الطرق الصحية للتخلّص من السمنة الموضعية

انا طولى ووزنى مناسبين جدا وجسمى منسق بس للاسف عندى بطن او كرش صغير المشكلة دى تعبانى اوى انا بحاول انى اشفط بطنى كل يوم وممكن افضل ساعات وانا شافطة بطنى بس عندى ترهلات كمان من بعد الصدر كده وبصراحة لو عملت رياضة مش ضامنة استمر عليها .اللف التنحيفى ده بيتعمل عند دكتور ولا ايه؟ وهل هيقضى على الترهلات دى ولا ايه؟ انا فرحى قرب كمان 3 شهور.اسفة للاطالة بس انا بجد تعبانة نفسيا بسبب المشكلة دى.

===========

رد بص وطل:
اللف التنحيفي طريقة من طرق علاج مشكلة الترهلات والسمنة الموضعية لكنها مش هتغني عن ممارسة الرياضة وبتعمليه عند دكتور متخصص.

ana nefsi a3raf eh el silulite da ya rit 7ad yewada7ly

=========

رد بص وطل:
السيليوليت هو طبقة دهنية رقيقة تتكون تحت الجلد مباشرة فتجعل البشرة على شكل قشرة البرتقال أو الليمون وتظهر في مناطق معينة من الفخذين والردفين وأعلى الذراعين.

السلام عليكم ورحمة الله وبركاته انا كنت عايزة تمارين رياضيه لمن يعانون من عسر الهضم تمارين لتليين المعده وكذلك تمارين لمن يعانون من الم بالظهر والرقبه.

============

رد بص وطل:
صديقتنا العزيزة عسر الهضم من الأمور اللي لازم تعالجيها وماتسيبهاش كده لكن لازم يكون العلاج تحت إشراف طبي متخصص والموضوع مالوش علاقة بالتمارين الرياضية، أما بالنسبة لآلام الظهر والرقبة فإن شاء الله نقدم لكم عدد عن التمارين الخاصة بالمشكلة دي.

هاي ازيكم الكلام جميل وانا بهنيكم علي النجاح انا مش في مصر ووزني زاد وحاولت امارس الرياضه واعتمد علي الخضراوات والفواكه وخاصه وجبة العشاء كانت سلطه زبادي فقط واشعر بتحسن.

=========

رد بص وطل:
أهلاً بيك صديقنا العزيز ونهنيك على النظام الصحي اللي بتتبعه ونتمنى إنك تداوم عليه وتوصل للوزن اللي إنت عايزه وياريت تتابعنا دايماً وتبعت لنا باستمرار.

ممكن لو سمحتى تدينا معلومات اكتر عن طريقه اللف التنحيفى لانى عندي مشكله فى الكرش والجوانب وجزاك الله خير.

==========

رد بص وطل:
اللف التنحيفى عبارة عن دهان بمادة طبيعية من الاعشاب والطحالب البحرية يتم دهان المنطقة المطلوبة بكمية مناسبة مع عمل مساج خفيف ثم نلف المنطقة بمادة عازلة (بلاستيك مثلا) ونشدها قليلا(تكون محكمة الشد) وتترك لمدة ساعة الى ساعتين ويفضل ممارسة الرياضة مثل المشى.

ما هو اللف التنحيفى.

===========

رد بص وطل:
اللف التنحيفى عبارة عن دهان بمادة طبيعية من الاعشاب و الطحالب البحرية يتم دهان المنطقة المطلوبة بكمية مناسبة مع عمل مساج خفيف ثم نلف المنطقة بمادة عازلة (بلاستك مثلا) ونشدها قليلا( تكون محكمة الشد) وتترك لمدة ساعة الى ساعتين ويفضل ممارسة الرياضة مثل المشى.

