السمنة هي مشكلتي في الحياة، وعقدتي دائما في المدرسة وفي الجامعة، لدرجة إن الموضوع سبّب لي اكتئاب، وأصبحت أتجنّب الناس؛ خوفاً من نظراتهم اللي كانت بتضايقني، فقررت إني أتابع ريجيم، وفعلاً بدأت أحقق جزء من هدفي، وإن شاء الله هاوصل.. لكن نِفسي أعرف لو نفسي أرتاح شوية من الريجيم وأكمّل بعدين؛ إزاي أحافظ على وزني؟!! ولمّا أخس إيه طريقة التثبيت؟
التثبيت هو أن تحصل على سعرات توازي المجهود المبذول يومياً، وأن تراقب ما تأكله بعد التوقّف عن الريجيم، مع مراقبة الوزن كل فترة.
والمفترض خلال فترة الريجيم أن تتعلّم طريقة الأكل الصحيحة، وأن تعتاد عليها، وأن يصبح أسلوب حياة.
وفيه أكتر مِن شكل للتثبيت إما بتقليل كميات الأكل؛ يعني تاكل كل حاجة لكن بكميات أقل؛ يعني تقريبا نصف كمية مع ممارسة التمارين الرياضة اليومية المتاحة حسب إمكانياتك والمتاح أمامك؛ زي المشي، أو طلوع السلم، أو العجلة، أو الجيم، أو السباحة.
الطريقة التانية أن توازن بين الوجبات؛ يعني لو يوم خرجت أو عندك مناسبة وهتاخد راحتك في الأكل، فاليوم اللي بعده لازم تمشي على الريجيم، ولو لَخْبَطت في الأكل يومين، اليومين اللي بعدهم تمشي على الريجيم.
وهكذا.. المهم أن توزن نفسك على الأقل مرة كل أسبوع علشان لو لقيت نفسك وزنك زايد، تبدأ تقلل في الوجبات الحرة خلال الأسبوع؛ يعني لو محدد ثلاث وجبات في الأسبوع تقللهم لوجبة واحدة أو اثنين، ولو بدأت تاكل قطعتين شيكولاتة في اليوم، خلّيهم قطعة واحدة كل يومين وهكذا.
ولو لقيت نفسك نازل على الميزان ممكن تزوّد شوية الحاجات اللي بحبها ولكن بحدود، ومهم جداً مراقبة الوزن باستمرار علشان ممكن الكيلو يجر كيلو، ومن غير ما تشعر هترجع اللي نقصته بسرعة.
لا بد أن نأخذ في الاعتبار أن التثبيت بيختلف من شخص لآخر حسب طبيعة النشاط، وكمان حسب الحالة المزاجية، فيه ناس بتحب تاكل لما تشبع، وفي هذه الحالة عند التثبيت تحاول تكتّر من الأكل اللي بيخليك تشعري بالامتلاء؛ زي: السلطة والفاكهة أكتر من الأنواع الأخرى.
وغالبا يمكنك الحفاظ على الوزن في معظم الحالات، وإن كان لا يمكن التعميم لو أخذت وجبة فاكهة في اليوم، ويفضّل أن تكون في العشاء ومع المشي ألف خطوة في اليوم؛ أي: ساعة ونص تقريبا يومياً (مش لازم مستمرة يمكن أن تكون متقطّعة خلال اليوم).
أنا وزني عامل ليّ مشكلة جامدة جداً.. وفعلاً باعمل ريجيم وأخس عليه خمسة كيلو مثلاً، وبمجرد ما أتوقّف أرجع أزيد عشرة كيلو.. مش عارف أعمل إيه؟
الرجوع إلى الوزن السابق بسرعة هائلة، وأن يصبح الوزن أكثر من الأول مشكلة تواجه كل اللي بيعملوا ريجيم مِن أجل هدف وقتي أو لأسباب خاصة؛ زي اجتياز امتحان أو مقابلة عمل أو حضور مناسبة؛ لأنه بمجرّد تحقيق الهدف تنتهي علاقاتنا بتنظيم نوعية الأكل، ومع الأسف أغلب المرضى لا يرغب أن يتحوّل الريجيم إلى نظام للحياة في المستقبل.
المشكلة أنك تمارس عادات سيئة في الأكل طول الوقت، وعند اتباع الريجيم بتوقّفها، وبمجرّد ما تتوقّف عن الريجيم بترجع مرة تانية لكل العادات الغذائية السيئة، وتعوّض أيام الحرمان بأكل كميات هائلة من كل حاجة كنت محروم منها وقت الريجيم، خاصة لو أهملنا تثبيت الوزن.. وهو ده سبب إننا بنرجع بسرعة وأكتر من الأول؛ يعني لو خسرنا خمسة كيلو ممكن نرجعهم عشرة لو لم نثبت الوزن.
