د. محمد أبو الغيط: شفط الدهون يعتمد على شطارة الدكتور!

انا وزنى 110 وطولى 180 وبعمل ريجيم بس أنا مشكلتى إنى عندى كرش هل الريجيم مع المشى هيجيب نتيجة ولا لا ارجوك رد عليّ لانى مخنوق من الوزن الزائد.

===============

رد بص وطل:
الصديق العزيز أكيد اتباع ريجيم مع الرياضة هيجيب نتيجة لكن لازم الريجيم يكون تحت إشراف طبي علشان الدكتور يقدر يعطيك الريجيم الصحي المناسب لطبيعة جسمك.

ماهو حل مشكلة ترهل جلد الجسم وبياخد وقت قد ايه الحل ده

==============

رد بص وطل:
لعلاج الترهلات لابد من ممارسة الرياضة وطبعا كلا حسب امكانياته وقدراته المادية والمتاح امامه وان كان يفضل ان تكون تمرينات شد الترهلات مع مدرب رياضى لو كان ذلك ممكنا لكن مجرد المشى الجاد اليومى لمده ساعة كفيل بشد الجسم لكن بعد فترة من الالتزام والمواظبه على المشى .
اما فى السن الاكبر فالجراحة تاتى بنتائج افضل من الرياضة وخاصة فى الحالات التى فقدت كليوات كثيرة جدا وكانت تعانى من سمنه زائدة او بعد الحمل و الولادة مرات عديدة واصبحت البطن مترهله جدا ولم يعد يجدى معها نفعا اى تمارين رياضية .

انا يادكتور ولدت قيصرى مرتين ورا بعض فى مده قصيرة جدا وطلع لى كرش
هو ده الى كبير وشكلم مستفز بعد الولاده انا عايزة اخس هل الريجيم هيجيب نتيجه مع الكرش ولا عمليه الميزوثيرابى احسن.

=============

رد بص وطل:
ممارسة التمارين الرياضية أحسن طريقة لعلاج المشكلة دي وإن كانت ستحتاج لوقت طويل ولكنها أكثر صحة وفائدة لجسم.

دكتور تحيه طيبه للمره الثالثه اخس 10 و15 كيلو واعود لنقطة البدايه طولي 170 ووزني الحالي 96 أنا بصدد حميه الآن واذا خسيت هذه المره ان شاء الله سأكون بحاجه الى متابعه ومساعده حتى لا اعود لما كنت عليه كيف يمكن ان تساعدني ارجوك لا تهمل رسالتي.

=============

رد بص وطل:
الصديقة العزيزة المشكله اننا بنمارس عادات فى الاكل لما بنعمل ريجيم بنوقفها وبمجرد ما نتوقف عن الريجيم بنرجع مرة تانيه لكل عادتنا الغذائية السيئة ونعوض ايام الحرمان باكل كميات هائلة من كل حاجه كنا محرومين منها وقت الريجيم وخاصة لو ما عملش تثبيت وبصراحه خسارة التعب اللى تعبه راح على الفاضى.. وهو ده سبب اننا بنرجع بسرعه وأكتر من الاول يعنى لو خسرنا خمسة كيلو ممكن نرجعهم عشرة لو لم نثبت الوزن.

بعد اذنك يا دكتور انا عندى 16 سنه وانا وزني 75 ونفسى اخس ونفسى فى نظام غذائي وفى مناطق فى الجسم عايزه اخسسها.

==============

رد بص وطل:
ياريت تتابعنا صديقنا العزيز لإن قريب جداً هيكون عندنا أنظمة غذائية على اخسر وزنك.. أما بخصوص السمنة الموضعية فدي حلها هو ممارسة التمارين الرياضية.

