أهلا بكم في حلقة جديدة من حلقات "أبيض وألوان مع ريهام"..
هنقدم لكم النهارده حلقة جديدة وهنعرف فيها إزاي نعمل ماكياج خفيف لفترة النهار..
ويكون شكلنا حلو من غير ما الماكياج يبان.
الموديل اللي معانا النهارده شعرها لونه بني فاتح، وبشرتها قمحية فاتحة، وملامحها شرقية إلى حد ما، هنعرف مع بعض دلوقتي إزاي نعمل لها ماكياج يليق مع لون بشرتها، وعينيها، وشعرها، وفي نفس الوقت يكون بسيط، وهادي، وكاجوال يناسب فترة الصبح للجامعة والشغل.
الفونديشين: هنستخدم فونديشين خفيف على البشرة، نوزعه على الوش كله كويس أوي، والغرض من الفونديشين هو توحيد لون البشرة مش إننا نحط طبقة لون تاني عليه ونغيّر لونه.
البودرة: هنستخدم البودرة السايبة، ونوزّعها باستخدام فرشة البلاشر؛ علشان لو فيه أي بودرة زيادة ماتبقاش واضحة، وهنحط فوق العين كونسيلر، ونوزعه كويس؛ وده علشان البلاشر يثبت عليه كويس.
الآي شادو: الألوان اللي هنستخدمها في الآي شادو تبقى ألوان هادية قريبة من لون البشرة؛ زي: البيج، والبرتقالي، والبني، والأوف وايت، هنحط لون بيج تحت الحواجب، وبلاش نحط من اللون الأبيض؛ وده علشان مش هيبقى مناسب لفترة النهار، وبعدين نحط لون برتقالي في زاوية العين اللي بتكون فوق الجفن المتحرك؛ ودي بتدي لمعة حلوة فوق العين، وبعدين نحط لون بني خفيف أوي على الجفن المتحرك.
الآي لاينر: أفضل نوع للآي لاينر هو النوع الجل وده سهل؛ لأنه بيسيح بسرعة، وبيكون ثابت جدا، ومافيهوش لمعة، هنحط خط رفيع أوي فوق الرموش، وبعدين نسيحه بقطن الأذن؛ علشان يبان شكله أخف، ويناسب فترة الصبح أكتر، وكمان يبقى ممزوج كويس مع الآي شادو.
الكحل: بالنسبة لفترة الصبح يفضل إننا نبعد عن الكحل الأسود؛ يعني ممكن نستخدم اللون البني مثلا، وبعد ما نحط خط كحل تحت العين هنسيحه بقطن الأذن.
الماسكرا: هنحط ماسكرا بشكل خفيف علشان تناسب فترة الصبح، وأهم حاجة إننا نسرح الرموش بعد ما نحط الماسكرا؛ علشان ماتكلكعش، ويبان شكلها مش طبيعي.
أهم حاجة نبقى واخدين بالنا إننا ننضف المنطقة تحت العين بالفرشة؛ علشان لو أي حاجة وقعت ماتعملش لون تحت العين.
البلاشر: أنا اخترت لون مشمشي وده بيدي لون طبيعي للبشرة، هناخد منه بجانب الفرشة، وزي ما قلنا بنحط صوابعنا على الخد بشكل سبعة وبعدين نحط البلاشر في المنتصف، وبعد كده نسيحه بالجانب التاني من الفرشة.
ممكن بعد ما نحط البلاشر بنسخن إيدينا شوية، وبعدين نمشي على وشنا بإيدينا؛ علشان لو فيه بلاشر زيادة يسيح مع الحرارة.
الحواجب: بالنسبة للحواجب في ماكياج النهار بنبعد تماما عن رسمها بالقلم، وهنكتفي فقط بإننا نملأ الفراغات بآي شادو لون الحاجب باستخدام الفرشة؛ وده علشان مايبقاش شكلها مصطنع، ومايناسبش فترة النهار.
الرُوج: هنختار لون من الألوان الطبيعية القريبة من لون البشرة، ويفضل إنها تكون نصف لامعة؛ وده لأن الألوان اللامعة مابقتش بتُستخدم، وبنستبدلها بألوان نصف لامعة.
