من المشاكل اللي بتواجه أي بنت في بداية زواجها وتفكيرها في الحمل، هو الخوف من زيادة الوزن، وخاصة لو كانت بذلت مجهود قبل الزواج في الريجيم..
كلام كتير ونصايح أكتر من الأمهات والحموات عن الأكل أثناء فترة الحمل والرضاعة، طبعاً من منطلق خوفهم على الأم والجنين؛ لكن مع الأسف قد تنتهي كل هذه الإرشادات في الغالب إلى إصابة الأم بالسمنة، وهي في بداية حياتها..
علشان كده في لقائنا مع د. محمد أبو الغيط النهارده، هنعرف معاه إزاي نتجنب المشكلة دي وفي نفس الوقت نحافظ على صحتنا أثناء الحمل والرضاعة..
- فيه اعتقاد إن الحمل والرضاعة هما الطريق السريع للسمنة بعد الزواج.. إيه رأيك؟
فيه اعتقاد إن الحامل لازم تاكل أكل اتنين، وترتاح، وتنام على ظهرها طول فترة الحمل، وحاجات كتير من الوصايا الخاطئة التي نتداولها وننصح بها الحامل خوفاً منا على صحتها وسلامة الجنين.. وطبعاً كل ده خطأ جداً.. أكيد الحامل لازم تاكل كويس مافيش اعتراض على كده؛ لكن لازم تاكل أكل صحي مغذي.
- إيه هي الزيادة الطبيعية في وزن الحامل أثناء شهور الحمل؟
الحامل بتزيد كيلو كل شهر طوال فترة الحمل، أما اللي وزنها بيزيد أكتر من كيلو في الشهر؛ فده يعني إن وزنها هيزيد بمعدل 10 : 12 كيلو في التسعة أشهر؛ وده معناه إنها هتكون مريضة بالسمنة، وطفلها هيكون عنده بالتالي مشاكل في المستقبل.
- إيه أكتر العادات الخاطئة اللي بتمارسها أي أم أثناء فترة الرضاعة؟
فيه طبعاً نصائح معتادة بنسمعها دايماً؛ زي: اللي بترضع لازم تاكل حلاوة وتكتّر من المكسرات وتشرب موغات، وتاكل كميات كبيرة من الأكل علشان كمية اللبن تزيد، وبننسى إن فيه حاجات طبيعية وخفيفة بتساعد على إدرار اللبن؛ زي: الجرجير والورقيات والخضراوات بشكل عام.
- هل الحامل ممكن تعمل ريجيم؟
مفيش حاجة اسمها الحامل تعمل ريجيم يخسسها؛ لكن لازم تاكل صح، والمقصود هنا بالريجيم إنها تنظّم أكلها..
يعني السيدة الحامل بتلجأ لطبيب الريجيم مش علشان تخس؛ لكن علشان تزيد فقط بالمقدار المسموح به من الكيلووات في فترة الحمل، من خلال تناول وجبات مكتملة العناصر الغذائية؛ لأن السمنة تؤذي الأم والجنين وتعرّضهم لمشاكل كتيرة ومخاطر هي في غنى عنها.
- إيه هو النظام الغذائي المثالي أثناء فترة الحمل أو الرضاعة؟
ممكن الأم تتناول خمس وجبات؛ لكن طبعاً حجم الوجبة يكون أقل من الوجبة العادية، بشرط أن تحتوي الوجبة على كل العناصر الغذائية اللي ممكن نستبعدها في الريجيم العادي؛ يعني تكون بتحتوي على نشويات وسكريات وزيوت؛ لكن مع تقليل الدهون، وتزوّد من شرب اللبن ويُفضّل لو كان منزوع الدسم، وتهتم جداً بالفاكهة والخضراوات والورقيات، وخاصة أثناء فترة الرضاعة.
ومع اتباع نظام غذائي صحي متوازن وممارسة تمارين رياضية خفيفة زي المشي خلال فترة الحمل، هتقدر الأم تستعيد وزنها السابق بعد الولادة مباشرة.
- امتى الأم تبدأ ريجيم بعد الولادة؟
قبل ما تخرج من المستشفى ممكن دكتور التغذية اللي متابعها يحدد لها طبيعة الأكل اللي ممكن تمشي عليه في الأشهر الثلاثة الأولى اللي بعد الولادة..