اصدقائى الغاليين بص وطل هل
اصدقائى الغاليين بص وطل هل شاى الاسد فعلا بيخسس ارجو الرد وشكرررررا؟
===========
رد بص وطل:
بغض النظر عن نوع الشاي لكن الحل الوحيد هو اتباع ريجيم صحي متوازن.
الحل في الرياضة استمري في
الحل في الرياضة
استمري في ممارسة الرياضة
وحطي في اعتبارك انه ما لا يدرك كله لا يترك كله
يعني مش معنى اني خرفت في الاكل في يوم اني اسيب نفسي باه
تقدري تاكلي عادي لكن على ما تقدري لو حاجه ملهاش لازمة عارفة انها هتتخن بلاشها
ممكن اعرف وزنى مناسب ولا لا
ممكن اعرف وزنى مناسب ولا لا انا وزنى 60 وطولى 162 ولا محتاجه اخس وشكرا
==============
رد بص وطل:
وزنك كده صحي بس لازم تحافظي عليه باتباع العادات الغذائية السليمة وممارسة بعض التمارين الرياضية البسيطة.
هاى انا كنت عايزه اعرف وزنى
هاى انا كنت عايزه اعرف وزنى مناسب ولا لا انا وزنى 60 وطولى 162 وانا لا بتخن ولا بزيد وزنى ثابت بس عندى مشكله الخطوط البيضاء اعالجها ازاى وعايزه اعرف رايكم فى الشاى الاخضر وشكرا.
==========
رد بص وطل:
الخطوط البيضاء بتروح لوحدها مع الوقت، وممكن تستشيري دكتور أمراض جلدية علشان يديكي أسماء كريمات لعلاج المشكلة دي وماتنسيش طبعا أهمية ممارسة التمارين الرياضية، وبالنسبة للشاي الأخضر فهو يدخل تحت مسمى المواد التي لها تأثير محدود أو غير مؤثر في الريجيم، لكنه غير مضر وله فوائد تانية لا يمكن تجاهلها زي احتوائه على مواد مضادة للأكسدة ومهم لزيادة المناعة، لكن تأثيره في موضوع الريجيم لا يستحق أن أعتبره من أدوية الريجيم سواء أقراص أو شاي.
انا بشكر الموقع وكل العاملين
انا بشكر الموقع وكل العاملين فيه انا عملت ريجيم والحمد لله بخس وجسمى ابتدى يبقى كويس لكن انا كنت عايزه اسال هو حجم الصدر بيقل هو كمان ولا لأ لان حجمه كبير وانا كنت عامله الريجيم فى الاساس علشان يقل ارجوكم افيدونى.
==============
رد بص وطل:
الريجيم بيقلل وزن الجسم ككل، وممكن مناطق تخس قبل مناطق تانية على حسب توزيع الدهون في الجسم، وطبعا الجسم كله بينزل، لكن ده مش معناه إن الريجيم هيقلل أو هيغير من شكل الصدر، لأن ده بيحتاج لعمليات تجميل، لكن الريجيم دوره غنه يخلصك من الدهون الزائدة في كل مناطق الجسم.
السلام عليكم الريجيم شيء جميل
السلام عليكم الريجيم شيء جميل جدا كفاية ان الانسان بيكون نشييييط جدااااااااا انا عن نفسى عملت ريجيم ودلوقتى خفيت منه بس بوزن نفسى كل اسبوع بس انا دلوقتى ماشى على المية السخنة على الريق والجنزبيل من غير سكر وباكل دلوقتى تقريبا اللى انا عايزه والحمد الله الوزن تمام بس انا بمشى كتييييييييير جدا وده برده اهم حاجة وبالتوفيق للجميع.
انا وزنى 72 كيلو وطولى 165
انا وزنى 72 كيلو وطولى 165 وانا وعندى بيبى عمرها 10 شهور وبنرضع طبيعى الحمد لله انا بس بعد الولاده تخنت 4 كيلو ونفسى انزلهم مش عارفه وعندى بطن صغيره مش كبيره اوى نفسى اتخلص منها انا بمشى تقريبا 3 مرات فى الاسبوع لو فى ريجيم اخس بس عليه ال 4 كيلو دول واثبت على كده وشكرا.
============
رد بص وطل:
بالنسبة للريجيم فإنتي ممكن تمشي على الريجيم اللي موجود على بص وطل مع إضافة بعض الزيوت، ولبن خالى الدسم، وخضراوات ورقية وفاكهة وشرب سوائل كثير.
