حافظ على جسمك الرياضي.. بريجيم صحي

انا عندي كرش بس هو مش باين عشان حجمه مش كبييييير انا عندي 17 سنه عايز احافظ على رشاقتي.

============

رد بص وطل:
ممارسة الرياضة هي أحسن طريقة للحفاظ على الرشاقة وعلى صحة الجسم بشكل عام.

انا طولى 168 سم ووزنى 76 وعايزة اخس ومش عارفه خالص وجبت اعشاب من عند العطار ومش عارفه هتعمل مفعوووووول ولا لأ ونفسى اخس وعندى بطن فظيعه ياريت الافاده و يا ترى اقدر افقد الوزن الزائد مع اتباع النظام الغدائي فى قد ايه من الوقت عشان عندى فرح وعايزة اخس فى اقرب وقت

==============

رد بص وطل:
الصديقة العزيزة.. الوزن الصحي المناسب مع طولك واللي المفروض توصلي له يتراوح بين 56 لـ 70 كيلو، وعلشان توصلي للوزن ده لازم تتبعي نظام غذائي صحي ومتوازن، مع ضرورة ممارسة التمارين الرياضية وخاصة تمارين شد عضلات البطن، لإن مفيش ريجيم معين بيخسس منطقة معينة في الجسم، وبالنسبة للوقت اللازم للنزول في الوزن فده بيختلف من شخص لآخر لإن استجابات الناس للريجيم مختلفة ففيه ناس تتبع ريجيم وتنزل 3 أو 4 كيلو في الشهر، وناس تانية مبتقدرش تنزل إلا كيلو كل شهر، لكن لازم تعرفي إن الريجيم الصحي والسليم هو اللي بينزل الجسم من 1 إلى 2 كيلو في الشهر مش أكتر من كده لإن السرعة في نزول الوزن بيخلي رجوع الوزن مرة أخرى للزيادة أسهل

أما بالنسبة للأعشاب فنتيجتها بتكون في أضيق الحدود وكمان مش لازم تستعمليها بكثرة لإنها بتمنع امتصاص الكثير من المواد الغذائية وبالتالى قد تساعد على فقدان الوزن ولكنها قد تضر الجسم.

أنا طولي 160 ووزني 68 وحاولت أخس بتقليل الأكل جدا لكن المذاكرة مش بتخليني أتحرك والرياضة بتتعبني جدا وعايزة أخس مش أقل من 10 كيلو أعمل إيه؟؟؟

=============

رد بص وطل:
لابد من ممارسة الرياضة مع اتباع الريجيم للوصول للوزن الصحي والحفاظ عليه، والرياضة مش متعبة خالص لو مارستيها بالطريقة الصحيحة، وممكن تعملي تمرينات بسيطة جداً في البداية، وكمان المشي مهم ومفيد جداً، وكمان لازم تعرفي إن النزول السريع للوزن ممكن يرجع تاني علشان كده من الأفضل إننا ننزل وزننا بالراحة جداً وبخطوات بطيئة علشان ما نرجعش الوزن اللي نزلناه بسرعة.

السلام عليكم انا وزني 84 وطولي حوالي 185 وعاوز اخس مش عارف وكمان مش عارف البس الهدوم اللي نفسي البسها وكل لما اجي اعمل ريجيم مش اقدر واكل تاني لاني بجوع اوي ممن حد يساعدني

============

رد بص وطل:
صديقنا العزيز انت معندكش اي مشكلة في وزنك لإنه صحي ومناسب مع طولك جداً، ولو عايز تخس فإنت مش محتاج تنزل أكتر من 4 أو 5 كيلو بالكتير، وعلشان تتغلب على احساسك بالجوع ممكن تاكل خضار وفاكهة من المسموح بها في الريجيم علشان تقلل من احساسك بالجوع، وكمان لازم تمارس التمارين الرياضية بانتظام وتجعلها جزء من يومك علشان تقدر تحافظ على وزنك.

انا وزني 67 وطولي 165 وعمري 13 سنه ايه الريجيم المناسب.

============

رد بص وطل:
صديقتنا العزيزة ده لينك لريجيم صحي مناسب للأطفال واللينك هو
http://www.boswtol.com/health-and-beauty/diet/10/june/6/14848

شكرا لبص وطل على الموضوعات المتميزة دي وهو افضل موقع بالنسبة لي وعايزة اسال انا طولي 159 ووزني 75 وعندي 27 سنه وكل ما احاول اخس اوصل لحد الوزن ده ومكملش لانى كنت 85 كيلو وانا متزوجة وعندي طفل وهي حبوب منع الحمل ممكن تزود الوزن.

============

رد بص وطل:
الصديقة العزيزة.. بعض الناس تتبع نظام ريجيم واحد لمده طويله متخيله انه صح او متبعه نظام فى الاكل مرتاحه عليه وفى هذا النظام لخبطه وهو لا يعرفها وبيكررها طول الوقت فالوزن بيثبت عند رقم معين ولا يتحرك او قد يزيد وزن المريض رغم الالتزام، والحل هو التاكد ان النظام المتبع صحيح وثانيا تسجيل كل حاجه بناكلها – حتى الشاى والقهوة واى حاجه بتدخل المعده - فى جدول لمده اسبوع وعرضها على متخصص عشان يقدر يحدد فين اللخبطه بالتحديد، ولو استمر الوزن ثابت نلجأ الى مساعدة الجسم بالدواء يسرع عملية الحرق التى تختلف من شخص لاخر، ولو بعد الالتزام والدواء المشكله مستمرة ممكن نجرى تحليل هرمونات لان قد يكون هناك لخبطه فى الهرمونات او فى مشكلة ما تسبب زيادة الوزن او تمنع انقاص الوزن.

