في الأسبوع الثالث.. جسمك رياضي ووزنك مظبوط

انا عندى 19 سنة ووزنى 81 وطولى 161 وعملت ريجيمات كتير جدا تحت اشراف دكاترة متخصصين المشكلة بقى مش فى كل ده المشكلة انى بعد كل مرة كنت برجع تانى لحد ما دلوقتى متابعة مع دكتور بس مش عارفة التزم او اخس العزيمة مش عاوزة ترجع لى تانى وكمان ده سبب لى مشاكل لان بقى عندى الام ظهر مزمنة ياريت يا دكتور تنصحنى بحاجة تشجعنى انى ارجع التزم واخس زى الاول وشكرا على الاهتمام.

==============

رد بص وطل:
الصديقة العزيزة العزيمة والإرادة أهم حاجة في موضوع خسارة الوزن والريجيم، ولازم تعرفي إن خسارة الوزن بسرعة مش هو ده الهدف، لكن الأهم إن الوزن اللي نخسره مايرجعش تاني، وده بيجي مع الانتظام على الريجيم وتغيير العادات الغذائية للعادات الصحيحة، وعمل تثبيت للوزن كل فترة، وكمان ممارسة الرياضة حاجة مهمة جداً.

كنت عايزه اسأل سؤال انا وزنى 55 وطولى 165 وانا فى تانيه كليه كنت عايزه اعرف كده جسمى حلو ولا مش حلو وثانكس .

==============

رد بص وطل:
الوزن الصحي المناسب مع طولك يتراوح بين 54 لـ 68.

انا عمرى 18 ووزنى 64 وطولى 161 عايزة اخس واوصل لحد 52 بس مابحبش الرياضة بس بحب نط الحبل ومابعملش ريجيم بس بحب المشى وبمشى كتير تفتكروا ده كفاية عشان اوصل للوزن اللى انا عايزاه ارجوكم ردوا عليّ.

==============

رد بص وطل:
الصديقة العزيزة الوزن الصحي المناسب لطولك المفروض إنه يكون في الحدود ما بين 51 لـ 64 يعني إنتي كده لسه في الحدود الصحية لوزنك، لكن لو عايزة تنزلي بعض الوزن لازم تقللي في كميات أكلك، مع ممارسة الرياضة ونط الحبل طبعاً رياضة مهمة جداً والمشي كمان مفيد جدا.

انا عندي 18 سنة وزني 90 كيلو وطولي 174 وعايزة اخس وعايزة اعرف ازاي.

===========

رد بص وطل:
لابد من اتباع نظام غذائي صحي متوازن مع ممارسة التمارين الرياضية المتاحة أمامك زي المشي وطلوع السلم والجري ونط الحبل.

بجد موقع جامد جدا... لو سمحتم انا عندى 16 سنة ووزنى 60 وطولى 162 المشكلة انى تخينة من الارداف انا بمشى كل يوم ساعة وبطلع السلم وانزله 12 دقيقة وكنت بدأت اخس وبعدين رجعت تانى مرة واحده اعمل ايه؟ شكرا.

===============

رد بص وطل:
صديقتنا العزيزة لازم تنظمي أكلك، وتعودي نفسك على العادات الغذائية السليمة وحطي في اعتبارك إن السعرات الحرارية اللي بتحصلي عليها خلال اليوم لازم تحرقيها، لإنها لو ما اتخزنت في جسمك هتتحول لدهون، وحاولي تكتري من اكل الخضار والفاكهة الطازة وشرب المية والسوائل.

السلام عليكم ورحمة الله وبركاته - انا رشا عندى 26 سنة وزنى 99.650 وطولى 165 عايزة أعرف الوزن المفروض يكون ايه لانى ابتدىت مااحبش شكلى ولا مظهرى وكمان حاسة انى بقيت بتعب بسرعة من اقل حاجة وشكلى بقى كبير قوى ياريت حد يساعدنى متشكرة جدا ليكم

================

رد بص وطل:
الوزن الصحي المناسب لطولك يا رشا لابد وأن يتراوح ما بين 54 و68 كيلو، وعلشان تخسري الوزن الزائد لازم تستشيري دكتور متخصص وتعملي التحاليل اللازمة علشان يعرف ايه سبب السمنة عندك ويديكي العلاج المناسب.

انا عندى 21 سنة وزنى 77 وطولى 162 عايزة اعرف الوزن المناسب ليا وياترى مفيش طريقة اقدر اخلى معدل الحرق يزيد عندى وشكرا جدا.

================

رد بص وطل:
الوزن المناسب ليكي يتراوح بين 52 لـ 65 كيلو، وعلشان تزودي معدل الحرق لازم تزودي من المجهود اللي بتعمليه وتمارسي التمارين الرياضية، ولازم يكون المجهود اللي بتعمليه مكافيء للسعرات الحرارية اللي بتحصلي عليها خلال اليوم.

القسم اكثر من رائع لكن ينقصه مواضيع عن زيادة الوزن بطريقه صحيه
انا وزني 52 كجم وطولي 168سم ولا اعاني من امراض وشهيتي جيده للاكل
ولكن وزني لا يزيد وارهق سريعا فلا امارس الرياضه.

