يا ترى وزني كده مناسب ولا لأ؟
هل محتاجة أستشير دكتور ولّا ممكن أقلل من أكلي شوية، ويا ترى محتاجة أنزل كام كيلو؟
يا ترى طولي مناسب مع وزني، ولّا لأ؟
أسئلة كتيرة ومشكلات أكتر بتواجهنا لما بنقرر نعمل ريجيم...
وطبعاً د. محمد أبو الغيط معانا علشان يرد على كل أسئلتنا...
- إزاي نحسب الوزن المثالي... وإيه الفرق بين الوزن الزائد والسمنة المرضية؟
مهم جدا نعرف نحسب وزننا ونعرف هل نعاني فعلا مرض السمنة أو مجرد زيادة في الوزن، وفيه طريقتين لحساب السمنة؛ إما بحساب معامل كتلة الجسم أو بقياس محيط الوسط.
- إزاي نحسب معامل كتلة الجسم؟
يمكن حسابه برقمين؛ الرقم الأول الوزن بالكيلو جرام، والثاني الطول بالمتر، مثلاً: لو طولي 170 سم ووزني 100 كيلو.. نقسم الوزن على مربع الطول بالمتر (100 / 1.7 × 1.7).
- لو الناتج كان يتراوح بين 18.5 إلى 25؛ معنى كده إن الوزن طبيعي جداً.
- لو الناتج كان يتراوح بين 25 إلى 30؛ ده معناه إن فيه وزن زائد، وهو مؤشر لبداية الخطر والدخول في مرحلة السمنة.
وهذه المرحلة تتطلّب مجرد إجراءات للسيطرة على الزيادة في الوزن، ولا تحتاج بالضرورة إلى علاج، وصاحب الوزن الزائد مطلوب منه الانتباه إلى طبيعة طعامه، والابتعاد عن المأكولات ذات السعرات الحرارية العالية، وأن يُقلِّل من الوجبات الجاهزة وشرب المياه الغازية، بالإضافة إلى ممارسة التمارين الرياضية حتى لا ندخل في مرحلة السمنة.
- وامتى نحتاج لعلاج ومساعدة طبيب متخصص؟
العلاج يبدأ عندما يكون ناتج معامل كتلة الجسم يتراوح بين 30 إلى 35، وهذا يعني أن المريض يعاني سمنة من الدرجة الأولى، ومن 35 إلى 40 يبقى المريض بيعاني سمنة من الدرجة الثانية، ومن 40 فأكثر نعتبرها سمنة مرضية خطيرة جداً تتطلّب تدخّلاً دوائياً، واتباع نظام غذائي لإنقاص الوزن.
- وإيه هي الطريقة الثانية لحساب الوزن؟
الطريقة الثانية هي قياس محيط الوسط؛ لأن هناك بعض الأشخاص تتركّز مشكلتهم أو وزنهم الزائد في منطقة البطن فقط أو ما نسمّيه الكرش، مع أن باقي الجسم قد يكون عادياً أو غير ممتلئ.
والكرش هو تكتّل مجموعة من الدهون داخل البطن... المشكلة إن الشخص مهما كان وزنه قليل، وعنده كرش حجمه كبير، فإن الدهون الموجودة في الكرش تفرز هرمونات مضرّة للغاية.
- السؤال الآن ما هو القياس الأمثل لمحيط الوسط؟
محيط الوسط لو كان أقل من 80 سم للبنات وتحت 94 سم للشباب، فلا توجد مشكلة.
تبدأ المشكلة لو البنت محيط وسطها 80 سم إلى 88 سم، وبالنسبة للولد لو تعدّى محيط وسطه 94 سم إلى 102 سم، أما إذا زاد محيط الوسط عن 88 للبنات فهذا مؤشر خطورة، وفي الحالة دي نحتاج علاج سريع وفعّال لتجنّب المخاطر الطبية.
- فيه شباب كتير بيعانوا سمنة بشكل ملحوظ بالرغم من قضائهم أغلب الوقت خارج البيت بدون أكل؟
علشان نتغلّب على المشكلة دي، لازم نعرف أسباب السمنة وليه وزننا بيزيد بسرعة...
السبب الأول: الإفراط في أكل أنواع ذات سعرات حرارية عالية جداً وبكميات كبيرة، زي المحمّرات، والأكل الدسم، والوجبات السريعة.