الرُوج: بنحطه باستخدام فرشة الرُوج؛ علشان دي بتساعد على التوزيع أكتر، وكمان بيدي ثبات أعلى للون.
خلص ماكياجنا النهارده
استنونا الحلقة الجاية مع ماكياج سواريه رائع
سلام،،،
واااااااو بجد تحفه بس افضل لو
واااااااو بجد تحفه بس افضل لو وحده مصريه وشبهما هيبقي احسن ويكون عندها نفس عيوب بشرتنا يعني مثلا حبوب و هلالات سوده كده يعني وشكرا
هاى يا ريهام انتى بجد رائعة
هاى يا ريهام انتى بجد رائعة بس بليز ممكن اسئلك الشادو انتى عاملاها درجات البني لكن لما ابقى نازلة الجامعة ولابسة ألوانات بعيد عن البني اعمل ايه ياريت تفيدينى بردك شكرا.
==============
رد بص وطل:
ميرسي جدا لذوقك يا جودي، وبالنسبة لسؤالك فأنا بعمل الخطوات اللي ممكن تعملي زيها وإنتي رايحة الجامعة لكن طبعا إنتي بتختاري الالوان اللي بتليق معاكي ومع هدومك، بس مع مراعاة إنها تبقى ألوان هادية وطبيعية علشان تتناسب مع فترة الصبح.
هاي ريهام أنا بشكرك على
هاي ريهام أنا بشكرك على الحلقة بجد جميلة.. عاوزة أعرف أنا عندي مناسبة وهلبس جاكيت رصاصي وبنطلون أسود عاوزة اعرف لون الميك أب اللي يليق على اللبس ولون بشرتى أنا بشرتي بيضا وكمان عاوزة اعرف طرحة وصندل وشنطة لونهم إيه..وشكرا
==========
رد بص وطل:
ممكن تعملي ماكياج رمادي في بينك، وممكن تلبسي الصندل والطرحة يبقى لونهم رمادي أو أسود، والطرحة ممكن تبقى رمادي فاتح ومشجرة بألوان زي البينك والأسود.
ازيك يا ريهام كنت عايزة اسالك
ازيك يا ريهام كنت عايزة اسالك انا بشرتى دهنى ومش بعرف احط ميك اب خالص لانها بتفرز دهون على طول وخصوصا منطقة الانف وكنت عايزة اعرف هل فى صن بلوك معين للبشرة الدهنية وكمان ازاى احط كريم الاساس وبودرة على بشرتى الدهنية؟ وشكرا ليك ياريهام يا قمورة على مساعدتك للبنات.
=============
رد بص وطل:
البشرة الدهنية بيناسبها الصن بلوك السائل مش الكريمي، وبالنسبة لبشرتك الدهنية فدي ممكن تستخدمي لها كريم اساس اللي بيكون oil free أو خالي من الزيوت، وبعد كده تحطّي عليه البودرة السايبة علشان تمتص الدهون الزيادة من على البشرة، وخلي دايما معاكي في الشنطة علبة بودرة مضغوطة صغيرة واسفنجة علشان تقدري تظبطي الميك اب كل ما تحتاجي.
شكرا يا ريهام على معلوماتك
شكرا يا ريهام على معلوماتك الحلوة دى بس انا كنت عايزة اسألك هو ايه الفونديشن؟ وكمان كنت عايزك اسالك هو ايه الروتين اليومى لتفتيح البشرة؟ وهل بعد ما اخلص الروتين اليومى للبشرة وتفتحه مش هترجع تسمر تانى؟
===============
رد بص وطل:
ميرسي ليكي يا وردة على ذوقك، ويا ريت تتابعينا دايما، والفاونديشن هو كريم الأساس، وده بيستخدم كأساس على البشرة قبل وضع الماكياج، أما بالنسبة لروتين تفتيح البشرة فأهم حاجة إنك تستخدمي الصن بلوك قبل ما تتعرضي للشمس، لأن دور الصن بلوك إنه يحافظ على الجلد من آشعة الشمس القوية، ويخلي البشرة قادرة على إنها تسترجع لونها الطبيعي بسهولة، ويا ريت تتابعي قمر 14 وهتلاقي حلقات عن الماسكات الطبيعية والروتينات اليومية المناسبة لكل نوع بشرة.
