الثورة المصرية عظيمة.. لأنها كشفت عن نماذج مصرية رائعة ورائدة ونادرة.. عندنا مثلا صابر عابدين من برك الخيام شخصية عظيمة.. وعندنا أحمد زبايدر شخصية عظيمة.. وعندنا الشريفة الشيخة ماجدة شخصية عظيمة عظيمة عظيمة أعظم عَظَمَات الستات..
الشيخة ماجدة لمن لا يعرف -وهم قليل- معالجة بالقرآن الكريم.. وهي صنعة يتخفى وراءها كثير من الدجالين والمشعوذين ومسخّري الجن، ولكن دعنا الآن من الجن فما قالته الشريفة الشيخة ماجدة يؤكد وبطلاقة أن الإنس جنّن الجن..
وقبل أن ندردش شوية فيما قالته الشيخة ماجدة أحب أن أحمد ربنا وأشكر فضله وأبوس إيدي شعر ودقن؛ لأنني كنت قلقا وبشدة على مستقبل الطرافة والكوميديا بعد رحيل الأخ الفكيك سي القذافي الأهطل الأعظم ملك ملوك تحت السرير، وقائد ثورة الكاتت.. سمعنا كتير عن رئيس بيموت، رئيس بيتنازل، رئيس بيتنحى، رئيس بينتحر، لكن رئيس تصحى الصبح ما تلاقيهوش... دي أكيد انفراد جديد للقذافي.. اللي بعد رحيله ربنا رزقنا باللي يكمل مسيرة الضحك من أول كلمة، ويمتع قلوبنا.. وربك لما قطع من القذافي وصل من الشريفة الشيخة ماجدة، في مسرحية "تخاريف" التي لا تنتهي فصولها..
الشريفة الشيخة ماجدة أوعى تزهق من ذكر الاسم الثلاثي، فهذه كلها قطعية واحدة مش هينفع تتفك، لسه طالعة من الديب فريزر وهتاخد وقت على ما نعرف نفصّصها، سيبيها شوية في درجة حرارة المطبخ، وبعد ما تفك اعزلي "الشريفة" لوحدها و"الشيخة" لوحدها و"ماجدة" لوحدها وبعدين احرقيهم التلاتة في الفرن!!
تحدثت الشريفة الشيخة ماجدة عن ثلاثة محاور:
الأول: أن مبارِك (بكسر الراء) والنغانيغ جمال وعلاء والسيد حبيب العادلي أبرياء براءة الكلب من عضمة كعبول.. وأن من قتل المتظاهرين هم إيران وحزب الله وفلسطين وقطر وبعض الشيعة العراقيين (بس نسبة قليلة يعني من الشيعة العراقيين عشان الخلطة ما تعجّنش)..
ثانيا: أن حبيب العادلي خدم البلد أكتر من 15 سنة.
ثالثا: أن مبارك حفيد سيدنا النبي صلى الله عليه وسلم..
ولنا في الرد على الشريفة الشيخة ماجدة كلمات قليلة:
أولا: يبدو أن التجليات النورانية قد رفعت الحجب عن عيون الشيخة ماجدة لأنها شريفة بنت شريف، فرأت الجريمة كاملة، وقعدت لا بيها وعليها في المكان الصح، في ميدان عبد المنعم رياض يوم 28 يناير، وهو اليوم الذي لم ينزل مصري من بيته إلا إذا كان ضد مبارك أو ضد من ضد مبارك، ولكنها كانت واقفة كده في ميدان عبد المنعم رياض بتفكر، بصت يا اخويا لقت مجموعة رجالة لابسين لبس شرطة، ودي حاجة غريبة طبعا يومها كلنا عارفين إن ما كانش فيه شرطة خالص في الوقت ده، بصت وزرّت على عينها وقالت: إيش خيال يا ناس.. إنتم مين يا أخويا؟ قام رد عليها واحد إيراني شكله أهبل، بيخرّ من أول سؤال قال لها إحنا مش شرطة يا حاجّة، ده إحنا إيرانيين وحزب اللهويين وفلسطينيين وقطريين وبعض شيعة عراقيين جايين نساند الثورة، يا حلاوته يا حلاوته.. وبعدين وهو واقف قدامها بيكلمها قعد يشاور للرجالة اللي معاه، اللي لسه جايين من المطار، حتى بالأمارة كانوا راكبين 400 المطار-تحرير، وقال لهم يلا يا ابني إنت اطلع العمارة دي، وانت اطلع العمارة دي، نشّنوا كويس.. يلا نساند الثورة، وطلعوا الكلاشينكوف وبنادق القناصة واتمركزوا وقعدوا يساندوا الثورة..
