مع رانيا.. الروتين اليومي لتنظيف وتفتيح البشرة
أهلا بكل بنات "قمر 14"، النهارده حلقتنا هنرد فيها على إيميلاتكم وأسئلتكم، وهنعرف مع بعض روتين لتنظيف البشرة وترطيبها من الماسكات اللي قدّمناها.
أهلا بكل بنات “قمر 14“..
النهارده في حلقتنا هجاوب على إيميلاتكم وأسئلتكم..
وهنعرف مع بعض روتين تنظيف وترطيب البشرة..
وإزاي نستخدم في الروتين ده الماسكات والصابون اللي قدّمناهم.
هنتكلّم النهارده عن كل أنواع البشرة، وعايزة أقول لكم إن فيه مواد بتُعمم على كل أنواع البشرة؛ زي ماسك الزبادي والعسل، بس ناخد بالنا إن البشرة الحسّاسة ما نزوّدش معاها العسل، كمان مية الورد والخيار من الحاجات اللي بتمشي مع كل البشرات.
دلوقتي هنعرف الروتين اللي هنمشي عليه من الحاجات الطبيعية، بس أهم حاجة إننا لو هنستخدم الماسكات الطبيعية يبقى ما ينفعش ندخّل معاها منظفات من أي شركة؛ لأن كل شركة بيكون لها هدف من المنظفات اللي بتقدّمها، وما ينفعش نخلط معاها ماسكات طبيعية خارجية.
- أوّل حاجة هنغسل وشنا بالصابون: بالنسبة للبشرة الدهنية والمركبة هتستخدم صابونة لمبادا أو أدورا زي ما قلنا قبل كده، أما بالنسبة للبشرة الجافة أو العادية أو الحسّاسة هنستخدم صابونة يكون فيها كريم مرطب أو زيوت طبيعية؛ زي صابون بزيت الزيتون أو بزيت اللوز أو بزيت الجوجوبا، وممكن نستخدم صابون دوف بالكريم.
- بعد كده هنحط مية الورد: ودي بتليق على كل أنواع البشرة.
- بعد كده هنحط مرطب للبشرة: وده لازم نفرق فيه بين لو هنخرج أو لأ؛ يعني لو خارجين ما ينفعش نحط زيت ونخرج بيه، لكن هنحط صن بلوك بدرجة حماية 100%، وبعدين نحط لوس بودر خفيف، ونبدأ نحط الميك أب الهادي اللي يليق مع فترة الصبح.
أما لو مش خارجين ممكن نعمل ماسك الزبادي بالعسل، وده بيليق على كل أنواع البشرة ولو البشرة حساسة أو جافة بلاش نحط عليه ليمون، أما لو البشرة دهنية أو مركّبة هنحط عليه ليمون بس ما نتعرّضش بيه للشمس، ونسيب الماسك ساعة وبعدين نشطفه.
- وبعد كده هنحط أي زيت مرطب للبشرة: زي زيت اللوز الحلو أو زيت الزيتون، ولو السن فوق 35 يبقى هنحط زيت جوجوبا مع زيت جنين القمح بنسبة متساوية، ومع الزيت ممكن نخلط أي قطعة صغيرة كريم مرطب زي نيفيا سوفت أو كريم بالزبادي والعسل، وهنسيبهم طول اليوم، وده لأن الكريم بيساعد البشرة إنها تمتص الزيت.
لو عايزين نفتح بشرتنا يبقى هنمشي على نفس النظام بس هنستخدم صابونة تكون فيها نسبة طين؛ لأنها بتساعد على التفتيح، ونعمل ماسك الزبادي والعسل ونحط الزيت المرطب، وبالليل هنغسل وشنا ونعمل ماسك الأرز وحبة البركة اللي عملناه قبل كده ونسيبه ساعة، وبعدين نغسل وشنا ونحط نفس الزيت اللي حطناه الصبح.
أهم حاجة عايزة أقول لكم عليها إننا ما ينفعش نحط زيت أو الليمون ونتعرّض بيه للشمس أو الضوء أو البخار والنار لو هنطبخ، وممكن نستبدله بعصير الخيار.
