كل بنت دلوقتي بتستعد لتجهيز ديكور شقتها، لازم تهتم بالدهانات؛ لأنها واجهة الشقة؛ ولأنها كمان اللمسة الفنية اللي بتظهر جمال الأثاث والديكور..
عن الجديد في ألوان واشكال الدهانات، هيكون حوارنا النهارده مع مهندس الديكور/ أحمد يحيى...
إزاي نعرف نختار ألوان الدهانات المناسبة لكل غرفة؟
فيه بعض الأساسيات اللي لازم ناخد بالنا منها وإحنا بنختار ألوان الشقة؛ يعني مثلا باب الشقة لازم يكون له طابع ولون رسمي شوية، أما غرفة الريسبشن فأكثر لون مناسب لها هو اللون البيج؛ لأنه لون ترابي ومحايد وشيك، وكل ما زادت عليه درجة اللون الأصفر، زادت شياكته.
أما غرفة النوم بيمشي معاها ألوان زي اللون البنفسجي والأبيض، والألوان دي بتعبّر عن الرومانسية، بجانب اللون الروز وهو لون يعبّر عن الخجل.
ونيجي لغرفة السفرة، وأكثر لون بيمشي معاها هو اللون الأحمر؛ لأنه بيوحي بالشجاعة والدفء، وكمان بيساعد على فتح الشهية.
وبالنسبة لغرفة المعيشة (الليفينج)؛ فدي ممكن ندهنها باللون البرتقالي، وهو لون يدل على الترحاب والسعادة والمرح والبهجة.
أما الأنتريه من الأفضل إننا نختار له لون موحّد، ونجمّله باللوحات أو برسومات مدهونة على الحائط.
هل ممكن نعمل أكتر من لون في حوائط الغرفة الواحدة؟
ممكن نعمل أي غرفة بأكثر من لون؛ فمثلا اللون الأصفر لون يعكس أشعة الشمس، ويعكس الانتباه والتركيز وينشّط الذاكرة.
أما اللون الأخضر بيعكس السلام والألفة والمحبة، وبيضيف أجواء طبيعية على المكان، وهو من أكثر الألوان اللي بتهدّي الأعصاب، والعين بترتاح لها.
وأكثر الألوان المتناسقة مع بعض الأخضر مع الأزرق، والأورانج مع الأصفر، والأخضر مع الأصفر، وممكن نقسّم الحائط نصفين؛ اللون اللي فوق غامق واللون اللي تحت فاتح، ونفصل بينهم بالبوردر (فاصل).
والبوردر ده عبارة عن إيه؟
هو عبارة عن شريط بنجيبه من محل الدهانات، وبنلزقه على الحائط في الفواصل بين لونين أو درجتين من لون واحد، وده بيتناسب أكثر مع غرفة الأطفال، وبيكون مثلا أزرق غامق تحت وأزرق فاتح فوق وبينهم بوردر، وبيبقى على شكل ألوان متداخلة أو دباديب أو رسومات مختلفة، وممكن البوردر يكون بديل عن الكورنيش اللي الموجود في الأسقف.
إيه أحدث أشكال وأنواع الدهانات دلوقتي؟
يوجد دهان الستوكو، وده نوع من الدهانات بيعطي إحساس الرخام، وده عبارة عن معجون بندهنه على الحائط، وبعدين نجيب بوردة ونمشّيها على الحائط علشان تدّي لمعة الرخام؛ وأحلى ألوانها: النبيتي والأخضر، ده غير كمان الحوائط المرشوشة بالإيربرش؛ ودي بتكون زي مسدس البخ، وميزتها إنها بتدّي تأثيرات لونية مختلفة؛ يعني مثلا تعمل الحائط بألوان مدرجة من أزرق غامق إلى أزرق فاتح، وبالإضافة طبعا إلى دهانات الزيت والبلاستيك.
ومن أحدث أشكال الديكور اللي بتتعمل باستخدام الدهانات، هي اللوحات المودرن اللي بتترسم على الحوائط.
إزاي نقدر نستخدم اللوحات المدهونة دي في التغيير من شكل الديكور؟
اللوحة المودرن المدهونة هي اللي بتتعمل بالدهانات بدلا من اللوحات الجاهزة؛ يعني مثلا باشوف الحائط لونه أزرق؛ فأقوم بتقسيم مكان اللوحات على الحائط إلى ثلاثة مستطيلات أو أربعة مربعات فوق بعض أو مستطيلين من بره وجواهم مربعات، وأدهن اللوحة بنفس لون الحائط، وبعد كده ألعب في شكل اللوحة من الداخل بالرسومات وكأنه منظر جمالي، وتظهر كأنها بداخل الحائط وجزء منه لكن على شكل برواز.