ثانيا: حبيب العادلي اللي خدم البلد أكتر من 15 سنة، سؤال واحد: خدمها في إيه؟ سيبك من المعتقلات والتعذيب والاختطاف، وخلينا في مصر التي تحوّلت إلى مستودع للعمليات الإرهابية، في سينا وطابا ودهب واسكندرية والصعيد.. فعلا حبيب العادلي في خلال 15 سنة خدم البلد كلها على قفاها!!
ثالثا: الشريف الشيخ مبارك بحسب افتكاس الشريفة الشيخة ماجدة، ورغم أن الشريفة الشيخة ماجدة معالجة بالقرآن الكريم لكن يبدو أنها تحتاج إلى حصة دين إضافية، نذكرها بقول رسول الله صلى الله عليه وسلم: "... ومن أبطأ به عمله لم يسرع به نسبه"، ومبارك كان عمله أبطأ من السلحفاة الحامل.. ونذكّرها بقول الرسول أيضا: "يا فاطمة اعملي ما شئت فإني لا أغني عنك من الله شيئا"... فليس لأحد عند الله صك مغفرة، وليس للقربى من وساطة ولا محسوبية اللهم إلا إذا صلح العمل وحسنت النية.. وبهذا أتوجه بنداء للشيخة ماجدة وكل الأشراف آل البيت ونسل النبي عليه الصلاة والسلام.. بأن أبا لهب كان عم النبي صلى الله عليه وسلم.. وآذر (أو تارخ) كان أبا إبراهيم عليه السلام، وامرأة لوط وامرأة نوح كانتا تحت عبدين صالحين فخانتاهما.. فالعبرة بالعمل لا بالنسب.. "إنه ليس من أهلك إنه عمل غير صالح"..
أسيبكم بقى تتابعوا الجلسة الخامسة لمحاكمة الشريف الشيخ مبارك والخدوم حبيب العادلي والننانيس.. ونروح نرفع قضية على إيران، مش بسبب قتل المتظاهرين لكن بسبب غباء العناصر المرسلة لتنفيذ المهمة.
إليك الفيديو الذي يكشف الحقيقة وراء 28 يناير
حسبي الله ونعم الوكيل في
حسبي الله ونعم الوكيل في الشيخة فكاكس
عميلة النظام السابق الذي يعلم مدي اهمية الدين وحب الرسول عليه الصلاة والسلامللشعب المصري
وحين فشلوا في فنون الاستعطاف و الترويع للشعب المصري لجؤ للدين ونسب الرصول من الانساب وهذا برئ منه الدين والرسول عليه الصلاة والسلام فمن قبل ادعوا ان احمد ابن عز من الاشراف وحاليا مبارك ونجليه من الاشراف
حاشي لله ما يدعون ولك الله يا شعب مصر
بجد تسلم ايدك يا استاذ محمود
بجد تسلم ايدك يا استاذ محمود ضحكتنى
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
ههههههههههههههههههههههههه
ههههههههههههههههههههههههه هههههههههههههههههه هههههههههههههههههههههههههههههههههههههههههههههههههههههههههههههههه هسترية ضحك يا جدعااااااااااان ههههههههههههه عثل عثل
بجد الواحد مش عارف يقول اية
بجد الواحد مش عارف يقول اية سيدنا النبى علية افضل الصلوات هيتبرى من حسنى مبارك الدكتاتور الظالم القاتل والست الهانم الكبيرة شكلها محترم بس للاسف كاذبة بجد عيب اوى تنسبى مبارك لسيدنا النبى علية افضل الصلوات دفعوا ليك اية يا كاذبة عيب على سنك مبارك نار جهنم وبئس المصير
رائع يا استاذ محمود وربنا
رائع يا استاذ محمود وربنا يريحنا من العاهات اللى بتطلع كل يوم
(وبعد ما تفك اعزلي "الشريفة"
(وبعد ما تفك اعزلي "الشريفة" لوحدها و"الشيخة" لوحدها و"ماجدة" لوحدها وبعدين احرقيهم التلاتة في الفرن!!)... إيه يا عم محود السخرية الجامدة أوي دي!!! الله يسامحك ضحكتني وماكنتش ناوي أضحك النهاردة بعد أن قرأت الأخبار اللي زي الزفت.. وأرى محاولات سرقة الثورة وتشويهها وأرى أيضا عجز المجلس والحكومة
مرة أخرى الله يسامحك يا أبو منار
يجب محاكمة مبارك والعادلي