لو عايزين مزيد من التفتيح أو لو فيه نمش في بشرتنا يبقى هنغسل وشنا، وبعدين نحط مية الورد، وبدل ماسك الزبادي والعسل هنعمل خليط من عصير الفجل وعصير الليمون وشرش اللبن الزبادي بمقادير متساوية، ونحطه في الثلاجة لمدة 48 ساعة، وبعدين نبدأ نحطّه على مكان البقع سواء الناتجة عن آثار حبوب أو نمش أو كلف، ونسيبه نصف ساعة وبعدين نشطفه، وبعد كده هنحط كمادات عصير خيار ونسيبها ساعة، وبعدين ندهن وشنا بزيت اللوز الحلو، بعد كده بالليل هنغسل وشنا بالصابون اللي بنستخدمه ونعمل ماسك الأرز وحبة البركة.
الروتين ده هنستمر عليه لمدة شهر ونشوف النتيجة، وإن شاء الله تبقى النتيجة كويسة.
من الحاجات المهمة اللي عايزة أقول لكم عليها إننا نستخدم الأسفنج الخفيف في سنفرة البشرة، وده بيكون رقيق على البشرة، وبيساعد على تقشيرها بشكل جيّد.
دلوقتي هجاوب على بعض أسئلتكم:
- أنا جبت كريم ليكوسيد وقرأت النشرة وقلقانة منه؟ وهل ممكن زوجي يستخدم نفس الكريمات؟
أنا عايزاكي تطمّني؛ لأن ده كريم طبي، وأنا متأكّدة من مدى صحته وجودته من أكثر من طبيب جلدي، وتقدري تستخدميه على مسئوليتي الشخصية، بس الأهم إنك تمشي على الترتيب اللي أنا قلت عليه مظبوط، وبالنسبة لزوجك ممكن يستخدمه بس ممكن ياخد معاه مدة أطول.
- أنا فرحي بعد شهر وعايزة أعرف إزاي أعمل إزالة للشعر؟ وعايزة ماسكات لتفتيح البشرة؟
ألف مبروك ليكي وربنا يتمم لك على خير، وهتلاقي في الحلقات اللي عملناها، حلقة كاملة عن روتين إزالة الشعر، وكمان الحاجات اللي نستخدمها بعد الإزالة علشان تقلل نمو الشعر وإن شاء الله تستفيدي منها، وبالنسبة لتفتيح البشرة تابعي الروتين اللي قلنا عليه في أول الحلقة وإن شاء الله يجيب النتيجة اللي إنتي عايزاها، بس أهم حاجة لازم تستمري عليه، ويكون عندك صبر؛ لأن الحاجات الطبيعية بتاخد وقت علشان النتيجة تبان.
أهم حاجة عايزة أكّد عليها إننا لازم نهتم بنفسنا من صغرنا، ومش لازم نستنى قبل الجواز بفترة صغيرة؛ لأننا مش هنلحق نظبط كل حاجة في فترة صغيرة.
كمان بالنسبة لمزيلات العرق بعد ما نستخدمهم لازم ناخد شاور قبل النوم، ونحط مكانهم كريم مرطب أو زيت زي زيت اللوز أو الزيتون أو ليمون بالجليسرين، وده من الحاجات الكويسة أوي للجسم كله.
من الحاجات المهمة كمان إننا بعد ما نرجع من بره لازم ننضف الحذاء، ونعطّره علشان يكون جاهز للبس مرة تانية.
حاجة كمان مهمة أوي وهي إننا نبخّر شعرنا علشان يعمل ريحة كويسة للشعر، خصوصا لو هتعملي ماسك من الماسكات اللي فيها توم.
وبكده تكون خلصت حلقتنا النهارده..
ونلتقي الحلقة الجاية إن شاء الله..
هارد فيها على كل أسئلتكم..
وهنكمّل كمان الروتين اليومي لتنظيف كل أنواع البشرة..
تابعونا،،،
*********************
للرجوع للحلقات السابقة
اضغط هنا “جمالك من الطبيعة مع رانيا”
*********************
