بالتأكيد كلٌ منا يرغب في أن يصل للقوام المثالي، وأن يخسر الوزن الزائد الذي يعيقه عن الكثير من الأشياء التي يتمنّى أن يمارسها.
ولكن البعض منّا قد تخونه إرادته وتضعف، وتمنعه أن يُكمل الطريق الذي بدأه.
ولذلك قرّرنا أن نقدِّم لكم بعض النماذج لأشخاص عاديين أكملوا الرحلة لنهايتها، ووصلوا لجسم معتدل ورشيق؛ حتى نأخذ منهم قدوة، ونتعلّم من تجربتهم، ونتجنّب أخطاءهم:
محاولة ناجحة مع الريجيم لإحدى صديقات الموقع
السلام عليكم.. أنا ماشية على ريجيم مزمن من حوالي 5 سنين؛ لأني من صغري وكان جسمي مليان، وكان الموضوع ده بيسبّب ليّ مشاكل جامدة أوي في كل حاجة، شكلي وطريقة لبسي؛ علشان كنت باقارن نفسي بالأطفال اللي في نفس سني.
كنت باحس إني غريبة في وسطهم، وكانوا بيتريقوا عليّ، والمدرسين في المدرسة كان بيطلّعوا عليّ ألقاب مش حلوة، وكنت مابحبش أروح المدرسة أو أنزل الشارع أو أخرج، وكنت بحب أفضل في البيت، وماكنتش باخرج غير في الضرورة وبس.
شراء ملابس العيد كان مأساة
كانت مأساتي بقى لما أنزل أشتري لبس، كنت باحس إني جاية من كوكب آخر، علشان لما كنت بادخل المحل، البياع كان يقول لماما مافيش مقاسها، كانت الكلمة دي بتجرحني أوي، وأفضل أقول لنفسي أنا ليه غير كل البنات؟!! وكنت باعيط، خصوصاً في العيد؛ علشان أحياناً كنت مابعرفش أشتري لبس، أو باشتري لبس بيكون مش حلو عليّ، بس كانت ماما بتجيبه لي علشان ماكونش زعلانة.
الناس كانت بتتريق عليّ
ده غير بقى نظرات الناس ليّ، وساعات بيكون فيه ناس رخمة بتتريق عليّ، وأنا ماشية، وبيقولوا لي يا "قلبوظة"، وكنت بازعل وباعيط أوي، وصلت لمرحلة إني مابحبش أشوف حد ولا أتكلّم مع حد.
فضل الحال ده لحد مرحلة إعدادي، وأنا عايشة المأساة دي، ومامتي كانت بتحاول ماتخلينيش أشعر بنقص؛ يعني بتسيبني براحتي في الأكل، باكل في أي وقت وأي حاجة.
وفي مرة رحت اشتكيت لماما، وقلت لها: "أنا نفسي أموت، أنا مابحبش شكلي، الناس بتتريق عليّ، ومش عايزة أروح المدرسة تاني"، قالت لي: "هخدك ونروح للدكتور".
تجربة الريجيم الأولى فشلت بسبب العيلة
فعلاً رحت للدكتور وشافني، وقال لماما إن وزني كبير أوي على سني، وده غلط، وهيأثر عليّ في كل حاجة، ولازم أمشي على كورس علاج علشان أخس، وبصراحة أنا كنت متحفّزة أوي للتجربة دي؛ علشان كان نفسي أغيّر نظام حياتي، وأخس وأكون طبيعية في شكلي ولبسي، وأعرف ألعب، وأخرج مع أصحابي.
والدكتور إداني نظام أكل، وكتب لي على علاج تخسيس علشان يساعدني في الدايت، بس ماما وبابا خافوا عليّ إن ممكن يحصل لي مضاعفات، خصوصاً إني كنت في سنة 5 ابتدائي، والعيلة عندي كلها عرفت موضوع الدايت، وإني رحت للدكتور، والكل قال لماما: حرام عليكِ لسه صغيرة على الدايت، إنتِ بتحْرِمي جسمها وهي في فترة نمو، وجسمها محتاج تغذية لما تكبر هتطول، وجسمها هينزل لوحده.