أنا أول مرة اشوف قمر 14 لكنى
أنا أول مرة اشوف قمر 14 لكنى حبيته جدا وانتى امورة اوى وبشكرك وياريت الرد انا عايزة اعرف ايه هو الفاونديشن وياريت تشرحي لى عامل إزاي لاني عمري ما استعملت الحاجات دي.
==========
رد بص وطل:
ميرسي جدا يا هدى لذوقك وكلامك الجميل واتمنى إنك تتابعينا على طول إن شاء الله، وبالنسبة للفاونديشن هو كريم الاساس اللي بيتحط على البشرة علشان نحضرها لاستقبال الميك اب، وفيه كريم أساس كريمي وسايل ومضغوط، وبتختاري النوعية على حسب نوع البشرة، ويا ريت تتفرجي على الحلقات اللي بقدمها على قمر 14 علشان تعرفي إزاي توزعي الكونسيلر بطريقة صحيحة، وتابعيني دايما كل يوم أربعاء على قمر 14.
لو سمحتى يا ريهام انا عندى
لو سمحتى يا ريهام انا عندى هالات سوداء وابتديت اظبط مواعيد نومى عشان تروح وبستعمل روليت غارنيه للهالات السوداء وكمان عندى بقعتين غامقين فى كل خد من ايام الكليه تقريبا بس الغريبه انهم غامقين عن باقى وشى!! فى واحده نصحتنى استخدم كريم فير اند لفلى بإستمرار عشان يوحد لون بشرتى وعلى فكرة أنا خطوبتى كمان شهرين؟ ايه رأيك؟
============
رد بص وطل:
أحسن حل للتخلص من الهالات هي الراحة والبعد عن الارهاق والتوتر والسهر، وبالنسبة للبقع اللي في وشك لازم الاول تستشيري دكتور أمراض جلدية علشان يديكي المرهم أو الكريم المناسب.
أنا كان نفسي من زمان في مكياج
أنا كان نفسي من زمان في مكياج بالطريقة دي زي الممثلين شكرا ليك بس كنت عايزة اعرف اية استعملة قبل المكياج بيكون خافي لعيوب البشرة هل الفاونديشن انا بشرتي جافة وبحس لما استعمل ايشي بلقيها كان بانت فيها عيوب كتير وشي مش رايق رغم اني استعملت اكتر من ماركة انا عايشة برة مصر هل الجو ولا الاساس مش مناسب ولازم استعمل خافي العيوب اعرف ممكن الوان روج وروجاجو انا بيضة وشكرا.
=============
رد بص وطل:
صديقتي العزيزة كل اللي إنتي محتاجة له وأكتر هنتكلم فيه بالتفصيل في حلقاتنا الجاية، وهيكون معانا دكاترة جلدية وتجميل متخصصين، لكن أهم حاجة لازم تاخدي منها قبل الماكياج هي صحة ونضارة بشرتك بإنك تعتني بالتغذية الصحية والسليمة وتعملي ماسكات طبيعية للعناية ببشرتك.
عايزه اعرف حمام الزيت الثلاثى
عايزه اعرف حمام الزيت الثلاثى واسيبه فترة أد إيه على الشعر وإيه الفرق بين الكريم واللوشن بالنسبة للوجه.
===========
رد بص وطل:
الكريم بيبقى أتقل شويه من اللوشن، والبشرة بتمتص اللوشن أسرع من الكريم.
هاى يا ريهام منوره بص وطل
هاى يا ريهام منوره بص وطل واموره ما شاء الله لو سمحت يا ريهام ممكن تقولنا على ماركات وكويسه ولو سمحت بالاسعار.