=================

رد بص وطل:
لابد من استشارة دكتور متخصص في علاج النحافة لإعطاؤك النظام الغذائي المناسب مع طبيعة جسمك.

انا عندي 18 سنة ووزني 77 كيلو وطولي 161 سم وعايز اخس شويه لاني حاسس اني بدأت اتعب وجانا الام في ظهري وكمان ارجع شكلي زى ما كان.

==============

رد بص وطل:
الصديق العزيز إنت محتاج تخسر حوالي 17 كيلو من وزنك علشان توصل للوزن الصحي والمناسب مع طولك، والأفضل إنك تتابع ريجيم صحي تحت إشراف دكتور متخصص علشان يديك النظام الغذائي المناسب مع حالتك الصحية وطبيعة جسمك، وكمان ممارسة التمارين الرياضية مهمة جداً لانقاص الوزن والحفاظ على صحة الجسم وشكله.

هاى بص وطل انا عندى 19 سنة ووزنى 49 وعايزة اتخن عشان فرحى بعد سنة معلش انا عارفة ان الصفحة للتخسيس بس سورى جربت كل الوسايل ومش عارفة وباخد برشام فاتح للشهية وبرده مش نافع.

============

رد بص وطل:
لازم تعرفي صديقتنا العزيزة إن اكتساب الوزن أصعب من فقد الوزن، لإن بناء الجسم أصعب من هدمه، ولازم تعملي بعض التحاليل زي تحليل بول وتحليل براز وتحليل كورتيزون وتحليل سكر وتحليل الغدة الدرقية، علشان تعرفي إيه سبب النحافة عندك، وتاخدي العلاج المناسب والنظام الغذائي المناسب تحت إشراف دكتور متخصص.

احلى تحية لاحسن موقع فى الوطن العربى وبدون مبالغة، عايزة اسأل لو بعمل رياضة طلوع ونزول السلم لان هى دى الممكنة بالنسبة لى ايه الاوقات المناسبة ليها واد ايه عدد الادوار اللى اطلعها وانزلها يعنى انا بطلع وانزل 30 دور كده كويس، بعد اذنكم كمان سؤال انا طولى 1.72 وكان وزنى 86 ودلوقتى بقيت 76 كده كويس بالنسبة لطولى ولا انزل تانى ومن فضلكم ردوا عليا لانى بعت قبل كده عدة اسئلة فى ابواب مختلفة ومردتوش وشكرا.

==============

رد بص وطل:
ميرسي ليكي يا نورا على ذوقك، ونتمنى إننا نفضل دايماً عند حسن ظنكم، وبالنسبة لسؤالك فطلوع ونزول السلم يعتبر رياضة وطبعاً 30 دور كويس جداً ويعتبر مجهود كبير، وبالنسبة للوز الصحي المناسب مع طولك فهو يتراوح بين 59 لـ 73 كيلو يعني إنتي محتاجة تخسري كمان تقريباً 5 أو 6 كيلو.

السلام عليكم انا بجد محتاجه لكم قوووووووى انا عندى 23 سنه وبمر بمشكله صعبه جدا من 8 شهور ولسه مستمرة الى الان وبسببها فقدت وزنى وفقدت شهيتى يعنى النهارده ماكلتش غير سمكه صغيره بس ووشى بقى لونه اصفر تماما وبجد مابقتش بقدر امشى ارجوكم افيدونى لان معدتى حاسه انها قفلت مابقتش تستقبل اى اكل ارجو الرد فى اسرع وقت ممكن.

===============

رد بص وطل:
الصديقة العزيزة لازم تاخدي في اليوم ال3 وجبات الأساسيين وتكون وجبات متكاملة وفيها كل العناصر الغذائية اللازمة للجسم، وحاولي إنك تاكلي خضار وفاكهة كتير، وكمان حاولي تتمشي الصبح بدري في الهواء وتمارسي رياضة على أد ما تقدري، وكمان ممك تستشيري دكتور علشان يوصف لك دواء فاتح للشهية.

السلام عليكم يا د.محمد انا طولي 171 ووزني 63 وحاسه اني نحيفه وخصوصا وشي نحيف اوي ياريت حضرتك تقولي علي اغذيه تخلي وزني كويس ووشي يتخن لان كل الناس مهتمين بالسمنه مش بالنحافه كمان يا دكتور عندي مشكله وهي ان عندي بطن فعايزه اعرف اسبابها ايه وازاي اعلاجها.

=============

رد بص وطل:
علشان تعالجي نحافة الوجه لازم تركزي في أكلك على الخضار والفاكهة الطازة وشرب المية والسوايل بكثرة وكمان فيه علاج لنحافة الوجه بالميزوثيرابي، أما بالنسبة لمشكلة البطن فدي ملهاش حل إلا ممارسة التمارين الرياضية، وبالنسبة لوزنك فاحب اقول لك إن وزنك ده صحي جداً ومناسب مع طولك وإنك مش بتعاني من اي نحافة.