وإيه أشكال الرسومات اللي ممكن تترسم داخل اللوحات دي؟
عموما الرسومات بتكون عبارة عن ألوان متداخلة، ومش شرط تكون شكلها مفهوم، لكن بتكون متناسقة مع شكل وألوان الأثاث الموجود في الغرفة.
على أي أساس ممكن نختار شكل الخطوط والرسومات اللي بتتدهن على الحوائط، وإيه الخامات اللي بتستخدم؟
عامة الخطوط المستقيمة بتدّي شعور بالراحة والاستقرار وإحساس بالتوازن؛ يعني مثلا لو الغرفة فيها كنبة ممكن أعمل وراها شرائط طولية بالدهان، ولو الحائط لونه بني أعمل الشرائط لونها بيج أو العكس، وده في النهاية بيدّينا شكل لوحات.
أما المواد المستخدمة في اللوحات المودرن المدهونة بتكون ألوان زيتية أو إكريليك، مع إضافة لمسات فنية بالفرشة الناعمة.
إيه هو فن "التريمبلوي"؟
"التريمبلوي" هو رسم مجسّمات بالحجم الطبيعي بظلالها؛ بحيث إن اللي ينظر إليها يشعر أنها طبيعية؛ يعني مثلا بنرسم حائط أو باب بالدهانات مع رسم الظل لهما.
وممكن نعمل شكل فتحة أو رف داخل الحائط بالدهانات، أو ناخذ من شكل الديكور الموجود في الغرفة وأرسمه على الحائط.
ديكور بيتك بالألوان الطبيعية
ولحد هنا خلص موضوعنا..
لكن أفكارنا الجديدة في عالم الديكور ما خلصتش..
تابعونا دايما وابعتوا لنا تعليقاتكم وأسئلتكم..
انا لسه معملتش اي حاجه في
انا لسه معملتش اي حاجه في شقتي ومحتاره بين الالوان والدرجات ياريت لو سمحتي تقليلي اوضه الاطفال والنوم يبقى الوانهم ازاي بالصور لو ينفع علشان الدرجات معلش هتعبك معايا واوضه الصالون وعندي الانتريه والسفره مفتوحين على بعض اعملهم الوان ايه والحمام والمطبخ حساني تعبتك بس انتي مش متخيله حجم الحيره اللي انا فيها ربنا يكرمك
مساء الخير ياريت تفيدوني
مساء الخير ياريت تفيدوني (اوضه الانتريه والسفره في مكان واحد الاوضه فيها حيطه نبيتي والباقي كريمي والانتريه جبته نفس الالوان المشكله الستاير اعمل الوانها ايه وهعملها مواسير ياتري اعملها ستارتين فوق بعض ولا واحده بس مع العلم اني عاوزه احس ان الاوضه منوره ياريت ترودوا عليا بسرعه شكرا
ميرسى جدا ليكم بجد بتفيدونا
ميرسى جدا ليكم بجد بتفيدونا جدا انا عندى الريسبشن السيراميك بتاعه رمادى فاتح وانا هحط فيه الانتريه والسفره لو عملت الحائط رمادى المفروض يكون غامق ولا فاتح وكمان انا عايزه اعمل الانتريه رمادى غامق فى احمر والسفره تبقى سوده هل كده صح ؟ ولو السفره بنى هتليق؟ وكمان عايزه اعنل حجره النوم فوشيا هل ده هيتناسب مع الخشب البنى وهل الافضل ان الطرقه تكون لو الريسبشن ولا لاء وعايزه اعرف هى الموضه انى اعمل لونين فى الاوضه ولا لون واحد وشكرا ليكوا جدا جدا ومعلش طولت عليكوا
كان ليا حساب ازاى يتم تفعيله
كان ليا حساب ازاى يتم تفعيله لان بقالى فترة مش بدخل عليه شكرا ليكم.
===========
رد بص وطل:
الصديق العزيز.. كل الاشتراكات القديمة تم حذفها وعليك القيام بعمل حساب جديد من خلال لينك مستخدم جديد الموجود في الرسايل.