لو سمحت يا دكتور انا كنت عايزة اسال عن حاجة غريبة شويه بتحصل لى وهو ان ساعات بيجى عليا يوم باكل كتيييير اوى لحد ما بطنى توجعنى ومش بعرف اوقف اكل.. ساعات كتييير باكل بس مش بعرف والمشكله انى مش بس باكل الاكل اللى كان نفسى فيه بس باكل اى حاجة وبسرعة جدااا وفى وقت قليل وبكميات كبيرة اوى والموضوع ده بيحصل لى مرة او مرتين كل اسبوع وبعدين لما عملت دايت خسيت حوالى 9 كيلو وبعدين رجعت تخنت تانى وروحت لكذا دكتور بس الحاله دى برضه ماوقفتش.. انا بسبب ده زايده عن وزنى المثالى بحوالى 15 كيلو وعايزة اكون بوزن مثالى ومش عارفة اعمل ايه.. انا قريت عن نظام اكل انى اكل كل حاجة عايزاها بس بالراحة وبكميات قليله بس انتظمت حوالى 5 ايام وفى اليوم السادس الحاله دى رجعت تانى.. انا مش عارفة ازاى اوقفها وببقى متضايقة اوى بعد ما باكل لدرجة انى بقعد اعمل تمارين بعد ماباكل الاكل ده وتقريبا كمية الاكل اللى ممكن اكلها فى اسبوع ممكن اكلها فى يوم..

===================

رد بص وطل:
الصديقة العزيزة إنتي ممكن تكوني بتعاني من مشكلة الشراهة المرضية او الBulemia تحتاج إلى علاج مع طبيب نفسى لإنها مرض نفسى وتحتاج لأكثر من مجرد تنظيم للعادات الغذائية. لان هذا المريض لديه مشكله نفسيه تجعله يلجأ الى التهام كميات هائله من الطعام دون يشعر بطعمها او قد لا يكون جائع اصلا وهناك حالات يشعر المريض بالذنب لانه اكل بهذه الطريقه فينخرط فى موجه بكاء هيستيرى وخاصة ان كان يعانى من السمنه ايضا ... وهناك حالات قد تلجأ الى ارغام انفسهم التقيئ للتخلص من الطعام ومع تدهور الحالة قد تصاب بتقرحات فى المرئ او قرحه المعده.. ويمكنك استشارة دكتور ضياء الدين حسني ورقم تليفونه 0108349803

كنت عايزة اسال اعمل ايه عشان اتخلص من الدهون الزائده فى منطقه الفخذين عندى لانها مضايقانى اوى وبحس بتقل فى المشي وبيظهر فى المنطقه دى بالذات الحبوب.

==============

رد بص وطل:
الصديقة العزيزة مشكلة السمنة الموضعية دي حلها مارسة التمارين الرياضية تحت إشراف مدرب رياضي متخصص أو اللجوء لعمليات التجميل وشفط الدهون.

انا عندى 15 سنة وعايزة اخس بس ماعنديش ارادة وماعنديش القدرة على تحمل الجوع او إني اشوف الاكل ومااكلش.

=================

رد بص وطل:
الصديقة العزيزة لازم يكون عندك إرادة قوية علشان تقدري تخسري وزنك وتكسبي صحتك وتوصلي للشكل اللي بتتمنيه وعلشان تتغلبي على مشكلة الجوع دي ممكن تكثري من تناول الخس والخيار طول اليوم علشان ماتحسيش بالجوع بسرعة.

انا عندي مشكلة ان انا مش تخينة اوي بس عندي جناب طالعة اوي فلما بلبس اي بادي او شيميز بيكون شكله مش حلو.. فانا كنت عايزة اسال لو استخدمت الجهاز اللي بيخسس المنطقة دي وسيبته هتخن من جنابي تاني ولا لا.. ولو ده مش صح اعمل ايه؟؟

===============

رد بص وطل:
الصديقة العزيزة ممارسة التمارين الرياضية أحسن حل لمشكلة السمنة الموضعية.. وبالنسبة لأجهزة التخسيس فهي تؤدى إلى انقباضات فى العضلات فتعتبر مثل رياضة بدون مجهود وذلك يساعد على فقدان الوزن وإن كانت بعض الابحاث ذكرت أنها يمكن ان تؤدى إلى تليف بالعضلات.

انا يا دكتور عايزة اسأل ايه افضل طريقه للتخلص من الكرش مع العلم اني ولدت 3 مرات اخر مرة من 5 سنوات وما ظهرش عندي الكرش غير من سنتين وعمري 30 سنه وهل لو كان الجراحه فهي امنه ولا لأ وهل بتكون مكلفه؟

================

رد بص وطل:
الصديقة العزيزة فيه حلين للمشكلة دي أولهم ممارسة التمارين الرياضية الخاصة بشد عضلات البطن والحل ده بياخد وقت طويل شويه لكنه مفيد وصحي للجسم كله أما بالنسبة للحل التاني فهمو عمليات التجميل وده حل آمن ومافيش منه خطر لكن لازم تختاري دكتور ثقة ومضمون ويمكنك استشارة الدكتور أحمد عادل نور الدين استاذ جراحات التجميل بكلية الطب جامعه القاهرة ورقم تليفونه 37488728.