===========
رد بص وطل:
ميرسي جدا ليكي يا منه، وأكيد إنتي الأجمل، وإن شاء الله الحلقة الجاية هنتكلم عن أفضل درجات الميك اب.
hi reham thx 3la ur
hi reham thx 3la ur information kont 3yza as2lk ana bashrty dohnya awy w ba7b l ko7l w byse7 3la tol a3ml ayaret te2oly tare2a a5leha msh yese7 w ana 3yza as2lk so2al ana 3ndy monsba 2ooryb w gbt fostan 2omsht tiger l heya brown w blck bs alblhs tar7a a w sandl a w eh make up monsb leha w ana bashrty fat7a thx
===========
رد بص وطل:
علشان الكحل مايسيحش لازم تحطي تحت عينيكي بودرة سايبة أو شادو باودر علشان يمتص الدهون اللي في الكحل ومايسيحش، وبالنسبة للطرحة والصندل ممكن تلبسيهم بني أو اسود، والطرحة ممكن تدخلي فيها البيج والبني علشان تفتح معاكي، والميك اب تدخلي فيه درجات البيج مع النحاسي والبني والدرجات دي هتليق جدا مع لون بشرتك.
أنا بشرتي قمحوية ولما احط
أنا بشرتي قمحوية ولما احط البودرة المائية بعد فترة وشى بيبقى أسود وغامق انا بحط البودرة المائية وبعديها البودرة السايبة لكن بيبقى بعد فترة وحش يا ريت تقولي لى ايه الحل وبسرعة عشان عندي معاد وعايزة ابقى حلوة أوي في اليوم ده وميرسى يا قمر.
==============
رد بص وطل:
أنا مش بافضل خالص استخدام البودرة المائية، وأحسن طريقة إنك توزعي كريم أساس بدرجة مناسبة للون بشرتك، وبعد كده تثبتيه بالبودرة السايبة واللي يفضل إنها تكون بدرجة شفافة.
تسلمى يا ريرى يا رب انا كنت
تسلمى يا ريرى يا رب انا كنت عايزاكى تقولي لى على مكياج اقدر احطه بالنهار؟
انا بيضاء ومحجبة وبحب جدا الألوان الفاتحة ووشي بيضاوي.
===========
رد بص وطل:
يا ريت تتفرجي على الفيديو يا شيمو وهتلاقي فيه خطوات لماكياج النهار بالتفصيل ونصايح علشان تقدري تعملي ماكياج كويس لفترة النهار.
انا عندي فرح بعد اسبوعين ووشي
انا عندي فرح بعد اسبوعين ووشي بايز خالص من الحبوب ومسمر خالص ومش عارفه اجيب جنين القمح ممكن كريمات او ماسكات.
===========
رد بص وطل:
الأفضل إنك تستشيري دكتور أمراض جلدية متخصص علشان يديكي العلاج المناسب على حسب طبيعة بشرتك ونوع الحبوب، وبالنسبة لجنين القمح ممكن تلاقيه في أكشاك وزارة الزراعة أو من كلية الزراعة.
جميل اوى وقد ايه بسيط جدا كان
جميل اوى وقد ايه بسيط جدا كان نفسى اتعلم الافكار الجميله دى من زمان ولو سمحتى ممكن تعلمينى ازاى وانا عروسه الف طرحه بسيطه وانا بقابل ضيوفى وازاى اغير من تسريحة شعرى باشكال بسيطه ومختلفه وشكرا حبيبتى
===========
رد بص وطل:
ميرسي يا سلما وبجد أنا مبسوطة إني اللي بقدمه بيعجبكم وأتمنى إنه ينال إعجابكم دايما، وإن شاء الله في الحلقات اللي جاية هقدم لكم بعض الأفكار البسيطة لربطات الطرح.
جميل اوى اوى الميك اب بتاعك
جميل اوى اوى الميك اب بتاعك هادى وعاجبنى اوى وياريت تقولي لى ماركه كونسيلر كويسه علشان الهالات السودا بورجوا كويسة ولا فيه أحسن؟؟
===========
رد بص وطل:
إن شاء الله الحلقة الجاية هنتكلم عن أفضل ماركات الماكياج، تابعينا ومتنسيش تقولي لنا رايك.
عايزة اسم صن بلوك
عايزة اسم صن بلوك كويس.