أنا عايزة مساعدة منك عندي
أنا عايزة مساعدة منك عندي أوضة النوم 6 م في 3.5 فحساها طويلة وكنت عايزة أدهن حيطة من الطوال أحمر والباقى يبقى بيج إيه رأيك وكمان أنا الأثاث عندي لونه بلحى يعنى بنى محمر كده وعندي السفرة مع الأنتريه في مكان واحد مفتوح أدهنه إيه مع البيج أورانج ولا بينك غامق وادهن الصالون إيه أرجوكي تساعديني أنا محتارة جدا.
==========
رد بص وطل:
أهلا بيكي يا بوسي، وبالنسبة لسؤالك فإنتي ممكن في غرفة النوم تدهني حائط باللون النبيتي مع البيج هيبقى حلو أوي وهيليق مع لون الأثاث، أما بالنسبة للسفرة فالأورانج اختيار موفق جدا لأنه بيبقى مناسب جدا مع غرفة السفرة، أما بالنسبة للصالون فيفضل إنه يبقى لون هادي ومريح للعين زي البيج أو الأبيض وفي الاخر إنتي اللي بتحددي على حسب ألوان الصالون نفسه.
بليز لو سمحت كنت بفكر اعمل
بليز لو سمحت كنت بفكر اعمل اوضه الاطفال موف * أصفر.. الموف تحت والأصفر فوق.. ده يبقي شكله مناسب ولا الافضل يكون لون واحد بدرجتين مختلفتين ... وكمان بالنسبه للي فوق واللي تحت بقول ممكن يكون الغامق تحت والفاتح فوق ولا العكس
كمان بالنسبه للانتريه والسفره هما في مكان واحد الانتريه رمادي * موف والسفرة سمرا .. ممكن لون الحيطه يبقي موف ؟؟؟
اخر حاجه النوم ايه اللون المناسب ليها تاني غير الموف والابيض والبينك مع العلم ان لون الاوضه الخشب بني ؟؟
ميرسي جدا
=============
رد بص وطل:
ممكن تعملي غرفة الأطفال موف في أصفر هيبقى حلو أوي، وممكن تفصلي بين اللونين ببوردر عليه رسومات أطفال زي ما قلنا في العدد، وبالنسبة للانتريه والسفرة ممكن تدهني الحوائط باللون الرمادي الفاتح جدا، وبالنسبة لغرفة النوم ممكن تدهنيها باللون الأبيض أو البيج الفاتح جدا.
اثاث غرفتي لونه بني محروق و
اثاث غرفتي لونه بني محروق و بيج ايه لون الدهان المناسب لاني محتاره جدا
=========
رد بص وطل:
ممكن تدهنيها باللون البيج.
انا محتاره ادهن لون اوضه
انا محتاره ادهن لون اوضه الاطفال ايه ارجوكو فيدوني محتاره ما بين الموف والبينك ويا تري لو فيه الوان احلي قولوا لي.
============
رد بص وطل:
ممكن تعملي ميكس بين اللونين وتفصلي بينهم بالبوردر اللي قلنا عليه ويبقى عليه أشكال ورسومات مناسبة لغرفة الأطفال.
ربنا يكرمك والله بسب الحاجات
ربنا يكرمك والله بسب الحاجات الجميلة بس انا ليا سؤال يتعلق بالبشرة المفروض انى اعمل ماسك كام مرة في الأسبوع؟؟ وهو إيه أفضل ماسك لتوحيد لون البشرة؟؟ ولكي جزيل الشكر.
============
رد بص وطل:
شكرا لكي صديقتنا العزيزة على تعليقك الجميل ونتمنى منك متابعتنا دوما، وبالنسب لسؤالك فده بيتحدد على حسب نوع الماسك والهدف منه، يعني فيه ماسكات ممكن تعمليها كل يوم وماسكات تانية بتتعمل مرة واحد في الأسبوع، ويا ريت تتابعي حلقات جمالك من الطبيعة مع رانيا على لينك قمر 14 كل يوم اثنين واللي بتقدم فيه حلول وماسكات طبيعية للتعامل مع مشكلات البشرة والشعر، تابعينا وابعتي قولي لنا رأيك، وبالنسبة لتوحيد لون البشرة فإنتي ممكن تدخلي على اللينك ده http://www.boswtol.com/health-and-beauty/beauty-and-styling/11/july/11/3...
