ماسكات من مطبخك لشعر كله صحة وحيوية
النهارده هنكمّل ماسكاتنا للعناية بالشعر، واللي بنستخدم فيها حاجات طبيعية من مطبخك
أعدّها لكم: رنا حسين ونهاد كمال
أهلا بكل بنات “قمر 14” في حلقة جديدة من حلقات “جمالك من الطبيعة مع رانيا”، والنهارده هنكمّل ماسكاتنا للعناية بالشعر، واللي بنستخدم فيها حاجات طبيعية من مطبخك…
ماسك الخيار
ابشري الخيار، واضربيه في الخلاط مع كمية قليلة جدا من الميه، وبعد كده وزّعي عصير الخيار ده على الشعر من الجذور وحتى الأطراف، وسيبيه من 30 : 60 دقيقة.
وممكن تدوّبي كرة الحنة -اللي قدّمناها في حلقة سابقة- مع عصير الخيار، وتوزّعي الخليط على شعرك، وتسيبيه نفس المدة، وبعد كده تشطفي شعرك بالميه العادية.
وطبعا مش محتاجين نقول أد إيه الخيار مفيد جدا لكل أنواع البشرة والشعر.
ماسك الفراولة للشعر الدهني أو المركّب
عصير الفراولة مفيد جدا للشعر الدهني والمركب، وفي حالة الشعر الجاف ممكن تضيفي البلسم على العصير ومعاه ملعقة كبيرة عسل أبيض، وتقلّبيهم مع بعض، وبعد كده تفردي الخليط على شعرك بنفس الطريقة اللي قلنا عليها، وتسيبيه نفس المدة من 45 : 60 دقيقة.
ماسك البرتقال للشعر المركب أو الدهني
المقادير:
- عصير برتقالة صغيرة
- ملعقة بلسم بالأعشاب
- كمية صغيرة جدا من العسل
الطريقة:
اخلطي عصير البرتقال مع العسل وبلسم الأعشاب، وقّلبيهم مع بعض كويس جدا، وبعد كده وزّعيه على شعرك من الجذور وحتى الأطراف.
ماسك البيض للشعر العادي والجاف
المقادير:
- بيضة
- ملعقة بلسم
الطريقة:
اضربي المكونات مع بعض كويس جدا، ووزّعي الخليط على الشعر من الجذور وحتى الأطراف، وسيبيه لمدة نص ساعة، وبعد كده تغسلي شعرك بالشامبو كويس جدا علشان تضيّعي ريحة البيض.
الماسك ده ممكن تعمليه مرة واحدة في الأسبوع، وهيبقى كافي جدا لو عملتي معاه ماسك تاني في نفس الأسبوع، بجد هتلاقي نتيجة هايلة.
وبكده تكون خلصت حلقتنا النهارده..
نتمنّى إنكم تجرّبوا الماسكات اللي عملناها..
وتبعتوا تقولوا لنا على النتيجة..
سلااااااااااااام،،،
