بص وطل>>> تفانين>>> جاليري

الفنان
مجدي الكفراوي

انتظار.... انتظار.... انتظار، ساعة كاملة منتظر فيها صديقي "عمر" بيه... وأخيراً وصل وبابتسامة عريضة قال لي:

أيوه يا فنان أنا اتأخرت عليك...

رديت عليه بكل عصبية: تعرف إنك شبه ليل الشتاء جداً، قال لي:

وماله ليل الشتاء...

قلت له: طويل وبارد يا أخي.. ضحك وضحكت وكملت وأنا أقفل الباب ورايا يلاّ بينا....

قال: على فين؟... عايزين نلحق الأوبرا..

لأ بالراحة عليّ يا فنان، أوبرا بالنهار وأنا كمان لابس كاجوال كده!

يا ابني احنا مش رايحين نحضر عرض أوبرا، احنا رايحين لحاجة ثانية خالص..

والله أنا معلوماتي عن الأوبرا إن الناس تبقى لابسة لبس منشّي زي اللي عندي في البنك، ويروحوا يسمعوا حاجات غريبة زي الفن التشكيلي بتاعك.

عظيم، تعال بقى علشان نصحح معلوماتك... وبعد ساعة ثانية في زحام القاهرة الجميلة وصلنا لدار الأوبرا وكان "عمر" طول الطريق بيتعذب بمحاضرة مني... يا ابني دار الأوبرا دي مش بس فيها المسرح الكبير اللي بيتقام عليه الحفلات بس.. لأ دي فيها المكتبة الموسيقية ودي تقدر بجنيه واحد تسمع كل المزيكا الكلاسيك اللي أنت عايزها، وفيها قصر الفنون وده عبارة عن قاعة عرض فن تشكيلي على مستوى عالمي، وفيها نقابة الفنانين التشكيليين وفيها المجلس الأعلى للثقافة وصندوق التنمية الثقافية، وفيها مركز الإبداع وقاعة عرض فن تشكيلي على أعلى مستوى، وفيها كمان متحف الفن المصري الحديث، وده المتحف الوحيد اللي جامع كل فنانين مصر التشكيليين الرواد والشباب بكل اتجاهاتهم الفنية... يعني الأوبرا دي لوحدها فيها سبع قاعات عرض تشكيلية، واحدة في النقابة وقصر الفنون وقاعة في المكتبة الموسيقية وقاعة بجوار المسرح الكبير وقاعة في الهناجر وقاعتان في متحف الفن المصري الحديث.

ياه... كل ده وأنا اللي كنت فاهم إن الأوبرا بتاعة ناس بتجعجع وخلاص..

علشان كده أنا جبتك الأوبرا علشان تشوف أكبر تجمع فني ممكن تشوفه في أي مكان مش هتلاقيه غير في الأوبرا...

طيب يا فنان أنا خايف أدخل...

لأ قول بسم الله كده وادخل برجلك اليمين.. ولما دخلنا الأوبرا وقف صاحبي يتفرج على التماثيل اللي موجودة في الهواء الطلق، تمثال للفنان "محمد عبد الوهاب"، وتمثال لـ"أم كلثوم" من أعمال النحات "طارق الكومي"، وهما عملان في غاية الروعة والكلاسيكية قال لي صاحبي:

ياه دول زي ما يكونوا بجد، والفنان ده مصري يا فنان؟...

طبعاً مصري وهو كمان من جيل الشباب وهو... "عمر"... "عمر"... أنت رحت فين... بابص لقيته واقف زي المسحور قدام تمثال "الغريبة"، إنه تمثال تجريدي من أهم و أروع ما نحت الفنان الكبير "محمد رزق" وهو عبارة عن رجل جالس يعزف على الربابة... إيه يا صاحبي رحت فين...

عارف يا فنان رغم إن التمثال ملامحه مش واضحة بس أنا حسّيت إنه شاددني جداً..

الله... الله ده كويس إنك بدأت تحس....