يجب محاكمة مبارك والعادلي لعدم قيامهم بتأمين البلاد والسماح لعناصر خارجية بقتل مدنيين مصريين
ومن دقنه وافتله
ههههههههههههههههههههههههههههه
هههههههههههههههههههههههههههههههههههههههههههههههههههههههههههههه والله حاجه عنب عنب عنب يا مزاجك اللى اعل من العالى دا انا نفسى اتقطع من الضحك بعد ما كان بقالى كثير مضحكتش بسبب اللى ميتسموش ابناء موباراك بس بصراحه انتى تستاهلى جايزة اوسكار فى الهبل او الاستعباط ... اوتلاقيكى ياعينى من ضحايا مبارك اللى شويه من كتر مرضهم النفسى بدل ما يكرهوا مبارك فحبوه والباقى اهم باقوا زيك كده حاجه يعنى حلاوه خالص ولاحول ولاقوة الا بالله العظيم لاكن كله الا نسب رسول الله ياوليه اوك.. سلامات
مالكم ومالها هى قالت اللى
مالكم ومالها هى قالت اللى شافته على البحر وهى بتدعى ربنا
كده مش هتخلوا حد يقولكم على حاجه تانى
احكى وقولى داحنا من ايام اخوكى القذافى مضحكناش
يا جماعة عيب اوى اللى بيحصل
يا جماعة عيب اوى اللى بيحصل ده , دى ست محترمة وعيب حد يتكلم عليها كده
هى ان شاء الله هاتتعالج وتبقى تمام , ودوها جنب مبارك فى المستشفى تونسه,
انا بشكرك يا شيخة ماجدة علشان الكلام اللذيذ اللى قلتية
والنبى انتى عثل عثل
بأشربك ونضارتك وبابا غنوجك
يا حلاوتك ياختي يا بيضا
يا حلاوتك ياختي يا بيضا ..!!
محدش و النبي شافك و انتي جاية ..؟؟؟
لو انتي مسلمة بجد اعرفي ان رسول الله ورد عنه ان قال فيما معناه لعن الله الداخل فينا بغير نسب و الخارج منا بغير سبب .
فنانه فنانه فنانه .. امسحى
فنانه فنانه فنانه .. امسحى دموعك يا امال بس بلاش يا جماعه غلط عشان متاخدش حسنات
والله انتى عسل وكمان سكر
والله انتى عسل وكمان سكر انتى قلتى انك جايه من كوكب زحل ولا المشترى
روحى يا شيخه وكمان روحى يا شيخه وحاجبلك رز بلبن وكمان بالمكسرات
وعجبى يا شريفه
الولية دى جاية من كوكو تانى
الولية دى جاية من كوكو تانى ولا اية
يااخوانى بالله عليكم حد يجللى
يااخوانى بالله عليكم حد يجللى رقم الست لما قصدى الست ماجدة عندى ليها شغلانة كويسة عندى كلبين فوق السطح هتيجى تربيهم
اللهم صلى على سيدنا محمد
اللهم صلى على سيدنا محمد النبى الامين الكريم ....بداية ...وهل لو فاطمة بنت محمد عليه الصلاة والسلام سرقت ؟ألن تقطع يدها ويقام عليها الحد ...وهل يقام الحد على الضعيف ولا يقام على الشريف ....ثم إن المنافقين كثيرون يجادلون فى حقوق الله ...كما فعلوا مع الملك فاروق فنسبو أمه نازلى الى سبط الحسين ونازلى قال ابنها فاروق فيها اقذر واقبح الكلام ...وشهر بها تشهيرا....إن هؤلاء هم شيوخ الوقت لأسف يباعوا ويشتروا....وأين نقابة الاشراف من هذا ....؟؟؟؟؟؟؟
ههههههههههههههههههههههههههههه
هههههههههههههههههههههههههههههههههههههههههههههههههههههه دى فى طراطيف الهواااا
بجد تسلم إيديك يا أستاذ محمود
بجد تسلم إيديك يا أستاذ محمود انت بجد خليتنا نضحك من قلبنا وخصوصا إن الست دي مش طبيعية خالص والظاهر كده انها من الفلول
والله العظيم الولية دى مجنونة
والله العظيم الولية دى مجنونة وكلامها كلة جنان رسمى نظمى فهمى
خفةدم من الغنام معهودة.. فيها
خفةدم من الغنام معهودة.. فيها معلومات تستاهل زغرودة
على فكرة أنا مش زعلان من
على فكرة أنا مش زعلان من ماجدة..كفاية إنها خلتنا نقرا مقال ممتع زى كده..شكرا يا أبو منار..