السبب الثاني: هو قلة الحركة؛ لأن الحياة النهارده بنحرّكها بالريموت كونترول، وأوقات الفراغ غالبا ما بنقضيها أمام الكمبيوتر أو لعب البلاي استيشن بالساعات.
السبب الثالث: الاستعداد الوراثي للسمنة، ناس كتير بتاكل كتير وحركتهم قليلة، وعلى الرغم من كده وزنهم عادي أو طبيعي.. هؤلاء لا يوجد في تاريخهم المرضي شخصيات مصابة بالسمنة، لكن -في الغالب- المصريون بطبيعتهم عندهم جينات وراثية تحمل مرض السمنة.
ولغاية هنا خلص عددنا النهارده...
وتابعونا في العدد القادم...
علشان نكمّل باقي الأسئلة والرد عليها...
إلى اللقاء،،،
انا وزنى 43 وطولى 156 ورفيعة
انا وزنى 43 وطولى 156 ورفيعة جدا ومش عارفة اتخن.
===========
رد بص وطل:
لازم تستشيري دكتور متخصص وتعملي بعض التحاليل والفحوصات علشان تعرفي سبب النحافة اللي عندك وتاخدي الدواء والنظام الغذائي المناسب ليكي.
اولا انا معجبه جدا بالموضوع
اولا انا معجبه جدا بالموضوع ده وكل موضوعاتكم الحقيقه ثانيا انا طولى حوالى 158 سم ووزنى حوالى 56 هل انا وزنى زياده ام طبيعى شكرا وياريت تجاوبونى.
=========
رد بص وطل:
أهلا بيكي يا هبه ونتمنى إننا نكون عند حسن ظنك دايماً ونقدم لك كل اللي بتتمنيه، وبالنسبة لوزنك فهو طبيعي جدا ومناسب مع طولك.
السلام عليكم ميرسى على
السلام عليكم ميرسى على الموضوع وكنت عاوزة اعرف ايه الوزن المناسب مع الطول 154 مع العلم انى وزنى حاليا 40.
=============
رد بص وطل:
الوزن الصحي المناسب مع طولك لابد وأن يتراوح بين 47 لـ 59 كيلو، يعني إنتي كده عندك نحافة والأفضل إنك تستشيري دكتور متخصص علشان يعمل لك التحاليل اللازمة ويديكي العلاج المناسب والنظام الغذائي المناسب لطبيعة جسمك.
انا وزني 91 كجم وطولي 163
انا وزني 91 كجم وطولي 163 وزهقت من عمل ريجيمات علما باني الان في فترة الرضاعة ارجو الرد بليز.
==============
رد بص وطل:
صديقتنا العزيزة الفكرة في الريجيم إن يكون عندك إرادة وصبر وعزيمة علشان تكملي المشوار للآخر يعني مش تزهقي من أول تجربة تفشل، ونصيحتنا لكي إنك تستشيري دكتور متخصص علشان يديكي ريجيم صحي متوازن مناسب لطبيعة جسمك ومناسب مع فترة الرضاعة.
ممكن اعرف ماهو الوزن المثالى
ممكن اعرف ماهو الوزن المثالى للطول 168.
==============
رد بص وطل:
الوزن الصحي والمناسب مع طولك لابد وأن يتراوح بين 55 لـ 70 كيلو.
انا وزنى 63 وطولى 169 ياترى
انا وزنى 63 وطولى 169 ياترى ده مناسب ولا لا؟؟
==============
رد بص وطل:
ممكن تعرف بالطريقة اللي قلنا عليها وهي 63/ 1.69×1.69 والنتيجة هتكون 22 وبكده يبقى وزنك فعلا طبيعي وصحي.
ومشكله الارداف عاوزة مشى
ومشكله الارداف عاوزة مشى برضو
=============
رد بص وطل:
المشي مفيد لتحريك كل عضلات الجسم، وفيه طبعاً تمارين خاصة بشد عضلات المنطقة دي.
بسم الله الرحمن الرحيم, طولى
بسم الله الرحمن الرحيم, طولى تقريبا من (167-169) سم ووزنى تقريبا 120 كجم فما هو راى سيادتكم علما بان معظم السمنة توجد فى البطن (الكرش) والارداف فارجو من سيادتك ان تقول لى هل انا قريب من مرض السكر اللعين ام لا؟ وهل يمكن من سيادتكم ان ترسلوا لى برنامج غذائى، شكرا على حسن انتباهكم.
