مع ريجيم الأسبوع الثاني.. اخسر وزنك وحافظ على صحتك

السلام عليكم انا طولى 156 ووزنى 59 كيلو وبعمل دايت دلوقتى وعمرى 23 سنة السنه اللى فاتت عملت دايت وكنت 63 وخسيت لحد 56 كيلو بس رجع وزنى فات بعدها بكام شهر فعايزه أسال هل فى دواء معين او نظام معين للتثبيت؟ وممكن استخدم اورليستات هيساعدنى ولا بلاش؟ وشكرا.

==============

رد بص وطل:
الصديقة العزيزة بالنسبة لسؤالك عن دواء اورليستات فهو دواء هام وتأثيره كويس جداً لكن محتاج نظام غذائي معاه، وبالنسبة لنظام التثبيت ففيه أكثر من شكل للتثبيت إما إنك تقللي كميات اكلك يعنى تاكلي كل حاجة لكن بكميات اقل مع الرياضة اليومية المتاحة، والطريقة التانية إنك تعملي توازن يعني لو يوم خرجت مع صحابك وهتاخدي راحتك فى الاكل اليوم اللى بعده تمشى على الريجيم، ولو لخبطي فى الاكل يومين اليومين اللى بعدهم اعملي ريجيم وهكذا.
واهم حاجة إنك توزني نفسك على الاقل مرة كل اسبوعين علشان لو لقيتي نفسك وزنك زاد تقللي فى الوجبات الحرة خلال الاسبوع يعني لو محددة ثلاث وجبات فى الاسبوع قلليهم لوجبه واحده اواتنين ولو بدأتِ تاكلِ قطعتين شيكولاته فى اليوم خليهم قطعه واحده كل يومين وهكذا، ولو لقيت نفسك نازلة على الميزان ممكن تزودي شوية الحاجات اللي بتحبيها ولكن بحدود.
مهم جدا مراقبة الوزن عشان ممكن الكيلو يجر كيلو ومن غير ماتشعر هاترجع اللى نقصته بسرعه .
لابد ان ناخذ فى الاعتبار ان التثبيت بيختلف من شخص لآخر حسب طبيعه النشاط وكمان طبيعه الحالة المزاجيه، فى ناس بتحب تاكل لما تشبع فى هذه الحالة عند التثبيت اكتر من الاكل اللى بيشعرنى بالامتلاء زى السلطة والفاكهه اكتر من الانواع الاخرى لو بحب الحلويات اقلل من الكميات عشان احصل على قطعه شيكولاته وهكذا بعد فترة كل واحد بيعرف طبيعة جسمه واستجاباته والفيصل وزنك على الميزان.

انا وزنى 56 وطولى حوالى 154 وبعانى من ان عندى بطن خفيفة بس انا عايزة اخس بس مش عارفة ازاى ممكن تساعدونى.

==========

رد بص وطل:
صديقتنا العزيزة إنتي وزنك صحي وكل اللي إنتي محتاجاه إنك تاخدي بالك من كميات أكلك علشان ماتزيديش عن كده مع ممارسة الرياضة علشان بطنك تنزل وجسمك يبقى مشدود.

انا عندي 22 سنه كنت 130 كيلو خسيت 35 كيلو في 8 شهور وبعدين زهقت فاكلت تاني ورجعت تخنت 5 كيلو وبقيت 100 وعندي حاله زهق من كل انواع الريجيم زهقت بدرجة مش معقوله ومليت جدا مش عارف اعمل ايه وانا طولي 175

===========

رد بص وطل:
الصديق العزيز أهم حاجة في الريجيم إنه يكون صحي ومتوازن وفيه كل العناصر الغذائية اللي بيحتاجها الجسم، ولو شعرت بالجوع أثناء اتباع الريجيم ممكن تاكل خضروات طازة زي الخس والخيار، وممكن من وقت للتاني تستشير الدكتور وتغير النظام اللي إنت ماشي عليه علشان ماتشعرش بالزهق والملل، ويمكنك الاستعانة ببعض الأدوية ولكن تحت إشراف الدكتور المتابع لحالتك، وماتنساش طبعاً اهمية الرياضة في انقاص الوزن والحفاظ على صحة الجسم، ولازم تعرف إن مش مهم إننا ننزل وزننا بسرعة لكن الأهم إن الوزن اللي نزلناه مايرجعش تاني، ولازم نعمل تثبيت للوزن لما نتوقف عن الريجيم.

