اعملي لعيلتك أحلى "كحك" و"غريبة" و"بسكويت"

في عدد النهارده هنقدّم لكم وصفات مختلفة لحلويات العيد على طريقة الشيف "أسامة"..

كل سنة وأنتم طيبين كلها كام يوم وييجي العيد…

وفي عدد النهارده هنقدّم لكم وصفات مختلفة لحلويات العيد على طريقة الشيف “أسامة” واللي قدّمها في حلقات برنامجه “أسامة أطيب”…

[nggallery id=504]

الكحك
المقادير:

• 1/4 كوب سكر
• كوب سمن
• كوب لبن دافئ
• 2 1/2 كوب دقيق
• ملعقة صغيرة خميرة
• 1/4 ملعقة صغيرة روح كحك “ينسون ومحلب”

الطريقة:
1- نخلط السمنة مع السكر كويس جداً.

2- بعد كده نخلط الدقيق مع البيكينج باودر وروح الكحك، وبعد كده نضيفه تدريجيا على السمنة، وبعد كده نضيف اللبن الدافئ، ونخلطهم مع بعض كويس جداً.

3- بعد كده نقطّع العجينة لقطع صغيرة، ونحشيها بالحشو اللي إحنا عايزينه سواء ملبن أو مكسرات أو عجوة، وبعد كده نزيّن الكحك من بره بالمنقاش، وندخّله فرن ساخن على درجة حرارة 170، ونسيبه لمدة 30 دقيقة، بعد ما يستوي نطلعه ونرش عليه سكر بودرة.

[nggallery id=506]

الغريبة
علشان الغريبة تطلع معانا ناعمة لازم الزبدة اللي بنستعملها تكون ناعمة، وطبعا تكون بدون ملح.

المقادير:

• 2 كوب زبدة
• كوب سكر بودرة
• 3 1/2 كوب دقيق

الطريقة:
1- نضرب الزبدة بالمضرب شوية لغاية لما تفك من بعضها، وبعد كده نضيف عليها السكر البودرة ونخلطهم مع بعض كويس، وبعد كده نضيف الدقيق ونعجنهم كلهم مع بعض.

2- نشكّل العجينة، ويُفضّل إننا نشكّلها بأطراف الأصابع؛ لأن باطن الإيد بيكون سخن وممكن يسيّح الزبدة، وبنكوّرها وبنرصّها على الصاج، وممكن نزيّنها بالمكسرات.

3- بعد كده ندخّل الصاج في فرن ساخن على درجة حرارة 160 ونسيبها لمدة 15 دقيقة تقريبا، ويُفضّل إننا نحطها في الرف اللي في النصف، ونتابعها دايماً علشان لونها ما يتغيّرش.

[nggallery id=507]

بسكويت بالقرفة والقشطة
المقادير:

• 4 ملاعق صغيرة زبدة طرية
• كوب سكر
• كوب قشطة “وممكن نستبدلها بالزبادي بس نصفّي المية منه”
• 2 كوب دقيق
• 1/4 ملعقة صغيرة ملح
• كوب سكر
• بيضة
• سكر بودرة للتزيين

الطريقة:
1- نذوب الزبدة مع السكر كويس جداً لغاية ما يتداخلوا مع بعض تماماً، وبعد كده نضيف عليهم القشطة، ونقلّبهم كويس، وبعد كده نضيف البيضة.

2- نخلط الدقيق مع البيكينج باودر مع الملح، ونضيفهم على الزبدة والسكر والقشطة.

3- نجيب الصاج ونفرد عليه ورقة زبدة، ونقطّع العجين لقطع صغيرة، ونرصّها على الصاج، وندخله الفرن ونسيبه لمدة ربع ساعة في درجة حرارة 170 درجة، وبعد ما يطلع ممكن نرش على الوش قرفة وسكر بودرة.

[nggallery id=509]

بسكويت الشطرنج
البسكويت ده عبارة عن بسكويت بالفانيليا وبسكويت بالشيكولاتة، وبنرصّهم مع بعض علشان يعملوا في النهاية شكل الشطرنج…

مقادير بسكويت الفانيليا:

• كوب ونصف زبدة
• 1/3 كوب سكر
• 1/4 ملعقة صغيرة فانيليا
• صفار بيضة
• كوب ونصف دقيق

مقادير بسكويت الشيكولاتة:

• كوب ونصف دقيق
• 1/3 كوب كاكاو
• 1/2 ملعقة صغيرة بيكينج باودر
• 8 ملاعق كبيرة زبدة
• 1/2 كوب سكر
• بيضة

الطريقة:
1- لتحضير بسكويت الفانيليا، نضرب الزبدة مع السكر كويس جداً، وبعد كده نضيف صفار البيض، ونضربه كويس مع الزبدة والسكر.

2- بعد كده نخلط المقادير الجافة (الدقيق والفانيليا) مع بعض، ونضيفهم على خليط الزبدة والسكر، وندمجهم مع بعض لغاية ما نحصل على عجينة ناعمة، وبعد كده نحطّها في كيس بلاستيك في الثلاجة لمدة ساعة علشان العجينة تتماسك.

3- لتحضير بسكويت الشيكولاتة، نضرب الزبدة مع السكر، وبعد كده نضيف البيضة مع الاستمرار في العجن.

