اخسر وزنك الزائد.. بريجيم صحي للرياضيين

انا وزنى 75 وطولى 161 وعاوزة اخس ومش عارفة اعمل اية يا ريت تردوا عليّ.

==============

رد بص وطل:
ممكن تبدأي معانا بريجيم رمضان بس لازم يكون عندك إرادة وعزيمة وتواظبي على الريجيم مع ممارسة التمارين الرياضية.

انا ونى 73 وطولى 160 وعندى طفل عمره 11 شهر وبرضع طبيعى ونفسى اخس مش عارفه اعمل ايه ياريت لو فى نظام تغذية صحيح ورجيم خاص للرضاعة ياريت تعرضوه لى.

==============

رد بص وطل:
لاتباع ريجيم مع الرضاعة لابد ان يكون النظام الغذائى متوازن يعني تنزلي بالكثير 4 كيلو فى الشهر مع إضافة بعض الزيوت، ولبن منزوع الدسم وخضروات ورقية وفاكهة والإكثار من السوائل.

السلام عليكم.. انا كان وزنى 104 وخسيت لحد 75 ورجعت تخنت تانى لحد 95 ومش عارفة اخس تانى واخدت سيبوتريم وعمل نتيجة في الاول وبعد كدة بطل ومش عارفة اخس ازاي عاوزة اخس خلال شهر رمضان ياريت تساعدوني محتاجة انزل 10 كيلو على الاقل فى الشهر.

=================

رد بص وطل:
الصديقة العزيزة مش المهم إننا نخس وزن كتير بسرعة لكن الأهم إن الوزن اللي نخسره مايرجعش تاني، وإن شاء الله هيكون عندنا في شهر رمضان ريجيمات صحية مناسبة مع الشهر الكريم.

أنا وزنى زايد جداً بالنسبة لطولى، طولى قرابة 175 ووزنى حوالى 85 إلى 90.
أنا بزيد نسبياً بس مش بأكل كتير، مش عارف، مره أكل عيش سن وبقيت أكل بشكل محدود مش كتير، ومره أبطل فى الغالب بشتغل اليوم كله وبأكل بره بس مش أكل حريف يعنى ممكن كشرى أو طعميه، لكن مش كبده ولا لحمه، قليل لما أكل بره كده.
ومش عارف بجد أعمل ايه. عايز اعرف وضعى ايه. مع العلم أن هدومى بتودعنى حته حته. وشكراً

=============

رد بص وطل:
الصديق العزيز، لازم تهتم بنوعية وكميات أكلك علشان تحافظ على وزنك، ولازم تهتم بتنظيم عاداتك الغذائية وممكن إنك تستشير دكتور علشان يديك النظام الغذائي المناسب لطبيعة جسمك، ولازم تعرف إن الوزن الصحي المناسب مع طولك المفروض إنه يتراوح بين 61 إلى 76 كيلو.. وتقدر تبدأ معانا في ريجيم صحي في رمضان.

انا طولى 173 سم ووزنى 70 كجم يا ترى ايه هو الوزن المثالى.

==============

رد بص وطل:
الوزن المثالي المناسب مع طولك المفروض إنه يتراوح بين 60 وحتى 74 كيلو.

انا وزنى 115 كيلو طولى 176 اريد ان اخسر وزنى فى شهر رمضان
نريد ريجيم ينفع للطبقة المتوسطة والفقراء.

=================

رد بص وطل:
تابعنا وإن شاء الله هيكون عندنا ريجيم صحي في رمضان.

تحية بجد جامدة على احلى موقع فى الوطن العربي.. أنا عندى 16 ووزني 58 وطولي 162 عندي سؤالين الأول هو انا كده وزني كويس ولا عايزة اخس؟ التاني انا بطلع السلم انزله 15 دقيقة ده كويس عشان اخس مع العلم ان دي الرياضة اللي اقدر عليها؟ شكرا.