وزني 65 قامتي 169 المشكلة لدي بطني زائد عن اللزوم عمري 20 سنة.

=============

رد بص وطل:
الحل الأمثل للمشكلة دي هو ممارسة التمارين الرياضية لإنها مفيدة لصحة الجسم بشكل عام وبتساعد على التخلص من مشكلة السمنة الموضعية مع المواظبة والانتظام عليها، ويوجد حل آخر وهو اللجوء لعمليات التجميل.

انا عندى 20 سنة وطولى 150 ووزنى 62 وعايزة اعرف اخس اد اية وعايزة اعرف نظام يناسبنى.

===========

رد بص وطل:
الوزن الصحي والمناسب مع طولك يتراوح بين 45 لـ 55 كيلو، ويا ريت تتابعينا وإن شاء الله هنقدم ريجيمات صحية ويمكنك ايضاً استشارة طبيب متخصص وعمل بعض التحاليل لمعرفة سبب الزيادة في الوزن وبناءاً عليه يقدر يقول لك على النظام الغذائي المناسب لطبيعة جسمك.

انا بنت 22 سنه وزنى 53 وطولى 163 هل ده مناسب ولا لأ مع العلم انى باكل كويس.

============

رد بص وطل:
الوزن الصحي المناسب مع طولك يتراوح بين 53 لـ 66 كيلو، يعني وزنك كده لسه في الحدود الصحية ومش بتعاني من مشكلة نحافة ولا حاجة، ولو عايزة تزودي وزنك شوية ممكن تزودي في الأكلات اللي بتحتوي على سعرات حرارية عالية زي العسل والحلاوة ولكن مع متابعة وزنك على الميزان باستمرار علشان ماتتعديش الحدود الصحية لوزنك.

عمرى 18 سنة وزنى 69 وطولى 159 عند بطن تجعل من مظهرى عريضة ارجو المساعدة والرد السريع.

===========

رد بص وطل:
صديقتنا العزيزة أنت في حاجة لاتباع ريجيم صحي للوصول للوزن الصحي والمناسب مع طولك والذي يتراوح بين 50 لـ 63 كيلو مع ضرورة ممارسة التمارين الرياضية والمواظبة عليها للتخلص من السمنة الموضعية في البطن واي منطقة في الجسم.

انا ماشيه فى 20 سنه وطولى 160 ووزنى 65 ياترى انزل كام كيلو علشان يبقى طولى مناسب مع وزنى وهل الابر تسبب ضرر للجسم.

=============

رد بص وطل:
الوزن الصحي المناسب مع طولك يتراوح بين 51 لـ 63 كيلو، وبالنسبة للإبر الصينية فهي لها استخدامات طبية عديدة مثل علاج الالم المزمن والصداع النصفى ولكن بالنسبة للتخسيس فقد اعلن مؤتمر الجمعية الاوروبية لدراسة السمنه منذ عام 96 إنها لا تأثير لها على الوزن.

انا وزني 77 وطولي 160 ايه الوزن المناسب ليا.

============

رد بص وطل:
الوزن المناسب مع طولك يتراوح بين 51 لـ 63 كيلو.

شكرا للجهد المبذول وعندى سؤال انا طولى 172 سم ووزنى 85 وعندى 34 سنة واجريت ولادة قيصرية من سنتين واوقفت رضاعة من 4 شهور ومحتاجة اعرف وزنى الصحى حدوده كام وان كان الدهون والترهل فى الصدر والبطن وشوية الارداف وباقى الجسم مش بدين يبقى الحل ايه
ولكم جزيل الشكر وارجو الرد.

