وصلتني رسائل كثيرة جدا من عدد كبير من القرّاء الأعزاء بيسألوا عن النحافة..
البعض جرب حاجات كتير، وكل محاولاتهم كان مصيرها الفشل؛ وده لأن النحافة بتحتاج وقت وصبر من المريض؛ لأن بناء الجسم عادة أصعب من هدمه؛ يعني خسارة الوزن أسهل وأسرع من بناء جسم صحي ينقصه حتى يصل إلى وزنه الطبيعي عدد من الكيلو جرامات..
وعلشان نتكلّم عن النحافة بمزيد من التفصيل هيكون ضيفنا د. عمرو مطر الأستاذ بكلية طب جامعة القاهرة ورئيس الجمعية المصرية للتغذية الطبية..
- يعني إيه نحافة؟
لازم نفرّق بين النحافة والهزال.. النحافة هي: انخفاض وزن الشخص عن وزنه الطبيعي.. ونقدر نعرف الوزن الطبيعي بحساب معامل كتلة الجسم، وعلى حسب الرقم الناتج فيه درجات للنحافة زي ما فيه درجات للسمنة.
تبدأ النحافة لو الرقم أقل من 18.50 ولو الرقم وصل إلى 16.50؛ فهي نحافة من الدرجة الأولى، ولو أقل من 14.50، فهي نحافة من الدرجة التانية، ولو أقل من كده يعتبر نحافة شديدة جدا.
أما الهزال فهو: نزول الوزن بطريقة غير مبررة وسريعة جدا ومرضية.. وممكن سببها يكون ضوء أحمر إن فيه مرض خطير، وهذا أحد أعراضه، ومن الأمراض التي تُسبّب الهزال: السكّر، واضطراب الغدد الدرقية، والأورام السرطانية لا قدّر الله، لكن عامة النحافة مش معناها إن الشخص مريض؛ لأن الشخص ممكن يكون رفيع بس صحته كويسة وسليم وخالي من الأمراض.
- إزاي الشخص يفرّق بين النحافة العادية بدرجاتها والهزال اللي هو مؤشّر لوجود مرض ما بالجسم؟
لو الشخص وجد نفسه بينزل 5% من وزنه خلال شهر أو 10% خلال 3 شهور من غير ريجيم وكان بياكل كويس جدا ورغم كده وزنه بينزل؛ فالمعدّل ده معناه إنه لازم يتوجّه فورا لطبيب متخصص لعمل التحاليل والفحوصات الشاملة لمعرفة أسباب نزول وزنه بهذه الطريقة.
- ما هي أسباب النحافة؟
النحافة قد يكون سببها عضويا أو نفسيا، ومن الأسباب العضوية التي تُؤدّي للنحافة:
1- الأنيميا وسوء التغذية.
2- العامل الوراثي من الأب أو الأم.
3- الإصابة بديدان طفيلية تعيش على ما تأكله من غذاء الشخص النحيف.
4- اضطراب الغدة الدرقية، التي تعمل على رفع معدل الحرق، وزيادة معدل ضربات القلب، مما يُؤدّي إلى نحافة شديدة.
5- ارتفاع معدّل حرق السعرات الحرارية، وهذا ممكن أن يُؤدّي إلى نحافة من الدرجة الأولى، وهي لا تشكّل خطورة من الناحية الصحية.
وكل هذه الأسباب يكشفها الفحص الطبي والتحاليل التي يرى البعض أنها غير مهمة، أما بالنسبة للعوامل النفسية المسببة للنحافة؛ فهي مثل: القلق، والعصبية، والضغوط النفسية من كثرة المشكلات، وهي الأكثر شيوعا بين الشباب.
والعامل النفسي يجعل الشخص يفقد الشعور بحلاوة الأكل، ويُصاب بفقدان الشهية، مما يُؤدّي إلى نزول وزنه بصورة كبيرة، ولكن بمجرد ما ينتهي السبب، ممكن الإنسان يرجع لشهيته ووزنه الطبيعي.
- هل النحافة تشكّل خطورة على صحة الإنسان مثل السمنة؟
طبعا النحافة الشديدة والتي يكون فيها معامل كتلة الجسم أقل من 14.50، تُشكّل خطورة على صحة الإنسان؛ فالسمنة والنحافة من أمراض سوء التغذية، ولهما نفس مقدار الخطورة.
