يجيب على الاستشارات:
د. محمد أبو الغيط
الأستاذ بكلية الطب جامعة القاهرة وسكرتير عام الجمعية المصرية الطبية لدراسة السمنة
كتير بنسمع عن الريجيم الكيميائي، وعن عدد الكيلوات اللي بيقدر ينزّلها في وقت قصير جداً يعني في أسبوع واحد ممكن الواحد يخسّ خمسة كيلو، ولو استمر يخسّ في الشهر عشرين كيلو.. يعني عصا سحرية لكل مشاكل السمنة والتخن اللي معقدة أغلب الناس... وعلشان طبعاً إحنا متفقين إننا نمشي صح فبجد كان مهم جداً إننا نستشير دكتور "محمد أبو الغيط" مستشار "بص وطل" في حملة (اخسر وزنك.. تكسب صحتك).. يا ترى الريجيم الكيميائي صح ولاّ غلط؟ وهل فيه خطورة على صحتنا لو فقدنا هذا الكم من الكيلوات في هذه الفترة البسيطة؟..
في البداية يعني إيه ريجيم كيميائي..!!
الريجيم الكيميائي لم تُجرَ عليه دراسات وأبحاث كافية حتى الآن.. وهناك اعتقاد خاطئ أن الريجيم الكيميائي هو اختيار أنواع معينة من الأكل علشان أكلة تحرق سعرات الأكلة التانية.
ولكنه معروف أنه يعتمد على نوعية واحدة من الأكل "بيض فقط أو نوع فاكهة أو بروتين فقط.." مدة طويلة والجسم لا يستطيع هضمها أو امتصاصها طوال الوقت فيتخلص منها دون أن يستفيد منها وده مضرّ جداً على الجسم اللي محتاج كل أنواع الأكل... كمان لما الشخص يكون مطلوب منه أكل نوع واحد في الغالب مش بيقدر يأكل كميات مهما كان نوع الأكل..
الريجيم الكيميائي بيساعد على خروج الميه من الجسم بكميات كبيرة جداً، فطبيعي أن الجسم يخس كويس جداً وهذا ما يبدو من الوهلة الأولى، ولكن المشكلة أن الجسم بيفقد الميه مش الدهون بمعنى لو واحد حب يعمل ريجيم كيميائي لمدة أسبوع ممكن يخسّ بسهولة خمسة كيلو في أسبوع...
ترجمة الخمسة تخسيس فقدان كيلو دهون مقابل فقدان 4 كيلو ميه، وده طبعاً خطر جداً؛ لأن الكيلوات دي بترجع بسرعة جداً بمجرد ما يرجع للأكل تاني.
لكنه بيخسس أوي... إيه الضرر منه؟!
لا ننكر أن الريجيم الكيميائي بيخسس أسرع من الريجيم العادي؛ ولكن ممكن يرفع نسبة "الأستيون" في الدم... وارتفاع النسبة في الجسم إلى حد معين قد يؤذي القلب والكبد والكلى وشبكية العين، وبالتالي لا ننصح أبداً بالريجيم الكيميائي.
اللجوء إلى هذا النوع من الريجيم أحياناً نضطر إلى استخدامه؛ ولكن في حالات خاصة جداً ومحدودة ولفترة قصيرة بمعنى لأسباب قهرية في حالة اضطرار المريض الذي يعاني من السمنة لإجراء عمليات عاجلة قد تهدد حياته؛ فلا بد أن يفقد عدداً كبيراً من الكيلو جرامات.
الريجيم الكيميائي حاجة خلاص بطلت على مستوى العالم حالياً، المسموح به هو لا يتعدى معدل التخسيس من كيلو إلى كيلو ونص في الأسبوع، وبالتالي فيه كتير من الأطباء وخاصة من المطلعين على كل جديد في عالم التخسيس توقفوا عن إعطاء مرضاهم هذا النوع من الريجيم.
هل ممكن الريجيم الكيميائي يسبب الوفاة..!!
بالطبع... في الأحوال العادية الريجيم قد يكشف أنواعاً من الأمراض مبكراً فتمكن الإنسان من متابعتها وعلاجها، وده في صالحه... وخاصة أمراض الغدد الصماء ومشاكل المبايض وفقر الدم وارتفاع نسبة الكوليسترول أو مرض السكر والضغط وغيرها...
