مهلاً المغرب لم يؤذّن بعد.. أو ربما أذّن.. الله أعلم.. كل ما لك عليّ هو حق النصح وأنت حر.. ولهذا أنقل لك التنبيه التالي متقمصاً شخصية كابتن خالد لطيف: عزيزي الصائم.. إذا كنت قاعد وفاتح "دريم"، فهتلاقي المغرب بيؤذن، أما لو كنت فاتح "المحور" فلسه باقي على المغرب دقيقتين، وإذا كنت فاتح "الرحمة" أو "الناس" فقدامك كام دقيقة.. سيبك من الشيخ اللي خلّص أذان تحت في المسجد، واوعى تبص في النتيجة أحسن تعضّك.
المفترض أن شهر الصيام يعلّمنا قيمة كبرى في منتهى الأهمية والخطورة؛ وهي النظام، واحترام الوقت.. كل عبادات الإسلام لها أوقات محددة، ولكن عبادة الصوم بالخصوص تلحظ أنها تولي الوقت أهمية كبرى، الإفطار في دقيقة محددة لا يجوز قبلها بدقيقة، والإمساك في دقيقة محددة لا يجوز بعدها بدقيقة، لنعلم أن للوقت احترامه وأهميته في حياتنا، وأن طريقة: "معادنا تمانية تسعة" ما لهاش مكان عند ناس بتصوم صح!!.
اطمئن يا صديقي فأنا لن أحدّثك عن فضل رمضان، ولا أهمية الشهر الكريم؛ لأن "بعد العيد ما يتفتلش كحك"، ولكني أحب أن أحدثك في أمر آخر وهو إننا بنهرّج.. والله العظيم بنهرّج.
كل قناة تؤذن المغرب على مزاجها، وكل مسجد يؤذن على مزاجه، ونحن في هذا نخضع لذوق المؤذن أو القناة، واحد حبّوب عايز يفرّح الناس فيؤذن بدري شوية.. واحد نكدي عايز يضايق الناس فيؤذن متأخر شوية.
قد أكون ظالماً إذا عزوت الأمر للمزاج وحده؛ فهناك عامل آخر في منتهى الخطورة، وهو الساعة.. جايز واحد تكون ساعته مأخرة كام دقيقة فيتأخر في الأذان، أو واحد ساعته مقدّمة كام دقيقة فيؤذن بدري، وده طبعاً من حظّ سكان منطقته.
ونفس الأمر ينطبق على القنوات الفضائية المصرية التي تؤذّن بالمصري، بعضها وكأنها تقدم عروضاً لجذب المشاهدين لشاشاتها فتؤذن لهم المغرب بدري، وبعضها كأنها عارفة إن زباينها رجالة، فبتطوّل براحتها لحد الدعاء أو قرآن المغرب ما يخلص وقت ما يخلص، وهي الدنيا طارت؟!
لم يمرّ عليّ يوم في الشهر الفضيل أفطر فيه في موعد محدد، بل أنتظر حتى ينتهي كل هذا، عملاً بالمثل القائل: "الأخير ربه كريم"، و"خليني أنا الكبير"، و"اتقلْ تاخد حاجة نضيفة".. ومعزوفة الأذان تتواصل وتتواصل على التوقيت "المتعدد" لمدينة القاهرة، وعلى السادة المقيمين داخلها مراعاة مزاج المؤذن وساعته.
أتابع القنوات السعودية على اختلافها فأجد تقديساً للأذان وتوقيراً لموعد الصلاة -أي صلاة وليست فقط صلاة المغرب في رمضان- فعندما يحين موعد الصلاة ينتقل الجميع لنقل شعائر الصلاة من رحاب المسجد الحرام بمكة المكرمة، أذان واحد من مكان واحد في وقت واحد، وهي خطوة نتمنى لو استطعنا أن نخطوها يوماً؛ فما المانع لو صدر توجيه عام لجميع القنوات المصرية بنقل الصلاة من الجامع الأزهر مثلاً بشكل مُلزم، أو حتى نقل الأذان فقط من ذات المسجد؛ نقلاً حياً لا مجرد تسجيل يُذاع حسب عوامل خاضعة للاختلاف في أمر هو غير قابل للاختلاف.