وكل واحد بقى عمل نفسه دكتور، ماما خافت عليّ طبعاً، وقالت لي: "مافيش دايت.. لما تكبري هتخسي لوحدك"، وطبعاً أنا صدّقت كلام ماما، وقلت ماما عارفة أكتر مني، وكملت حياتي عادي، بس برضه ماكنتش مبسوطة في حياتي، وبحب الوِحدة والقعدة في البيت، ولو حد اتكلّم على موضوع التخن أو جاب حاجة تخص الحكاية دي، كنت بتضايق أوي، وباحس إنه بيتكلّم عليّ، وأنا مقصودة بكل كلمة، وإن الناس بتبص عليّ وبتراقبني.
الاكتئاب زاد في مرحلة المراهقة
فضلت كده لحد أولى ثانوي لما دخلت المدرسة، وشفت البنات، كنت تقريباً أنا الوحيدة اللي في الفصل مليانة، نفسيتي تعبت؛ لأن ده سن مراهقة البنت بتحس إنها آنسة وكبرت، وبتبتدي تهتم بنفسها، وتاخد بالها من حاجات ماكانتش بتفكّر فيها، وده اللي حصل معايا بالظبط، يمكن الموضوع ماكانش مأثر فيّ أوي، بس الموضوع زاد عندي بنسبة أكبر في مرحلة ثانوي، وبقيت بافكر فيه على طول، وأنا نفسي شكلي يتغيّر، وكنت مابفكرش في أي حاجة غير الموضوع ده بس، وإني لازم أعمل دايت وأخس وأخلّي شكلي حلو، وأغيّر استايل لبسي والكلام ده كله.
خصوصاً إني كنت باشوف البنات اللي في سني بيخرجوا، ولبسهم حلو، وعايشين حياتهم، وكنت دايماً حاسة بالنقص في حياتي.
تجربة الريجيم التانية فشلت بسبب "الفسحة"
فكرت بيني وبين نفسي إني أروح للدكتورة، وبلاش دكتور؛ علشان كنت باحس بإحراج جامد أوي، ورحت عند دكتورة، وبرضه نفس الموضوع قالت لي: "وزنك كبير أوي على سنك، والمفروض وزنك يكون مناسب لطولك، وابتدي امشي على ريجيم خصوصاً إنك صغيرة وجسمك هينزل بسرعة"، أخدت الدايت منها، ومشيت عليه أسبوع واحد، وما قدرتش علشان كنت في أيام الدراسة، وباجوع بسرعة، وفي الفسحة كنت باشوف البنات بتاكل، وأنا باحس بالحرمان والجوع.
ورجعت تاني آكل براحتي، ومافكّرش في ريجيم، وبعدين جيت في إجازة تانية ثانوي، عملت ريجيم من دماغي أنا، وفعلاً خسيت، وكنت فرحانة أوي بالنتيجة، وخصوصاً إن الكل لاحظ عليّ إن جسمي نزل وشكلي اتغيّر.
حاولت أكمّل، بس بصراحة ماقدرتش؛ بسبب الدراسة والمذاكرة اللي كانت بتخليني أحس بجوع جامد أوي.
فشلت في الكلية.. بسبب وزني
خلّصت مرحلة ثانوي، وأنا جسمي برضه أكتر حاجة بتشغل تفكيري وحياتي، وكنت مستنية النتيجة علشان الجامعة بقى، ودي طبعاً مرحلة تانية خالص غير اللي فات كله، يمكن ماكنتش حاسة بالموضوع ده؛ علشان المدرسة ليها زي معين الكل مرتبط به، ومافيش حد بيحس باختلاف في اللبس؛ لكن الجامعة حاجة تانية في كل حاجة، حاولت أعمل دايت علشان أخس وأروح للدكتورة تاني بس ماعرفتش.
وِجِه ميعاد الدراسة، وأنا حاسة بخنقة، وإني مش عايزة أروح الكلية، وإن شكلي مش حلو، ومع أول يوم من دخولي الجامعة فعلاً حسيت باختلاف في كل حاجة؛ كانت البنات عاملة عرض أزياء، وكل واحدة عايزة تظهر إنها شيك في لبسها وشكلها، وكنت بتضايق، وعلشان السبب ده ماكنتش بحب أروح الكلية مع إني كنت في كلية هندسة يعني لازم أروح.