ولغاية هنا خلص كلامنا النهارده..
استنونا الأسبوع القادم..
علشان نعرف الخطوات الصحيحة لعلاج النحافة،،،
السلام عليكم انا وزنى 67
السلام عليكم انا وزنى 67 وطولى 165 يا ترى وزنى مناسب وانا بعانى من الخطوط البيضاء اعمل ايه؟
============
رد بص وطل:
الوزن الصحي المناسب مع طولك لابد أن يتراوح بين 54 لـ 68 كيلو، لكن لابد من متابعة وزنك على الميزان باستمرار علشان تتعاملي مع أي زيادة تحصل في وزنك بسرعة، ويفضل لو حاولتي تقللي حوالي 5 أو 7 كيلو من وزنك علشان تكوني متطمنة إن وزنك مش هيعدي الحدود الصحية، أما بالنسبة للخطوط البيضاء فإنتي لازم تستشيري دكتور أمراض جلدية متخصص علشان يديكي العلاج أو الكريم المناسب.
انا بعت رسالتين ومظهروووووووش
انا بعت رسالتين ومظهروووووووش اوووووووووووووووف
==============
رد بص وطل:
الصديقة العزيزة.. يا ريت تتأكدي إنك بتبعتي أسئلتك بالطريقة الصحيحة، وتتأكدي إنك بتبعتيها في المكان الصحيح، وتأكدي إننا بنرد على كل الأسئلة اللي بتوصل لنا بمجرد وصولها.
انا وزني 67 وطولي 178 هل جسمي
انا وزني 67 وطولي 178 هل جسمي مناسب.
=============
رد بص وطل:
الوزن الصحي المناسب مع طولك لابد أن يتراوح بين 63 لـ 79 كيلو.
انا وزني 65 وطولي 180 وانا
انا وزني 65 وطولي 180 وانا اريد زيادة وزني بس جربت كل المحاولات ومفيش فايدة... اعمل ايه مع العلم ان انا شهيني مفتوحة وباكل كتير بس انا جسمي لا بيزيد ولا بيخس من صغري ..اعمل ايه؟
=============
رد بص وطل:
الصديق العزيز.. أولا أنت لا تعاني من النحافة لأن وزنك مازال في الحدود الصحية المناسبة مع طولك والذي لابد أن يتراوح بين 64 لـ 80 كيلو، ولو حاسس إنك محتاج تزود بعض الوزن فممارسة الرياضة وخاصة المشي من اكتر الحاجات اللي هتساعدك وكمان تناول وجبات تحتوي على سعرات حرارية عالية لأن ممكن يكون معدل الحرق عندك مرتفع، وطبعا زي ما قلنا الحالة النفسية بيكون لها تاثير كبير على الوزن.
انا عندى مشكله انى جسمي مليان
انا عندى مشكله انى جسمي مليان خالص وبخس بس بيجى يرجع تانى ومفيش حل الا وعملته ممكن من حضرتك تقولى اعمل ايه مع العلم ان وزنى اوقات يصل الى 110 وينزل الى 85 مع العلم ان طولى 160 وبخس من اماكن معينه فقط.
===========
رد بص وطل:
المشكله ان نمارس عادات فى الاكل لما بنعمل ريجيم بنوقفها وبمجرد ما نتوقف عن الريجيم بنرجع مرة تانيه لكل عاداتنا الغذائية السيئة ونعوض ايام الحرمان باكل كميات هائلة من كل حاجه كنا محرومين منها وقت الريجيم وخاصة لو ما عملتيش تثبيت.. وهو ده سبب اننا بنرجع بسرعه وأكتر من الاول يعنى لو خسرنا خمسة كيلو ممكن نرجعهم عشرة لو لم نثبت الوزن.
انا يا جماعه وزنى 60 وطولى
انا يا جماعه وزنى 60 وطولى 187 اعمل ايه
===========
رد بص وطل:
الوزن الصحي المناسب مع طولك لابد أن يتراوح بين 69 لـ 87 كيلو، ولزيادة وزنك لابد من استشارة طبيب متخصص وعمل بعض التحاليل والفحوصات لمعرفة سبب النحافة التي تعاني منها، والتأكد من عدم وجود سبب عضوي أو علاج السبب العضوي إن وجد، مع اتباع نظام غذائي صحي متوزان مناسب مع طبيعة جسمك وكمية المجهود الذي تبذله يوميا وحالتك النفسية.