أنا عندي 18 سنة ووزنى 74
أنا عندي 18 سنة ووزنى 74 وطولى 166... بس دابما شكلي بيبان اكبر من سني خصوصا إني طويلة وعريضة أنا وجبتي إلى حد ما معتدلة وحركتى فى اليوم عادية يعنى مش اكتر من مشوار الكليه وطلوع السلم بس بحس ان وزنى بيزيد من اقل حاجة مشكلتى كمان تكمن فى "الارداف".. عندى "جناب" جامد وحتى لو عملت ريجيم مش بحس إنها نزلت.. مش عارفة اعمل إيه وخايفة أزيد أكتر من كده في المستقبل
وشكرا.
===========
رد بص وطل:
الحل بسيط جدا وهو إنك تتبعي نظام غذائي صحي متوازن مع ممارسة التمارين الرياضية حتى ولو كانت رياضة المشي كل يوم لمدة 10 دقايق وتحاولي تزوديها مع الوقت لكن أهم حاجة هو اتباع ريجيم صحي متوازن وتغيير العادات الغذائية الخاطئة وبكده تقدري تحافظي على وزنك.
سلام عليكم ورحمة الله وبركاته
سلام عليكم ورحمة الله وبركاته جزاكم الله خيرا على هذا الموقع الجميل جدا وخصوصا صحة وجمال أنا باستفاد منكم جدا وكنت عاوزة اسال حاجة انا عملت ريجيم من تقريبا 3 شهور وخسيت الحمد لله لغاية دلوقتي بشكل كويس بس المشكلة اني اول ما خسيت باخس في الأسبوع اتنين كيلو قعدت اسبوعين اخس كل اسبوع 2 كيلو وبعد كدة لغاية دلوقتي باخس كيلو واحد في الأسبوع وأما باخس اكتر كيلو ونص أكتر حاجة هل ده خلل في جسمي واعمل ايه عشان اخس اكتر من كده في الاسبوع وايه الحاجات الطبيعية من الخضار أو الفاكهة اللي بتزود الحرق غير الأعشاب لإني مش بحب شرب الأعشاب وأسفة على الإطالة وبشكركم جدا للمرة التانية.
==========
رد بص وطل:
بنشكرك صديقتنا العزيزة على على كلامك الجميل وعلى متابعتك لينا، وبالنسبة لسؤالك فمش مهم إنك تخسي عدد كبير من الكيلوات في الاسبوع لكن الأهم إن الوزن اللي بتنزليه ما ترجعيهوش تاني بسهولة، ولازم تعرفي إن الريجيم الصحي بينزل الجسم من كيلو لأربعة كيلو في الأسبوع وده بيختلف من طبيعة جسم لآخر وعلى حسب معدل الحرق، وأهم حاجة إنك تتبعي نظام غذائي صحي وممكن تغيري النظام الغذائي كل فترة، وبالنسبة للخضراوات والفاكهة التي تساعد على حرق الدهون فهي مثل الجريب فروت والكيوي والأناناس.
انا بنت 22 سنة طولى 155
انا بنت 22 سنة طولى 155 ورفيعه من كتر كلام الناس اني رفيعة بدأت أكل كتير لدرجة انى عودت نفسى على نظام انى اكل كتير تلات أرغيفه وبعدها اكل لسان عصفور بقيت باكل بكميات وأكنى بنتقم أنا جسمى ماتخنش اوى بس بقيت افضل مما كنت عليه دلوقتي عندي مشكلة البطن الكبيرة ونفسي في حل.
============
رد بص وطل:
أفضل طريقة للتخلص من مشكلة السمنة الموضعية في منطقة البطن والأرداف هي ممارسة التمارين الرياضية.
السلام عليكم.. أنا وزنى 53
السلام عليكم.. أنا وزنى 53 وطولى 163 وانا رجلى رفيعه من تحت وكف ايدى كبير وايدى رفيعه وانا بقيت زى الشخصيه الغريبة بين الناس وبيقولوا لى انى رفيعه جدا لكنى باكل بس لما اكون زعلانه من حاجه معدتى مش بتقبل الاكل واخدت امبولات نيوروتون وثيراجران.
===========
رد بص وطل:
الصديقة العزيزة أولا لازم يكون عندك ثقة في نفسك اكتر من كده ولازم تعرفي إن كل إنسان بيكون له شكله اللي بيميزه بكل ما فيه من خصائص شكلية، وبالنسبة لوزنك فإنتي مش بتعاني من حالة نحافة ووزنك صحي ومناسب مع طولك لأن الوزن المناسب مع طولك لابد ان يتراوح بين 53 لـ 66 كيلو، وممكن إنك تستشيري مدرب رياضي علشان يقول لك على التمارين اللي تناسبك لعلاج مشكلة نحافة الأرجل والذراعين، وفي النهاية نصيحتي ليكي إنك تحاولي تختاري الملابس اللي تبين مميزات جسمك وتداري عيوبه لأن اي حد في الدنيا عنده عيوب ومميزات بس المهم إننا نعرف نبين أحلى ما عندنا.