انا من حوالي 5 سنين كان وزني 101 كيلو وعملت رجيم لمدة 7 شهور وصل وزني ل69 كيلو ولسه محافظه علي الوزن ده لحد الان بتخن ساعات في حدود 5 كيلو وبنزلهم تاني وانا طولي 171 سم مشكلتي اني معرفتش افرح بالوزن اللي وصلت له ده لانه بقى عندي ترهلات في البطن من الاسفل وفي منطقه الفخدين من الداخل وبصراحه انا سبت الرياضه من ساعه ما بطلت الريجيم يعني من حوالي 5 سنوات ده غير الخطوط البيضاء اللي في جسمي سؤالي اللي بجد هكون شاكره ليكم لو ساعدتوني اني الاقي اجابه ليه هل الرياضه ممكن تساعدني اتخلص من ترهل الجلد والشحوم في المنطقتين دول (اسفل البطن والمنطقه الداخليه للفخدين)؟؟ انا بقيت علي وش جواز وبجد نفسي في حل غير العمليات الجراحيه ولكم جزيل الشكر والامتنان علي مساعدتك لينا مع كل الود والتقدير.

===========

رد بص وطل:
أولاً نحب نحييكي على الوزن اللي خسرتيه ونتمنى إنك تكوني قدوة لبنات كتيرة علشان يكون عندهم إرادة وتحدي ويقدروا يواظبوا عللى الريجيم ويخسوا، وبالنسبة لسؤالك فزي ما قولنا في العدد الرياضة مفيدة جداً جداً لشد الجسم وعلاج الترهلات بس لازم تواظبي عليه وتبقى عادة مستمرة في حياتك لإن لما الجسم بيعتاد على الرياضة العضلات بتبدأ تتشد لكن لما بتوقفي العضلات بتبدأ ترتخي وترجع المشكلة زي الأول، وفي النهاية الرياضة لازم تكون أساس في حياتنا.

أنا وزنى 80 وطولى 156 وماعنديش إرادة انى اعمل ريجيم واخدت برشام وبرضه مأثرش ممكن نصيحة.

==========

رد بص وطل:
علشان وزنك ينزل لازم تمشي على ريجيم صحي متوازن علشان جسمك يخس بشكل صحي وبلاش استخدام الأدوية إلا عند الحاجة وبعد استشارة الطبيب المتابع لحالتك. وبالنسبة للإرادة فدي حاجة لازم تنميها في نفسك علشان تقدري في النهاية توصلي للشكل اللي إنتي عايزاه واللي أكيد هيكون أفضل.

اي الاجهزة افضل الاوربتراك ام العجلة لشد جميع اجزاء الجسم وخصوصا ترهل البطن والافخاد.

=============

رد بص وطل:
جهاز الاوربتراك أو العجلة هي مجرد جهاز رياضي من الممكن التدريب عليه ولكن ليس من الممكن الاعتماد عليه حتى تفقدى وزن ولكن فقد الوزن محتاج إلى التزام تام بنوع معين من ريجيم متزن ومتكامل العناصر الغذائية ويليه التثبيت.

طيب لو سمحت ايه ايك فى مشروب الزنجبيل بالقرفه هو قعلا بيخسس.

===============

رد بص وطل:
مفيش أي أبحاث علمية أثبتت أن المشروبات دي بتخسس فعلاً، ولكنها مفيدة على أي حال لكن لا يمكن نعتمد عليها لوحدها في التخسيس يعني لازم نمشي على نظام غذائي صحي ومتوازن.

انا وزنى 75 كيلو وطولى 165 وبعمل دايت مع دكتور تخسيس وبخس والحمد لله بس المشكلة انى بخس من فوق بس لكن منطقة الارداف بتخس بنسبة ضئيلة جدا تكاد تكون غير ملحوظة انا الدكتور قال لى ان الوزن الطبيعى ليا 68 وده كتير شوية لإنى اصلا كنت 96 كيلو قبل كده بس انا حاسة انى قربت للوزن الطبيعى ومع ذلك رجلى كبيرة جدا والمنطقة اللى تحت كلها بمارس المشى لكن مش بيعمل حاجة معاها انا حاسة انها هتفضل تخينة اوى كده على طول حتى بعد ما اوصل للوزن الطبيعى وده موضوع يؤرقنى جدا خصوصا ان فاضل شهور على جوازى اعمل ايه؟

============

رد بص وطل:
أولا نحب نهنيكي على الوزن اللي خسرتيه، وإن شاء الله تكملي للنهاية وتوصلي للوزن المناسب، أما بخصوص السمنة الموضعية أو تركيز الدهون في بعض مناطق للجسم فدي هتحتاج لصبر ومواظبة وممارسة التمارين الرياضية بانتظام واستشارة مدرب متخصص لمعرفة التمارين الخاصة بشد عضلات الأجزاء دي من الجسم.