نحن في كل رمضان نأسى ونتحسر عندما نجد العالم الإسلامي مفرقاً دمه بين البلاد، وهلال السعودية غير هلال مصر غير هلال ليبيا غير هلال الجزائر.. وليلة القدر طبعاً بتكون في كل بلد حسب هلالها، وبنغيّر ميعاد نزول القرآن من اللوح المحفوظ إلى السماء الدنيا في ليلة القدر حسب ما نراه نحن في السماء، ونتمنى توحيداً عالمياً للتقويم ومرصداً موحداً لجميع بلاد الإسلام، ونحن نفشل بدايةً في توحيد أذان مدينة واحدة.
الأمر خطير فعلاً، ويستحق وقفة؛ لأن ما يحدث مهزلة.. وعدم احترام للدين والشرع، والفريضة التي وصفها الله بأنها "كتاب موقوت" في قوله تعالى: {إِنَّ الصَّلاةَ كَانَتْ عَلَى الْمُؤْمِنِينَ كِتَابًا مَوْقُوتًا}.
أرجو أن يقرأ هذا الكلام أحد المسئولين عن الأوقاف في بلادنا، ومنهم كثير من المخلصين الغيورين على الدين، ولهؤلاء أتوجّه بالدعوة للحفاظ على ركنين من أركان الإسلام (الصلاة والصوم)، وإنقاذهما من بين أيدي العابثين.
وفي النهاية أتمنى لكم صوما مقبولاً وإفطاراً مظبوطاً..
يا ريت تطرحوا موضوع تغيير
يا ريت تطرحوا موضوع تغيير الساعة كل كام يوم أنا عارفة انه موضوع هزلي لكن يا ريت يتناقش بشكل جدي و نشوف حل للمهزلة دي ازاي نطالب بالغاءالتوقيت الصيفي
الموضوع بسيط جدا والفرق دقايق
الموضوع بسيط جدا والفرق دقايق الى يخليك صايم طول اليوم يخلينا نصبر شويه لما المؤذن يخلص ومعظمهم بيبقى فى التوقبت الصحيح مش للدرجه الى حضرتك مكبرها اوى كدا
السلام عليكم ورحمة الله
السلام عليكم ورحمة الله وبركاته
الموضوع بحد ذاتة جيد جدا ولكن ما رئيكم فى طرح الاذان الموحد مثل باق الدول الاسلامية والعربية حيث يطبق ذلك فى السعودية والامارات والكويت وتقريبا معظم دول الخليج
لكن هل تدرون ماهى حكمة الله عز وجل من جعل الاذان هكذا اقصد انه مثلا الاذان بيكون من الساعه 1الى 1:20 لصلاة الظهر هل فترة ال20 دقيقة هى ما تزعج مدينة القاهر او اذان المغرب من 5 الى 5:15 هل سوف يقف افطار صائم لمدة 8 او 10 سعات على 5 دقائق الحكمة فى الاذان بعد الدراسات والابحاث انه يزال اسم الله اكبر يتكرر على مدار الساعه يعنى ذكر الله وتكبيره وتحميده وتهليلة فى الارض لمدة 24 ساعة تنتهى من القاهرة يبداء فى المنصورة ينتهى من المنصورة يبداء فى المنيا وهكذا
هل تعرفون شيئا هناك احد رواد الاسلام حديثا وهو صديقى فعندما دخل الاسلام وفتنت الامور عليه قالى لى توجهت بعد الساعه الرابعة بعد منتصف الليل الى السماء خارج البيت واذا بالسماء تساقط جليدا ومن شدة البرد والرعد والصواعق كل منطقته التى يسكن فيها نيام فتوجه الى الله بالدعاء وقال اذا كنت انت فعلا اله الكون فاجبنى رد عليا ؟ فجائته الاجابة من المولى عز وجل الله واكبر من مسجد للمسلمين ويكرر السؤال وتتكرر الاجابة يذهب الى فتح التلفاز واذا به يبحث عن قناة مسلمين ولم يدخل الاسلام بعد ويسأل فاذا بصوت الاذان يأتيه من احدى القنوات المسلمة ما هذا اسلم الرجل الان فى مكة المكرمة وهو داعية الى الحق سبحانه وتعالى فى دول افرقيا
والله المستعان
والسلام عليكم ورحمة الله وبركاته
ايوة احنا فعلا بنهرج من زمان
ايوة احنا فعلا بنهرج من زمان وتهريج سخيف كمان
احنا من الاخر امة ضحكت من جهلها الامم بدون اى مبالغة
انا نفسى بتصعب عليا اوى من البلد دى......