===========

رد بص وطل:
الوزن الصحي لكي يتراوح بين 59 لـ 73 كيلو، ويمكنك اتباع ريجيم صحي متوازن للوصول للوزن المناسب مع ضرورة ممارسة التمارين الرياضية للتخلص من مشكلة السمنة الموضعية لإن مفيش ريجيم بينزل مناطق معينة في الجسم.

السلام عليكم:
انا وزنى 73 وطولى 56 كنت عاوزة اعرف الوزن المثالى هياخد منى وقت اد ايه فى حين انى اى ريجيم بمشى عليه بنزل 1 ك بس.

============

رد بص وطل:
الوقت اللي إنتي محتاجاه علشان توصلي للوزن المناسب بيتحدد على حسب حاجات كتير منها نوع الريجيم ومدى التزامك به وعوامل تانية كتير، وأهم حاجة دلوقتي إنك تمشي على ريجيم صحي وتواظبي عليه تحت إشراف دكتور متخصص علشان يقدر يحدد إذا كان الريجيم بيجيب نتيجة معاكي ويغيره لك لما تكوني محتاجة لتغييره مع ضرورة ممارسة التمارين الرياضية بانتظام.

انا عندي 12 سنه ووزني 55 كيلو وطولي من 150 الي 155 ايه الوزن الصحي.

============

رد بص وطل:
الصديقة العزيزة لازم تذكري طولك بالتحديد علشان اقدر اقول لك على الوزن المناسب له.

طيب انا طولى 168 ووزنى 68 ك وانااصلا كنت رفيعه ومره زدت ممكن اعرف ايه النظام الريجيم اللي يناسبنى وانا عندى 22 سنه علما انى بقيت باكل شيكولاته وبسكوتات كتير مش عارفه ليه.

==========

رد بص وطل:
صديقتنا العزيزة وزنك مازال في الحدود الصحية ومناسب مع طولك لكن لابد من الالتفات لنوعية الأكل اللي بتاكليه والكميات علشان تحافظي على وزنك وماتزيديش عن كده وحاولي على أد ما تقدري تقللي من أكل الحلويات والشيكولاتة وممكن تكتفي بقطعة صغيرة جداً منها، مع الاكثار من تناول الفاكهة والخضروات الطازجة، وضرورة ممارسة التمارين الرياضية بانتظام حتى ولو كانت رياضة المشي بشكل يومي لمدة 30 دقيقة.

حلو اوى نظام الاكل ده لكن انا عندى سؤال انا وزنى 58 وطولى 159 وعندى 22 سنة انا مش عارفة اخس ابدا مع انى بقلل اكلى وبمارس السباحة ويوجا ومع ذلك مش عارفة اخس ومش عارفة اعمل اية.

============

رد بص وطل:
وزنك مناسب جداً مع طولك، ومش محتاجة تخسي، لكن واظبي على الرياضة اللي بتعمليها مع رياضة المشي كل يوم لمدة نصف ساعة.

السلام عليكم انا وزنى 65 وطولى 162 ايه هو الوزن المثالى.

==========

رد بص وطل:
الوزن الصحي والمناسب مع طولك يتراوح بين 52 إلى 65 كيلو.

انا وزني 85 وطولي 160 ونفسي اخس بجد وخطوبتي بعد شهر شكراااااااا.

===========

رد بص وطل:
صديقتنا العزيزة، الوزن الصحي المناسب مع وزنك يتراوح بين 50 لـ 63 كيلو، وده معناه إنك محتاجة تخسي على الأقل من 20 لـ 25 كيلو، وده هيحتاج إنك تمشي على ريجيم صحي على الأقل لمدة 4 أو 5 شهور، علشان تقدري تخسري وزنك بأمان وتكوني واثقة إن الوزن اللي خسرتيه ده مش هيرجع تاني بسرعة، لأن غلط جدا النزول المفأجئ واللي بيخلي نسبة الاستيون ترتفع فى الدم وده معناه لخبطه في وظائف الجسم وبيؤثر بالسلب على خلايا الجسم واستجاباتها للريجيم وهنا بيضر الجسم بالاضافة انك ممكن ترجعي للوزن السابق بسرعة هائلة.