ولكن الريجيم الكيميائي قد يقضي على المريض قبل أن يكتشف مرضه؛ مثلاً لو مريض عنده مشاكل في القلب وهو مش عارف ممكن تحصله مشكلة يدفع حياته ثمناً لهذا النوع من الريجيم.
علشان كده استشارة الطبيب حاجة مهمة جداً وإجراء الفحوصات والتحاليل المطلوبة شيء ضروري قبل الانتظام في الريجيم بشكل عام.
ولو المريض مش قادر يتابع مع دكتور يعمل إيه!!..
ولو المريض مش قادر يتابع مع دكتور؛ فمن الحكمة أنه لا يتبع ريجيم كيميائي أو ريجيم سريع؛ لأنه قد يدخله في دوامة من المشاكل والأمراض التي هو في غنى عنها.
ويلجأ إلى نظام غذائي متوازن، وإحنا في "بص وطل" بنحاول ننشر أنواع معتدلة من الريجيم لكل الناس... وبالطبع هاكون معاكم في أي استشارة خاصة بالريجيم... المهم نبدأ نهتم ونشوف ونراقب أنواع الأكل اللي بنتناولها طول النهار.
السلام عليكم عندى 23 سنه وزنى
السلام عليكم عندى 23 سنه وزنى 88 طول 170 عندي منطقه الأرداف كبيره وعندى مشكله الارجل ألم شديد ذهبت عند الدكتور لعمل ريجيم كان العلاج إبرة صينيه مع نظام غذاء نصف رغيف مصرى مطلوب ريجيم غير قاسى علشان برضع طفل وشكرا الرجاء الرد.. شكرا
===============
رد بص وطل:
الصديقة العزيزة لقد ثبت إن الإبر الصينية ليس لها تأثير في موضوع الريجيم وإنقاص الوزن وعلشان تتبعي ريجيم مع الرياضة لابد ان يكون نظام غذائى متوازن يعني تنزلي بالكثير 4 كيلو فى الشهر مع إضافة بعض الزيوت، لبن خالى الدسم، خضروات ورقية، فاكهة، سوائل كثير.
السلام عليكم انا وزنى 100
السلام عليكم انا وزنى 100 كيلو وطولى 157 بخس ببطء فظيع ونفسى اخس ومتابعه مع دكتوره وتركب لى ابر صينيه نفسى اعرف غلط ولا صح وبعمل جلسات (انفرا) وتردد وجهاز كريزى فيت نفسى فى حل.
==============
رد بص وطل:
الصديقة العزيزة الإبر الصينية ليس لها أي تأثير في موضوع التخسيس وعليك باتباع ريجيم صحي متوازن تحت إشراف دكتور متخصص ويمكنك الإستعانة بالأدوية التي تساعد على سرعة الحرق والإحساس بالشبع مع ممارسة الرياضة بانتظام حتى لو كانت رياضة المشي أو السباحة أو صعود السلم وإن شاء الله توصلي للوزن الصحي المناسب لك.
السلام عليكم ورحمة الله
السلام عليكم ورحمة الله وبركاته.. انا عندى 29 سنه وطولى 175 ووزنى 176 انا مشكلتى انى جربت مع دكاتره كتير اول اسبوع بخس من 5ك ل 9ك وبعد كده نص كيلو فى الاسبوع التانى وبستمر على الريجيم لمده لحد ما بزهق من الريجيم ومفيش اى حاجة احس انها عامله نتيجه نفسى فى برنامج تخسيس سريع ونتائجه تظهر عليه بسرعه خصوصا وانا فرحى قريب ومش عارف اتصرف ازاى وياريت يكون الريجيم تكاليفه بسيطه علشان اقدر استمر وياريت تقول لى على نوع برشام يكون بيجيب نتائج كويسه وشكر لكم..السلام عليكم.
=========================
رد بص وطل:
الصديق العزيز ده ريجيم بامكانيات قليلة ممكن تمشي عليه لكن لازم يكون عندك إرادة قوية وتعرف إن الموضوع محتاج لشوية صبر
• الصبح: 1/2 رغيف بلدى مع فول او جبنة قريش او 2 ملعقة مربى
• الغداء: لحوم+ سلاطة+ خضار
• العشاء: فاكهة.