=============
رد بص وطل:
صديقنا العزيز نرجو لك الصحة والعافية دائماً، وللتأكد من إصابتك بمرض السكر لابد من عمل بعض الفحوصات والتحاليل تحت إشراف دكتور متخصص، ولو لا قدر الله كنت مصاب بالسكر فلابد من اتباع نظام غذائي صحي تحت إشراف دكتور، وتقدر ترجع للموضوعات القديمة هتلاقي ريجيم كامل لمرضى السكر، أما لو كنت إن شاء الله غير مصاب بالسكر فيرجى استشارة دكتور تغذية متخصص للكشف عليك وعمل الفحوصات اللازمة لمعرفة سبب السمنة حتى يمكنه وصف الدواء والريجيم المناسب لحالتك الصحية والنفسية.
هاي أنا وزني 62 وطولي 171
هاي أنا وزني 62 وطولي 171 ونفسي انزل 4 كيلو كمان بس انا اصلا اكلي مش كتييير ايش اعمل وبشرب خلطة الكمون والزنجبيل والليمون كويسه ولا لأ وبشرب ميه كتير وبحاول اعمل رياضة يوميا ممكن تجاوبوني لأنه أنا مهووسة بالنحافة ونفسي أسير زي عارضات الأزياء.
==========
رد بص وطل:
صديقتنا العزيزة وزنك كده صحي ومثالي جدا، ولو عايزة تخسي عن كده لازم تتبعي نظام ريجيم صحي مع ممارسة الرياضة.
هاى ياجماعة شو اخباركم انا
هاى ياجماعة شو اخباركم انا طولى 165 ووزنى 60 كيلو تقريبا بس انا شايفة ان جسمى جميل اوى كده والناس عايزانى اتخن شوية وناس بتقول لى كده حلو فممكن لو حد يعرف دكتور تغذية كويس يسأله اكل ايه علشان اتخن وشكر جدا ليكم.
===========
رد بص وطل:
صديقتنا العزيزة وزنك كده طبيعي ومناسب جداً، ولازم تكوني واثقة من نفسك، وعموما لو عايزة تتخني لازم ما تزيديش عن 68 كيلو لإن دي الحدود الصحية لوزنك والمناسبة مع طولك.
انا مش عارفة احسب انا وزنى 50
انا مش عارفة احسب انا وزنى 50 وطولى 151 سم.
============
رد بص وطل:
وزنك طبيعي جداً.
انا برضو مش عارفة احسب
انا برضو مش عارفة احسب الوزن.. انا طولى 170 ووزنى 60 ولما بتخن بيبقى من تحت بس. ياترى وزنى طبيعى؟؟
==============
رد بص وطل:
وزنك طبيعي ومناسب جدا.
انا وزنى 53 بس مشكلتى انى
انا وزنى 53 بس مشكلتى انى عندى كرش فيه حل للتخلص من الكرش؟
==============
رد بص وطل:
الحل حاجة من اتنين إما ممارسة التمارين الرياضية أو اللجوء لعمليات التجميل، وطبعا التمارين الرياضية أكثر فايدة وصحة للجسم وإن كانت بتحتاج لوقت طويل شوية.
شكرا ليكم...انا وزني 62 وطولي
شكرا ليكم...انا وزني 62 وطولي 171 ونفسي انحف 4 كيلو انا باخذ خلطة الكمون والزنجبيل والقرفة مع الليمون في الصباح وقبل كل وجبة هل ده كويس ولا لأ.
============
رد بص وطل:
الأعشاب دي كويسة ومفيدة جدا للجسم لكن لا يمكن الاعتماد عليها فقط في موضوع التخسيس ده، يعني لابد من اتباع نظام غذائي صحي مناسب لطبيعة جسمك.
انا مش عارفه احسب وزني انا
انا مش عارفه احسب وزني انا وزني 55.5 وطولي 160 ياتري كده مناسب ولا ايييييه وساعات ببقي 57
============
رد بص وطل:
وزنك كده مناسب جدا، يا ريت تحافظي عليه.