انا طولى 174 وزنى 54 ماذا
انا طولى 174 وزنى 54 ماذا افعل؟
============
رد بص وطل:
لابد من استشارة طبيب تغذية متخصص لعمل بعض التحاليل ومعرفة سبب النحافة التي تعانين منها حتى يتمكن من اعطائك النظام الغذائي المناسب لكي على حسب طبيعة جسمك وحالتك النفسية.
السلااااام عليكم ياريت تفيدني
السلااااام عليكم ياريت تفيدني يا دكتور لاني خلااااص تعبت بقى خلاص عندي احباط مشكلتي اني وزني دلوقتي 77 وطولي 163 بالرغم اني كان وزني كان كويس كنت الاول 57 وبعدين تخنن ونفسي اخس تاني انا بتخن بسرعة بمجرد اني بزعل ونفسيتي تبقى وحشة يعني ممكن اتخن 5 كليو في اسبوع ونظام اكلي زي ما هو ونسيت اقول لك يا دكتور اني عندي قولون عصبي ونظامي في الاكل كويس يعني في اليوم كله باكل رغيف بلدي ده بالكتيررر وانا بعمل ريجيم مع نفسي بس للاسف مش ينفع معايا مش عارفة ليه اسفة اني طولت عليك ارجو الرد عليا شكرا.
===========
رد بص وطل:
الصديقة العزيزة طبعا الحالة النفسية بتأثر بشكل كبير على الوزن، وعلشان تخسري وزنك وتوصلي للوزن الصحي المناسب مع طولك لابد من المتابعة مع دكتور تغذية متخصص علشان يديكي النظام الغذائي المناسب ليكي على حسب طبيعة جسمك وحالتك النفسية.
طيب انا طولى 153 ووزنى 44 او
طيب انا طولى 153 ووزنى 44 او 45؛ وبتخن لما بتكون حالتى النفسيه كويسه من 2:3 كيلو بالكتير اوى وبرجع اخسهم بعد يومين تلاته؛ مع العلم انى حالتى النفسيه على طول مش مستقره؛اعمل ايه؟ واثبت وزنى ازاى لو تخنت شويه؟ وشكرا ع المقال الرائع ده! اه نسيت اقول ان عندى 24 سنه وخايفه السن يكون ليه علاقه بالنمو او بالتخن والنحافه؟
===============
رد بص وطل:
طبعا السن له عامل وكمان الحالة النفسية لها تأثير كبير جدا على وزن الجسم من حيث الزيادة أو النقصان، وبالنسبة لوزنك فحتى يكون مناسبا لطولك لابد أن يتراوح ما بين 46 لـ 58 كيلو وده معناه غن وزنك يعتبر في الحدود الصحية يعني ما وصلتيش لمرحلة نحافة شديدة والحل علشان تزودي وزنك إنك تحسني من حالتك النفسية وكمان تنظمي عاداتك الغذاية وتاكلي كل الحاجات اللي جسمك محتاج لها..
والله انتى عسولة اوى وكمان
والله انتى عسولة اوى وكمان احلى حاجة انك بتهتمى بالاسئلة وبتردى كمان عليها
أنا وزني 60 وطولي 155 ..هل
أنا وزني 60 وطولي 155 ..هل وزني مناسب مع طولي؟
============
رد بص وطل:
الوزن الصحي المناسب مع طولك يتراوح بين 47 إلى 60 كيلو.
بجد حرام عليكم كل اللى كاتبين
بجد حرام عليكم كل اللى كاتبين الكومنتات بتاعتهم احنا بنحلم نوصل لل50 او لل55 اللى مش عجباكم
انا طولى 168 سم ووزنى 63 كيلو
انا طولى 168 سم ووزنى 63 كيلو هل أنا كده وزني مناسب مع العلم ان أي حد يشوفني بيقول عليّ رفيعة.
===========
رد بص وطل:
وزنك كده مناسب جدا مع طولك وصحي وممكن لو عايزة تزودي وزنك شوية لكن ماتوصليش لأكتر من 70 كيلو.
