محتارة تعملي إيه في وجبة العشاء؟!
كل يوم بتعملي نفس الأكلات وزهقتي!!
عايزة تجددي وتفاجئي عيلتك بأصناف جديدة على العشاء؟!
يبقى تابعينا علشان النهارده هنقدم لكم مجموعة من الوصفات السهلة والسريعة..
علشان تعملي بها أحلى وألذ وجبة عشاء..
خليكي معانا..
**********************
بيض أومليت بالجبن والسبانخ
ده طبق بيض مش عادي لأن فيه كل العناصر الغذائية، يعني ممكن نعتبره وجبة كاملة لوحده...
المقادير
4 بيضات
1/4 كوب جبن شيدر مبشور
كوب من أوراق السبانخ
2/3 كوب من الفلفل الأحمر المقطع قطعاً صغيرة
2 كوب بصل مقطع قطعاً صغيرة
1/4 معلقة صغيرة فلفل أسود
معلقة بقدونس مفروم
قليل من الزبدة أو الزيت على حسب الرغبة
قليل من الملح
قليل من الفلفل الأحمر المطحون
معلقة خل تفاح
الطريقة
1- اخلطي الفلفل الأحمر المقطع مع الخل والبصل والفلفل الأسود في وعاء غويط وسيبيهم شوية.
2- هاتي طاسة تيفال وحطي فيها الزبدة وبعدين حطي الطاسة على نار متوسطة.
3- في وعاء تاني حطي البيض مع البقدونس والملح والفلفل الأحمر المطحون واضربيهم بالمضرب الكهربي على سرعة متوسطة لغاية ما كل المكونات تختلط ببعضها وتبقى عاملة زي الزبدة، وبعد كده ضيفي باقي المكونات عليه.
4- صبي البيض في الطاسة وسيبيه على نار متوسطة من غير تقليب لمدة 4 أو 5 دقايق لغاية ما البيض يستقر، وقبل ما البيض يستوي تماماً رشي الجبنة وطبعاً الطبق ده لازم يتاكل سخن.. وبالهنا والشفا
***********************
فطيرة المهماري المقلية
ده نوع خبز طعمه حلو ومسكّر وممكن يتعمل على الفطار أو على العشاء، والخبز ده ممكن يتاكل بارد أو ساخن، وممكن ناكل معاه جبنة أو مربى...
المقادير
3 كوب دقيق
3/4 كوب سكر
معلقة كبيرة زبدة
بيضة
معلقة صغيرة خميرة مذوبة في قليل من الماء الدافئ
3/4 كوب لبن
3 معالق جوز هند مبشور
معلقة كبيرة حبهان مطحون
زيت للقلي
الطريقة
1- أحضري وعاء غويط واخلطي فيه الدقيق مع السكر وجوز الهند والخميرة والحبهان المطحون، وحطيهم على جنب.
2- أحضري وعاء تاني وامزجي فيه اللبن مع البيض والزبدة، وبعد ما يمتزجوا تماماً مع بعض ابدئي ضيفي الخليط ده على خليط الدقيق اللي عملتيه في الأول بس خلي بالك إنك هتضيفيه بالتدريج وبالراحة، وفي أثناء الإضافة بتقلّبيهم مع بعض علشان يعملوا عجينة متماسكة وناعمة، وبعدين غطّي العجينة دي بقطعة قماشة وسيبيها في مكان دافئ لمدة ساعة علشان تخمر.
3- قسمي العجينة لـ 6 قطع متساوية وافردي كل قطعة على شكل دائرة يكون سمكها حوالي 2 سم، بعد كده قطّعي كل دائرة من اللي عملتيهم أربع أرباع.
4- بعد ما قطعتي العجينة سخّني زيت كتير في طاسة عميقة وبعد ما الزيت يتسخن ابدئي اقلي مثلثات العجين اللي عندك فيه، وقلّبيها كذا مرة لغاية ما تاخد لون ذهبي جميل وتطفو على سطح الزيت، وبعد كده طلّعيها.. وبالهنا والشفا.
**********************
تارت بالجبنة والبسطرمة
التارت ده طريقته سهلة جداً ومكوناته كلها متوفرة في أي بيت..