اهل القاهرة حيشغلوا اذاعة
اهل القاهرة حيشغلوا اذاعة القران الكريم
طاب احنانعمل ايه
انا بسمع صوت مسجدين ف نفس المنطقة
واحد بيادن ويخلص ويكون التاني لسة مبداش
انا مره كنت بتفرج علي ميلودي
انا مره كنت بتفرج علي ميلودي دراما
واذنت المغرب علي الساعة5 ونص
هههههههههههههههههههههههههههههه تهريج الله يكون في عونا
بعد كده الواحد يفطر علي حسب ساعته مش بعيد تكون ماما في المطبخ وانا في السفره وانا بفطر وهيه لاءهههههههههههههههههههههه
موضوع اي كلام ...مش لاقي حاجه
موضوع اي كلام ...مش لاقي حاجه يقولها فقال اهذى شويه
طب انتو يا سكان الفاهرة
طب انتو يا سكان الفاهرة بتقولو كده اومال احنا نعمل ايه الاذان هنا كل واحد علي مزاجه في الجوامع غير كده القنوات برضه علي مزاجها فبنستني اذاعة القران الكريم لان بصراحة هي الاضمن عشان الواحد صيامه ميضيعش علي الفاضي
والله عندك حق فعلا بجد حاجه
والله عندك حق فعلا بجد حاجه منتهى الاستهتار وبعدين فى القناه السعوديه اللى اسماه القران الكريم لو حضرتك تسمع عنها بتجيب فى شريط تحت كده مواقيت الصلاه فى جميع البلاد وماعتقدش انه بيأذن فى الميعاد المكتوب دا
فعلا عندك حق والله ومقال
فعلا عندك حق والله ومقال محترم جدا و عموما لانه محدش في البلد دي عاوز يتحسن ف لو محدش التزم بالكلام ده على الأقل ممكن تفتح اذاعة القرآن الكريم بتأذن بعد ضرب المدفع مباشرة ومواعيدهم مظبوطة جدا..ياريت كل القنوات تكون زيها
يا عزيزي الكاتب موضوعك أكثر
يا عزيزي الكاتب موضوعك أكثر من رائع لكن هل تعتقد أن في شعب مش عارف يحل مشكلة الزبالة ومشكلة البطالة ومشكلة الفساد هيقدر يحل مشكلة الأذان ؟؟؟!!! لا حياة لمن تنادي دول ناس بقى في ودانهم سد منيع بيسمح بس انه يسمع ازاي نكسب وازاي نقرف الشعب
للأسف القنوات الفضائية بما
للأسف القنوات الفضائية بما فيها الحكومية بقوا يبدوا الاعلانات على أذان ربنا.تلاقى الأذان أذن على إذاعة القرأن الكريم و القناة الأولى مشغلة اغنية و التانية عليها اعلان جبنة.
و الشئ اللى يدعو للحزن هنا ان المشكلة دى ممكن كسكان للقاهرة نحلها ببساطة و نستمع للأذان على إذاعة القرأن الكريم بما انها مفيهاش اعلانات,طب و سكان باقى الأقاليم من العريش للسلوم يعملوا ايه؟!!