وزي ما قلنا، لازم تاكل كل حاجة لكن بكمّيّات قليلة، وتعتمد على العصائر الفريش والسوائل بكثرة، وتهتم بأكل الجرجير والخس والبقدونس علشان تحصل على الكالسيوم، ولا تُفْرِط في السكريات بحجة الرضاعة، وتتجنب الدهون؛ لأن الأم طبيعي في هذه المرحلة بتفقد وزنها الزائد بعد الولادة، ومهم إنها تستغل هذه الفترة في العودة لوزنها السابق، مع عدم الإضرار بالعناصر الغذائية التي تصل إلى طفلها من خلال اللبن.. وممكن الأم تخسّ 4 كيلو في الشهر لو نظّمت أكلها صح ورجعت تمارس التمارين الرياضية.
أنا طولى 166 ووزنى 49 كيلو
أنا طولى 166 ووزنى 49 كيلو ولا يوجد لدي أي أمراض وعملت تحاليل ولا يوجد اى شىء غير طبيعى حتى مكونات الدم كلها طبيعيه وقد تابعت مع طبيبه وزاد وزنى 4 كيلو فى 4 أشهر وحين اوقفت الدواء وقد كان تريزوركس وسبازمو ديجستين وبودر سوستاجين رجعت الى وزنى الاصلى وتزوجت بعدها بشهر وحملت ووزنى زاد 18 كيلو وبعد الولادة رجعت لوزني الأصلي أيضا ولا ازيد أبدا ماذا أفعل.
===========
رد بص وطل:
علاج النحافة بيحتاج لوقت أكبر من علاج السمنة لأن بناء الجسم بيكون أصعب من هدمه، والحل إنك تستشيري دكتور تغذية متخصص علشان يديكي نظام غذائي مناسب لطبيعة جسمك ولازم دايما تتابعي وزنك على الميزان علشان تاخدي بالك لو حصل زيادة في وزنك أكتر من المعدل المطلوب.
وموضوع التمارين الرياضيه انا
وموضوع التمارين الرياضيه انا متعوده ع الرياضه من فتره طويله سنتين او اكتر وفترة الحمل والولاده طبعا هتمنعني عايزه اعرف امارس التمارين من امتى الكل بيخوفني ان عضلاتي هترتخي لما اسيب الرياضه مع العلم ان كان وزني 80 ووصلت ل 60 موضوع زياده الوزن ده قالقني ارجو الرد.
===============
رد بص وطل:
ممكن تسألي مدرب رياضي متخصص عن التمارين الرياضية اللي تناسبك أثناء فترة الحمل، وطبعا بعد استشارة الطبيب المتابع لحملك، وكمان تقدري ترجعي لممارسة الرياضة بعد ما تقومي بالسلامة على طول.
كنت عايزة اسال ازاى اقوى
كنت عايزة اسال ازاى اقوى ارادتى خصوصا مع الرجيم وكمان عايزة اسأل عن الشاي الأخضر هل ليه دور في تخفيف الوزن ولا دى خرافة وخاصه شاي المعبد لاني قعدت فترة كبيرة اشربه.
==========
رد بص وطل:
الإرادة دي لازم تطلع من جواكي ولازم تعرفي إن الريجيم مش نظام للتعذيب أو الحرمان، لكنه نظام صحي للجسم ككل، وبالنسبة للشاي الأخضر فهو يدخل تحت مسمى المواد التي لها تأثير محدود أو غير مؤثر في الريجيم، لكنه غير مضر وله فوائد تانية لا يمكن تجاهلها زي احتوائه على مواد مضادة للأكسدة ومهم لزيادة المناعة، لكن تأثيره في موضوع الريجيم لا يستحق أن أعتبره من أدوية الريجيم سواء أقراص أو شاي.
فعلا كنا محتاجين الموضوع
فعلا كنا محتاجين الموضوع ده..
