مع رانيا.. ترمس مطحون وكربوناتو لبشرة نضرة والحنة لشعر ناعم
أهلًا بكل بنات قمر 14، في أول حلقة بعد شهر رمضان المعظم، النهارده معانا ماسكات وحاجات كتيرة هاقدمها لكم، هيكون معانا كرات النشا والورد لجمال البشرة ونضارتها، ماسكات بالحنة والبنجر لتغذية وتنعيم الشعر.
أهلًا بكل بنات “قمر 14” في أول حلقة بعد شهر رمضان المعظم..
النهارده معانا ماسكات وحاجات كتيرة هاقدمها لكم..
هيكون معانا كرات النشا والورد لجمال البشرة ونضارتها، وماسكات بالحنة والبنجر لتغذية وتنعيم الشعر.
تابعونا النهارده وكمان في الحلقات الجاية علشان معانا حاجات جديدة وكتيرة، وإن شاء الله تستفيدوا منها.
قبل ما نبدأ الحلقة.. فيه كتير منكم بيسألوني على شرايح البرتقال اللي جففناها ممكن نستخدمها إزاي، ودي هنستخدمها ونضيفها على ماسكات تانية هاقدمها لكم قريب، كمان كتير سألوني على الشامبو والبلسم للشعر تابعونا في الحلقات الجاية هنقدم لكم كل اللي طلبتوه.
ماسك الترمس والكربوناتو لبشرة نضرة
الماسك ده بيفتّح البشرة جدًّا وبيطرّيها وينعمها، وهو مناسب لكل أنواع البشرة.
المقادير:
- ملعقة كبيرة ترمس مطحون
- ملعقة كبيرة رز مطحون
- ملعقة صغيرة كربوناتو
- 3 ملاعق كبيرة مية ساخنة
الطريقة:
هنخلط الترمس والرز كويس أوي، وبعدين نحط عليهم الكربوناتو.. المكونات الجافة دي نقدر نخلطها ونخزنها في برطمان، ووقت ما نحب نعمل الماسك بناخد الكمية المناسبة ونعجنها بالمية؛ لكن ماينفعش نخزّنها وهي مخلوطة بالمية.
بعد ما نخلط المكونات الجافة دي كويس، هنحطّ عليها مقدار من المية الساخنة لعجنها، وممكن إننا نزود كمية المية؛ بحيث تكون العجينة ملمسها متوسط لا يابسة أوي ولا سايلة أوي.
لما نيجي نعجن الماسك ده هنحس إن فيه فوران بسيط، وده علشان فيه كربوناتو، ونقلّبه كويس علشان المكونات تتداخل مع بعض.
الماسك ده نقدر نستعمله على بشرة الوش، وممكن الجسم؛ بس مهم إنه يكون دافي مش سخن أوي، وطبعًا يكون الوش والجسم نظيف زي ما إحنا متعودين.
بنحطه على بشرة الوش، ونبعد عن منطقة العين ونفركه شوية، كمان بنحط منه على منطقة الجبهة، والناس اللي عندها قشور في منطقة الحواجب ممكن تحطّ منه وتعمل سنفرة للقشور دي، بعد ما نوزع الماسك ده على الوش كويس باخد الكمية الباقية، وأوزع منها على مناطق تعبيرات الوش.
من أكتر المناطق اللي بتعجز بسرعة في البشرة هي منطقة منتصف الجبهة بين الحاجبين، وعند زوايا العيون من الخارج، وعند زوايا الفم من الخارج، وهنسيب الماسك ده لمدة 15 : 20 دقيقة، وبعدين نشطف وشّنا.
بعد ما نمسح الماسك ندهن وشّنا بأي زيت مرطب؛ زي زيت اللوز، أو زيت حبة االبركة حسب عمر البشرة.
الماسك ده بيساعد على تفتيح البشرة، وإزالة الجلد الميت، وترطيبها، وبيديها نضارة، وبيطريها أوي.
سلطة البنجر
عايزة أقول لكم إن البنجر من الحاجات المفيدة جدًّا للبشرة والشعر؛ يعني لو أكلنا من البنجر يوميًّا قبل الأكل بنصف ساعة هيفيد جدًّا في إنبات الشعر ونضارة البشرة.
المقادير:
- كمية من البنجر
- زيت زيتون
- ثوم مفروم
الطريقة:
هنسلق البنجر نصف سلقة، وبعدين نقشّره ونقطّعه أرباع، وبعد كده نملأ برطمان بزيت الزيتون لحد المنتصف، ومعاه الثوم المفروم، وبعدين نحط البنجر ونحط البرطمان في التلاجة لمدة يوم، وبعد كده نبدأ ناكل البنجر.
ممكن ناكل الكمية اللي إحنا عايزينها قبل الأكل بنصف ساعة مثلًا أو ساعة، هتحسوا بنتيجة هايلة؛ لأنه بينبت الشعر بشكل قوي جدًّا.
ماسكات حنة لتغذية وترطيب الشعر
الماسك الأول لجذور الشعر
الماسك ده هنحطه على جذور الشعر فقط، وده بيساعد على تنظيف فروة الرأس لو فيها قشرة، أو فطريات، كمان بتغذي فروة الرأس؛ لكنها ممكن تنشفها شوية.
المقادير:
- 2 ملعقة كبيرة حنة
- ليمونة
- كمية من مية البنجر
الطريقة:
بنعصر الليمونة على الحنة، وبعدين نضيف عليهم كمية من مية البنجر، ونعجنهم كويس أوي؛ بحيث تكون الحنة لزجة ولينة؛ لأن الحنة كل ما تبقى لينة هتدي للشعر لون أكتر، ومش هتبقى ثقيلة على فروة الرأس.
لو القشرة في الشعر جامدة أوي ممكن نضيف عليه ملعقة صغيرة خل تفاح، ولو قشرة عادية يبقى هنكتفي بالليمون.
ممكن نسيب الحنة تخمر لمدة نصف ساعة أو ساعة، أو ممكن نستخدمها على طول مافيش مشكلة.
الماسك التاني للشعر
المقادير:
- 2 ملعقة كبيرة حنة
- قطرات ليمون
- 2 : 3 ملعقة صغيرة زيت سمسم
- كمية من مية البنجر
الطريقة:
هنخلط الحنة والليمون والزيت مع بعض كويس أوي، وبعدين نضيف مية البنجر ونعجنه.
ممكن نحط أي نوع زيت تاني من الزيوت المرطبة للشعر فقط؛ زي: زيت جوز الهند، أو زيت الحلبة، أو زيت اللوز الحلو.. والزيوت دي علشان تساعد على ترطيب الشعر وتغذيته، وماينشفش من تأثير الحنة زي الماسكات التانية.
طريقة الاستخدام:
نغسل شعرنا الأول، وبعدين نفرق الشعر من أسفل لأعلي بخطوط عرضية، ونحط من الماسك الأول على جذور الشعر فقط، وبعدين ناخد من الماسك التاني على الشعر نفسه، وهنسيب الماسكات على الشعر لمدة 3 : 4 ساعات، وبعدين نغسله.
بعد كده هتحسوا بنتيجة هايلة جدًّا؛ فروة رأس نظيفة وخالية من القشرة وبتلمع، وشعر طري وناعم ولامع، وده طبعًا من تأثير مية البنجر.
خلصت حلقتنا النهارده
استنونا الأسبوع الجاي وكل أسبوع
معانا ماسكات وحاجات جامدة كتير
سلام،،،
*********************
للرجوع للحلقات السابقة
اضغط هنا “جمالك من الطبيعة مع رانيا“
*********************