المقادير:
العجينة:
3 كوب دقيق
2/1 كوب زبدة سايحة
2/1 كوب زيت
2/1 كوب لبن
بيضة
ذرّة ملح
كيس بيكنج باودر ينقص منه ملعقة صغيرة علشان هنستخدمها في الحشو
الحشو:
8/1 كوب جبن موتزاريلا، أو رومي على حسب المتوفّر عندك
مثلث روكفور أو نستو
8/1 كيلو بسطرمة
زيتون أسود
معلقة بيكنج باودر
بيضتين
كوب زبادي
كوب لبن
3 معالق دقيق
الطريقة:
أولاً تحضير العجينة:
1- نخلط الزبدة مع البيضة واللبن والزيت وبعدين نضيف عليهم الدقيق شوية شوية، وبعد كده الملح والبيكنج باودر.
2- هاتي الصينية وادهني قاعدتها سمنة ودقيق وبعد كده افردي عليها العجينة.
3- ضعي الصينية في فرن ساخن لمدة 20 دقيقة.
ثانياً تحضير الحشو
1- اضربي جميع مكونات الحشو -ما عدا الزيتون- في الخلاط، وحطّي الحشو فوق العجينة اللي طلّعتيها من الفرن، وبعد كده وزّعي الزيتون على الوش.
2- توضع الصينية في فرن ساخن ونختبر سواها كل شويه بإننا نغرس فيها سكين؛ لو طلعت السكينة من غير ما يكون عليها عجين يبقى كده التارت استوى.. وبالهنا والشفا.
***********************
كبدة إسكندراني
ده طبق مميز جداً لو عايزة تعملي وجبة عشاء مميزة، وكمان له فوائد غذائية كتيرة ومش بياخد وقت خالص في تحضيره..
المقادير:
1/2 كيلو كبدة طازجة ومقطّعة شرائح رفيعة
۲ حبة فلفل أخضر مقطعة
فلفل أحمر حار (حسب الرغبة)
٥ فصوص ثوم
حبة طماطم مقطّعة قطعاً صغيرة
۳ معالق كبيرة خل
عصير ليمونة
زيت زيتون
ملح - فلفل أسود - شطة (حسب الرغبة)
الطريقة:
1- هاتي طبق كبير علشان تتبّلي فيه الكبدة بعصير الليمون والخل والملح والفلفل والشطة.
2- ضعي الزيت على النار وشوّحي فيه الثوم قليلاً، وبعد ما لونه يبقى ذهبي ضيفي الفلفل الأخضر والفلفل الحار.
3- وبعد كده ضيفي الكبدة وفي الآخر خالص ضيفي الطماطم المقطّعة، وقلبيهم قليلاً على نار هادية لغاية ما تحسّي إن الكبدة استوت، وبعد كده قدّميها وهي سخنة.. وبالهنا والشفا.
**********************
قرص العجة الأخضر
العجة دي من الحاجات اللي بتعتبر وجبة متكاملة، وممكن تنفع كوجبة فطار أو عشاء..
المقادير:
بيضتين
٤ معالق بقدونس مفروم
معلقتين بصل أخضر مفروم
فلفل أخضر حار
ملح - فلفل أسود
معلقة زبدة
الطريقة:
1- اضربي البيض بالشوكة كويس، وبعد كده ضيفي عليه البصل الأخضر والبقدونس والفلفل والملح والفلفل الأسود.
2- هاتي طاسة وسخّني فيها الزبدة، واقلي فيها البيض على الوجهين لغاية ما تستوي، وبعد كده حطّيها في طبق التقديم، وزيّنيها بالبقدونس.. وبالهنا والشفا.
*************************
بسكويت بصوص الشوكولاته
دي وصفة سهلة جداً، ومكوناتها موجودة ومتوفرة في كل بيت، ومش هتاخد منك أكثر من ربع ساعة في تحضيرها؛ ده غير إنها بتدّي طاقة كبيرة، وممكن إنك تكتفي بها كوجبة للعشاء...
المقادير:
5 بيضات
فانيليا
5 معالق سكر
5 معالق كاكاو
ربع كيلو زبدة طرية
2 قالب بسكويت ماري (أو أي نوع بسكويت موجود عندك، وممكن تستبدليه بشرائح كيك تكون باقية عندك)
الطريقة:
1- يضرب البيض مع الفانيليا والسكر والكاكاو والزبدة في الخلاط الكهربائي إلى أن يتجانس الخليط، وبعد كده ارفعيه على نار متوسطة مع التقليب المستمر لمدة 10 دقائق، وبعد كده حطي الخليط في الثلاجة.