أنا اسمى اسماء وزنى 67 ك وطولى 166 سم وعندى بطن وأجناب مش كبيرة بس مضايقاني اعمل ايه علشان ينقصوا وايه هو وزني المثالي.

===========

رد بص وطل:
الوزن الصحي المناسب مع طولك لابد وأن يتراوح بين 55 لـ 68 كيلو، وعلشان تتغلبي من مشكلة السمنة الموضعية دي لابد من اللجوء لممارسة التمارين الرياضية أو اللجوء للف التنحيفي زي ما قولنا في العدد ده.

الموضوع شيق و مناسب جدا لان الكثير بيعانو من هذا الموضوع و منهم انا

انا ضعيفة الإرادة وزني 79 وطولي 175 وتختوخة حبة بمشي على الريجيم تمام بس اسبوعين او ثلاثة ويجي يوم ابوظ كل اللي عملته واكل شيكولاته وشيبسي وبعدين ارجع الوم نفسي واحس اني هديت اللي أنا ببنيه أنا مش عارفة هل اليومين دول يبوظوا كل اللي عملته الأيام اللي فاتت ولا زي بعض الناس ما بتقول انه كده وزني يثبت ولا برفع معدلات الحرق ولا إيه... أعمل ايه يا بص وطل.

==========

رد بص وطل:
فيه فرق بين الريجيم والتثبيت، في الريجيم لازم تلتزمي بالوجبات اللي موجودة في النظام الغذائي، وأي زيادة أو لخبطة أكيد هتقلل وتبطيء تأثير الريجيم، وترجعي خطوات كتيرة لورا، أما بالنسبة للتثبيت فهو ببساطة إنك تحصلي على سعرات توازي المجهود المبذول يوميا وان تراقبي ما تأكلي بعد التوقف عن الريجيم ومن المفترض إنك خلال فترة الريجيم تتعلمي طريقة الأكل الصح وتعودي نفسك عليها ويبقى ده اسلوب حياتك على طول.. صحيح مش معقول إنك هتعيشي طول حياتك تعملي ريجيم أو تتابعي مع دكتور وعلشان تعملي تثبيت لوزنك ففيه أكثر من شكل للتثبيت إما إنك تقللي كميات اكلك يعنى تاكلي كل حاجة لكن بكميات اقل مع الرياضة اليومية المتاحة، والطريقة التانية إنك تعملي توازن يعني لو يوم خرجت مع صحابك وهتاخدي راحتك فى الاكل اليوم اللى بعده تمشى على الريجيم، ولو لخبطي فى الاكل يومين اليومين اللى بعدهم اعملي ريجيم وهكذا.
واهم حاجة إنك توزني نفسك على الاقل مرة كل اسبوعين علشان لو لقيتي نفسك وزنك زاد تقللي فى الوجبات الحرة خلال الاسبوع يعني لو محددة ثلاث وجبات فى الاسبوع قلليهم لوجبه واحده او اتنين ولو بدأتِ تاكلِ قطعتين شيكولاته فى اليوم خليهم قطعه واحده كل يومين وهكذا، ولو لقيت نفسك نازلة على الميزان ممكن تزودي شوية الحاجات اللي بتحبيها ولكن بحدود.

هو ممكن السليوليت يختفى من الرياضة؟ وايه راى حضرتك فى الشورت الحرارى ولو انا عروسة شهر كافى انى اشد جسمى؟

==========

رد بص وطل:
يحتاج السيليوليت مراجعة طبيب أمراض جلدية أو جراح تجميل ولا علاقة له بالريجيم لان هو عبارة عن تكتل الدهون والالياف بشكل معين تحت الجلد وهى تحتاج الى علاج مش مجرد حاجة تذوب الدهون ولا ينفع معها اللف التنحيفى أو شفط الدهون، أما بالنسبة للشورت الحراري فهو ليس فعال بدرجة كبيرة ولا يتم فقدان الوزن عن طريق استعماله فقط، فهو يساعد بنسبة لا تتعدى 1 أو 2% وذلك ليس بالمفعول الواضح، ولكن لابد من اتباع نظام غذائي يناسب حالتك الصحية والنفسية مع ممارسة التمارين الرياضية لشد الجسم.