ولو أنت مش بتعاني من أي مشاكل عضوية ممكن تستعمل دواء زي Meridia ولكن تحت اشراف دكتور متخصص.
يا دكتور انا وزنى 73 وطولي
يا دكتور انا وزنى 73 وطولي 150 عاوزة ريجيم معين امشي عليه ونوع علاج كويس علشان اخس ال 15 كيلو دول في حوالى شهرين.
==========================
رد بص وطل:
لابد من استشارة دكتور متخصص في علاج السمنة لعمل التحاليل اللازمة ومعرفة سبب السمنة اللي عندك وعلى هذا الأساس يمكنه اعطاؤك النظام الغذائي والدواء المناسب لك.
ازاى ابعت اسئله
ازاى ابعت اسئله للدكتور؟
===========================
رد بص وطل:
الصديق العزيز يمكنك ارسال كل اسئلتك ومشاركاتك بنفس الطريقة اللي ارسلت بها هذه المشاركة والرد هيكون بنفس الطريقة.
عمرى 46 سنة وطولى 150 ووزنى
عمرى 46 سنة وطولى 150 ووزنى 70 كيلو جربت أدوية مثل شيتوكال وجربت الاعشاب بجميع انواعها ولا استطيع ان اقلل كمية الاكل وليس فى امكانى الذهاب إلى طبيب متخصص أرجو المساعدة.
==================
رد بص وطل:
الصديقة العزيزة لازم تعرفي إن دواء شيتوكال ليس له تأثير في موضوع الريجيم وبالنسبة للأعشاب فهي تمنع امتصاص الكثير من المواد الغذائية وبالتالى قد تساعد على فقدان الوزن ولكنها قد تضر الجسم.. وعلشان تقدري تخسري وزنك وتحافظي على صحتك وشكلك الخارجي لازم يكون عندك إرادة قوية وصبر وتقللي كميات أكلك وممكن تاكلي خضار كتير زي الخس أو الخيار علشان تقللي من إحساسك بالجوع على مدار اليوم وممكن تستعيني بدواء زي الميريديا اللي بيسرع من عملية الحرق وسرعة الإحساس بالشبع ولكن بعد التأكد من عدم وجود أي موانع طبية لأستعمالك هذا الدواء.
يا دكتور ... يا ريت بس اعرف
يا دكتور ... يا ريت بس اعرف فوائد الماء المغلي مع الليمون يوميا ... و في ناس قالت لي من الطرق المفيده لحرق الدهون كوب ماء مغلي و يقطع عليه شرائح ليمون + كمون و ينقع لمدة 6 ساعات .. حابب اتأكد بس من المعلومه دي؟؟؟
==============================
رد بص وطل:
تكثر الإدعاءات الخاصة بتناول مشروبات وأكلات مختلفة تساعد على التخلص من الوزن الزائد أو العكس، ولكن حتى الآن لا توجد دلائل علمية دامغة على فائدة أو ضرر هذه المشروبات بالنسبة للوزن.
انا سني 22 سنة وطولي 170ووزني
انا سني 22 سنة وطولي 170ووزني 79 ونفسي اخس بس انا بعمل دايت كتير بس بكون متحمسة في الاول وبعد كده بكسل عنه نفسي في نظام دايت كويس افضل عليه لغاية ما اخلص وعايزة اعرف الوزن المثالي ليا كام؟
=====================================
رد بص وطل:
الصديقة العزيزة لازم يكون عندك إرادة قوية جداً علشان تقدري تخسري وزنك وتوصلي للوزن اللي إنتي عايزاه، والزن الصحي المناسب ليكي ولطولك يتراوح بين 57 لـ 72 كيلو..
السلام عليكم ورحمة الله
السلام عليكم ورحمة الله وبركاته..انا مشكلتى انى وزنى فى تزايد مستمر ومش عارفة انزله خالص طولى173 ووزنى97 كيلو وبعد كل ولادة بزيد اكتر ومش برجع تانى وكمان انا حامل وعايزة اخس ومش عارفة والموضوع ده مضايقني خالص ياريت لو فى حل تفيدونى به والف شكر.
