الفنان مجدي الكفراوي

الله... مفيش حاجة في الدنيا أجمل من منظر الغروب لما الشمس تدخل تنام في حضن الأرض وتملأ الأفق بدرجات الأحمر والبرتقالي! ويا سلام لو فيه شوية سحب صغيرة... لأ.. لأ إيه ده أنا مفيش حاجة بتخنقني قد منظر الغروب... بحس إن النهار بيموت والليل بيتولد... وأنا بخاف من الضلمة!! ده كان بداية الحوار بيني وبين صديقي اللي كل ما يشوفني يسألني... إيه يا فنان أخبار الفن التشكيكي بتاعك لسه البؤرة الكونية بتدور حوالين المحور الإستاتيكي لزاوية الضوء المنفلت... قلت له بس متقولش منفلت وبعدين إيه اللي أنت بتقوله ده... إيه علاقة ده بالفن التشكيلي... وليه مصعب الدنيا على نفسك كده... أنا برضه اللي مصعبها على نفسي ولا أنتم اللى مصعبنها علينا... يا راجل كل ما أسمع فنان تشكيلي بيتكلم في الإذاعة أو التليفزيون وأبقى خلاص هافهم بيقول إيه فجأة يتوهني ويقول لي حاجات غريبة... قلت له طيب يا صديقي مافكرتش بنفسك مرة في الفن التشكيلي اللي حواليك في كل حتة، واللي أنت شخصياً بتمارسه كل يوم...؟ يا أخي وأنت من ساعة ما بتصحى الصبح لحد ما تنام عايش في وسط الفن التشكيلي... بتصحى تقف قدام المراية وتبدأ تجمل في نفسك وتطلع من ده تدخل في العلقة اليومية في اختيار ملابسك هتلبس إيه المهم إنك بتستقر على شكلك اللي أنت افترضت إنه جميل واللي هتقدر تقابل بيه الناس النهارده...

مش كده بس؛ لا، كل شيء حواليك في بيتك فن تشكيلي تصميم السجادة وشكل الفوطة، براد الشاي، المعالق والشوك والسكاكين التلاجة، البوتاجاز، الكراسي ده في البيت..

لما بتنزل الشارع البيوت، العمارات، السيارات..

وإيه علاقة ده كله بالفن التشكيلي؟!

ازاي بقى... كل اللي نفذوا الحاجات دي كلها فنانون... لا تتخيل المجهود اللي بذل علشان تشوف الحاجات دي قدامك، من تصميم شكل المنتج واختيار درجات الألوان عليه، وتجريبها... موال يا صاحبي.

وبعدين اختيارك لكل أشيائك من ملابس وأدوات كل ده جزء من ممارسة الفن التشكيلي اللي أنت غرقان فيه طول اليوم... وكل الحاجت دي اللي احنا بنستخدمها بيسموها "الفن التشكيلي التطبيقي"

.. أيوه... أيوه يا فنان التطبيقي الميتافزيقي الحنجوري هو ده اللي أنا بقولهولك، كنت هافهم لحد ما قلت التطبيقي!!

يا عزيزي الفن التشكيلي التطبيقي حكايته ببساطة إن الفنانين قرروا إنهم يطبقوا لوحاتهم وأعمالهم النحتية لحاجات نقدر نستخدمها وبالمرة تجمل لنا بيوتنا؛ يعني مثلاً لو لوحة عالمية أو رسم بقى موجود على تي شيرت أو ستارة أو سجادة مش ده يبقى أجمل؟ لو تمثال اتوظف لأنه يبقى "أبجورة" وحاجات كده كتير وعشان كده عملوا كليات ومعاهد للفنون التطبيقية.

جميل يا فنان بعيداً عن الفن التطبيقي.. عايز أفهم اللوحات والمعارض والحاجات دي... بس معلش لازم أمشي دلوقت عشان عندي ميعاد مع خطيبتي.