موضوعات سابقة
.ارسل الموضوع لصديق  الفنانمجدي الكفراوي |
 |
وبعد عمر ما خلص التليفون بص في وشي لقى علامة تعجب كبيرة يا ابني هي خطيبتك اسمها سلمى ولاّ هند وبعدين أنت مش ناوي تعرفني عليها على أساس إني أخوك الكبير
يا سيدي سلمى خطيبتي القديمة وهند خطيبتي دلوقت وموضوع أعرفك عليها ده..."انس يا عمرو" قصدي يا فنان، المهم سيبك من الموضوع ده وخلينا في المهم... الرسم والنحت... احكي لي
ماشي يا سيدي خلينا في المهم.... عارف الصعب في حكاية الفن التشكيلي إيه... إنك مش عارف تحكيها منين... من التاريخ ولا من أول ما كان فيه تصنيفات ومدارس فنية ولاّ منين بالضبط.
لأ يا فنان اعتبرني مواطن صالح بيحب الفن التشكيلي مع مراعاة إن أنا باتابع حسابات وأرقام.
طيب عموماً الفن التشكيلي "المعاصر" الموجود دلوقت له مجموعة أفرع ممكن يكون كل فنان متخصص في فرع منه وممكن تلاقي فنانين بيمارسوا أكثر من فرع، والأفرع المهمة اللي احنا بنشوفها هي الرسم والتصوير والجرافيك، فيه طبعاً فروع ثانية أضيفت حديثاً مع تطور الفن التشكيلي وتطور التكنولوجيا واستخدامها في الفن.
استخدام التكنولوجيا في الفن هي حصلت؟!
آه طبعاً بقى عندنا الأفرع الحديثة في الفن زي الفيديو آرت والتشكيل المجسم في الفراغ بس مش ده موضوعنا دلوقت... هييجي وقتها وهنتكلم عنها بعدين، الأول الرسم والرسم يعني إنك تعمل لوحة بخطوط فقط بدون مساحات لون أما التصوير
طبعاً عارفه إني أصور بكاميرا
لأ ده فرع حديث اسمه التصوير الفواتوغرافي وده من الأفرع اللي ارتبطت بالتطور التكنولوجي... بس التصوير اللي أنا أقصده هنا هو التصوير الزيتي يعني الرسم بألوان سيان كانت زيتية أو مائية ده بيسموه تصوير، وهو عبارة عن الرسم عن طريق ملء مساحات لونية متجانسة لتوضيح الظل والنور والأبعاد، وده اللي احنا بنشوفه كتير في اللوحات اللي موجودة في كل مكان حوالينا وأحيانا الرسم بيسبق التصوير في بعض اللوحات.... يعني كتير من الفنانين بيحبوا لما يشتغلوا في لوحاتهم يرسموها الأول بالخط وبعد كده يلونها والبعض الآخر بيفضل الرسم على طول باللون
أيوه يعني إيه الفرق بين الرسم والتصوير بالضبط علشان دماغي بدأت تسخن
الفرق باختصار إن الرسم توضيح الشكل المرسوم بالخط أما التصوير فهو توضيح الأشكال المرسومة بالمساحة
طيب تاريخنا مين فيهم كان الأول الرسم ولاّ التصوير
هو متقدرش تجزم بالظبط لكن الحفريات اللي لاقوها في كهوف الإنسان البدائي كانت بتأكد إن الرسم كان الأول..
وطبعاً التصوير عرفوه مؤخراً أيام ليوناردودافنشي ومايكل أنجلو..
لأ يا ناصح... إيه... هو أنت عمرك ما زرت الأقصر أو أسوان ظروفك ما سمحتش ما شفتش في التليفزيون إن معابد الفراعنة مليانة لوحات تصوير ورسم ورليف...
عندك.. إيه رليف دي!!
آسف يا سيدي الرليف ده نحت بارز أو غائر هنتكلم عليه مع النحت... بس كمان فيه لوحات تصوير موجودة في المعابد وفيه لوحات "وجوه الفيوم" ودي عبارة عن لوحات لأشخاص واللي بيسموها دلوقت "بورتريه" غاية في الدقة والجمال فالتصوير بيمارس من زمن بعيد لكنه كان بيمارس بغرض ديني عادة أو لخدمة الملوك لتسجيل انتصاراتهم وسيرتهم الذاتية لكن ماكانش حد بيستخدمه كوحدة فنية جمالية في البيوت زي ما احنا بنعمل دلوقت، والفنان كمان ماكانش حر في الموضوعات اللي بيرسمها
ده عن الرسم والتصوير، النحت بقى إيه حكايته
قبل ما أكمل اسمح لي أحضر الباليتة والألوان ونكمل وأنا بارسم علشان بصراحة أنت معطلني...!!