شكرا لكم
انا مشكلتي إني خلاص زهقت من
انا مشكلتي إني خلاص زهقت من كتر ما بقلل في الأكل وأحرم نفسي من حاجات كتير ومش بخس بشكل ملحوظ. انا بحب أقرأ كتير في علم النفس والصحة النفسية ومن خلال قرايتي عرفت اني وصلت لمرحلة اسمها الشره العصبي - انا تعبانة جدا ويأست من كل حاجة في الدنيا مع اني وزني مش زيادة كتير وده اللي مجنني كام كيلو مش عارفة أخسهم، وكل اللي حواليا يقولوا لي انت مش تخينة ومش باين عليكي عشان انا طويلة انا 171 ووزني 80 -انا عايزة اكون جسمي احلى من كده وأعرف البس براحتي- اللبس عمال بيكش في المحلات وبتعب عشان الاقي حاجة مناسبة ليا كمحجبة وفي نفس الوقت على الموضة وتناسب سني مش تكبرني انا بقيت باكل كتير ومش هاممني اي حاجة باكل حاجات حلوة كتييييييير ورجعت لكل حاجة تخليت عنها في الريجيم بشراهه وبرجع اندم علي كده جدا وساعات كنت بلجأ للملينات عشان تخلصني من اللي أكلته وشاي الريجيم وده عملي مشاكل كتير ولخبطة في مواعيد الدورة الشهرية
انا عارفة ان اللي عندي مش مشكلة بالنسبة لناس كتير
بس انا مش عارفة اعمل ايه وازاي اتخلص من الحالة اللي عندي خايفة ان وزني يزيد اكتر وتبقي المشكلة اكبر عايزة حد يساعدني انا يأست من نفسي بجد مش عارفة أرجع الإرادة للريجيم تاني
أسفة إني طولت عليكم.
==========
رد بص وطل:
صديقتنا العزيزة زي ما قولتي إنتي محتاجة تنزلي عدد كيلوات مش كبير أوي يعني مش لازم تحسسي نفسك إنك في أزمة أو مشكلة كبيرة، كل اللي عليكي إنك تستشيري دكتور متخصص علشان يديكي النظام الغذائي المناسب لطبيعة جسمك ولازم تعرفي بينك وبين نفسك إن الريجيم اللي إنتي بتعمليه في الاول والآخر لمصلحتك إنتي مش بس علشان الناحية الشكلية لكن علشان تحافظي على صحتك، الموضوع مش محتاج منك غير شوية صبر وإرادة وإنك تحاولي تغيري نظام أكلك وتخليه نظام ثابت في حياتك عامة.
بصي يا جميل انصحك اهم حاجة في
بصي يا جميل انصحك اهم حاجة في العلاج مش موضوع الوزن لان وزنك الزايد مش كتير هي مشكلتك الحقيقية هي النهم العصبي الذي اصبت به- وده للاسف بقى منتشر اوي اليومين دول بسبب الهوس في الحصول على الجسم المثالي اصل انا عارفة الحالة دي كانت عند واحدة بحبها هي برضو طويلة172 فكان نفسها توصل لجسم عارضات الازياء حاولي تستشيري اخصائي نفسي في الموضوع ده عشان تحسي بالرضا عن شكل جسمك ومتفكريش تخسي دلوقت وابعدي تماما عن الميزان..
وبعدها هتقدري تنظمي اكلك ومتاكليش غير وانتي جعانة ترجعي زي زمان يعني ....وصدقيني ساعتها فقدان الوزن هيكون سهل اوي.انصحك ماتهمليش الموضوع ده او ممكن تبداي انت مع نفسك بحيث تراقبي الحالات اللي بيجيلك فيها نهم وتحاولي تقنعي نفسك ان جسمك حلو وانك مش محتاجة تخسي.
.u have to love ur own body.coz it's the
only one u have
وربنا يوفقك يا قمر
هل بعد الولادة بترجع تاني
هل بعد الولادة بترجع تاني لوزنها؟ أنا قلقانة جدا لأن الـ9 ك اللي هزيدهم -ويارب يكونوا 9 بس- عملت مجهود جامد عشان اخسهم أنا كنت 85 بقيت 75.
==========
رد بص وطل:
الصديقة العزيزة لو اتبعتي النصائح والإرشادات اللي قلنا عليها أثناء فترة الحمل مش هتزيدي إلا الزيادة الطبيعية، وهتقدري تنزليها بكل سهولة بعد الولادة إن شاء الله.
