تأثير اقتراب الدورة الشهرية على وزن الجسم

انا عندى سؤال وعايزة حد يرد عليا من فضلكم انا جسمى متناسق جدا مع طولى بس عندى مشكله الذراعين شكلهم كبير وبيدونى شكل وحش اوووى بيبقى جسمى رفيع وهما عكسه تماما اقدر احل المشكله دى ازاى ولو بالرياضه اى نوع رياضه يناسب المشكله دى وشكرااا.

==============

رد بص وطل:
الصديقة العزيزة.. من الأفضل إنك تستشيري مدرب رياضي متخصص علشان يقول لك بعض التمارين المفيدة للحالة دي، وكمان تقدري تداري المشكلة دي باختيارك للملابس المناسبة اللي تداري عيوب جسمك وتظهره بشكل أفضل.

السلام عليكم بجد شكرا لكل بص وطل فادني كتير اوي وعرفت منه حاجات كتير مكنتش اعرفها بس أنا دلوقتي عندي مشكلة في الوزن أنا من حوالي 4 سنين كده كنت 98 كيلو وبعدين عملت دايت طبعا على فترات اخس وارجع اتخن لحد ما وصلت 68 كيلو وكنت فرحانه جدا اني قربت اوصل للي أنا عاوزاه بس بعد كده ومن حوالي سنه رجعت ل 72 كيلو وثبت علي كده كل الفتره دي بس دلوقتي انا حاسه اني بدات اتخن تاني وبجد مش عارفه اعمل دايت خالص وحاسه اني بعند مع نفسي مش عارفه ليه بجد محتاجه اعرف حل بس يا ريت يكون سريع انا عندي 22 سنه وطولي 160 وعلى فكرة أنا مش بشتغل وخلصت دراسة يعني مش بتحرك كتير شكرا.

===========

رد بص وطل:
الصديقة العزيزة.. أولا بنشكرك على ذوقك وكلامك الجميل ده ونتمنى إننا نقدر نقدم لكم كل اللي يفيدكم دايما، أما بقى بالنسبة لسؤالك فتجربتك اللي مريتي بها هي أحسن إجابة على سؤالك، يعني لما يكون عندك إرادة ورغبة في الوصول لهدفك وتمشي على خطوات صحيحة هتقدري في النهاية تحققي اللي إنتي عايزاه، ودلوقتي الموضوع في إيدك ابدئي من جديد بريجيم صحي متوازن ويفضل إنه يكون تحت إشراف دكتور علشان يقدر يديكي الريجيم الصحي المناسب مع طبيعة جسمك وحالتك النفسية، مع ممارسة التمارين الرياضية حتى ولو كانت تمارين بسيطة زي المشي أو الجري أو حتى طلوع السلم، وإن شاء الله تخسري وزنك وتحافظي على صحتك وتوصلي لأفضل شكل ممكن، وتابعينا دايما في المعلومات والنصايح والريجيمات اللي بنقدمها على بص وطل، ويا ريت تبعتي لنا دايما خسرتي أد ايه من وزنك كل فترة علشان تكوني دافع لكل الناس اللي بتحاول تخس وماعندهمش إرادة.

انا كنت بعت رد من شهر وإني كان طولي 174 ووزنى كان 82 انا دلوقتى وصلت 76 الحمد لله انا ناوى ان شاء الله اوصل 66 فهل تعتقد الوزن ده هيكون مناسب مع طولى واثبت عنده، ولا حضرتك شايف وزن تانى اثبت عنده افضل من 66؟ وايه راي حضرتك فى جهاز الاوربتراك، لانى ناوى اشتريه لما اثبت بحيث يبقى ممارسة الرياضة عليه جزء من الروتين اليومى؟

==========

رد بص وطل:
الصديق العزيز.. الوزن الصحي المناسب مع طولك يتراوح بين 60 إلى 75 كيلو، ولو وصلت لوزن 66 فهو يعتبر وزن مثالي جدا بالنسبة لك وممكن تثبت وزنك على كده، وبالنسبة لجهاز الاوربتراك فهو كويس للتدريب وممارسة التمارين عليه.

السلام عليكم ورحمه الله وبركاته انا حامل للمرة الثانيه وطولي 170 ووزني 90 عايزة اعرف اكل ايه وابتعد عن ايه انا في الشهر السادس ووزني بيزيد وهل ربط البطن بعد الولاده مفيد ام مضر وانا بولد قيصري برجاء الرد عليا ولكم كل الشكر.