موضوع هااااااااااااايل فعلا
موضوع هااااااااااااايل فعلا انا حسبت معامل كتله الجسم ولقيته 18.02 انا وزنى 45 كيلو وطولى 158 يعنى بعانى من النحافه من الدرجه الاولى بس انا عملت كل التحاليل ولقيتها كلها نتايجها طبيعيه جدا انا مش بخس لكن وزنى ثابت بقاله حوالى 5 سنين انا عندى 21 سنه ومش عارفه ممكن يكون ايه السبب مع العلم ان انا مش بعرف ازود كميه الاكل اللى باكلها وده بيخلينى افشل في الاستمرار مع دكتور تغذية ياريت تردوا عليا ومتشكرة جدااااا مقدما.
============
رد بص وطل:
الموضوع مش محتاج إلا شوية صبر وخصوصا إنك مش محتاجة تزودي وزنك كتير إلا حوالي 8 أو 9 كيلو.
السلام عليكم.. انا خاسة خالص
السلام عليكم.. انا خاسة خالص وحاسة انى نحيفة خالص ووزنى 49 وطولى 165.5 وكشفت ماعنديش اى مرض الحمد لله بس نفسيتى مش حلوة الايام دى وعملت تحاليل ولقيت عندى عسر هضم واخدت حبوب كتير من غير اخصائى وبعد كده استشارة اخصائى تغذية وعمل لى نظام فعملته مايكملش أسبوع وخلاص فلو سمحت يا دكتور قول لي اعمل ايه وشكرا ليك.
==========
رد بص وطل:
الصديقة العزيزة.. زي ما قلنا إن الحالة النفسية من أكتر الحاجات اللي بتأثر على الوزن، علشان كده حاولي تظبطي حالتك النفسية وماتخليش أي حاجة تاثر عليها، واهتمي بأكل كل ما هو صحي ومفيد من خضراوات وفاكهة ولحوم ومنتجات ألبان، لأن الوزن لازم يجي من صحة مش من تراكم الدهون، وكمان زي ما قلنا ممارسة الرياضة مهمة جدا، واتباع نظام غذائي صحي.
السلام عليكم.. انا بنت عندي
السلام عليكم.. انا بنت عندي 19 سنة مشكلتي في حب الشباب انا مش باكل شيبس او حاجات مقلية ولا حاجات من بره والكلام ده وباكل على طول اكل صحي بس المشكلة اني بحب الشيكولاتة.. اول ما اكلها الاقي حبتين تلاتة في وشي لدرجة اني بقيت لما بشتريها ابقى عارفة اني هصحى الصبح وعندي حبوب.. اصل المشكلة اني مش بحط اي ميك اب وبيكون شكلي وحش وكل اصحابي بيلاحظوها.. مع العلم اني باكها مرة كل اسبوع او كل اسبوعين- مش كتير يعني.. هل المفروض امتنع عنها تماما؟
===========
رد بص وطل:
الصديقة العزيزة لازم تستشيري دكتور جلدية متخصص علشان يحدد إذا كان مفروض تمتنعي عن الشيكولاتة تماما ولا لأ.
انا بعت رساله مش ظهرت
انا بعت رساله مش ظهرت ليه.
=============
رد بص وطل:
صديقتنا العزيزة يا ريت تبعتي سؤالك مرة تانية لأنه ماوصلش وإن شاء الله تلاقي رد في اقرب وقت.
السلام عليكم أولا بجد بنشكر
السلام عليكم أولا بجد بنشكر الدكتور كثرا انا طولى 150 سم ووزنى 45 ك بس كنت نحيفة جدا بسبب وجود الغدة الدرقية وقمت بإجراء استئصال الغدة منذ 7 شهور وبدأ جسمى يتحسن بس المشكلة ان وزنى ذاد فى منطقة البطن والآرداف وانا مكسوفة جدا حتى من زوجى ولم استطيع عمل رياضة بإستمرار لإن الغدة الجار درقية تم إستئصالها عن طريق الخطأ وبالتالى عندى ألم شديد فى العظم رغم انى بأخد 12حبه كالسيوم فى اليوم لكن أي مجهود بيزيد في آلام العظم عندي ارجو الرد عليّ وشكرا.
===========
رد بص وطل:
ألف سلامة عليكي صديقتنا العزيزة.. ويا ريت تستشيري دكتور متخصص علشان يديكي نظام غذائي مناسب لطبيعة جسمك ولحالتك الصحية.