لو سمحت يا دكتور ايه افضل طريقة عشان البطن تنزل؟!

==============

رد بص وطل:
أحسن حل هو ممارسة التمارين الرياضية الخاصة بشد عضلات البطن لإنها صحية للجسم كله أو يمكنك اللجوء للعمليات الجراحية.

انا كنت عايزه اسأل عن نظام كويس وفعال للنحافه اصل انا فى اولى كليه ووزنى 50 كيلو وبجد انا بضايق من انتقاد الناس ليا انى رفيعه مع العلم انى مش بحب اللحمه او الكبده اوالحاجات دي بس بحب اللحمه المفرومه والفراخ البانيه اوك ياريت حضرتك تفيدنى.

==================

رد بص وطل:
الصديقة العزيزة لو التحاليل والكشوفات أثبتت إن مفيش مشكلة عضوية عندك.. يبقى أحسن حل هو إنك تزودي في كميات الأكل وتاخدي خمس وجبات في اليوم وتدخلي في أكلك الحاجات اللي فيها سعرات حرارية عالية زي الحلاوة والعسل وغيرها ده بجانب ممارسة التمارين الرياضية لبناء الجسم.
ولازم يكون عندك إرادة وصبر وتعرفي إنك لو زدتي كيلو أو اثنين في الشهر فده معدل كويس جداً.

لو سمحت يا دكتور انا عايزه اخس بس عن طريق التمارين واناعندى 15 سنه.

================

رد بص وطل:
الصديقة العزيزة لابد من اتباع ريجيم صحي مع ممارسة الرياضة وهناك رياضات كتيرة وبسيطة ممكن تمارسيها زى المشى ولو غير متاح نطلع السلم او ركوب العجله او السباحه لو متاحه.

لو سمحت يا دكتور ارجوك انا تعبت جدا عمرى ما عملت ريجيم وكان ناجح مش عارفه ايه اللى بيحصل لى واما بخس برجع تانى انا مريت بمراحل كتير سببت لى مشاكل نفسيه بسبب الريجيم بس المشكله انى دلوقتى مقبله على الزواج ان شاء الله بعد 4 شهور ووزنى دلوقتى 105 وطولى 168 ومش عارفه اعمل ايه ومش عارفه معايا وقت كفايه انى حتى اوصل فيه لوزن يكون شكلى جميل فيه ومقبول ولا لأ مع العلم انى معنديش دهون متراكمه فى مكان معين بس انا مش عارفه انا عاوزه نظام ريجيم لمده شهر مثلا يجيب معايا نتيجه انا جربت نظام الدايت اللى هو سبع ايام ويوم فرى وكان بيجيب نتيجه وانا اصلا جسمى بيستجيب للريجيم بسرعه بس برده مش بقدر اعمله ارجوكم عاوزه تعليمات كامله اقدر امشى عليها عشان تجيب نتيجه يعنى اعمل الريجيم واخد يوم فرى ولا اعمل ايه وكان فى انظمه ريجيم قديمه في الموقع هنا قبل التحديث من فضلكم ترجعوها تانى او تبعتوها لى او تقولوا لى ازاى اقدر احصل عليها ارجو الرد واسفه جدا جدا للأطاله ومشكورين لسعه صدوركم وخدماتكم المتميزه.

==============

رد بص وطل:
صديقتنا العزيزة ياريت تتابعينا وهتلاقي كل المعلومات اللي إنتي عايزاها قريب جداً.

لو سمحت يادكتور محمد كنت عايزه اعرف من حضرتك ازاي اخسس منطقه الارداف والهانش اناوزني 58 وطولي 154 بس وزني كله تحت ده مسبب لي مشكله ممكن يا دكتور.

======================

رد بص وطل:
الصديقة العزيزة أحسن حل لمشكلة السمنة الموضعية هو ممارسة التمارين الرياضية لإن مفيش نظام غذائي ممكن إنه يخسس منطقة معينة في الجسم.