2- هاتي صينية بايركس، وكسّري فيها البسكويت لقطع صغيرة، وممكن تستبدليه بشرائح الكيك زي ما قلنا.
3- صبي خليط الكاكاو والزبد على البسكويت من فوق.
4- ممكن تزيّني وش الصينية بكريم شانتيه أو بشرائح الموز على حسب رغبتك.. وبالهنا والشفا.
ولغاية هنا خلص عددنا لكن وصفاتنا لسه ما خلصتش
وفي انتظار آرائكم ومشاركاتكم
إلى اللقاء،،،
بجد شكرا وتسلم الايادي ياريت
بجد شكرا وتسلم الايادي ياريت بقي شوية وصفات للنحافة بس ضروري قبل الشتا ما يخلص
تسلم الايادي بجد وصفات تحفه
تسلم الايادي بجد وصفات تحفه انا هبدأ اجرب صنف صنف بس ياريت بقي وصفات للنحافه السريعه ضروري جدا جدا
هل تناول البطاطس المحمره
هل تناول البطاطس المحمره بكثره (يوميا او اكثر من مره في اليوم) له اضرار سلبيه على الصحة؟ وهل تؤدى فعلا لمرض السكر؟ ارجو الاجابه وجزاكم الله كل خير.
==========
رد بص وطل:
أكيد تناول الأطعمة المقلية بكثرة بيضر بالصحة، أما البطاطس فهي مفيدة طبعاً للجسم، لكن التوازن مطلوب في أي حاجة وينصح بعدم الإكثار من نوع واحد من الأكل.
الاكلات مو مره حلوه شكل طعمها
الاكلات مو مره حلوه شكل طعمها مو ذاك الزوود
تسلم ايديكى وياريت كمان افكار
تسلم ايديكى وياريت كمان افكار للفطار وكمان وجبات لاطفال فى الفطار
ممكن طريقة تشيكن الاجريك لانى
ممكن طريقة تشيكن الاجريك لانى بموووووت فيها وميرسى
بجد تسلم ايديك وصفات سهلة
بجد تسلم ايديك وصفات سهلة وسريعة ومش مكلفة ممكن طريقة عمل البيتزا
بصراحه اكلات للعشاء فوق الوصف
بصراحه اكلات للعشاء فوق الوصف وما فى حاجه مكلفه ميرسى جداااااا جداااا على كل ما تقومو بنشره فعلا موقع راااااااائع ريناد
هاااااى رنا بجد كل مواضيعك
هاااااى رنا بجد كل مواضيعك تحفه واحنا مش عرفين نشكرك ازاى ربنا يخليكى لينا وتنقذينا من المواقف اللى بنقع فيها...رنا انا طلبى جيبي لنا شويه اكلات او حلويات تتعمل بسرعه اوى وبرضه متكلفش اوى واهم حاجه فى الاكلات تبقى نواشف وحاجات خفيفه اصل نينا دايما تطلب منى الحاجات دى وانا لازم ابيض وشى قدامها خاصه انى لسه متجوزه من 20 يوم بس ههههههههههه.. وشكرا ايمى اوى على ردك مقدما اللى ان شاء الله هيعجبنا باااااااااااى.
============
رد بص وطل:
أولاً نحب نبارك لك صديقتنا العزيزة على الزواج، ونتمنى لك حياة سعيدة، ونوعدك إننا دايماً نقدم لكم أكلات جديدة ومش مكلفة وتابعينا دايماً لإننا كل يوم بنقدم وصفة وكل يوم جمعة بيكون عندنا عزومة كاملة فيها وصفات متنوعة من العصير والحلو والسلطة والطبق الرئيسي والشوربة.
حلو قوى تسلمي على الطرق
حلو قوى تسلمي على الطرق الجميله دى.
لو سمحتم انا عايزة وصفات
لو سمحتم انا عايزة وصفات لزيادة الوزن بس فى مدة قصيرة ياريت تردوا بسرعه.
==================
رد بص وطل:
حاضر صديقتي العزيزة نوعدك إننا نقدم لك وصفات لزيادة الوزن في أقرب وقت.
الوصفات تحففففففففففففففه
الوصفات تحففففففففففففففه كلها وسهله جدااا، بس اخر وصفه بتاعة البسكويت بالشيكولاته احطه بعد كده فى الفرن عشان هو فيه بيض ولا اكله على طول؟؟
===============
رد بص وطل:
صديقتي العزيزة، بعد ما بتخلطي مكونات الصوص مع بعضها بترفعيها على النار لمدة 10 دقايق، وبعدين بتحطيه في الثلاجة وبعد ما يبرد بتصبيه على البسكويت.