انا حسبت وزني بالطريقة
انا حسبت وزني بالطريقة المكتوبة وطلع طبيعي..بس عندي بطن وشكلها مش حلو..حلها إيه؟
==============
رد بص وطل:
زي ما بنقول دايماً يا roro حل مشكلة السمنة الموضعية هي ممارسة التمارين الرياضية أو اللجوء لعمليات التجميل، وإن كنت أرى التمارين الرياضية أكثر صحة وفائدة للجسم ككل وإن كانت بتحتاج لوقت طويل شوية.
انا وزنى 53 وطولى 165 وعايزة
انا وزنى 53 وطولى 165 وعايزة اعرف مناسب ولا لا.
===============
رد بص وطل:
وزنك كده مناسب صحيا مع طولك لكن لو قليت عن كده هتبدأ تدخل في مرحلة النحافة.
ياريت يا أستاذه نهى تعملوا
ياريت يا أستاذه نهى تعملوا مقال عن علاج النحافه وأسبابها لان ده اللى مش موجود فى باب صحه وجمال غير علاج السمنه فقط... ولكم جزيل الشكر.
==============
رد بص وطل:
احنا قدمنا قبل كده حلقة عن مشكلة النحافة وأسبابها وطرق علاجها، وده لينك الموضوع اللي قدمناه http://www.boswtol.com/health-and-beauty/diet/09/october/6/942 ويا ريت تتابعينا وإن شاء الله قريب جدا هنقدم لكم موضوعات أكتر بخصوص الموضوع ده
انا وزني 73 وطولي 173 افيدوني
انا وزني 73 وطولي 173 افيدوني جزاكم الله خير شكرا مصطفي
==============
رد بص وطل:
وزنك كده صحي ومناسب جدا ويا ريت تحافظ عليه.
انا وزنى 50 كيلو وطولى 155
انا وزنى 50 كيلو وطولى 155 انا نفسى اتخن عشان خطيبى عايزنى اتخن بس انا باكل كتير ومش بلاقى نتيجة خالص... انا بجد نفسى ازيد بس مش عارفة اعمل ايه... خصوصا فرحى قريب وكنت فى الخطوبة رفيعة جدا وانا لابسة الفستان..
=========
رد بص وطل:
صديقتنا العزيزة إنتي وزنك كده صحي جدا ومناسب مع طولك لإن الوزن الصحي ليكي لازم يتراوح بين 48 لـ 60 كيلو، ولو عايزة تزيدي في حدود ال10 كيلو المسموحة ليكي حاولي إنك تكتري من الأكلات اللي بتحتوي على نسبة كبيرة من السعرات الحرارية زي العسل والحلاوة وكمان كلي خضار وفاكهة كتير، ويمكنك استشارة دكتور متخصص علشان يديكي نظام غذائي مناسب ليكي ولحالتك النفسية.
أنا طولي 158 ووزني 69 كيلو وم
أنا طولي 158 ووزني 69 كيلو ومحيط وسطي 83 محتاجه اخس كام كيلو
تقريبا؟؟؟ وعندي جناب مبوظه شكلي خالص والمشكله اني مش عارفه
اعمل ريجيم خاالص لاني معظم اليوم بره البيت وبضطر اكل الوجبات
السريعة مش عارفه اعمل ايه انا تعبت كل اللي قادره عليه اني اثبت وزني بس لكن مبخسش ممكن الرد بلييز.
==========
رد بص وطل:
علشان تعملي ريجيم لازم يكون عندك إرادة ورغبة قوية في إنك توصلي للوزن المناسب وعموماً إنتي مش محتاجة تخسي عدد كبير من الكيلوات يعني إنتي محتاجة تخسي تقريبا 9 كيلو، ودول ممكن تنزليهم بسهولة جداً لو اتبعتي نظام غذائي صحي متوازن ومش شرط إنك تنزلي في وزنك بسرعة لإن كل ماكان النزول بطيء كل ما كان صحي وثابت أكتر، وممكن في الأوقات اللي بتبقي فيها في الشغل تاخدي معاكي الوجبة بتاعتك اللي موجودة في الريجيم، وممكن كل ما تجوعي تاكلي خضار زي الخس والخيار أو فاكهة من الفواكه المسموحة زي التفاح وبكده تتغلبي على احساسك بالجوع.