=============

رد بص وطل:
وزنك كده صحي جداً ومناسب مع طولك، وبالنسبة لرياضة طلوع السلم فهي طبعاً كويسة ومفيدة وحاولي تزودي المدة كل شوية يعني ممكن تخليها 20 دقيقة وبعد كده تبقى 25 وهكذا، وممكن تجربي رياضة نط الحبل والجري وكمان المشي مفيد جداً.

انا وزنى 73.5 و طولى 164 المفروض اكون كام.

===============

رد بص وطل:
الوزن الصحي المناسب لطولك المفروض إنه يتراوح بين 53 إلى 66 كيلو.

انا وزنى ما بين 60 الى 55 وعاوزه اثبت وزنى على 50 اعمل ايه بالاكل ولا الرياضة ممكن الرد....

================

رد بص وطل:
أولاً لازم تعملي ريجيم علشان توصلي للوزن اللي عايزة تثبتي عليه، ولما توصلي للوزن اللي إنتي عايزاه بتبدأي التثبيت، والتثبيت هو إنك تحصلي على سعرات توازي المجهود المبذول يوميا وان تراقبي ما تأكلي بعد التوقف عن الريجيم ومن المفترض إنك خلال فترة الريجيم تتعلمي طريقة الأكل الصح وتعودي نفسك عليها ويبقى ده اسلوب حياتك على طول، وطبعاً مش معقول إنك هتعيشي طول حياتك تعملي ريجيم أو تتابعي مع دكتور وعلشان تعملي تثبيت لوزنك ففيه أكثر من شكل للتثبيت إما إنك تقللي كميات اكلك يعنى تاكلي كل حاجة لكن بكميات اقل مع الرياضة اليومية المتاحة، والطريقة التانية إنك تعملي توازن يعني لو يوم خرجت مع صحابك وهتاخدي راحتك فى الاكل اليوم اللى بعده تمشى على الريجيم، ولو لخبطي فى الاكل يومين اليومين اللى بعدهم اعملي ريجيم وهكذا.
واهم حاجة إنك توزني نفسك على الاقل مرة كل اسبوعين علشان لو لقيتي نفسك وزنك زاد تقللي فى الوجبات الحرة خلال الاسبوع يعني لو محددة ثلاث وجبات فى الاسبوع قلليهم لوجبه واحده اواتنين ولو بدأتِ تاكلِ قطعتين شيكولاته فى اليوم خليهم قطعه واحده كل يومين وهكذا، ولو لقيت نفسك نازلة على الميزان ممكن تزودي شوية الحاجات اللي بتحبيها ولكن بحدود.

اولا احب اشكر القائمين على موقع بص وطل لشمولية الموقع وجمال موضوعاته وكنت عايز استفسر من الدكتور هل ننتظر ريجيم رمضان ان شاء الله وخصوصا ان انا في امس الحاجه الى نظام غذائي مع بلوغ وزني 145 كجم مع جسد طوله 177 سم وانا في اشفاق شديد على نفسي من حالتي البدنيه والصحيه فهل اجد عندكم ان شاء الله ما يخلصني من الضيف الثقيل والذي يبلغ وزنه قرابة 70 كجم... اشكركم وبارك الله فيكم وتقبلوني صديقا لكم.

===============

رد بص وطل:
أهلاً بيك صديقنا العزيز، وطبعاً تشرفنا صداقتك، ونتمنى إنك تتابعنا دايماً، وإن شاء الله في رمضان هنبدأ بريجيم خاص مناسب مع الصيام، تقدر تتابعه معانا وتبعت لنا وتقول لنا نزلت قد ايه مع الريجيم ده.

هل الجيم فى رمضان قبل الفطار ولا بعد الفطار.

============

رد بص وطل:
ممكن قبل الفطار نعمل تمرينات خفيفة وسهلة في البيت، وبعد الفطار ممكن نروح الجيم، وعموماً في رمضان الصلاة الكتيرة بتكون بمثابة تمرينات رياضية للجسم.