============
رد بص وطل:
من أحسن انواع الصن بلوك هي بايوديرما.
ريمو انتى بجد very nice مفيش
ريمو انتى بجد very nice مفيش كلمة بجد ممكن تشكرك على مجهودك اللى بتعمليه كنت عايزة اعرف أنا شعرى الزيت بينشفه وفى نفس الوقت انا كنت قلت لك انى عملت فرد ونفسى اعالجه ممكن بدل الزيوت كريمات وايه هي ماركتها وكمان دهن الآس انا مش لقيته خالص ممكن الاقيه فين بجد شكرا ليكى على كل حاجة.
=============
رد بص وطل:
ميرسي ليكي إنتي يا لامو على ذوقك وكلامك الجميل ده، وبالنسبة لشعرك فإنتي ممكن تعملي له حمام كريم، ومن أفضل الأنواع لوريال، أما بالنسبة لدهن الآس فده ممكن تلاقيه في محلات العطارة الكبيرة.
هاي.. انا كنت عايزه اسأل على
هاي.. انا كنت عايزه اسأل على شويه حاجات كده معلش انى هطول عليكى
بصى للون بشرتى انا ولا بيضه ولا سمره يعنى خمريه كنت عايزه اعرف ايه هى الالوان اللى ممكن تليق عليا فى المكياج عشان انا ان شاء الله ريحه جامعه وعايزه اعمل حاجه خفبفه يعنى قولى اجيب لون روج ايه واحمر الخدود وانا عينى واسعه اجيب الوان ايه وانا ممكن احط كحل ولا لا وانا وجهى طويل بس مش اوى قولى احمر الخدود احطه ازاى طريقه اللى تليق عليّ.
==========
رد بص وطل:
صديقتي العزيزة أفضل حاجة للبنت اللي بتروح الجامعة إنها تستخدم ألوان فاتحة وهادية، والبشرة الخمرية عامة بيليق عليها معظم الألوان، والكحل هيبقى حلو أوي معاكي سواء اسود أو ألوان، وبالنسبة للبلاشر يليق معاكي اللون الخوخي أو المشمشي، ويا ريت تتابعينا في الحلقات اللي الجاية علشان تعرفي اسرار الميك اب وإزاي توزعي البلاشر بالطريقة اللي تناسب شكل وشك.
هل البودرة السايبة هى اللوس
هل البودرة السايبة هى اللوس بودر؟
===========
رد بص وطل:
البودرة السايبة هي اللوس باودر.
هو ايه الفرق بين اللوس باودر
هو ايه الفرق بين اللوس باودر اللى حضرتك استخدمتيها هنا وبين البودرة المضغوطه والبودرة المائية؟
==========
رد بص وطل:
اللوس باودر دي بنستخدمها بعد كريم الأساس علشان تثبت الماكياج، أما البودرة المضغوطة فدي بنستخدمها لو عايزة تظبطي الماكياج وإنتي بره البيت، وكمان ممكن تستخدمي البودرة المضغوطة لوحدها من غير كريم أساس لأنها عبارة عن كريم أساس وبودرة مع بعض، أما البودرة المائية فأنا مش بافضل استخدامها خالص.
لو سمحتى عايزة ماركة فاونديشن
لو سمحتى عايزة ماركة فاونديشن و بودر و كونسيلر يكون نوعهم كويس و مش بيبانوا كأنهم طبيعى خالص اجيب ايه؟
============
رد بص وطل:
تابعينا يا هدى الحلقة الجاية علشان هنتكلم بالتفصيل عن افضل ماركات الميك اب اللي ممكن كل بنت تستخدمها، بس ما تنسيش تبعتي لنا رايك.
تسلم ايدك حلو اوى اوى اوى اوى
تسلم ايدك حلو اوى اوى اوى اوى اوى ولايت جدا بس هل في بديل للقلم البني لون تانى لان انا ساعات بحس ان لو لابسين على اسود صعب نحط بنى فإيه البديل والشادو بتاعه ايه وياريت تكتبي لى اسم درجة البلاشر ونوعه.