انا طولي 170 ووزني 58..
انا طولي 170 ووزني 58.. مشكلتي ان كل اللي حواليا بيعتبروني طول ووزن مثالي.....بس انا بحس ان طولي زايد اوي وجربت كتير اني اتخن بس مش بزيد غير بصورة بطيئة جدا جدا.. هي في انواع أكل معينة ممكن تزود الوزن اسرع؟
=========
رد بص وطل:
الوزن الصحي المناسب مع طولك لابد وأن يتراوح بين 57 لـ 72 كيلو، وممكن تزودي وزنك شوية لو حاسة إن شكلك مش متناسق مع طولك، عن طريق اتباع نظام غذائي صحي تحت إشراف دكتور وممكن تاكلي حاجات فيها سعرات حرارية عالية شوية زي العسل والحلاوة.
انا مش عارفة بصراحة اجيب انا
انا مش عارفة بصراحة اجيب انا اد اية انا وزنى 49 كيلو وطولى 165 سم.
===========
رد بص وطل:
الوزن الصحي المناسب لطولك لابد وأن يتراوح بين 53 إلى 67 كيلو، وهذا يعني أن وزنك أقل من الوزن المناسب بحوالي 5 كيلو.
السلام عليكم ورحمة الله
السلام عليكم ورحمة الله وبركاته أنا طولى 160 ووزنى 57 يا ترى وزنى مناسب لطولى.
===========
رد بص وطل:
وزنك مناسب جدا مع طولك ويا ريت تحافظي عليه.
السلام عليكم.. انا طولي 160
السلام عليكم.. انا طولي 160 ووزني 45 ونفسي اتخن ومش عارفة اعمل ايه وعندي مناطق نحيفة جدا فيها ومناطق عادية وبجد حالتي النفسية وحشة فارجو الرد ولكم جزيل الشكر.
===========
رد بص وطل:
الصديقة العزيزة.. ممكن تعملي بعض التحاليل علشان تعرفي سبب النحافة اللي بتعاني منها، ودي التحاليل اللي المفروض تعمليها...
تحليل بول
تحليل براز
تحليل كورتيزون
تحليل سكر
الغدة الدرقية
لو سمحت يا دكتور.. أنا وزني
لو سمحت يا دكتور.. أنا وزني 59 وطولي تقريبا 162 وزني كده كويس بس لما بخس بيبقي من وشي مش بفقد من الوزن بس اكتر وزني في الارداف ممكن تقول لي علي حاجه اعملها اخس بها من المنطقه دي.
===========
رد بص وطل:
صديقتنا العزيزة.. زي ما بنقول دايما مفيش ريجيم يخسس منطقة معينة في الجسم، لكن الريجيم بينزل الدهون من كل الجسم بس ممكن منطقة يبان عليها أكتر من التانية لأن بيكون فيها كمية دهون أقل، وعلشان تحافظي على نضارة وشك وماينزلش أثناء الريجيم لازم تهتمي جدا بشرب الميه وتاكلي خضراوات وفاكهة كتير، أما بالنسبة للسمنة الموضعية في منطقة الأرداف فدي حلها هو اتباع ريجيم صحي مع ممارسة التمارين الرياضية.
النحافه احسن مليون مره من
النحافه احسن مليون مره من السمنه على الاقل بياكلوا كل اللى نفسهم فيه براحتهم
بشكركم على الموضوع الجميل ده
بشكركم على الموضوع الجميل ده بس عندى سؤال انا طولى 170 سم ووزنى 54 كيلو ونفسى اتخن وجسمى يملى شوية وباكل كتير واى حاجة بتتخن باكلها بس ما فيش فايدة مش بزيد عن الوزن ده ممكن اقل لكن مافيش زيادة وجربت اخد حوب زى الموسيجور بس مش بيتخنى بيخلينى اكل من غير نتيجة قولوا لى اعمل ايه ولو فيه تحاليل تتعمل ياريت تقولوا لى عليها عشان اعملها وميرسى ليكم.. واسفة للاطالة.
===========
رد بص وطل:
فيه بعض التحاليل اللي لازم تعمليها لمعرفة سبب النحافة حتى يمكنك علاجه مع اتباع نظام غذائي مناسب لطبيعة جسمك، والتحاليل دي هي...