السلام عليكم ممكن يادكتور تقول لنا علي رجيم ينفع الاغلبيه اللي مش بيعانوا من السكر او الضغط يعني ريجيم صحي يناسب اغلب الناس اللي بيعانوا من سمنة متوسطه مع العلم ان اغلب الناس عندها انيميا بس بتختلف في نوعها طبعا شكرا.

=========

رد بص وطل:
إن شاء الله سنعمل على تنفيذ طلبك في أقرب وقت.

انا وزنى 55 كيلو وطولى 160 ياترى كده وزنى مناسب.

==========

رد بص وطل:
وزنك كده صحي ومناسب جداً مع طولك.

لو سمحت عاوزة حل لمشكله ثبات الوزن لانى وزنى بينزل وبعدين بيجى عند رقم معين ويثبت مش بيرضى يخس اعمل ايه.

=========

رد بص وطل:
الصديقة العزيزة المشكلة إنك ممكن تتباعي نظام ريجيم واحد لمدة طويلة متخيلة انه صح او متابعه نظام فى الاكل مرتاحه عليه لكن النظام ده ممكن يكون فيه لخبطه وإنتي مش عارفة وبتكرريها طول الوقت، وبالتالي الوزن بيثبت عند رقم معين ومش بيتحرك وممكن الوزن يزيد بالرغم من التزامك بالنظام الغذائي، والحل إنك تتاكدي ان النظام اللي إنتي ماشية عليه صح ولازم تسجلي كل حاجه بتاكليها – حتى الشاى والقهوة واى حاجه بتدخل المعده - فى جدول لمده اسبوع وتعرضيها على متخصص عشان يقدر يحدد فين اللخبطه بالتحديد، ولو استمر الوزن ثابت ممكن تلجأي لمساعدة الجسم بدواء يسرع عملية الحرق ولو المشكلة فضلت مستمرة ممكن تعملي تحليل هرمونات لان قد يكون هناك لخبطه فى الهرمونات او فى مشكلة ما تسبب زيادة الوزن او تمنع انقاص الوزن.

السلام عليكم انا وزنى 95 وطولى 179 وعندى 18 سنه المفروض الوزن المثالى يكون كام واعمل ايه.

===========

رد بص وطل:
الوزن المثالي والصحي والمناسب مع طولك لابد وأن يتراوح بين 63 لـ 80 كيلو، وعلشان تنزل الوزن الزائد عندك لابد من اتباع ريجيم صحي مع ممارسة التمارين الرياضية، ويمكنك اتباع ريجيم الأطفال الموجود على باب اخسر وزنك.

انا عندى 16 سنة ووزنى 65 وطولى 163 وعاوزة اعمل ريجيم بمعنى اخس 14 كيلو ارجوك الررررد.

==========

رد بص وطل:
صديقتنا العزيزة إنتي مش محتاجة تنزلي 14 كيلو ولا حاجة لإن وزنك مش كبير أوي، ولازم تعرفي إن الوزن الصحي المناسب مع طولك يتراوح بين 53 لـ 65 كيلو، يعني لو عايزة تخسي ممكن تنزلي من 3 لـ 5 كيلو وده بإنك تقللي في كميات أكلك شوية وتلعبي رياضة.

انا عندى 14 سنه ووزنى 69 وطولى 150 هل ده مناسب مع سنى.

==========

رد بص وطل:
الوزن الصحي والمناسب مع طولك يتراوح بين 44 لـ 56 كيلو، يعني إنتي محتاجة تمشي على ريجيم صحي علشان تخسري الوزن الزائد مع ممارسة بعض التمارين الرياضية البسيطة.

شكرا جزيلا على قائمة رجيم الاسبوع هايلة

أنا وزني 93 وطولي 176 كده كويس ارجو الرد بسرعة.

===========

رد بص وطل:
الوزن الصحي المناسب مع طولك يتراوح بين 61 لـ 77 كيلو، وده معناه إنك محتاج تخسر حوالي 17 أو 20 كيلو من وزنك، وده باتباع ريجيم صحي وممارسة التمارين الرياضية.

