قلقانة على خطيبي من الطريق الوحش
أنا عندي 19 سنة وبادرس في 3 كلية اتخطبت من سنة ونص تقريبا لشاب أكبر مني بـ6سنين أنا وأهلي لما اتكلمنا معاه لقيناه محترم وكويس جدا
السلام عليكم.. من فضلكم أنا عندي مشكلة وعايزاكم تحلوها معايا عشان بجد أنا تعبت جدا، أنا عندي 19سنة وبادرس في 3 كلية، اتخطبت من سنة ونص تقريبا لشاب أكبر مني بـ6سنين، أنا وأهلي مكناش نعرفه، بس لما اتكلمنا معاه لقيناه محترم وكويس جدا الحمد لله وعلى خُلُق، وتمت الخطوبة برضا جميع الأطراف.
إحنا حبينا بعض جدا وبصراحة هو حبني أكتر، من كتر حبه ليّ وقُربه مني صارحني بحاجة كان عملها في الماضي قبل ما يعرفني بكتير، الحاجة دي هو إنه عرف ناس بتعمل في تجارة غير مشروعة تماما، وللأسف هو اشتغل مع حد منهم لكن مرة واحدة بس.
وقال لي إنه فعلا بعد عن الطريق خالص، وأقسم لي إنه مش هيرجع له تاني مهما كانت الظروف، أنا مصدقاه بس خايفة جدا لإن فيه واحد من الناس اللي كان يعرفهم بيبعت له السلام من فترة للتانية، أنا قلقانة إن الراجل ده ياخده للطريق الوحش تاني.
خطيبي كان قايل لي الكلام ده على إنه سر المفروض إنه مايطلعش برة مهما كانت الظروف عشان ماتحصلّوش مشاكل، وأنا من كتر قلقي بصراحة ماقدرتش أتمالك أعصابي فكان لازم أفضفض لأمي، وفعلا فضفضت معاها بس للأسف حصلت حاجة غير متوقعة، فأمي طلبت مني أسيبه، ولما طلبت من بابا يتدخل في الموضوع لقيت رده مقنع جدا، قال لها إن ده ماضي وكلنا بنغلط؛ لازم نسامحه ونساعده ونقف جنبه وقال كويس جدا إنه بيحكي، وإنه كان ممكن يتجوزني من غير ما يقول أي حاجة وكنت هاكتشف كل ده بعد الجواز، أنا بقيت في حيرة مش عارفة أسمع كلام مين؟
هو أقسم لي بالله إني لو سيبته هايضيع وهيمشي في طريق غلط، عشان وجودي جنبه هو الدافع الوحيد بعد خوفه من ربنا طبعا إنه يمشي صح.
أنا صليت استخارة ومش حاسة بأي تغيير جوايا يعني العادي بتاعي، هو فعلا أنا لو قدمت النية الكويسة ربنا هيجازيني خير وخطيبي يفضل كويس كده؟ ولا أبعد عنه وأسيبه يروح لأي طريق؟
z.love.m
صديقتي العزيزة.. كنت متعاطفة جدا مع خطيبك وباقول زيك، لازم نغفر لكي يغفر لنا، كنت هاقولك تحاولي تقنعي مامتك بوجهة نظرك إنتي وباباكي وهي بعد شوية هتهدأ وترضى ومش هيكون فيه مشاكل إن شاء الله.
بس في نهاية رسالتك استوقفتني جملة مهمة إنتي قلتيها، وهي “إنه أقسم لي بالله إني لو سبته هايضيع وهيمشي في طريق غلط عشان وجودي جنبه هو الدافع الوحيد بعد خوفه من ربنا طبعا إنه يمشى صح”، صديقتي كلنا بنخاف من ربنا، بس الخوف من ربنا وعذابه مش كفاية عشان الواحد يمشي صح، بدليل إن كلنا بنغلط وبنكذب كل يوم وبنعمل بلاوي، عارفين إن أبسط حاجة فيهم لها عقاب كبير عند ربنا ومع ذلك بنغلط، وعشان مانغلطش محتاجين مع الخوف من ربنا إننا نحبه ونستحي منه، ونفهم النعم اللي اداها لنا ونقدّرها، ونفهم الفرق بين الحلال والحرام ويكون عندنا مبررات كافية لو هنعمل أي شيء حتى لو حرام.
كلنا عندنا ناس بنحبهم وبنحاول نكون كويسين عشان نسعدهم، لكن افرضي اللي بتحبيه ما حبكيش، هتدمري نفسك علشانه؟! لأ طبعا، أنا عاوزاك تسألي نفسك ليه خطيبك غلط الغلطة دي زمان.. أو ممكن تسأليه هو شخصيا.
ومن إجابته تقدري تعرفي إذا كان هيكررها ولا لأ، وبالتالي هل حياتك معاه هتكون مهددة زي ما أمك بتقول ولا مجرد غلطة وعدت زي ما والدك بيقول.
فيه فرق كبير بين اللي بيسرق لأنه جعان، واللي بيسرق عشان هو عاوز يملك اللي في إيد غيره، وحتى في مرة من المرات تم إسقاط حد السرقة عن الأولاني ولم تقطع يده، لأن ظروفه أجبرته، لو خطيبك ظروفه أجبرته زمان على التجارة غير المشروعة وهو فعلا تاب وأناب وقرر عدم الرجوع لها أبدا، ودلوقتي حياته اتحسنت وبقى عنده حبيبة بيخاف عليها وحياة جديدة مش عاوز يضيّعها علشان نفسه في الأول مش عشان أي حد تاني، يبقى ليه هيرجع لها مهما حصل وليه بيقول لك إنك لو سبتيه هيرجع لها؟! المفروض إنه فاهم إنها غلط وسواء إنتي موجودة في حياته أو لا، مش المفروض يعمل الغلط لو هو فعلا إنسان كويس، لأن نفترض إنكم اتخانقتوا أو اختلفتوا سوا، هل ده هيكون مبرر منطقي عشان هو يرجع لطريق الغلط؟
لكن لو هو غلط لأسباب تانية مالهاش علاقة بالظروف المادية والنفسية، زي أصحاب السوء، أو إنه كان متورط في تعاطي حاجة، أو إنه عاوز يعمل فلوس زيادة بدون مجهود، فدي أسباب تخليكي تراجعي نفسك بخصوص شخصيته وصفاته ومدى إحساسك بالأمان معاه.
على كل حال الوقت علاج لحاجات كتير، في البداية ارجعي انتبهي لمذاكرتك لأنها أهم شيء، وبعد كده اعرفي إن الموقف ده كله حصل عشان تراجعي نفسك في خطوبتك وحياتك، سيبك من الجدل مع أبوكي وأمك وأسألي نفسك وردي بصدق بعد ما تفكري في خطيبك من كل الجوانب، هل هو ده الراجل اللي إنتي عاوزاه يكون أب لأولادك؟ على أساس إجابتك هيكون اختيارك.