كنت بتحجج إني تعبانة، ومرة إني ماعنديش حاجة لحد ما سقطت في سنة أولى، علشان طبعاً مش فاهمة حاجة علشان ما باحضرش محاضراتي، وتعبت جامد، ونفسيتي اتدمّرت، والكل كان عارف إني سقطت علشان الكلية صعبة والمواد تقيلة؛ مش لأني متضايقة من لبسي وشكلي، وبعدين تعبت بسبب الموضوع لمدة سنة خليتني أقعد في البيت السنة دي، وكنت تقريباً مابخرجش خالص غير أروح للدكتور وخلاص.
كنت محبوسة في "سجن السمنة".. وخرجت للحياة
في المدة دي عملت ريجيم، وخسيت جامد أوي، واتغيّر شكلي وطريقتي ولبسي وكل حياتي، بقيت أحلى في كل حاجة، بقيت أحب أخرج كتير، وبقيت باشتري لبس كتير أوي، وحسيت فعلاً باختلاف رهيب حصل لي، وكأني كنت في سجن محبوسة، وخرجت للحياة، ورجعت للدراسة، وحبيت حياتي أوي، ولما كنت باشوف حد تخين كان بيصعب عليّ أوي علشان حاسة به، وأد إيه هو بيعاني.
والحمد لله بفضل ربنا خسيت، واشتغلت كمان مدرّبة في جيم، ونجحت في شغلي أوي؛ لأني كنت باخلّي أي حد ييجي لي الجيم لازم يخس، ويستمر معايا في الدايت والرياضة، وكنت بافضل أتكلّم معاهم كتير علشان اخلّي عندهم أمل..
كنت باعمل الحاجات اللي ماحدش كان بيعملها معايا؛ علشان كنت عارفة أد إيه ده موضوع صعب أوي على اللي بيكون فيه، وبيأثّر على نفسيته جامد، وكنت باكون فرحانة أوي ومبسوطة لما حد يخس عندي.
الريجيم علّمني حاجات كتير في حياتي
أنا دلوقتي بقالي 5 سنين محافظة على وزني، وماشية كويس على الريجيم، ومابحرمش نفسي من الأكل، واتعلّمت إنه علشان أنجح في الريجيم لازم أمشي على 3 خطوات؛ وهي:
1- إن الواحد لازم يكون عنده إرادة وأمل إنه يقدر يعمل الحاجة اللي عايز يحقّقها.
2- يكون عندنا أمل في ربنا، ونتأكّد إننا على أد ما هنتعب هناخد نصيبنا؛ يعني الواحد علشان يخس ييجي على نفسه شوية، وهو لوحده مش هيحاول يرجع تاني للوضع القديم علشان هيخاف على تعبه يروح هدر.
3- أهم حاجة الصبر في الريجيم، وإننا ما نستعجلش النتيجة، وصحيح ممكن نفشل كتير بس برضه لازم نحاول.
تسابيح
الصديقة العزيزة...
أولاً: أحبّ أن أقول لك إن تجربتك هايلة ومثال يحتذى به، وفعلاً كل الأشخاص اللي بيعانوا السمنة محتاجين الإرادة والصبر علشان يفقدوا وزنهم، ومحتاجين للصراع مع أنفسهم والانتصار على غريزة الأكل، وأن نتفهّم أن الأكل للإشباع فقط، وليس للاستمتاع، وألّا نربط الأكل بالمشاعر واللحظات النفسية السيئة، إلى جانب إنهم لازم يغيّروا من أسلوب حياتهم عامةً.
ثانياً: أُحبّ أن أهنّئك على نجاحك وإصرارك على المحافظة على وزنك؛ فالتثبيت شيء مهم جداً، وثبات الوزن فعلاً أهم من التخسيس؛ لأنه يدل على نجاح الشخص، ولكن نزول 20 كجم واسترجاعهم مرة ثانية ليس نجاحا، ولكن لا بد من الاستمرار في المحاولة.
ثالثاً: أُحبّ أن أُركّز على إصرارك وحماسك الهائل، وعدم اليأس، ونجاحك في الحصول على ما تسعين إليه، ولكن أُحبّ أن أؤكّد عليكِ وعلى كل أصدقائنا أن الإنسان ليس بشكله ومظهره، ولكن بشخصيته وكيانه، ولا بد أن يعتمد الإنسان على أفكاره ومعتقداته، ولا يتأثّر بكلام الناس أو أفعالهم حتى لا يتم خسارة أي شيء؛ مثل فقدانك أوّل سنة في الكلية، فلا بد أن نعيش حياة طبيعية مع محاولات التخسيس المستمرة.
