلاش الكلام ده، أنا لا عارف يعني إيه كلاسيكية ولا تجريدية بس الحاجات دي حلوة جداً عن قرب؛ فاعتبرني "مواطن صالح" وقول لي بالراحة كده.. يعني إيه كلاسيكية، ويعني إيه تجريدية؟

ما هو علشان أنت مواطن صالح أنا جبتك هنا ومُصِّر إننا ندخل المتحف علشان بعد كده لما أكلمك عن المدارس الفنية نبقى بنتكلم عن حاجة أنت شفتها.. تأكل حاجة يا عمر...
فين؟
هنا...
أكل وشرب وفن ومزيكا وأوبرا قول لي يا فنان هو أنا ممكن آجي هنا أنا وخطيبتي...
طبعاً بس مين فيهم "هند" ولاّ "سلمى"
ويعدين يا فنان...
وضحكنا

• هي الأوبرا ناس بتجعجع وخلاص؟!
  
  
• النحت على الهوا!!!
  
  
• كهوف الإنسان البدائي وعلاقتها بالرسم!
  
  
• حكاية الفن التطبيقي الحلزوني!!
  
  
• الفن التشكيكي والبؤرة الكونية...!