بجد تحفه يا شيخه يا شريفه يا
بجد تحفه يا شيخه يا شريفه يا ماجده بجد بركاتك يا شيخه ماجدى مدد حى
والله لو كان آل البيت موجودين
والله لو كان آل البيت موجودين لأمروا بإهدار دمك أنتى ومبارك والعادلى
ياحفيدة الحجاج بن يوسف الثقفى
انا بقالى تقريبا سنه مش بعلق
انا بقالى تقريبا سنه مش بعلق على أى موضوع فى الموقع ده بس بجد مش قادر حد يا جماعه يمسك ايدى او حد يشيل الكيبورد من تحت ايدى بجد بجد
ههههههههههههههههههههههههههههههههههههههههههههههههههههههههههههههههههههههه
صباح الفل يا حاجة انتى عنب يا عينى كل ده شايلاه فى قلبك وساكته
بجد زي احمد مطر مابيقول انها
بجد زي احمد مطر مابيقول انها عامله دماغ عنب
واضج ان الحاجه ماجده شافت
واضج ان الحاجه ماجده شافت الكلام اللي بتقوله في الحلم بلاش ياجماعه نظلمها علشان كده ننصحها انها تستغطي كويس وهي نايمه وتسمع كلام ماما وبابا علشان ماتحلمش بالكوابيس دي تاني
ههههههههههههههههههههههههههههه
هههههههههههههههههههههههههههههههههههههههههههههههههد مفيش غير كده
يل وليه اتقى الله ومتذكريش
يل وليه اتقى الله ومتذكريش اسم النبى صلى الله عليه وسلم مع الحثالة
حد يقتل الوليه دى هى
حد يقتل الوليه دى هى كانت بتحلم وقامت تحكى الحلم خير الله يجعله خير الست شكلها عامله دماغ عنب وبحر ايه اللى فى القاهرة دا دا التهييييييييييييييس عالى اوى
اللهم اجعلنا من بركاتك ياحضرة
اللهم اجعلنا من بركاتك ياحضرة الشريفة الشيخة ماجدة. . وقد أسرعت عقب سماعى لحديثك الجليل واستخلاصى للعبر منه بتبشير صديقى العزيز سامى بأنه من ذرية الرسول الكريم طالما أن اسم والده "السيد" وهو سند مؤكد بالرجوع للقواعد العلمية الشريفة التى أرستها الست بجلالة قدرها!.. لكن هناك مشكلة صغيرة أرجو أن تساعدنا سماحة الشيخة على حلها وهى: كيف نقنع مبارك نفسه بأنه من الأشراف وأن جده الرسول الكريم؟.. لماذا أقول ذلك؟ أقوله لأن الرئيس الراحل صدام حسين حين سئم من مناشدات مبارك العاقلة المتعقلة التى تطالبه بسرعة الخروج من الكويت ـ والتى بلغ عددها 32 مناشدة ـ رد عليه برسالة مذاعة من راديو بغداد قال فيها ـ من بين ما قال ـ أن جده من نسل الحسين، فكان تعقيب مبارك فى مؤتمر صحفى أن سخر من هذا النسب وقال: أنا كمان ممكن أقول إن جدى من أولياء الله الصالحين.. قال ذلك من باب الإستهزاء والقول بأن الإدعاء أمر سهل، ولو كان يعرف ما تعرفه عنه الست الشيخة ـ قوى الله إيمانها وبصيرتها وأحد من بصرها ـ لكان أكد للراحل صدام بأنه هو أيضا من ذات السلالة الشريفة، بل وربما كان سينضم إليه من باب الإلتزام برابطة الدم والعمل بمبدأ "أنا وابن عمى على الغريب" ، مع إنه لم يلتزم برابطة التحالف التى كان يفرضها عليه انضمامه (ومصر معه بالطبع) إلى "مجلس التعاون العربى" والذى كان يتكون من مصر والعراق والأردن واليمن وهو تحالف عربي كان فى مواجهة "مجلس التعاون الخليجى" .. لكن يبدو أن مبارك ـ وفى غفلة عن البصيرة النيرة للشيخة الجليلة ـ أوقع نفسه عمدا فى خطأ مطبعى وحول "التحالف" إلى "تخالف".. ومن ثم لا يسعنى إلا أن أقول: مدد ياشيخة ماجدة مدد! بركاتك ياشيخة ولا تنسينا إذا وصلت الفتة وبلغت "الهبر" الحناجر!
heheheheheheheheheheheheheheh
hehehehehehehehehehehehehehehehe
La 7awl wala kwa ella bellah
ham yeda7ak w ham yebakky
والنبي عسل يا اخواتي والله لا
والنبي عسل يا اخواتي والله لا شريفه شريفه يعني انا مش متخيل هو لسه فيه ناس متخلفه لحد النهارده اما عجيبه والله
يعم ارحمونا بقا كده هيجلنا
يعم ارحمونا بقا كده هيجلنا شلل
بجد الثوره ديه زى مشفنا فيها رجاله وعرفنا ان مصر بخير شفنا بردو خونه وشخصيات تستاهل الحرق زى الشيخه ماجده ديه