انا تزوجت من 4 شهور وكان وزني
انا تزوجت من 4 شهور وكان وزني 62 وطولي 162 ودلوقتي وزني زائد وأصبح 71 وزوجي مش عايزني اتخن وزعلان مني ومش عارفة اعمل ايه ارجو الرد بسرعة.
============
رد بص وطل:
صديقتنا العزيزة للأسف المشكلة دي منتشرة جداً بين البنات في العالم العربي وهي زيادة الوزن بعد الزواج، وده بسبب عدم الاهتمام بالعادات الغذائية وكثرة العزومات، والراحة لفترة طويلة، وعلشان تلحقي الموضوع ده من أوله حاولي تظبطي عاداتك الغذائية ومارسي التمارين الرياضية زي المشي او الجري، أو حتى التمارين البسيطة اللي ممكن تعمليها بنفسك في البيت، وكمان كلي خضار وفاكهة كتير علشان تقللي من احساسك بالجوع خلال اليوم.
لو سمحت يا دكتور انا سنى 14
لو سمحت يا دكتور انا سنى 14 سنه ووزنى 57 كيلو وطولى 160 انا بجد عاوزه اخس وتعبت جدا وباكل كتير اوى ومش بعرف امشى على الريجيم مش عارفه مش بقدر ولما بلاقى نفسي جعانه لازم اكل ومش بعرف استغنى عن الاكل ومتعقده فعلا مش بحب اروح اشترى هدوم العيد علشان مش بلقى على مقاسى ولو لقيت بتبقى هدوم مش على مزاجى وبابقى شيفاها هدوم حلوه بس كلها للرفيعين اعمل ايه بجد زعلانه اوى حتى ماما بتقول لى اعمل ايه مش لاقيه مقاسك واتعقدت اوى ممكن لو سمحت تجيب لي اي حاجة تخسسني من غير ريجيم علشان مش بقدر عليه والله مستنية الرد وشكرررررراً.
============
رد بص وطل:
صديقتنا العزيزة دائماً بنهتم اننا نقدم لكم تجارب الآخرين مع الريجيم على بص وطل، علشان نعرف إيه الأخطاء اللي وقعوا فيها ونتجنبها، علشان نوصل لأحسن النتائج وزي ما شوفتي إزاي صديقتنا اللي بعتت لنا الرسالة المنشورة على الصفحة حالياً قدرت تتغلب على رغبتها في الأكل بالإرادة والعزيمة والرغبة الشديدة إنها توصل لأحسن شكل ممكن وده هيتطلب منك صبر وقوة عزيمة، وزي ما قولنا قبل كده ماينفعش إننا نخسر وزننا من غير ما نتبع ريجيم صحي تحت إِشراف دكتور متخصص، والموضوع هيكون سهل لما تكوني من جواكي فعلا عايزة تخسي، ويمكنك استشارة دكتورة نفسية علشان تساعدك في حل مشكلتك مع الرغبة الشديدة في الأكل، وتقدري كمان تبعتي لنا المشاكل اللي هتقابلك مع الريجيم واحنا هنرد عليكي على طول.
انا اسف يا جماعه مش قصدى
انا اسف يا جماعه مش قصدى الاصرار والمثابرة دى حاجه حلوة جدا جدا والارداه والعزيمه اهم حاجه، لكن انا كنت عايز اوصل انى مش لازم اوصل للقاع علشان اقتنع انى لازم اصلح من نفسى مش لازم اغلط علشان اصلح هي بتحكى انها حاولت كتير وفشلت فانا كنت عايز اوصل ان مش دايما اللى بيضحك اخيراً يضحك كثيراً ومش مكسب ان الواحد يفضل طول عمره مهموم ويضحك فى الاخر فانا بقول كده لاللى بيفكر يعمل حاجه كويسه انه يبدأ النهارده قبل بكرة والمكاسب اللى هتبدأ من النهارده هتبقى اكبر من المكاسب اللى هتبدأ من بكرة انا اسف جدا لو اتسببت فى مضايقه شعور حد.
انا مبسوطة اوى من النصايح دى
انا مبسوطة اوى من النصايح دى بس انا مشكلتى ان انا اكلى قليل جدا ووزنى 59 بس ليا بطن وحاولت كتير وعملت دايت وشربت ليمون ومية مغلية على الريق بس برده نفس المشكلة بجد اعمل ايه وميرسى ليكم.