يا جماعة انا طولي 173 وكان وزني 96 كجم وعملت رياضة ورجيم متواضع ونزل وزني خلال شهرين 6 كجم وبقى 89 كجم... ياريت لو فيه نظام غذائي معين او نصايح امشي عليها لاني كمان طبيعة شغلي مكتبية قاعد فترات طويلة جدا على المكتب وشكراً.

===============

رد بص وطل:
أهلاً بيك صديقنا العزيز، وإن شاء قريب جداً هنقدم نصايح وأنظمة غذائية للناس اللي بتشتغل لفترات طويلة.

السلام عليكم انا وزنى 95 وطولى 182 وعايز اعرف الوزن المثالى كام واخس ازاى وحاولت اروح الجيم وانتظمت بس مجبش نتيجه خااااالص ارجو الرد.

=============

رد بص وطل:
الوزن الصحي المناسب مع طولك يتراوح بين 66 لـ 82 كيلو، وعلشان تخسر وزن لازم تمشي على نظام ريجيم صحي ومتوازن إلى جانب ممارسة الرياضة.

ما فيش تمرينات للتخسيس بدل الأكل والنظام الخاص.

===========

رد بص وطل:
علشان نحافظ على وزننا لازم نتعلم ناكل صح ونغير عاداتنا الغذائية إلى جانب ممارسة التمارين الرياضية، والتمارين دي ممكن تتعمل في الجيم وفي البيت ممكن نعمل بعض التمارين البسيطة أو نمارس رياضة المشي يومياً لمدة نصف ساعة على الاقل.

مواضيعكم حلوة جداااااااا بس انا مش فاهمة ليه كل التركيز بس على اللى عايزين يخسوا أنا رفيعة ونفسي امنية حياتى انى اتخن شويه مافيش حد بيدينى سنى الحقيقي دايما مستصغرنى وتريقه بقي فظيييييعه على رفعى وكده انا وزنى 50 وطولى 169 بجد باتمنى اتخن شويه ومش عارفه اعمل ايه وايه نظام الاكل اللى هيزود وزنى
وميرسي جدا على المجهود الرائع.

==========

رد بص وطل:
صديقتي العزيزة إنتي بتعاني من النحافة، ولازم تستشيري دكتور متخصص وتعملي بعض التحاليل علشان تعرفي إيه سبب النحافة اللي عندك دي وتاخدي العلاج المناسب لها وكمان تمشي على نظام غذائي خاص، ولازم تعرفي إن علاج النحافة بيحتاج لوقت أكتر من علاج السمنة علشان كده لازم تصبري وتواظبي على النظام الغذائي.

السلام عليكم ميرسي كتير على الريجيم ده لكن عندى مشكلة إن لما اعمل ريجيم وجهى بينزل جدا ومش عارفة اعمل ايه نفسى جسمى يكون جميل ووجهى جميل.

============

رد بص وطل:
علشان تحافظي على وشك مع الريجيم لازم تهتمي بشرب المية والسوايل كتير وكمان أكل الفاكهة والخضار الطازة.

السلام عليكم.. كنت عايزة ريجيم يناسب حالتى انا على طول بيجي لى انيميا بمجرد التوقف عن الحديد او الفيتامينات بتجيلى انيميا وحاليا باخد فيروترون واميولانت للمناعة عشان كل شوية بيجينى التهاب فى الزور وسخونية وعسر هضم وامساك وبتعب كتير مع العلم ان وزنى مش زيادة يعتبر معقول بس عندى مشكلة فى غضاريف ركبتى فمحتاجة انزل وزنى عشان محملش على ركبتى كتير.

==============

رد بص وطل:
الصديقة العزيزة لازم تستشيري دكتور متخصص وتعملي بعض التحاليل علشان يقدر يديكي النظام الغذائي المناسب لطبيعة حالتك.