تحليل بول
تحليل براز
تحليل كورتيزون
تحليل سكر
الغدة الدرقية
ايوة اكيد العامل النفسي هو
ايوة اكيد العامل النفسي هو السبب في النحافة
السلام عليكم ورحمة الله
السلام عليكم ورحمة الله وبركاته انا وزنى 53 وطولى 164 معقولة الحمد لله بس المشكله وشى خاسس خالص وبهتان المشكله انى مابجعش غير بسيط جدا واكلى بسيط خالص ومعنديش شهية والحمد لله نفسيتى كويسه وخدت فواتح شهيه كتير جدا معملتش حاجة نفسى اكل بشهيه كده انا تحاليلى الحمد لله كويسه هى بس الاميبا وعسر هضم بسيط انا مشكلتى انى لما بكتر فى الاكل عن المعتاد بتاعي برجع فعلشان كده بخاف اكل باكل بسيط اوى كاني عاملة ريجيم ويمكن اقل افيدونى افادكم الله.
=============
رد بص وطل:
الصديقة العزيزة.. مبدئيا إنتي لسه ما وصلتيش لدرجة النحافة لأن الوزن الصحي اللي لازم تكوني عليه واللي بيتناسب مع طولك لابد وأن يتراوح بين 53 لـ 67 كيلو، لكن لازم تعالجي المشاكل اللي بتعاني منها علشان وزنك مايقلش أكتر من كده وكمان علشان تطمني على صحتك لأن عسر الهضم والأميبا ممكن يسببوا مشاكل كتيرة بعد كده، فيا ريت تستشيري دكتور باطني متخصص وتعالجي المشاكل دي مع اتباع نظام غذائي صحي تحت إشراف طبيب تغذية متخصص.
nice topic, waiting the rest
nice topic, waiting the rest isA
ازاى نحسب معامل كتلة
ازاى نحسب معامل كتلة الجسم؟؟
=========
رد بص وطل:
الصديقة العزيزة يمكنك حساب معامل كتلة الجسم برقمين؛ الرقم الأول الوزن بالكيلو جرام، والثاني الطول بالمتر، مثلاً: لو طولك 170 سم ووزنك 100 كيلو.. نقسم الوزن على مربع الطول بالمتر (100 / 1.7 × 1.7).
- لو الناتج كان يتراوح بين 18.5 إلى 25؛ معنى كده إن الوزن طبيعي جداً.
- لو الناتج كان يتراوح بين 25 إلى 30؛ ده معناه إن فيه وزن زائد، وهو مؤشر لبداية الخطر والدخول في مرحلة السمنة.
السلام عليكم... انا طولي 170
السلام عليكم... انا طولي 170 ووزني 58... انا بحس ان طولي زايد وعلى الرغم ان اللي حواليا بيقولوا لي ان طولي ووزني مناسبين... بس انا بحس اني محتاجة اتخن وخصوصا اني بحاول بس النتيجة بتكون بصورة بطيئة جدا جدا... ياريت القى حل... وهل لو بدأت اتخن هيبقي هيئة جسمي مش حلوة بحكم طولي؟!
=========
رد بص وطل:
زي ما قلنا إن بناء الجسم بيحتاج لوقت أكتر من التخسيس، علشان كده لو عايزة تتخني لازم تمشي على نظام غذائي صحي ولازم تتابعي وزنك باستمرار علشان مايزيدش عن الحدود المسموح بها والمناسبة مع طولك، وعموما الوزن الصحي المناسب مع طولك لابد وأن يتراوح بين 57 لـ 72 كيلو.
انا وزنى 60 وطولى 155 ..هل
انا وزنى 60 وطولى 155 ..هل وزنى مناسب مع طولى ولا لا؟؟
===========
رد بص وطل:
وزنك كده مازال في الحدود الصحية المناسبة مع طولك واللي لازم يتراوح بين 47 لـ 60 كيلو لكن لازم تخلي بالك جدا إنك ماتزيديش عن الوزن ده لأنك لو زدتي هتبدئي تدخلي في مرحلة السمنة، والافضل إنك تحاولي تنزلي كام كيلو علشان تبقي في الأمان ويا ريت تتابعي وزنك باستمرار على الميزان.