==============
رد بص وطل:
مشكلة السمن الموضعية حلها إما ممارسة التمارين الرياضية ولكن الطريقة دي بتحتاج صبر ومواظبة واستمرار، او اللجوء لعمليات التجميل.
أنا طولي 175 سم ممكن اعرف
أنا طولي 175 سم ممكن اعرف الوزن المثالى ليا.
=============
رد بص وطل:
الوزن الصحي والمناسب مع طولك يتراوح بين 61 لـ 76 كيلو.
طيب لو سمحت يا دكتور انا طولي
طيب لو سمحت يا دكتور انا طولي 178 المفروض اصلا وزني يبقي في حدود كام كيلو؟؟؟ مع ان وزني هو 79 كيلو بس حاسه ان أنا مفروض اخس شويه بس ياريت حضرتك تقول لي انزل كام كيلو بالتقريب وميرسي كتير ليك.
==============
رد بص وطل:
الوزن الصحي المناسب مع طولك المفروض إنه يتراوح بين 63 لـ 78 كيلو، يعني إنتي محتاجة إنك تنزلي حوالي 5 أو 6 كيلو علشان تبقي في الوزن المثالي، وده هيحصل بتنظيم العادات الغذائية وتقليل الأكل مع ممارسة الرياضة بانتظام.
يا استاذى العزيز مع احترامى
يا استاذى العزيز مع احترامى ليك انت من وجهة نظرك انى فاشلة فأنت غلطان لانى متاخرتش انا سنى لسة 30 ولما ابتديت الريجيم ابتديت من اول يوم رياضة ومشى لمدة ساعة ونصف يوميا وللأن انا ملتزمة بالساعة مشى لانى اتعودت عليها، المشى والتمرينات فى الجيم خلوا جسمى مشدود مع إني كنت بعمل جلسات علشان الترهلات فانا كنت عاملة حساب الترهلات من قبل ما اخس والحمد لله كل اخواتى وزوجى ربنا يخليه ليا هما كانوا مصدر قوتى وكل لما اوصل لوزن كنت بحاول احطمه و شكرا على تشجيعك فانت انسان محبط وتبعث باليأس.
مش ممكن ... والله العظيم أنا
مش ممكن ... والله العظيم أنا لولا انى بقرأ كلامك ده أنا كنت افتكرت نفسي أنا اللى كاتباه.. أنا فعلاً عشت نفس حياتك دى بالظبط بس الفرق انى لحقت نفسي وانا فى المدرسه وبجد ياما الواحد اتعرض لمشاكل ونظرات الناس.. بس الحمد لله أنا بقالى أكتر من 10 سنين محافظه على وزنى.. يا ريت كل البنات يخلو بالهم من وزنهم ويعرفوا إن مفيش مشكله ملهاش حل:)
تعرفى انا كنت فعلا تخينة
تعرفى انا كنت فعلا تخينة وشكلى وحش ولما روحت الكليه اتصدمت من البنات بس الحمدلله عندى ارداة كبيرة وفعلا خسيت خالص واكتشفت فعلا انى جميلة كده وروحى بقت حلوة خالص ولبسى شيك خالص ولما ابص لنفسى فى المراية اقول انا ازاى كنت زمان بس انا عندى سؤال انا سمعت ان المية السخنة على ليمون من غير سكر بيضعف الكبد ده صحيح وممكن اشربها فى الريجيم ولا خطا؟
===========
رد بص وطل:
المية عامة مفيدة جداً للجسم والريجيم سواء كانت سخنة أو باردة، ومش لازم إضافة الليمون.
تجربتك بجد هايله بتفكرينى
تجربتك بجد هايله بتفكرينى بنفسى بالظبط بس انا للاسف لسه برضه بحاول اخس جربت ريجيمات كتير ولعبت رياضه واخدت ادويه وبرضه جسمى مليان والمشكله ان فرحى قرب.
بس انا حاليا مش باكل اى حاجه فيها دهون ولا زيوت خالص وباخد توم على الريق وميه مغليه على ليمون وباكل مسلوق وبقلل من اكلى وربنا يجيبه بفايده يارب.. ادعوا لى.
