الفنان مجدي الكفراوي

تي تي... تااا... تيراا... ريراا

دي نغمة العود الرائعة اللي عملها الفنان الجميل "عمار الشريعي"... آه ده موبايلي مين ده اللي بيتصل الصبح بدري... عايز أنام... من غير ما أشوف الرقم علشان نايم طبعاً رديت على التليفون أيوه مين...

؟ مين إزاي يعني... إيه يا فنان إنت "دلت" رقمي ولا إيه؟ إوعى تكون لسه نايم

أيوه يا "عمر" لأ بس نايم يا أخي.. خير في حاجة
يا عم فوق الساعة 12 أنت لسه نايم... عايزين نكمل كلامنا... إيه هتجيلي والا أجيلك؟ لأ تعال إنت يا "عمر" أنا في انتظارك

ماشي يا صاحبي فوق كده وإعمل لنا 2 قهوة على ما آجي ولاّ أجيب البن معايا...

إخلص يا خفيف أنا منتظرك باي...

ويادوب فوقت ولقيت جرس الباب... ده عمر بيه صديقي... إيه يا سيدي الحماسة وخداك كدا ليه خير...

يعني أنا قلت النهارده السبت والبنك إجازة آجي أقعد معاك شوية خصوصاً إني عارف إنك متقدرش تعيش من غيري وبالمرة نكمل كلامنا...

المهم عملنا القهوة وقلت له أيوه يا صديقي عايز تعرف إيه...

أبداً كمل لي الحدوتة خلصنا الفن التطبيقي الحلزوني إيه حكاية الفن التاني ده... بتاع اللوحات والتماثيل إحكيلي....؟

آه قصدك فن المعارض... خلينا الأول نتفق على حاجة مهمة جداً وهي المنطقة اللي احنا بنستقبل منها الفن وهي زي ما أنت عايز تسميها سميها سميها الروح... الأحاسيس... الذوق العام... أي مسمى المهم إن فيه منطقه عندك إنت كمحاسب وعندي كفنان موجودة بحكم إننا بشر بنحس وبنفهم وسيبك من موضوع بنفهم علشان أنا مش متأكد من الموضوع ده عندك...

المهم يا صاحبي إن موضوع بنحس ده كلنا مولودين بيه... كلنا كنا بنرسم واحنا صغيرين

أيوه حتى أنا فاكر وأنا في ابتدائي "مس سعاد" بتاعت الرسم

قاطعته أيوه أيوه علقت الرسم بتاعك في أوضة الناظر... إنت

عرفت منين؟

أصل أنا الناظر...!! ضحكنا وكملت كلامي المهم يا صاحبي أنا قصدي إننا كلنا بنتولد واحنا مؤهلين لكل المهن بيكون جوانا استعداد لإننا نكون دكاترة ومهندسين وفنانين ومحاسبين ولو واحد فينا اهتم بحاجة أكتر من الثانية من معاناة إن الحاجات الثانية ماتت ومش شرط إنك كنت بترسم وأنت صغير أو بتحب الرسم علشان تقدر تحس بيه لكن نفس المنطقه اللي جوانا اللي هنسميها الأحاسيس اللي بتقدر تستقبل منها المزيكا والأغاني إللي أنت بتحبها... صحيح إنت بتحب تسمع إيه

شوف يا فنان أنا في الحزين بحب "حمادة هلال"، ولما ابقى رومانس أديها "تامر" و"حماقي"، ولما بابقى مهيس متعدش... وفين "فيروز" و"الحجار"؟ وفين "عبد الحليم" و"أم كلثوم"؟ لا ربنا يخليك الدكتور مانعني من الحاجة الحلوة...!!

ماشي يا خفيف دا اللي كنت عايز أوصل له معاك وهو إنك بتقدر تحب حاجة وماتحبش حاجة ثانية لأن ده ذوقك اللي بيتناسب مع روحك" أحاسيسك"... عايزك كمان تتعامل مع الفن التشكيلي بنفس الطريقة ممكن تشوف لوحة أو تمثال وتحبه أو تكرهه لكن في الحالتين مش معناه إن العمل الفني سيء لا معناه إنه توافق مع روحك... لمس حاجة جواك... أو العكس... ونفس المنطقه اللي إحنا بنتكلم عليها هي اللي بتخليك أحيانا متضايق جداً ومش عارف السبب... هي نفس المنطقة اللي إنت بتستقبل منها الفن التشكيلي....

خلاص يا فنان اتفقنا على إن استقبال الفن من أحاسيسنا... أرواحنا... أيا كان المسمى إحكيلي بقى حكاية الفن إيه..." عارفة أحلى حاجة فيكي إيه... لامؤخذة يا فنان أرد بس على التليفون ونكمل كلامنا...! أيوه يا "سلمى"...

"سلمى"... أنت مش قايل لي أنت خطيبتك اسمها "هند"؟

هش... هش... بعدين يا صاحبي