4- نخلط المقادير الجافة (الدقيق والبيكينج باودر والكاكاو) مع بعض، وبعد كده نضيفهم على خليط الزبدة والسكر وندمجهم مع بعض لغاية ما نحصل على عجينة ناعمة، وبعد كده نحطها في كيس بلاستيك في الثلاجة لمدة ساعة علشان العجينة تتماسك.

5- وبعد كده نجيب العجين ونفرده كويس بالنشابة على ورق زبدة، ونتأكّد إن سُمك العجينة كله أد بعضه من كل النواحي، ونتأكّد إن سُمك عجينة الشيكولاتة أد سُمك عجينة الفانيليا، وبعد كده نساوي أطراف العجينة.

6- بعد كده ندهن سطح واحدة منهم بطبقة من البيض، ونلزق عليه العجينة التانية.

7- نقطّعهم نصفين على شكل مستطيل، ونحط النصفين على بعض، وبعد كده نقطّعهم مرة كمان بالطول، وندهن سطح كل شريحة ببياض البيض ونلزقهم مع بعض بشكل متبادل، يعني نحط طرف عجينة الفانيليا على طرف عجينة الشيكولاتة، ونلزقهم على بعض بحيث نحصل على شكل زي الشطرنج، وبعد كده نقطعهم شرائح وندخلهم الفرن على درجة حرارة 170 لمدة 20 دقيقة.

[nggallery id=510]

البتيفور
المقادير:

• كوب زبدة طرية
• 1/2 كوب سكر بودرة
• 2 بيضة
• 1/2 ملعقة صغيرة فانيليا
• 1 1/4 كوب دقيق

الطريقة:
1- نضرب الزبدة مع السكر البودرة لغاية ما الخليط يبقى ناعم أوي ولونهم يبقى أبيض، وأثناء العجن بنضيف بيضة بيضة، ونسيبهم يختلطوا مع بعض كويس جداً، وبعد كده نخلط الدقيق مع الفانيليا، ونضيفهم على العجينة ونستمر في العجن لغاية ما نحصل على عجينة ناعمة وطرية جداً، وممكن نعمل بتيفور بالكاكاو بإننا نضيف على العجينة كمية من الكاكاو.

2- بعد كده نجيب كيس الحلواني، ونحط فيه العجينة ونبتدي نقطّعها بأشكال مختلفة، وبعد كده ندخلهم الفرن على درجة حرارة 170 ونسيبه لمدة 15 دقيقة، وبعد ما تستوي ممكن نلزق البتيفور ببعضه بالشيكولاتة السايحة، ونزيّنه من بره بجوز الهند أو المكسرات.

[nggallery id=511]

الكليجة
المقادير:

• ملعقة صغيرة خميرة
• 1/2 ملعقة صغيرة سكر
• كوب ماء دافئ
• 3 كوب دقيق
• ملعقة صغيرة بيكينج باودر
• ملعقة صغيرة حبهان مطحون
• 1/2 كوب زيت ذرة
• 1/4 كوب سمن
• عجوة للحشو

الطريقة:
1- نخلط كل المكونات الجافة مع بعضها، وبعد كده نضيف عليهم السمنة والزيت والماء بالتدريج، ونعجنهم مع بعض كويس جداً.

2- نسيب العجينة لمدة 35 دقيقة علشان تتخمّر، وبعد كده نفرد العجينة بالنشابة ونحشيها بالعجوة، وممكن نعملها على شكل دواير أو مربعات، ونرصّها في الصاج، وندهن وش العجينة بالبيض، وندخّلها الفرن على درجة حرارة 170 ونسيبها لمدة 30 دقيقة.

المعمول بحشو التفاح
المقادير:

• 1/2 كوب لبن
• كوب زبدة
• 2 كوب دقيق سميد
• كوب دقيق
• 1/4 كوب سكر
• 2 ملعقة كبيرة ماء زهر
• سكر بودرة

للحشو:

• تفاح مقطّع مكعبات صغيرة
• زبدة
• سكر بودرة أو سكر بني
• قرفة

الطريقة:
1- نغلي الزبدة مع اللبن، وأثناء ما الزبدة بتغلي نخلط الدقيق الأبيض مع دقيق السميد والسكر، وبعد كده نضيفهم على الزبدة واللبن، ونعجنهم كويس مع بعض مع إضافة ماء الزهر، ونسيب العجينة تبرد شوية.

2- بعد كده ننقلها في طبق تاني، ونغطّيها ونشيلها في الثلاجة لمدة 8 ساعات.

3- بعد كده نطلّع العجينة من الثلاجة، ونقطّعها لقطع صغيرة ونحشيها ببحشو التفاح أو بالعجوة، ونشكّلها زي ما إحنا عايزين، وندخله الفرن على درجة حرارة 170 ونسيبه لمدة 25 دقيقة.

لتحضير حشو التفاح:
نشوّح التفاح في كمية صغيرة من الزبدة وكمية صغيرة من السكر البودرة أو السكر البني وشوية قرفة.

وبكده يكون خِلص عددنا النهارده…
وكل سنة وأنتم طيبين…
إلى اللقاء،،،