طيب ممكن اسأل سؤال انا طولى
طيب ممكن اسأل سؤال انا طولى 166 ايه هو الوزن المثالى ليا؟؟؟
=================
رد بص وطل:
الوزن الصحي والمناسب مع طولك المفروض إنه يتراوح ما بين 54 لـ 69 كيلو.
اشكرك على صراحتك بس بدي قووول
اشكرك على صراحتك بس بدي قووول كيف عملتيه شو بطلتي تاكلي ولا نقصتي شو اكلتي اكيد بعدتي تماما على العجائن ممكن رد حبيبتي بطلة القصة
أنا سمعت انى لو شربت شاى اخضر
أنا سمعت انى لو شربت شاى اخضر 3 مرات فى يوم ممكن اخس 3 كيلو فى شهر ده حقيقى.
================
رد بص وطل:
الشاي الأخضر يدخل تحت مسمى المواد التي لها تأثير محدود أو غير مؤثر في الريجيم، لكنه غير مضر وله فوائد تانية لا يمكن تجاهلها زي احتوائه على مواد مضادة للأكسدة ومهم لزيادة المناعة، لكن تأثيره في موضوع الريجيم لا يستحق أن أعتبره من أدوية الريجيم سواء أقراص أو شاي.
انا كنت عايزة اسأل عن موضوع
انا كنت عايزة اسأل عن موضوع يخص الصحة والجمال بس مش عارفة اكتب فين علشان توصل لكم مشكلتى.
===============
رد بص وطل:
صديقتنا العزيزة ممكن تكتبي لنا سؤالك وتبعتيه بنفس الطريقة اللي بعتي بها مشاركتك دي على لينك اخسر وزنك أو قمر 14 وهتلاقي الرد عليها في أسرع وقت.
معلش فى السؤال هو لازم دكتور
معلش فى السؤال هو لازم دكتور اللى يحط لى الجدول وكام مرة اروح له استشارة وشكرا.
=============
رد بص وطل:
الدكتور بيحدد لك النظام الغذائي على حسب طبيعة واحتياجات جسمك، ولازم يكون فيه متابعة مستمرة علشان الدكتور يقدر يعرف إذا كان الريجيم ماشي في الاتجاه السليم، أو محتاج يحصل فيه تغييرات.
ana kaman 3amalt keda w
ana kaman 3amalt keda w 5aseet 60 k.g ana 3arf en ma7adesh haysada2 bs ana kont 137 w now 78
بجد يا جماعه انا مواصلة
بجد يا جماعه انا مواصلة المسيرة وقولت لنفسى لا مفيش حرمان من الاكل بس في كميات صغيرة اوى يعنى بدال رغيف لاء ربع كفاية بالليل باكل ثمرة فاكة وكوباية زبادى وفعلا جسمى مستمر فى النزول وانا مش بقدر اخرج فبضطر انى اطلع السلم وانزلها بسرعه ولمدة 10 دقايق ادعو لى انى اوصل للنتيجة المظبوطة فاضل 34 كيلو وفعلا يا دكتور انا كنت متابعه مع دكتور شاب كويس جدا وعملى ريجيم والفايدة انه الوزن اللى بينزل مابيرجعش تانى ابدا ودة اللى انا بحس بية وشكرا لبص وطل عشان اللافتة الجميلة دى ودة فعلا المعتاد من الموقع دة.
انا مشكلتى كانت بعد الزواج
انا مشكلتى كانت بعد الزواج لكن الحمد الله بالصبر والارادة والتصميم خسيت من 115 الى 78 وانا طولى 168 المفروض كنت اخس تانى بس شكلى كان كده احلى وبعدين جوزى كان بيشجعنى على طول والحمد لله بعد سنتين بزيد زياده معقولة وبرجع انزلها تانى بس اهم حاجة المشى متواصل لمده ساعة وربنا يوفق الجميع.
لو حبينا نقيم تجربتك هنلاقيها
لو حبينا نقيم تجربتك هنلاقيها تجربه تعبر عن فشل اكتر ما تعبر على نجاح، لو كانت الارادة عندك من الاول وانتى فى اوئل السمنه كان التخلص منها مش هسيب اثر زى دلوقتى، دلوقتى انتى جسمك هيكون مليان سليوليت وجلد وعايز عمليات تجميل، النجاح الحقيقى اللى يحصل فى الوقت المناسب مش اللى بيخس بعد فوات الأوان، اللى فاتك اهم بكتير من اللى جاى.