===========

رد بص وطل:
ربط البطن بعد الولادة مالوش أي تأثير، والأفضل إنك تماري بعض تمارين البطن البسيطة ولكن بعد مراجعة طبيبك الخاص، ومع تنظيم الأكل وممارسة الرياضة البسيطة زي المشي جسمك هيرجع لطبيعته مرة تانية، وبالنسبة للريجيم أثناء الحمل فلابد من اتباع نظام ريجيم متوازن للمحافظة على هذا المعدل مع اضافة فاكهة بين الوجبات وبعض النشويات ولبن خالى الدسم مع متابعة حالة الجنين بانتظام.

السلام عليكم ورحمة الله وبركاته انا بعمل دايت مع نفسي مش متابعة مع دكتور باكل كل حاجة بس بكميات قليلة وخففت من المقليات واستبدلته بالمسلوق والمشويات بجد طعمها الذ كتير وخفيف علي المعدة والحمد لله خسيت في شهرين 3 كيلو هو يعني بطئ شوية بس انا مبسوطة كتير لإني كنت قربت افقد الأمل اني ممكن اخس.
بس انا ليا استفسار، اقراص الخميرة اللي بتتباع في الصيدلية انا كنت بجربها وفرقت كتير مع بشرتي خليتها احسن ووشي بقي صافي فهل لو اخدتها تاني هتتعارض مع الريجيم اللي انا بعمله لاني سمعت من ناس كتير وقريت في بعض المواضيع علي النت انها بتزيد الوزن؟ أسفة إني طولت عليكم.

=========

رد بص وطل:
أولا نحب نهنيكي على إرادتك ورغبتك في تقليل وزنك وإنك بتحاولي وإن شاء الله مع الوقت وتنظيم العادات الغذائية وممارسة بعض التمارين الرياضية هتقدري تخسري وزنك وتوصلي للوزن المناسب، وبالنسبة لأقراص الخميرة فإنتي ممكن تاخديها قبل الأكل بساعتين لأن الخميرة بتعتبر فاتح للشهية وعامة الموضوع ده بيرجع لقابلية وطبيعة كل جسم.

انا وزنى83 و طولى 155 و عندى تاخبر فى الدورية كل شهر عن الشهر اللى اقبله اعمل اية غير الرجيم علشان انا مش بحبه

===========
رد بص وطل:
الريجيم الصحي هو أحسن وآمن طريقة للتخلص من الوزن الزائد، مع ممارسة بعض التمارين الرياضية، ولكن الريجيم لازم يكون صحي ومتوازن علشان ماتحسيش إنك تعبانة منه، وكمان يفضل إنك تغيري نظام الريجيم كل فترة علشن ما تحسيش بملل وجسمك يستجيب أسرع، بس المهم إنك يكون عندك الإرادة وتعرفي إن الوزن الزائد بيؤثر جدا على صحتك دلوقتي وفي المستقبل.

يادكتورة انا رفيعة جدا 47 كيلو بس عندى كرش كبير اعمل اية عندى 17 سنة

=========

رد بص وطل:
الحل هو اتباع العادات الغذائية الصحيحة وعدم تناول وجبات دسمة قبل النوم، وتناول وجبة العشاء الساعة 6 أو الثامنة وتكون بتحتوي على فاكهة وكوب زبادي، مع ضرورة ممارسة التمارين الرياضية زي المشي أو الجري أو السباحة أو بعض التمارين لشد عضلات البطن.

ممكن يا دكتور تقولى على نظام غذائى كويس انا وزنى 70 وطولى 160

==========

رد بص وطل:
ممكن تتباع بعض الأنظمة الغذائية اللي بنقدمها على بص وطل والموضوع مش صعب ولكن بيحتاج لصبر ومواظبة والتزام بالريجيم مع الاهتمام بممارسة التمارين الرياضية، وده لينك لريجيم صحي متوازن ممكن تتبعه http://www.boswtol.com/health-and-beauty/diet/11/february/27/27982

بليز ياجماعة عاوزة حاجه لازاله الشعر نهائيا غير وسيلة اشعة الليزر وارجو الرد سريعا ولكم جزيل الشكر

============

رد بص وطل:
الليزر من الطرق الىمنة للتخلص من شعر الجسم، ولكن لابد من الرجوع لدكتنور متخصص لمعرفة إذا كانت الطريقة دي هتناسبك ولا لا، والبديل له هو الطرق التقليدية زي الشمع والسويت.