أنا مشكلتى إن جسمي مظبوط بس
أنا مشكلتى إن جسمي مظبوط بس ليا بطن وصعب اعمل عمليات شفط وعملت دايت وبرده البطن موجودة طب إيه الحل على العلم إن أكلى قليل جدا.
==========
رد بص وطل:
زي ما قلنا يا روجينا حل المشكلة دي هو ممارسة التمارين الرياضية أو اللجوء لعمليات التجميل وشفط الدهون، وطبعاً الرياضة هي أكثر فايدة وصحة للجسم علشان كده لازم تواظبي عليها من دلوقتي وتعتبريها عادة من عاداتك اليومية زي ما بتغسلي سنانك ومع الوقت هتحسي إن الموضوع بسيط وسهل.
ياريت يا أستاذه نهى تعملوا
ياريت يا أستاذه نهى تعملوا مقال عن علاج النحافه وأسبابها لان ده اللى مش موجود فى باب صحه وجمال غير علاج السمنه فقط... ولكم جزيل الشكر.
==========
رد بص وطل:
نوعدك صديقتنا العزيزة إننا نلبي لك طلبك في أقرب وقت ممكن.
بجد ميرسي اوووى على المعلومات
بجد ميرسي اوووى على المعلومات اللى بتقدموها فى الموقع الرائع دi بس كنت عاوزة اسHل سؤال ضرورى وبجد محتاجة حد يرد عليا انا فرحى بعد شهرين وعندى مشكلة انى عندى بطن مش بتكون واضحة اوووى فى لبس الخروج بس بتكون مضيقانى فى لبس البيت اوووى وخصوصا الحاجات الضيقة وبجد عاوزة احل المشكلة دى قبل جوازى مع العلم انى جسمى كويس ومش محتاجة ريجيم وخايفة اعمل ريجيم عشان بطنى اخس ودة ياثر على وشى قبل الفرح اعمل ايه؟
===========
رد بص وطل:
ميرسي ليكي صديقتنا العزيزة ونتمنى إننا نقدر نفيدكم دايماً، وألف مبروك مقدماً على الزفاف، وبالنسبة لمشكلة البطن فدي حلها زي ما قولنا قبل كده هي ممارسة التمارين الرياضية ولكن الموضوع بيحتاج لوقت ومواظبة، وكمان يمكنك اللجوء إلى اللف التنحيفي عند دكتور متخصص.
انا وزني 50 وطولي 163 عايزه
انا وزني 50 وطولي 163 عايزه اعرف ده كويس ولا لا؟ ارجو الرد لاني مش فاهمه.
=========
رد بص وطل:
طريقة الحساب سهلة جدا كل اللي عليكي إنك تجيبي حاصل قسمة وزنك على مربع طولك يعني ( 50 / 163 × 163 ) والنتيجة هتكون 18 تقريباً وده معناه إن وزنك أقل من الوزن الطبيعي بنسبة صغيرة يعني محتاجة تزيدي حوالي 3 - 5 كيلو.
أنا وزنى 56 كيلو وطولى 157 سم
أنا وزنى 56 كيلو وطولى 157 سم ومحيط وسطي 73 فهل هذا الوزن مثالي ولا اخس شوية علما بإنى فيا بطن وفيا هانش كبير شوية مش قوى ياريت تفيدوني وشكرا على استماعكم لأسئلتنا.
==========
رد بص وطل:
وزنك كده صحي ومناسب لطولك، وبالنسبة للسمنة الموضعية ممكن تلجأي لممارسة التمارين الرياضية أو عمليات التجميل.
أنا معرفتش احسب الوزن المثالى
أنا معرفتش احسب الوزن المثالى انا عندى 27 سنة انسة طولى 150 ووزنى 53 واوقات 50 هل الوزن مثالى.
==========
رد بص وطل:
وزنك كده صحي ومفيهوش مشكلة بس لازم تاخدي بالك من اكلك علشان وزنك ما يزيدش ولازم توزني نفسك كل فترة علشان لو حصل أي زيادة تقدري تنزليها بسرعة.
طب ايه العلاج لحل مشكلة زيادة
طب ايه العلاج لحل مشكلة زيادة محيط الوسط للبنات؟
=============
رد بص وطل:
الحل هو ممارسة التمارين الرياضية الخاصة بالمنطقة دي ويمكنك اللجوء للف التنحيفي.