انا وزنى 73 وطولى 165 المفروض اخس كام كيلو؟

==============

رد بص وطل:
الوزن الصحي المناسب مع طولك يتراوح بين 54 إلى 68 كيلو.

من فضلكم انا طولى 164 ووزنى 62 عندى 26 سنة والمشكلة اللى عندى ان فى سيليوليت فى منطفة الفخدين ومضايقنى جدا لان منظره مش كويس فممكن اعرف بيضيع بايه ولا فى نوع كريمات بيضيعها ياريت تفيدووونى.

==============

رد بص وطل:
يحتاج السيليوليت مراجعه طبيب امراض جلدية او جراح تجميل ولاعلاقة له بالريجيم لان هو عبارة عن تكتل الدهون والالياف بشكل معين تحت الجلد وهى تحتاج الى علاج مش مجرد حاجة تذوب الدهون ولا ينفع معها اللف التنحيفى او شفط الدهون.

لو سمحتي انا عندي 15 سنة رايحة أولى ثانوي وطولي 150 ووزني 53
عاوزه اعرف وزني كده كويس ولا ايه بالظبط.

==============

رد بص وطل:
الوزن الصحي المناسب مع طولك يتراوح بين 44 لـ 56 كيلو.

لو سمحتى انا عندى 15 سنه رايحة أولى ثانوى وطولي 150 ووزني 53
عاوزه اعرف وزنى كده كويس ولا ايه بالظبط.

================

رد بص وطل:
الوزن الصحي المناسب مع طولك يتراوح بين 45 لـ 56 كيلو.

انا طولى 170 متر ووزنى 74 كيلو وعندى 16 سنة اعمل ايه علشان اخس بطريقة صحية وماتضرنيش.. أرجو الرد بسرعة.

===========

رد بص وطل:
علشان تخسري وزنك بطريقة صحية ومن غير ضرر لازم تمشي على نظام غذائي صحي تحت إشراف طبي، مع ضرورة ممارسة التمارين الرياضية، ويمكنك الرجوع لريجيم الأطفال اللي قدمناه على اخسر وزنك وده الينك بتاعه http://www.boswtol.com/health-and-beauty/diet/10/june/6/14848

انا عمري 12 سنة طولي 148 وزني 48 انا عاوزه اعرف الوزن المناسب لسني وعاوزه ريجيم مناسب لوزني وسني.

============

رد بص وطل:
ده لينك لريجيم صحي مناسب للأطفال http://www.boswtol.com/health-and-beauty/diet/10/june/6/14848

هلا لو سمحتم انا عمرى 27 وطولى 190 ووزنى 104 وزنى مناسب وانا مبسوط اوى كده من جسمى بس عايز اثبت الوزن ده ازاى بقى؟عايز طريقة لتثبيت الوزن ارجو الرد بسرعة..

=============

رد بص وطل:
صديقنا العزيز إنت في حاجة لخسارة بعض الوزن علشان توصل للحدود الصحية لوزنك والمناسبة مع طولك والتي تتراوح ما بين 72 لـ 90 كيلو، وتقدر توصل للوزن ده باتباع ريجيم صحي متوازن وممارسة الرياضة بانتظام، أما بقى بالنسبة لتثبيت الوزن ففيه أكثر من شكل للتثبيت إما إنك تقلل كميات اكلك يعنى تاكل كل حاجة لكن بكميات اقل مع الرياضة اليومية المتاحة، والطريقة التانية إنك تعمل توازن يعني لو يوم خرجت مع صحابك وهتاخد راحتك فى الاكل اليوم اللى بعده تمشى على الريجيم، ولو لخبط فى الاكل يومين اليومين اللى بعدهم اعمل ريجيم وهكذا.
واهم حاجة إنك توزن نفسك على الاقل مرة كل اسبوعين علشان لو لقيت نفسك وزنك زاد تقلل فى الوجبات الحرة خلال الاسبوع يعني لو محدد ثلاث وجبات فى الاسبوع قللهم لوجبه واحده اواتنين ولو بدأتِ تاكلِ قطعتين شيكولاته فى اليوم خليهم قطعه واحده كل يومين وهكذا، ولو لقيت نفسك نازل على الميزان ممكن تزود شوية الحاجات اللي بتحبها ولكن بحدود.
مهم جدا مراقبة الوزن عشان ممكن الكيلو يجر كيلو ومن غير ماتشعر هاترجع اللى نقصته بسرعه، ولابد ان ناخذ فى الاعتبار ان التثبيت بيختلف من شخص لآخر حسب طبيعه النشاط وكمان طبيعه الحالة المزاجيه فى ناس بتحب تاكل لما تشبع فى هذه الحالة عند التثبيت اكتر من الاكل اللى بيشعرنى بالامتلاء زى السلطة والفاكهه اكتر من الانواع الاخرى لو بحب الحلويات اقلل من الكميات عشان احصل على قطعه شيكولاته وهكذا بعد فترة كل واحد بيعرف طبيعة جسمه واستجاباته والفيصل هو وزنك على الميزان.