انا عندي 22.5 سنة وطولي 155 ووزني 46 مش عارفة اتخن خالص ولكن والدتي قالت لي ان هي واختى كانو رفيعين برده في نفس السن ده
هل في حل ليا ولا طالما مرتبط بالوراثة مالوش علاج ... ارجو الافادة

=======

رد بص وطل:
الصديقة العزيزة أولا لابد من عمل بعض التحاليل الطبية للتأكد أنه ما من سبب عضوي للنحافة في حالتك وبعد التأكد لابد من اتباع نظام غذائي صحي تحت اشراف طبيب متخصص ولازم تعرفي ان علان النحافة بيحتاج لوقت اكبر من علاج السمنة يعني مش لازم تزهقي من البداية وماتنسيش اهمية ممارسة التمارين الرياضية.

انا عندى مشكلة الدورة الشهرية انها بتتاخر كل شهرين او اكثر وانا فعلاا بزيد وانا من سنة مكنشى جسمى كدة مع العلم انى بمشى كثير وبشتغل وسنى صغير فى اول العشرين عايزاه حل وخايفة ادخل فى مرحلة الجواز وانا كدة

===========

رد بص وطل:
لابد من استشارة طبيب نساء متخصص لمعرفة سبب اضطراب الدورة عندك وإذا كنتي تعاني في مشكلة في الهرمونات أم بسبب مشاكل أخرى نفسية أو عضوية، حتى يتمكن من وصف الدواء المناسب وإن شاء الله الموضوع يكون بسيط، ولكن اهتمي إنك تظبطي عاداتك الغذائية علشان تحافظي على وزنك.

يادكتورة لو سمحتى انا كنت عاوزة اعرف بالنسبة لعمليات تكبير الثدى فيها ضرر بالنسبة للرضاعه أو اى تأثير بعد الزواج.

==========

رد بص وطل:
لابد من استشارة طبيب تجميل متخصص ويكون موثوق فيه.

انا عايزة اسال عن الميزان ذات السطح الزجاجى كويس ولا لا

=========

رد بص وطل:
الميزان الديجيتال عامة بيبقى دقيق، ولو تقصدي ميزان زجاجي ديجتال فهو كويس.

يا دكتور بليييييييز انا مش اول مره ابعت وميوصلنيش اي رد او اهتمام انا طولي 168 ووزني 73 بعد ما كان وزني 66 انقطعت الدورة عندي فتره وبقت غير منتظمة بشكل غير عادي وروحت للدكتورة وطلبت مني بعض التحاليل وقالت اني كويسة بس اخس شوية
مشيت ع نظم غذائية من موقعكم ومنزلتش نص جرام حتي ونتائج التحاليل هي:
total t3 126
total t4 7.7
tsh 1.4
fsh 5.37
prolaction 8
blood group A+
ياريت يادكتور اعرف هل مشكلة وزني في الغدة والهرمونات ولا المشكلة فين مع العلم إن الريجيم بيكون إلى جانب مشي أو رياضة ساعة يوميا.. وشكرا.

==========

رد بص وطل:
الصديقة العزيزة.. أولا بنعتذر لك عن التأخير في الرد لأننا بنحتاج لوقت علشان نرسل المشكلة لمتخصصين للحصول على الرد الصحيح، وبالنسبة لسؤالك فإنتي مش بتعاني من مشكلة السمنة ولكنها مجرد زيادة بسيطة في الوزن لأن وزنك الصحي لابد أن يتراوح بين 56 إلى 70 كيلو.
وبالنسبة لمشكلة عدم انتظام الدورة الشهرية فالأفضل إنك تستشيري دكتور متخصص في الغدد والهرمونات مع محاولة خسارة الوزن الزائد وطالما جرّبتي ريجيمات وماجابتش معاكي نتيجة يبقى الأفضل إنك تستشيري دكتور تغذية علشان يديكي نظام غذائي صحي يتناسب مع طبيعة جسمك وحالتك النفسية مع الالتزام والمواظبة وممارسة بعض التمارين البسيطة.

اشكرك د.محمد لكن بسأل عن حقن الميزوثيرابي لحقنها في البطن أو الارداف، ياريت تفيدنا اكتر، وشكرا.

=========

رد بص وطل:
الميزوثيرابي من العلاجات الجيدة جدا للتخلص من السمنة الموضعية ولكن لابد من مراجعة طبيب متخصص علشان يقول لك إذا كان مناسب لحالتك ولا لأ، وماتنسيش إن ممارسة التمارين الرياضية من ابسط واسهل وآمن الحلول، ولكنها تحتاج لمواظبة ووقت أطول.