مع رانيا.. اللون الأحمر سر جمالك

أهلا بكل بنات "قمر 14" وحشتوني جدا، كل سنة وإنتم طيبين، النهارده هنعمل حلقة استثنائية وخاصة جدا بمناسبة عيد الحب

أهلا بكل بنات “قمر 14” وحشتوني جدا، كل سنة وإنتم طيبين، النهارده هنعمل حلقة استثنائية وخاصة جدا بمناسبة عيد الحب؛ تابعونا دايما علشان فيه مفاجآت تانية كتير..

استغلي اللون الأحمر في عيد الحب
اللون الأحمر هو رمز عيد الحب، والنهارده هنستغل كل حاجة لونها أحمر للحصول على جمال طبيعي، ودلوقتي هنتكلم عن الكركديه، وهو من الحاجات المفيدة للبشرة والشعر، لأنه بيعمل على تجديد خلايا الجلد.

اسكراب الكركديه
الماسك ده للبشرة العادية والمركّبة والدهنية

المقادير:
2 ملعقة صغيرة كركديه
¼ ملعقة صغيرة خل ورد
¼ ملعقة عسل أبيض
4 نقط زيت ورد
ملعقة كبيرة ميّه

ملحوظة: لتحضير خل الورد، اخلطي أوراق الورد البلدي مع خل أبيض في زجاجة، بحيث إن أوراق الورد تملأ ربعها، وبعد كده اقفلي الزجاجة ورجّيها وعتّقيها من 3 أسابيع لشهر.

الطريقة:
اخلطي المكونات كلها مع بعض وابتدي اعملي بيه سنفرة لبشرة الوجه وسيبيه من 30 : 45 دقيقة واستخدميه مرة أو مرتين في الأسبوع.

الكركديه كمان مفيد للشعر، ممكن تضيفي عليه ميه وتغسلي بيه شعرك، علشان تحصلي على لمعان طبيعي.

ماسك الكركديه للرءوس السوداء
المقادير:
2 ملعقة صغيرة كركديه
ملعقة صغيرة زيت سمسم
ملعقة كبيرة ميه

الطريقة:
1- اخلطي المكونات كلها مع بعض وادهنيه على بشرتك مرة أو مرتين في الأسبوع.

ماسك الفراولة لكل أنواع البشرة
الفراولة من الفواكه اللي بتدّي نضارة وإشراق للبشرة وبتعمل على تنظيف الأسنان، وكمان بتدخل في ماسكات كتيرة للبشرة والشعر.

المقادير:
3 ثمرة الفراولة
¼ ملعقة صغيرة عسل
ملعقة صغيرة دقيق

الطريقة:
قطّعي الفراولة شرائح وضيفي عليها العسل والدقيق، واهرسيهم بالشوكة أو ممكن تضربيهم في الخلاط، بعد كده وزعيها على البشرة كلها بما فيها فوق وتحت العين لمدة من 30 -45 دقيقة.

بالنسبة للبشرة الدهنية ممكن تكتفي بس بالفراولة لوحدها وتهرسيها وتوزّعيها على بشرتك، لأنها بتقبض المسام الواسعة.

بالنسبة للي عندها حساسية من الفراولة أو شديدة الجفاف أو المركّبة لما تيجي تعمل الماسك ده لازم تصفّيه من البذور السوداء وتبدئي توزّعيها على البشرة وممكن تضيفي عليها زيت اللوز الحلو.

كريم جوز الهند لتقصف الشعر
المقادير:
3 ملعقة صغيرة زيت جوز الهند
7 فص ثوم مفروم

الطريقة:
1- سيّحي زيت جوز الهند على النار وضيفي عليه الثوم وسيبيهم على النار لمدة من 5-7 دقيقة، بعد كده ارفعي الخليط من على النار وصبّيه في طبق زجاجي، بعد كده غطّي الطبق وسيبيه في المطبخ في مكان دافي لمدة أسبوع أو عشرة أيام.

2- بعد أسبوع ارفعي الغطاء من على الخليط وسيّحيه للمرة التانية على النار، وبعد كده صفّي الخليط في شاش واعصريه كويس، وحطي الزيت اللي اتصفي في الثلاجة، وبعد كده ادهنيه على فروة الرأس لمدة 3 ساعات وبعد كده اغسلي شعرك، واعملي الماسك  من 2-3 مرات في الأسبوع، والماسك ده من الماسكات اللي بتمنع تساقط الشعر وكمان بتطوّله وبتشيل القشرة.

ماسك الزبادي لتفتيح البشرة
المقادير:
2 ملعقة صغيرة زبادي
¼ ملعقة صغيرة زيت ورد
ملعقة كبيرة نشا
ملعقة ميه صغيرة

الطريقة:
1- اخلطي الزبادي مع النشا وزيت الورد، بعد كده ادهني بيه وشك وسيبيه لمدة ساعة على بشرة نظيفة، الماسك ده بيدّي نضارة للبشرة وبيغذّيها.

الحبوب ومشكلات المعدة
دلوقتي هاقول نصايح لكل اللي بيعانوا من الحبوب في البشرة بسبب تلوث المعدة، ممكن تستخدموا أقراص الخميرة لاحتوائها على فيتامينات مفيدة للبشرة والمعدة، ممكن تجيبيها من الصيدلية وتاخدي من قرص لقرصين بعد الأكل بربع ساعة.

تقدري كمان تخلطي ملعقة خميرة مع لبن أو عصير برتقال وتشربيها على الريق، ودي من الوصفات الرائعة والمفيدة للبشرة.

وبكده تكون خلصت حلقتنا النهارده..
كل عيد حب وأنتم بخير..
يا ريت تجرّبوا وصفاتنا وتبعتوا تقولوا لنا رأيكم فيها..
وتابعونا علشان فيه مفاجآت كتير مستنياكم،،،