====================================
رد بص وطل:
صديقتنا العزيزة نتمنى من الله أن يتم حملك على خير، ولازم تعرفي إن بالنسبة للحمل فالوزن بيزيد طبيعياً بمعدل كيلو فى الشهر لذا فما هو أكثر من ذلك عبارة عن دهون زائدة ويمكن اتباع نظام ريجيم متوازن للمحافظة على هذا المعدل مع اضافة فاكهة بين الوجبات وبعض النشويات ولبن خالى الدسم مع المتابعة مع الدكتور لمتابعة حالة الجنين بانتظام.
السلام عليكم..شكرااا جدااا
السلام عليكم..شكرااا جدااا على الكلام الجميل ده..لكن أنا كنت عايزه اقول مشكلتي..أنا سني 17 سنه ووزني 82 كيلو وطولي 172 وده كتييير جدا مش متخيلين ده عامل لي مشكله اد ايه :( بليييز يا جماعه ممكن تقولوا لي اي طريقه (دايت بس سهل عشان الجامعه) عشان انا تعبت من اللف على الدكاتره:) بلييييز.
========================================
رد بص وطل:
صديقتنا العزيزة ياريت تتابعينا وإن شاء الله هتلاقي كل اللي إنتي عايزاه قريب على بص وطل، ولكن من الأفضل إنك تتابعي مع دكتور علشان يقدر يعرف إيه سبب السمنة اللي عندك بالظبط عن طريق اجراء بعض التحاليل وبالتالي يقدر يديكي النظام الغذائي والأدوية المناسبة ليكي.
السلام عليكم هل جلسات التدليك
السلام عليكم هل جلسات التدليك لتخسيس البطن مثلا بتجيب نتيجه ولا لا؟لأنى عملت دايت و خسيت 13 كيلو و جسمى بقى مظبوط لكن البطن لا!
=========================================
رد بص وطل:
صديقتنا العزيزة يفضل إنك تستشري دكتور تجميل علشان يقول لك الحل المناسب للمشكلة دي، لكن ممارسة التمارين الرياضية الخاصة بمنطقة البطن نتيجتها بتكون كويسة جداً وكمان مفيدة للجسم بوجه عام.
الكلام دة صح 100% وانا مجرباة
الكلام دة صح 100% وانا مجرباة بس انا بعمل رجيم مع دكتورة بالاكل بس بعد ما ابطل ريجيم برجع تانى زى الاول يعنى انا هفضل طول عمرى اعمل ريجيم.
بجد شكرا يا دكتور ده الي
بجد شكرا يا دكتور ده الي بحاول اقوله لناس كتير ومفيش فايدة وناس كتير تعبت منه وبالرغم من كدة محدش عايز يتعظ ياريت الموضوع ده ناس كتير تشوفه يمكن يعرفوا فعلا اية خطورته
والله الموضوع حلو جدا وفى
والله الموضوع حلو جدا وفى غاية الاهمية بس ياريت عاوزة اعرف ريجيم يكون مناسب للمستوى المادى ويكون تكلفتة رخيصة وفى متناول الناس جميعا وجميع الطبقات
===================================
رد بص وطل:
طيب ياريت تتابعينا وإن شاء الله نجيب لك ريجيم مناسب في أقرب وقت.
انا ممكن اعرف هل كبسولات
انا ممكن اعرف هل كبسولات الشيكوتال مفيده ولا مضره للانسان وانا عاوزه اعرف اذا كان كده وزنى كويس ولا لأ؟ انا وزنى 59 كيلو وطولى 161 سم ممكن اعرف بليز الرد.
=============================
رد بص وطل:
صديقتنا العزيزة لازم تعرفي إن الشيتوكال مصنوع من مادة الشيتوزان وهى لا علاقة لها بالتخسيس. أما بالنسبة لوزنك فهو مناسب جداً مع طولك.
انا عندى 22 سنه ووزنى 75
انا عندى 22 سنه ووزنى 75 وطولى 161 انا مشكلتى انى عندى بطن عاليه ونفسى اخس بس مش عارفه انا كسوله جدا وانا فرحى قرب ومكسوفه اكون ادامه كده
ياريت تردوا عليا ضرورى.
================================
رد بص وطل:
الصديقة العزيزة أولاً نحب نهنيكي بقرب زفافك، وثانياً احب اقول لك إن السمنة الموضعية زي زيادة منطقة البطن أحسن علاج لها هو ممارسة التمارين الرياضية.