انا عندى 25 سنة وطولى 158 ووزنى 64 وعاوزة اخس قبل فرحى فى 1 اغسطس وعازة اعرف الوزن المثالى ونظام ريجيم يخسسنى.

=============

رد بص وطل:
الوزني الصحي والمناسب مع طولك يتراوح بين 49 لـ 62 كيلو يعني إنتي محتاجة تخسي تقريباً 4 أو 5 كيلو علشان توصلي للوزن المثالي، وده تقدري توصلي له بإنك تقللي في كميات أكلك وتمارسي الرياضة بشكل منتظم حتى لو كان إنك تمشي كل يوم لمدة 30 دقيقة.

انا عندي 21 سنة وطولي 168 والوزن 70 بس انا مش تخينه بس مليانه وده واضح في لبس خروجي جدا ايه الوزن المناسب ليا؟ وسؤال تاني ياريت هل لو أنا قللت من كميات الاكل وزني يقل ولا لازم ريجيم؟

==========

رد بص وطل:
الوزن الصحي والمناسب مع طولك يا ريم يتراوح بين 56 لـ 70 كيلو، ولو عايزة تنزلي وزنك بعض الكيلوات ممكن تقللي كميات أكلك شوية مع ممارسة التمارين الرياضية لزيادة معدل الحرق.

أنا عندي 26 سنة ووزني 89 كيلو وطولي 165 سم ومخطوبة وهتجوز قريب اعمل ايه؟

==========

رد بص وطل:
أولاً الف مبروك مقدماً ومع تمنياتنا لكي بالتوفيق والسعادة، وعليكي بالبدء في اتباع ريجيم صحي تحت اشراف دكتور للوصول للوزن المناسب قبل الفرح.

طب انا عندى 28 ووزنى 74 كيلو وطولى 162 كده مناسب.

==========

رد بص وطل:
الوزن الصحي والمناسب مع طولك لازم يكون بيتراوح بين 52 لـ 65 كيلو.

انا حامل في الشهر التالت وعايزة نظام امشي عليه مايضرنيش عشان مش عايزة اتخن زي الحمل الأولاني لاني تخنت 20 كيلو في اول حمل ومش عارفة اخس ودلوقتي عايزة نظام امشي عليه بحيث اني لو مخستش برده متخنش ياريت تجاوبوني.

========

رد بص وطل:
طيب تابعينا وإن شاء الله في اقرب وقت هتلاقي ريجيم خاص بالحوامل.

سلام عليكم انا طولي 163 ووزنى 72 الوزن مثالي ليا كام؟؟؟

===========

رد بص وطل:
الوزن الصحي المناسب مع طولك يتراوح بين 53 إلى 66 كيلو.

طيب انا عندى 14 سنه ووزنى 69 وطولى 170 كده مناسب ولا لا ارجو الرد.

========

رد بص وطل:
وزنك صحي ومناسب مع طولك.

السلام عليكم انا طولى 159 ووزنى 75 ومحتاجه اخس تقريبا 15 كيلو بس محتاجه اخسهم فى خلال شهرين لانى فرحى بعد العيد على طول وكمان انا جسمى مش بيخس بسهوله يعنى بينزل كيلو او كيلو ونص بس فى الاسبوع رغم انى بمشى كتير ومش عارفه اعمل ايه.

==========

رد بص وطل:
صديقتنا العزيزة مروة، لازم تعرفي إن المعدل اللي إنتي ماشية عليه في فقدان وزنك ده معدل صحي جداً، يعني المفروض إنك ماتنزليش أكتر من 2 كيلو في الأسبوع، لإنك لو خسيتي بمعدل أسرع من كده، هتلاقي نفسك بترجعي الوزن اللي خسرتيه بسرعة أكتر، وعموما لو مشيتي بمعدل نزول كيلو ونصف في الأسبوع، هتقدري تخسري 12 كيلو من وزنك في خلال شهرين وده طبعاً معدل كويس جداً.

انا وزنى 85 وطولى 173 ايه هو الوزن المثالى ليا.

==========

رد بص وطل:
الوزن الصحي والمناسب مع طولك يتراوح بين 59 لـ 74 كيلو.