يااستاذ عز الدين انت بجد ردك
يااستاذ عز الدين انت بجد ردك مستفذ وغريب جدا يعنى ايه فاتها اكتر واهم من اللى جاى يعنى المفروض اى حد بقى يموت نفسه لو عنده مشكله وميحاولش يحلها لالالا انت غلطان اوى المهم اننا نحقق اللى احكنا عاوزينه واننا نرضى عن نفسنا فى الاخر مش تقول انها فاشله وتقول لها جسمك فيه سليوليت ايه ياعم الكلام الغريب بتاعك ده ياريت لو معندكش كلمه حلوه تسكت احسن.
مش ممكن السلبية اللى بتتكلم
مش ممكن السلبية اللى بتتكلم بيها دى يا عز الدين
ياااه بجد مش ممكن السواد و النظرة الضيقة للأمور اللى عندك
بجد بتمنى ربنا يحطك فى نفس الموقف او فى موقف مشابه و متعرفش تتصرف الا متأخر و ساعتها ابقى اقعد احبط فى نفسك زى مانت عاوز
لكن مش من حقك تحبط اى حد ناجح الا اذا كان الفشل ماليك و الحقد بيدفعك لانتقاد اى نجاح
أعوذ بالله بجد
بجد تجربة هايلة جدا جدا وربنا
بجد تجربة هايلة جدا جدا وربنا يقويكى بس انا يا دكتور عندى مشكلة صغيرة ونفسى حد يرد عليا انا فى الفترة الاخيرة من حوالى شهر او شهرين وزنى زاد انا مش عارفة قد اية لكن دة باين عليا قوى فى منطقة البطن والرجلين انا طولى حوالى 166 ونفسى انزل للوزن القديم بتاعى اللى وصلت له بعد عذاب بس العيلة والناس اللى حوليا بيقولوا لى جسمك كده حلو بس انا مش راضية عن شكلى قدام المرايا وحاسة ان شهيتى مفتوحة لدرجة انى اخدت سيبوتيرم المشكلة بقى ان فرحى قرب وعايزة اخس من المناطق دى واقلل من شهيتى ومش عارفة اعمل اية.
=================
رد بص وطل:
الصديقة العزيزة لازم تستشيري دكتور متخصص علشان يديكي الدواء المناسب ليكي مع النظام الغذائي المناسب وماتنسيش أهمية ممارسة التمارين الرياضية بانتظام حتى ولو كانت رياضة المشي كل يوم لمدة ساعة أو نصف ساعة.
انا كمان مريت بنفس التجربه
انا كمان مريت بنفس التجربه وخسيت جامد جدا واللى يشوفنى ما يصدقش انى كنت تخينه بس بقى عندى مشكله ترهلات فى ذراعى رغم انى لسه بنت صغيره والمشكله دى عقدتنى يا ريت لو حد يقول لى ايه الحل.
============
رد بص وطل:
مشكلة الترهلات دي حلها ممارسة التمارين الرياضية ولكنها هتحتاج لوقت كبير شوية لكن مع الانتظام هتحسي بنتيجة هايلة، والحل التاني هو الجوء لعمليات التجميل.
بجد تجربتك هايلة جدا جدا وانا
بجد تجربتك هايلة جدا جدا وانا كمان كنت متضايقة جدا الايام اللى فاتت فانا وجوزى لاحظنا نزول ملحوظ بالنسبة لجسمى يعنى فى حوالى اسبوع نزلت اربعه كيلو ومن غير ريجيمات بس كنت متضايقة واكلى قليل فقلت لنفسى ليه ما اكملش بالاكل القليل دة وابقى زى ما انا عاوزة انا دلوقتى 98 من اصل 107 وقبل اسبوع كنت 101 وربنا يقوينى واكمل.
طاب ايه هو
طاب ايه هو الريجيم.
=============
رد بص وطل:
الصديق العزيز كل طبيعة جسم ولها الريجيم اللي يناسبها علشان كده لازم تاخد الريجيم تحت إشراف دكتور متخصص.
وانا كمان ان شاء الله هعمل
وانا كمان ان شاء الله هعمل زيك واخلى عندى ارادة قوية جدا جدا
وحماس قوى جدا واخس واوصل للشكل اللى انا عايزاه ومش هربط الاكل بالفسح والاستمتاع تانى ابدا لان دى صحتى وشكلى.
