سَلطة الفتوش وكفتة داوود باشا في عزومة 2 رمضان

سَلطة الفتوش
المقادير:

• 3 ثمرات طماطم
• 3 ثمرات خيار
• بصلة صغيرة
• خس كابوتشا
• 3 ثمرات فلفل ألوان (أحمر + أخضر + أصفر)
• 2 معلقة كبيرة زيت زيتون
• فص ثوم مفروم
• عيش لبناني أو شامي
• عصير ليمونة
• ملح وفلفل أبيض
• ملعقة صغيرة سماق

الطريقة:
1- اغسلي الخضار كويس، وبعد كده قطّعي الطماطم، والخيار، والفلفل، والكابوتشا مكعبات صغيرة.

2- افرمي البصل، واخلطيه مع باقي الخضار اللي قطعتيه.

3- قطعي العيش قطع صغيرة، ودخّليه الفرن علشان يتحمّص، وممكن ترشّي عليه معلقة زيت قبل ما تدخّليه الفرن.

4- دلوقتي هنحضّر الدريسينج أو الصوص بتاع السلطة، وهو خليط من الملح، والفلفل، والسماق، وعصير الليمون، والثوم، وزيت الزيتون.

5- عند التقديم رشّي الدريسينج على السلطة، وقلّبيهم مع بعض كويس، وعلى الوش حطّي العيش المحمص.. وبالهنا والشفا.

*******************

شوربة الطماطم
المقادير:

• 4 ثمرات طماطم متوسّطة
• ثمرة بصل
• ثمرة جزر
• ثمرة بطاطس صغيرة
• فص ثوم مفروم
• ملعقة صغيرة ريحان مفرومة
• ذرة سكر
• ملعقة طماطم بوريه (صلصة جاهزة)
• عيش توست مقطع مكعبات وحمَّصيه في الفرن
• عود كرفس
• 2 معلقة صغيرة زبدة 
• 1/ 2 معلقة صغيرة خل
• 1/ 4 كوب كريمة لباني مخفوقة

الطريقة:

1- اغسلي الخضار كويس، وبعد كده قطّعي الطماطم، والخيار، والفلفل، والكابوتشا مكعبات صغيرة.

2- رجعي الخليط على نار هادية، وطعميه بالملح والفلفل الأبيض والسكر والخل علشان يدي طعم مِزز شوية، ارفعي الشوربة من على النار، واغرفي في أطباق التقديم اللي بتكون حاطة في كل طبق منهم معلقة من الكريمة المضروبة، وممكن تحطي العيش التوست جوه الشوربة أو تقدّميه منفصل لوحده.

3- قلّبي كل الحاجات دي على النار، مع قطعة زبدة صغيرة، ومعجون الطماطم مع التقليب لغاية لما تلاقي المكونات بدأت تستوي أو تتهري، وبعد كده اضربيهم في الخلاط وصفّيهم كويس جدا.

*******************

كفتة داوود باشا

المقادير:

• كيلو لحمة كندوز من وش الفخدة ومفرومة
• 1/ 2 كيلو طماطم معصورة
• معلقة كبيرة معجون طماطم
• فصين ثوم مفرومين
• بصلة كبيرة مفرومة
• حزمة كزبرة خضراء
• 1/ 4 كيلو صنوبر (اختياري)
• 2 بصلة
• 2 معلقة كبيرة زبدة
• ملح وفلفل أبيض

الطريقة:
1- اللحمة لازم يكون لها مواصفات معينة؛ يعني لو هتفرميها في البيت أو عند الجزار اطلبي منه إنه يفرم لك معاها بصلة وقطعة ليّه أد 1/ 8 كيلو، وتتفرم مرتين؛ علشان تبقى مفرومة ناعمة، وتبّليها بالملح والفلفل وجوزة الطيب.

2- نبدأ ناخد البصلة سوتيه مع الثوم، وعصير الطماطم، والطماطم البوريه، والزبدة، وسيبيهم على نار هادية.

3- في الوقت ده نروح نكوّر الكفتة لكور صغيرة، ونرصّها في الصينية، وقبل ما ندخلها الفرن نرش رشة دقيق بسيطة عليها على الوش، وبعد كده ندخّلها الفرن على درجة حرارة 120 لمدة 10 دقايق، ونقلّبها من وقت للتاني علشان تستوي كلها من كل الجوانب.

4- عقبال ما الكفتة تستوي في الفرن تكون الصلصة اللي على النار استوت، وتحطي فيها الكفتة وتقلّبيها شوية على النار هادية؛ علشان الكفتة تشرب من الصلصة، وقبل ما ترفعي الحلة من على النار انزلي بالكزبرة الخضراء، والطبق ده ممكن تقدّميه مع أرز أبيض، وعند التقديم حطّي الصنوبر علشان تزيّني به.

*******************

تشيز كيك بالمانجو
المقادير:

• 1 علبة بسكويت
• 1/ 4 كوب زبدة
• علبة جبنة بالكريمة
• 6 ملاعق صغيرة جيلي بطعم المانجو
• 1/ 2 كوب عصير برتقال
• 3 حبات مانجو مقطعة قطعا صغيرة
• 1/ 2 كوب سكر
• 2 معلقة كبيرة عصير ليمون
• 2 كوب كريمة للخفق

الطريقة:
1- دقي البسكويت كويس؛ لغاية ما يبقى ناعم، وضيفي إليه الزبد الطري وامزجيهم كويس مع بعض.

2- حطّي البسكويت والزبدة في صينية مستديرة ذات جوانب متحركة (قطرها 20 سم)، واضغطي عليها بإيدك كويس؛ علشان الخليط ينزل في قاع الصينية، وبعد كده حطّي الصينية في الفريزر لمدة ساعة.

3- دوّبي بودرة الجيلي في عصير البرتقال، وحطّيهم هما الاتنين على نار هادئة لغاية ما يذوب الجيلي تماماً مع التقليب باستمرار، وبعد كده اطفي البوتاجاز، وسيبي الجيلي لغاية ما يبرد.

4- اضربي الجبن مع السكر في وعاء باستخدام مضرب بيض كهربائي لغاية ما الخليط ده يبقى ناعم، وضيفي إليه عصير الليمون مع الاستمرار في الضرب لمدة دقيقة أخرى.

5- اخفقي الكريمة كويس باستخدام مضرب البيض، وضيفي نص الكريمة المخفوقة إلى مزيج الجبن، وقلّبيهم مع بعض كويس.

6- هاتي قطع المانجو الصغيرة وضيفيها إلى الجبنة، وضيفي عصير البرتقال وقلّبيهم مع بعض كويس، وبعد كده صبّي المزيج على البسكويت اللي إنت عملتيه، وسوّي السطح بظهر المعلقة وحطيه في التلاجة لمدة 7 ساعات، وبعد كده طلّعيه من التلاجة، وزيّنيه بقطع المانجو، والباقي من الكريمة المخفوقة.

واستنونا بكره مع عزومة جديدة إن شاء الله..
مع أطيب التمنيات بصوم مقبول وإفطار شهي بإذن الله..
سلااااااااام،،،،