السلام عليكم طبعا اولا احب
السلام عليكم طبعا اولا احب اشكركم على مجهودكم وعلى تعبكم معانا بس انا عندى تعقيب صغير انا جربت تارت الجبنه والبسطرمه بس عايزه اقول ان المقادير دي مش مظبوطه خااااااااااالص عشان 3 كوبايات دقيق قليله جدا على نص كوبايه سمنه ونص كوبايه زيت هتطلع مسمنه جدا والعجينه مش هتمسك فى بعضها يا ريت تعدلوا المقادير او تجربوا الحاجه قبل ما تنشروها وشكرا جزيلا لكم.
=============
رد بص وطل:
صديقتي العزيزة المقادير مظبوطة ومفيهاش حاجة غلط، و3 كويايات دقيق مش كتير خالص على 1/2 كوب سمنة سايحة و1/2 كوب زيت يعني تقريباً كوب واحد من المادة الدهنية، ولو لقيتي العجينة مش متماسكة معاكي وإنتي بتعمليها ممكن تزودي شوية دقيق.
وصفات جميلة جزاكي الله خيرا
وصفات جميلة جزاكي الله خيرا
ازاى هناكل البيض الني بدون
ازاى هناكل البيض الني بدون طبخ فى بسكويت بصوص الشوكولاته لم تذكرى وضعه فى الفرن.
==============
رد بص وطل:
بصي يا وفاء بعد ما بتخلطي كل مكونات الصوص مع بعضها بترفعيها على النار لمدة 10 دقايق وبعد كده بتحطيها في الثلاجة وبعدين بتصبيها على البسكويت.
انا جعت اوي .. بس ع العموم
انا جعت اوي .. بس ع العموم شكرا ع الوصفات دي وان شاء الله هجربها ..
ميرسى جدا على الوصفات الجامده
ميرسى جدا على الوصفات الجامده جدااااا دى، بس ياريت تعرفونا طريقه عمل الصوص الاورانج اللى بيبقى فى بوفيه السلطات فى اى مطعم وميرسى ليكم اووووووووى.
===============
رد بص وطل:
ميرسي ليكي إنتي صديقتنا العزيزة على متابعتك لينا وإن شاء الله نقدم لك طريقة عمل الصوص اللي إنتي عايزاه قريب جداً.
الوصفات كلها تحفه بس انا كنت
الوصفات كلها تحفه بس انا كنت عايزه اعرف هي آخر وصفة مش بتدخل الفرن؟؟ وهل ممكن نستبدل الزبده بزيت أو سمنة؟؟؟
============
رد بص وطل:
ميرسي ليكي يا سلمى على ذوقك، وبالنسبة لآخر وصفة فإنتي بعد ما بتخلطي مكونات صوص الشيكولاتة مع بعضها بترفعيها على النار وتسيبيها لمدة 10 دقايق، وبعد كده بتحطيها في الثلاجة وبعد ما تبرد حطيها على البسكويت، وممكن تستبدلي الزبدة بسمنة عادية.
besara7a wasfaat hailaa bas
besara7a wasfaat hailaa bas ana kont 3awza as2al hya a5er wasfa mesh btd5ol el forn ????
=============
رد بص وطل:
إنتي بتسوي الصوص بعد ما بتخطلي مكوناته مع بعضها على النار لمدة 10 دقايق.
اولا عاوزه اقول حاجه اول وجبه
اولا عاوزه اقول حاجه اول وجبه البيض بالجبنه والسبانخ اللى شرح الطريقه نسى خالص السبانخ بس بجد حاجات جميله وتفتح النفس انا جعانه هدخل اكل بقى.
============
رد بص وطل:
ميرسي ليكي يا ملك على ذوقك ونتمنى إنك تجربي الوصفات وتعجبك، وبخصوص وصفة البيض والسبانخ فاحنا قولنا إننا بعد ما ما هنضرب البيض مع التوابل في المضرب الكهربي هنضيف باقي المكونات عليه بما فيهم السبانخ.