===========
رد بص وطل:
الكحل البني بيبقى مناسب جدا للنهار حتى لو لابسة على أسود، وممكن تحطي كحل أسود عادي، وفي الحلقة الجاية إن شاء الله هنتكلم عن أحسن ماركات الماكياج.
شكرا لمجهودك جداااا بس انا
شكرا لمجهودك جداااا بس انا سمعت عن ماركات ماك اب معروفة وغالية فيها رصاص ياريت تقولي لنا حاجة للاستخدام اليومي واحنا متطمنين.
===========
رد بص وطل:
إن شاء الله الحلقة الجاية هتلاقي فيها كل اللي إنتي عايزاه، ويا ريت تبعتوا لنا دايما رايكم واقتراحاتكم للحلقات اللي محتاجين إننا نقدمها لكم.
انتى عسوله اوى ورقيقه ما شاء
انتى عسوله اوى ورقيقه ما شاء الله ومنوره بص وطل
عندى سؤال بخصوص انواع الميك اب آب لو سمحتى لانى مش بستعمل ميك آب خااااااااالص بس عندى هالات سوده وعايزه نوع كونسيلر كويس جدا يخفيها وفى نفس الوقت مش تزيد وياريت كمان ماركة ماسكرا نضيفه وميرسى اوى وياريت الرد سريعا :)
==============
رد بص وطل:
ميرسي جدا يا جهاد على ذوقك وعلى كلامك الجميل، وإن شاء الله الحلقة الجاية أوعدك إني هتكلم فيها عن ماركات الميك اب الكويسة والمضمونة للاستخدام.
انا معجبة جدا بريهام وبكل
انا معجبة جدا بريهام وبكل ماكياجاتها بجد روعه
المشكلة بقي إني عمري ما حطيت
المشكلة بقي إني عمري ما حطيت حاجه زياده عن الكحل والماسكرا ومش فاهمه اي حاجه في اي حاجه
===========
رد بص وطل:
طيب يا ريت تتابعي حلقاتنا وفي كل مرة إن شاء الله هتتعلمي حاجة جديدة وسر من أسرار ميك اب المحترفين.
أشكرك يا رهومة يا تحفة عايزة
أشكرك يا رهومة يا تحفة عايزة أشاهد الكثير من برامجك أعمل أيه؟
===========
رد بص وطل:
شكرا ليكي إنتي يا قمر على اهتمامك، وتقدري تتابعيني على لينك قمر 14 على بص وطل كل يوم أربعاء، هقدم لكم حلقات عن الميك اب والموضة وكل حاجة تهمك لجمالك.
تسلمى يا قمر على الحلقة
تسلمى يا قمر على الحلقة الحلوة دى حلوة اوووى الحلقة بس ياريت تكلمينا على احسن ماركات الميك اب ،وايه الانواع اللى ممكن تناسب البشرة الدهنية ...وايه رأيك فى الميك اب بتاع اوريفلام
===========
رد بص وطل:
إن شاء الله الحلقة الجاية هتلاقي فيها كل اللي إنتي عايزاه، ويا ريت تبعتوا لنا دايما رايكم واقتراحاتكم للحلقات اللي محتاجين إننا نقدمها لكم.
ازيك يا ريهام.. عندى سؤال هو
ازيك يا ريهام.. عندى سؤال هو البيز لما احطه بحطه ع كل وشى وكمان تحت العين ولا ابعد عن المنطقة دي.. ياريت تردي وكمان عاوزة رقم تليقونك... ميرسي.
===========
رد بص وطل:
البيز ممكن تحطيه على كل الوش حتى منطقة العينين.
ازيك يا ريهام عايزة اعرف لو
ازيك يا ريهام عايزة اعرف لو انا بحط صن بلوك الصبح السائل احط علية ميكب ازاى ابدا بالفوندشن و لا البودر.
=========
رد بص وطل:
الأفضل إنك تحطي الصن بلوك، وتستني لمدة 10 دقايق أو ربع ساعة لغاية ما البشرة تمتصه كويس، وبعد كده تحطي كريم الاساس وعليه توزعي البودرة السايبة.