وزني 80 وطولي 165 وعايزه اخس مش عارفه وفرحي بعد 3 شهور عايزة حل بجد شكراً.

========

رد بص وطل:
الحل إنك تمشي على نظام ريجيم صحي تحت إشراف دكتور متخصص مع ممارسة التمارين الرياضية بانتظام.

انا مشيت على نظام غذائي وزني نزل 4 كيلو وبقالي شهر ونص وقف على نفس الوزن 80-79 كيلو وانا طولي 165 وعايزة اخس فعلا بشرب اكتر من لتر مية في اليوم اعمل ايه يا دكتور انا تعبانه من الموضوع ده بجد وبلعب رياضة وببذل مجهود جامد اوي لكن مش عارفة وزني واقف ليه ارجوك ساعدني يا دكتور، شكرا.

========

رد بص وطل:
بعض الناس تتبع نظام ريجيم واحد لمده طويله متخيله انه صح او متبعه نظام فى الاكل مرتاحه عليه وفى هذا النظام لخبطه وهو لا يعرفها وبيكررها طول الوقت، وعلشان كده بنلاقي إن الوزن بيثبت عند رقم معين ومش بيتحرك او ممكن نزيد كمان رغم الالتزام بالريجيم.
والحل إنك تتاكد ان النظام المتبع صح وثانيا تسجيل كل حاجه بناكلها – حتى الشاى والقهوة اى حاجه بتدخل المعده - فى جدول لمده اسبوع وعرضها على متخصص عشان يقدر يحدد فين اللخبطه بالتحديد، ولو استمر الوزن ثابت نلجأ الى مساعدة الجسم بدواء يسرع عملية الحرق، ولو بعد الالتزام والدواء لقينا المشكله مستمرة ممكن نجرى تحليل هرمونات لان قد يكون هناك لخبطه فى الهرمونات او فى مشكلة ما تسبب زيادة الوزن او تمنع انقاص الوزن.

انا عندى 18 سنه وطولى 156 ووزنى 53 بس عندى بطن صغيره بسبب البنطلونات ونفسى فى حل وهل كده جسمى تمام ولا محتاج ينزل بس ارجوكو الرد عليّ فى نزول البطن فى خلال شهر.

=========

رد بص وطل:
وزنك مثالي وصحي جداً ومناسب مع طولك، وبخصوص البطن فأحسن حل هو ممارسة الرياضة والمواظبة عليها.

كل الكلام دة كويس جدااا طيب واللى وزنها 45 تعمل اية وطولها 164 وعمرى25 ؟؟؟؟

===========

رد بص وطل:
ممكن تعملي بعض التحاليل علشان تعرفي إيه سبب النحافة اللي عندك دي، ولو كان فيه سبب عضوي عالجيه، وبعد كده امشي على نظام غذائي تحت إشراف طبي، وعموماً حاولي تكتري من الأكلات اللي فيها سعرات حرارية عالية زي العسل والحلاوة، والعبي رياضة لإن الرياضة مش بس بتقلل الوزن لكن ممكن تكون طريقة لزيادة الوزن، وكمان بتساعد على فتح الشهية.

انا وزنى 63 وطولى 162 وعندى 16 هل انا محتاجة ريجيم.

==========

رد بص وطل:
الحدود الصحية لوزنك والمناسبة مع طولك تتراوح بين 52 لـ 65 كيلو، يعني إنتي كده في الحدود الصحية، لكن تقدري تنزلي 2 أو 3 كيلو بتقليل كميات الاكل وممارسة الرياضة.

انا عندى 28 سنة طولى 150 سم ووزنى 54 كدة مناسب ولا لأ.

=========

رد بص وطل:
الوزن الصحي المناسب مع طولك يتراوح بين 44 لـ 56 كيلو، وده معناه إن وزنك في الحدود الصحية المسموح بها لكن حاولي تاخدي بالك من اكلك ولازم تلعبي رياضة حتى ولو كانت ريلضة بسيطة علشان تحافظي على جسمك، ودايماً تابعي وزنك على الميزان علشان لو زدتي تقدري تنزلي اللي زدتيه بسرعة.