لالالا بجد انا زعلانة منكم
لالالا بجد انا زعلانة منكم اوى انا كل ما ادخل القسم ده اخرج منه جعانة بحس انى نفسي انط كده في الشاشة ده كفاية بس التنسيق ومنظر الاكل كده انتم عايزين لكم احمد خطيبي.. بجد انا كله كله عجبني بس زهقت من الكبدة الاسكندرانى لانى من الاسكندرية.. شكرا ليكم جدا جدا.
أنا عندي سؤال مستعجل جدا انا
أنا عندي سؤال مستعجل جدا انا معزومة بكرة علي عقيقة بنت اخو واحدة صاحبتي ومش عارفة هل مفروض اخد معايا هدية دهب او انقط ولا الحاجات دي للعيلة بس وحد اقترح عليا اني اجيب لبس بيبي صغنون شيك كده انا وصاحبتي من مستوي اجتماعي ومادي كويس والحمد لله بس انا مش عارفة اجيب ايه مناسب للمناسبة ودرجة القرب ان المولود يبقي ابن اخو واحدة صاحبتي وفي نفس الوقت مايكونش حاجة مبالغ فيها ولا حاجه قليلة فيبقي منظري وحش!! ياريت تردوا عليّ باسرع وقت!!
=============
رد بص وطل:
صديقتي العزيزة درجة القرب بينكم ما تسمحش بإنك تاخدي حاجة دهب أو تنقطي بفلوس لكن ممكن تجيبي هدية بسيطة مع بوكيه ورد أو تورتة.
وصفات حلوة بس ليا استفسار
وصفات حلوة بس ليا استفسار وصفة البسكويت بصوص الشيكولاتة دي مبتدخلش فرن؟؟؟
=========
رد بص وطل:
إنتي بتسوي صوص الشيكولاته على النار قبل ما تصبيه على البسكويت.
جامدين اخر حاجة أنا بجد
جامدين اخر حاجة أنا بجد وصافتكوا بكتبها كلها عشان هتجوز واعملها لخطيبي عشان بيموت في الاكلات الجديدة والغريبة بس عايزة طلب ياريت تعملوا عدد عن مجموعة عصاير جديدة عشان خطيبي بيحب العصائر بليز.
==========
رد بص وطل:
صديقتى العزيزة shooshoo شكراً لاهتمامك وتابعينا لأن إن شاء الله قريباً هنعمل لك عدد عن العصائر.
إيــه الحاجات دى يا جماعة
إيــه الحاجات دى يا جماعة والله العظيم أنا هاين عليه أجى عندك يا رنوش وأبوسك من خدك دة وخدك دة الاكلات اكتر من تحفة تـــسلم إيدك واكتر حاجة عجبانى مووت هيا ...فطيرة المهمارى..تارت بالجبنه والبسطرمة...والكبدة الاسكندرانى تجنن الوصفات بصراحة فوق العادى بكتير.
=============
رد بص وطل:
صديقتى العزيزة منامينو شكراً ليكى ويارب نفضل عند حسن ظنك على طول.
وصفه التارت دى عجبتنى جداً
وصفه التارت دى عجبتنى جداً وعاوزة أجربها بس ليا سؤال أنا ليه سوتها الأول نص سوى لحد 20 دقيقه وبعدين اطلعها احط الحشو وادخلها تانى تكمل سواها؟
=============
رد بص وطل:
لإن مكونات الحشو مش بتحتاج إنها تعد لفترة طويلة في الفرن.
بصراحة تحفة انا مش عارفة أعمل
بصراحة تحفة انا مش عارفة أعمل ايه ولا ايه من الوصفات دى برافو عليكم يا بص و طل جوعتونى بصراحة تسلم الايادى.
===========
رد بص وطل:
صديقتى العزيزة داليا شكراً ليكى وياريت كل الوصفات دى تعجبك لما تعمليها.
مهما بجد نقول لكم ميرسى ليكم
مهما بجد نقول لكم ميرسى ليكم وعلى مجهوداتكم الروعة دي مش هنديكم حقكم برضه.. بس ليا سؤال على البسكويت اللي بصوص الشيكولاته هو ازاى مش هيدخل الفرن وهو مسقى بالبيض ناى ارجو الرد؟؟
=========
رد بص وطل:
ميرسي ليكي جداً يا جوجو على ذوقك، وبالنسبة للبسكويت بصوص الشيكولاته فإنتي بتحطي الصوص على النار لمدة 10 دقايق وبعد كده بتحطيه في الثلاجة علشان يبرد قبل ما تصبيه على البسكويت.
