مع جو الصيف اللي كله انطلاق وحيوية، وخروجات ومصايف، كلنا بنفضّل نلبس الأحذية الخفيفة المفتوحة؛ علشان تتناسب مع الجو ده؛ لكن لازم ناخد بالنا إن تعرّض القدمين لأشعة الشمس القوية ممكن يكون سبب في الإصابة بسرطان الجلد، وده اللي حذّرت منه ربيكا تينج، مديرة قسم الأمراض الجلدية بالمركز الطبي لجامعة ليولا بشيكاغو.
وأكّدت أن معظم حالات سرطان الجلد تحدث في أجزاء الجسم التي تتعرض للشمس بشكل متكرر، وأن المشكلة في الأحذية المفتوحة التي نلبسها أنها تترك القدمين معرّضتين للشمس بشكل كبير؛ لأن مخاطر الإصابة بسرطان الجلد في المنطقة دي كبيرة.
مش بس القدمين بتكون معرّضة للشمس بشكل كبير؛ لكن كمان كفّ الإيد، والذراعين؛ خاصة لو كنا بنسوق، علشان كده يُنصح دايما بارتداء القفازات لو بنتعرض للشمس لفترة طويلة جدا، وكمان الملابس القطنية الفاتحة هي أنسب اختيار لملابس الصباح؛ خاصة لو كان شغلنا بيتطلب مننا التعرّض للشمس لفترة طويلة.
وتنصح تينج للحماية من سرطان الجلد، بتجنّب التعرّض للأشعة فوق البنفسجية، واستخدام كريمات الحماية من الشمس كل يوم، واللي لازم نوزعها على كل الأماكن المعرّضة للشمس من جسمنا، والابتعاد عن الشمس بين الساعة العاشرة صباحًا والثالثة عصرًا.
السلام عليكم ازيك يارانيا
السلام عليكم ازيك يارانيا اناكنت سمعت عن اسبراي البنج لتقليل الم نزع الشعر ممكن اعرف لو استخدمته ممكن يكون فيه ضرر انا مش متجوزه لسه ولو كويس ممكن تقولي لي علي نوع استخدمه حلو ولو وحش ممكن تقولي لي وصفه تقلل الالم شويه لو سمحتي تردي عليّ ضروري.
==========
رد بص وطل:
مفيش مشكلة خالص من استخدام البنج الموضعي، وهو مش ماركات زي الماكياج، لكن إنتي ممكن تروحي الصيدلية وتسألي عليه.
ما هي افضل انوع كريمات
ما هي افضل انوع كريمات الحمايه.
===========
رد بص وطل:
فيه أنواع وماركات كتيرة كويسة زي بايوديرما وديور ولونا ولكن اختيار النوع المناسب بيتحدد على حسب نوع بشرتك.
انا مالقيتش صن بلوك بايوديرما
انا مالقيتش صن بلوك بايوديرما في المحلات قالوا لي مغشوش ولقيت صن بلوك اسمهuriage - spf 90 ارجوكي قولي لي كويس واستخدمه ولا ايه وياريت تشرحي لنا ازاي نعرف إن نوع الصن بلوك كويس ولا لا أرجو الرد سريعا بلييييييييييز وشكرا ليكي يا قمر.
============
رد بص وطل:
صن بلوك بايوديرما موجود في الصيدليات الكبيرة زي سيف والعزبي تقدري تشتريه من هناك وإنتي واثقة إنه اصلي، والنوع التاني اللي قولتي عليه كمان كويس.
ايه احسن نوع صن بلوك لو
ايه احسن نوع صن بلوك لو سمحتي
=============
رد بص وطل:
فيه أنواع كتير كويسة من الصن بلوك ومن أفضل الأنواع هي بايوديرما.
طيب ايه احسن كريم لتفتيح
طيب ايه احسن كريم لتفتيح الجسم لأن كف ايدى غامق عن جسمى وعايزه حاجه يكون ليها تأثير سريع وقوى.
============
رد بص وطل:
فيه ماسكات طبيعية كتيرة ممكن تجربيها زي خليط الجلسرين وعصير الليمون، وبتخلطيهم بحيث إن كمية عصير الليمون تكون أكثر بحوالي الربع من الجلسرين، لأن الجلسرين من الحاجات اللي لو استخدمناها لوحدها هتسمّر البشرة.
النقاب هو الحل وخير وقاية
النقاب هو الحل وخير وقاية وطاعة لله
ايه رأي حضرتك في كريم نيفيا
ايه رأي حضرتك في كريم نيفيا للحماية من الشمس.
=========
رد بص وطل:
كريم نيفيا كويس، لكن ممكن تستخدمي كمان بايوديرما.
ربنا يستر .... انا كل
ربنا يستر .... انا كل البالرينات بتعتى مفتوحه لدرجة ان رجلى عاملة نصين نص ابيض و ده الجزء المتغطى و نص غامق و ده المكشوف
