الفنان مجدي الكفراوي

على عذوبة صوت "فيروز" وضعت ألواني على "باليت" اللون وبدأت أرسم على إحدى اللوحات البيضاء... ما أصعب البداية... كنت في منتهى النشوة والحيرة إلى أن باغتني صوت "عمر" من خلفي:

الله يا فنان، جميل طقس الرسم والجو اللي إنت عامله ده... يا أخي كان نفسي أطلع رسام.. طيب إيه مش هنكمل كلامنا ولاّ هاعطلك عن الشغل...؟!

- لا أبداً يا "عمر" مش هتعطلني ولا حاجة خلينا نكمل كلامنا كنا فين...

كنا عند النحت والجرافيك...

بص يا سيدي، الجرافيك ده تقدر تعتبره زي الرسم بالضبط بس مش بطريقة مباشرة بمعنى "جرافيك"، يعني حفر، بيقوم الفنان بالرسم على لوج زنك بعد ما يعالج سطح الزنك بمواد خاصة ويبدأ الفنان يرسم عليه اللوحة بأقلام معدنية مدببة لكن ميزة الحفر أو الجرافيك إنك تقدر تاخد من اللوحة أكثر من نسخة، والجرافيك حصل له تطور كبير جداً مع تطور التكنولوجيا واستخدام الكمبيوتر واتبنى عليه عمليات الطباعة المتطورة دلوقت... ده بالنسبة للجرافيك باختصار.

طيب احنا عندنا هنا في مصر فنانين في الفن ده "الجرافيك"؟

طبعاً احنا مش بس عندنا فنانين فاهمين في الحفر لأ، ده "بينالي" يعني معرض دولي يقام كل سنتين لهذا الفن، متخصص فقط في أعمال الجرافيك، وفنانين مصر كتير جداً منهم "الحسيني فوزي"، "أحمد نوار"، "عوض الشيمي"..، وغيرهم كتير.

النحت

النحت من أقدم الفنون التي مارسها الإنسان وهو عبارة عن تشكيل كتلة في الفراغ... بمعنى أن النحات بيقوم بعملية حذف وإضافة من أي كتلة صخرية ليظهر الشكل المراد نحته سواء شخص، طائر، حيوان، لكن عملية الحذف والإضافة بتختلف على حسب نوع الخامة اللي بينحت فيها الفنان، بمعنى إن لو الفنان بينحت على أحجار صلبة زي البازلت أو الرخام فلازم يكون العمل الفني مدروسا جداً لأن الأحجار الصلبة بيكون النحت عليها بالحذف فقط....

- آه يعني الغلطة بـ"جول"..

وكارت أحمر وحياتك..

- طيب والنحت على الخامات الصلبة دي بيكون بإيه وازاي؟

زمان كان الموضوع مقتصرا على الأزاميل بأشكالها المختلفة، والإزميل.. طبعاً إنت عارفة عمود قصير من الحديد مشطوف أو مدبب من أحد أطرافه، والصنفرة، ودلوقت بقى ممكن للفنانين إنهم يستخدموا صواريخ كهربائية للتعامل مع صلابة الخامة والنحت ده بيسموه النحت المباشر على الهوا يعني...!!

- إيه ده هو النحت كمان أنواع

آه طبعاً... يعني لو إنت عايز تعمل تمثال وعندك حساسية على صدرك ومش هتقدر على مجهود التعامل مع الصخور الصلبة والأتربة الناتجة ممكن تنحت بالطينة الأسواني وهنا تقدر تحذف وتضيف براحتك لأن الطين خامة طيعة تقدر تشكلها زي ما إنت عايز..

- أي حجم ممكن يتعمل بالطينة؟

طبعاً أي حجم بشرط إنك تحافظ على الطينة طرية طول ما إنت شغال وده بإنك تغطيها بخيش مبلول لكن لو الحجم كبير لازم تعمل حاجة مهمة جدا اسمها "كاراكاز" وده بالضبط زي الهيكل العظمي للإنسان وهو عادة بيكون من أسياخ حديد وسلوك وبعد ما بتخلص نحت التمثال من الطين بتعمل له حاجة اسمها "قالب"، وده بيسمح لك بعد كده إنك تصب التمثال بأي خامة إنت عايزها... صوف زجاجي، بوليستر، برونز، نحاس، ذهب..
- ده موال يا فنان..
لكن ممتع..

- وهو فيه أنواع تانية من النحت؟

فيه النحت الخزفي وده يطلق على التماثيل المفرغة وفيه كمان الرليف بنوعين "بارز أو غائر" وده عبارة عن نحت على مسطح بحيث تكون الأشكال بارزة نصف بروز من مساحة مستوية، وفيه كمان التشكيل في الفراغ وده بيكون بتجميع أشكال سابقة التجهيز وإعادة تركيبها وده من الفنون الحديثة.

- ومن أهم نحاتينا؟

طبعاً الفنان "محمود مختار" اللي عمل تمثال نهضة مصر اللي موجود قدام حديقة الحيوانات، وهو ليه كمان متحف باسمه في الجزيرة...

- آه متحف، عايز لو وقتك يسمح أنزل معاك نروح المتاحف والمعارض ونكمل كلامنا على أرض الواقع.

خلاص يا صديقي نتقابل المرة الجاية في متحف أو معرض

- سلام يا صاحبي..

• كهوف الإنسان البدائي وعلاقتها بالرسم!
  
  
• حكاية الفن التطبيقي الحلزوني!!
  
  
• الفن التشكيكي والبؤرة الكونية...!