قبل العيد.. اشتري لحمة صحية وخلّي أكلاتك شهية
تابعينا النهارده على "سفرة دايمة" علشان نقول لك نصايح مهمة لازم تاخدي بالك منها وإنتي بتشتري اللحمة
أحسن الطرق لحفظ اللحوم
يُفضّل قبل ما تشيلي اللحمة في الفريزر إنك تقطّعيها لقطع صغيرة مناسبة مع الحجم اللي إنتِ بتطبخي به، وتشيليها في الفريزر من غير ما تغسليها؛ لأن الرطوبة العالية ممكن تتسبب في إن اللحمة تفسد بسرعة، وكمان يُفضّل إنك تشيلي قطع الدهون اللي بتكون موجودة على اللحمة من بره؛ خاصة اللحمة الضاني.
ولما تيجي تطبخيها يُفضّل إنك تطلّعيها وتحطيها في الثلاجة قبل الوقت اللي هتطبخيها فيها بـ10 ساعات.
بس خلي بالك وإنتِ بتقسّمي اللحمة في أكياس الحفظ أو في الأطباق الفِل، إنك تحطي في كل كيس الكمية اللي تكفي لوجبة على حسب عدد أفراد أسرتك؛ علشان ما تضطريش إنك تجمّدي اللحمة اللي هتتبقى بعد ما تسيح؛ لأن تجميد اللحمة بعد تسييحها ممكن يخلّي اللحمة تتلف أو يتغيّر طعمها.
وبعد ما تقسّميها تخلّصي من الهواء الزيادة اللي موجود في الكيس، وحطيه في الفريزر، ويُفضّل إنك تحطي اللحمة على سطح الفريزر مباشرة.
وعلى فكرة أنتِ ممكن تغسلي اللحمة وتشوّحيها على النار لمدة 5 دقايق قبل ما تشيليها في الفريزر مع شوية ملح وفلفل، وبعد كده تسيبيها تبرد خالص، وبعدين تقسّميها في الأكياس وتشيليها في الفريزر بنفس الطريقة اللي قلنا عليها، وبكده تبقى اللحمة جاهزة عندك، ولما تحتاجيها في أي وقت هتطلّعيها من الفريزر وتحطيها على النار مباشرة، ومش هتستني لما تسيح، وتعمليها بعد كده بالطريقة اللي أنتِ عايزاها.
أما اللحمة المفرومة ممكن تعصّجيها وتسيبيها تبرد قبل ما تشيليها في الفريزر، وتقسّميها على أكياس وتفرّغي منها الهواء، وبكده تبقى جاهزة عندك علشان تعملي بها صواني المكرونة بالبشاميل والجلاش والرقاق والطواجن.
ودي طريقة تتبيل اللحمة المفرومة: وهي إنك تجيبي بصلة وتقطّعيها لقطع صغيرة، وتشوّحيها على النار في سمن أو زيت، وبعد ما البصل يتحمّر شوية حطي اللحمة المفرومة والبهارات والملح، وسيبيها على النار لغاية ما تتعصّج.
خلصت حلقتنا النهارده..
استنينا وتابعينا لسه معانا نصايح كتيرة قبل العيد..
علشان تستمتعي بكل أيامه..
سلام،،،