انا وزنى 85 وطولى 160 ومش عارفة اخس خالص كان وزنى 87 وروحت لدكتور من سنتين ونزلت 25 كيلو ولما سيبته وخلصت دراسة وزنى رجع تانى فى السنتين دول ومش عارفة اعمل رجيم تانى واخس ارجوكم ساعدونى عايزة اخس وخصوصا فى شهر رمضان.

============

رد بص وطل:
طيب تابعينا لإننا هيكون عندنا مفاجآت كتيرة لكل أصدقاؤنا في رمضان.

انا طولى 152 ووزنى 73 وعايزة اعرف المفروض اخس اد ايه علشان شكلى يبقى مقبول مش عايزة وزنى يبقى مثالى اوى يعنى.

===========

رد بص وطل:
الوزن الصحي المناسب مع طولك يتراوح بين 46 لـ 57 كيلو.

طب واللى عايز يتخن شويه ياكل ازاى انا بجد هلتزم بالبرنامج الغذائى اللى تقولوا عنه انا وزنى 60 وطولى 178 سم.. شكرا.

==============

رد بص وطل:
صديقنا العزيز لازم في الأول تعمل بعض التحاليل علشان تعرف إذا كان فيه سبب عضوي للنحافة عندك، ولابد من استشارة دكتور متخصص علشان يوصف لك العلاج والنظام الغذائي المناسب لحالتك، وكمان لابد من ممارسة التمارين الرياضية بانتظام، وحاول تكثر من الاكلات اللي فيها سعرات حرارية عالية زي العسل والحلاوة وغيرها.

لو عايزة اجرى الصبح افطر بعدها بأد ايه!!!!

==============

رد بص وطل:
ممكن تجري بعد ما تاخدي وجبة الفطار بتاعتك بنصف ساعة.

ممارسه التمارين على الارض احسن ولا على السرير؟ انا عندى بطن وكرش بحاول اعمل تمارين مشى فى البيت وتمارين بطن النتيجه هتظهر امتى وامارس الرياضه كل قد ايه؟ انا بشرب ميه كتييييير وجسمى طرى اوى بس مليان ومترهل انا طولى 172 ووزنى 84 ايه الوزن المناسب وياترى هتنزلوا ريجيم يقدر كل الناس تواظب عليه ولا لا؟

===============

رد بص وطل:
بالنسبة للتمارين الرياضية يفضل إنك تسألي مدرب رياضي متخصص على الطريقة الصحيحة لممارسة تمارين البطن، وعلشان تلاقي نتيجة لازم تواظبي على التمارين الرياضية وتعمليها على الأقل 4 أيام في الأسبوع، وبالنسبة لشرب المية الكتير فهي مفيدة للجسم جداً وبتساعد في تنزيل الوزن وبالنسبة للوزن المناسب مع طولك فهو يتراوح بين 59 لـ 74، وياريت تتابعينا وإن شاء الله هنقدم ريجيمات للناس العادية.

ضروري ضروري ضروري جدا الله يرضى عليكم اولا السلام عليكم ورحمه الله وبركاته، انا حصلي حاجه صعبه جدا وعايز احكيها لكم، انا في ايام الجامعه كان وزني من 69-72 كيلو كنت بلعب كوره باستمرار ووزني ممتاز ولياقتي عاليه وكله تمام بس لما سافرت السعوديه للعمل حصلي حاجات فظيعه
1- وزني زاد 20 كيلو .
2- ترهلات فظيعه في منطقه البطن والصدر والارداف.
3- طبعا الكرش الغني عن التعريف اللي بقى مضايقني جدا
انا عمري 23 وبجد مش عارف اعمل ايه انا مخنوق (بقيت كسول جدا- مابمشيش في اليوم اكتر من 5 دقايق - من الشغل للبيت بالسياره- نايم ع طول) ارجووووووووووووووكم ارجوكم ارجوكم انا عايز ارجع زي زمان - انا مبقتش عارف اهتم بنفسي ولا بلبسي بسبب وزني الزايد انا تعبت ارجوكم ساعدوني عايز ارجع لوزني وجسمي ولياقتي
وشكرا.. تقبلوا تحياتي.

===============

رد بص وطل:
وعليكم السلام ورحمة الله وبركاته صديقنا العزيز، طبعاً مشكلتك هي مشكلة شائعة جداً عند الناس اللي بتقضي فترات طويلة في الشغل قاعدة على المكتب والحركة مش بتكون كتيرة، فبالتالي الجسم مش بيقدر يحرق كل السعرات الحرارية اللي بيحصل عليها، علشان كده لازم تتأكد إنك تحرق كل السعرات الحرارية اللي بتحصل عليها خلال اليوم بالحركة الكتير وممارسة الرياضة، وطبعاً اهم حاجة هي اتباع ريجيم صحي متوازن تحت إشراف دكتور متخصص، وممكن إنك تتخلي عن العربية في بعض المشاوير وتعمل وقت في اليوم تتمشي فيه لمدة نصف ساعة اوساعة، وممكن تشتري بعض الأجهزة الرياضية البسيطة اللي ممكن تعمل عليها رياضة وانت في البيت أو حتى وانت في الشغل وقت الراحة، ولازم تعرف إن الحفاظ على الوزن مش بس حفاظ على الشكل العام ولكن ده حفاظ على صحتك ولياقتك.

بارك الله فيكم جميعا

جمييييييل اوى مفيش حاجه بقى للناس الرفيعه وعايزه تتخن ومش عارفين.